ANG PAHAYAG
kay Juan
Panimula
Ang Pahayag kay Juan ay isinulat noong kasalukuyang ang mga Cristiano ay inuusig dahil sa kanilang pananampalataya kay Jesu-Cristo bilang Panginoon. Ang pangunahing layunin ng sumulat ay palakasin ang loob at buhayin ang pag-asa ng mga sinusulatan niya, at payuhan sila na manatiling tapat kahit sa panahon ng paghihirap at pag-uusig.
Ang malaking bahagi ng aklat ay binubuo ng ilang pahayag at pangitain na inilalahad sa pamamagitan ng mga simbolo na nauunawaan ng mga Cristiano nang panahong iyon, subalit mananatiling mahiwaga sa iba. Tulad ng paksa ng isang tugtugin, ang paksa ng aklat na ito ay inuulit-ulit sa iba't ibang paraan sa pamamagitan ng iba't ibang pangitain. Kahit na marami at iba't iba ang kahulugang ibinigay sa mga nakasulat sa aklat na ito, ang pangunahing paksa ng aklat na ito ay malinaw. Sa pamamagitan ni Cristong Panginoon, lulupigin ng Diyos ang kanyang mga kaaway, kabilang na dito si Satanas. Gagantimpalaan ng Diyos ang kanyang tapat na mga anak ng bagong langit at bagong lupa kapag lubusan na siyang naghahari.
Nilalaman
Panimula 1:1-8
Pambungad na pangitain at mga sulat sa pitong iglesya 1:9–3:22
Ang Kasulatang nakarolyo na may pitong tatak 4:1–8:1
Ang pitong trumpeta 8:2–11:19
Ang dragon at ang dalawang halimaw 12:1–13:18
Iba't ibang pangitain 14:1–15:8
Ang pitong mangkok ng poot ng Diyos 16:1-21
Ang pagkawasak ng Babilonia at pagkatalo ng halimaw, ng huwad na propeta at ng diyablo 17:1–20:10
Ang huling paghuhukom 20:11-15
Ang bagong langit, ang bagong lupa at ang bagong Jerusalem 21:1–22:5
Pagwawakas 22:6-21
1
1 Ito ang pahayag ni Jesu-Cristo na ibinigay ng Diyos sa kanya at kanyang inihayag kay Juan na alipin niya, sa pamamagitan ng anghel na kanyang isinugo. Ang layunin ng paghahayag na ito'y ipakita sa mga alipin ng Diyos ang mga bagay na malapit nang maganap.
2 Pinatotohanan ni Juan ang lahat ng kanyang nakita. Ito ang kanyang patotoo tungkol sa mensahe ng Diyos at sa katotohanang ipinahayag ni Jesu-Cristo.
3 Pinagpala ang bumabasa ng aklat na ito, ang mga nakikinig sa propesiya nito, at tumutupad sa nasusulat dito! Sapagkat malapit na itong maganap.
Pagbati sa Pitong Iglesya
4 Mula kay Juan, para sa pitong iglesya sa lalawigan ng Asia.
Sumainyo nawa ang kagandahang-loob at kapayapaang mula sa Diyos na siyang nakaraan, kasalukuyan, at darating, mula sa pitong espiritung nasa harap ng kanyang trono,
5 at mula kay Jesu-Cristo, ang tapat na saksi, ang panganay sa mga binuhay mula sa kamatayan, at ang pinuno ng mga hari sa lupa.
Iniibig niya tayo, at sa pamamagitan ng kanyang dugo ay pinalaya niya tayo sa ating mga kasalanan.
6 Ginawa niya tayong isang kaharian ng mga pari upang maglingkod sa kanyang Diyos at Ama. Kay Jesu-Cristo ang kaluwalhatian at kapangyarihan magpakailanman! Amen.
7 Tingnan ninyo, dumarating siyang nasa mga alapaap at makikita siya ng lahat, pati ng mga tumusok sa kanya; tatangis ang lahat ng lipi sa lupa dahil sa kanya. Magkagayon nawa. Amen.
8 “Ako ang Alpha at ang Omega,” sabi ng Panginoong Diyos na Makapangyarihan sa lahat, ang kasalukuyan, nakaraan, at darating.
Isang Pangitain tungkol kay Cristo
9 Ako'y si Juan, ang inyong kapatid at kasama sa kapighatian at pagtitiis na nararanasan ng mga kabilang sa kanyang kaharian dahil sa pakikipag-isa kay Jesus. Noon ako'y nasa isla ng Patmos sapagkat ipinangaral ko ang salita ng Diyos at nagpatotoo ako para kay Jesus.
10 Noon ay araw ng Panginoon, at habang nasa ilalim ako ng kapangyarihan ng Espiritu, narinig ko mula sa aking likuran ang isang malakas na tinig na parang tunog ng trumpeta.
11 Sabi niya, “Isulat mo sa isang aklat ang iyong nakita, at ipadala mo ito sa pitong iglesya: sa Efeso, Esmirna, Pergamo, Tiatira, Sardis, Filadelfia at Laodicea.”
12 Lumingon ako upang tingnan ang nagsasalita, at nakakita ako ng pitong ilawang ginto.
13 Nakatayo sa gitna ng mga ilawan ang isang parang anak ng tao na nakasuot ng mahabang damit, at may gintong pamigkis sa kanyang dibdib.
14 Ang kanyang ulo at buhok ay kasimputi ng balahibo ng tupa o ng niyebe, at ang kanyang mga mata'y parang apoy na nagliliyab.
15 Kumikinang ang kanyang mga paa na parang tansong pinakintab, at parang rumaragasang tubig ang kanyang tinig.
16 May hawak siyang pitong bituin sa kanang kamay, at lumabas sa kanyang bibig ang isang matalas na tabak na sa magkabila'y may talim. Ang kanyang mukha ay nakakasilaw tulad ng araw sa katanghaliang-tapat.
17 Pagkakita ko sa kanya, para akong patay na bumagsak sa kanyang paanan, ngunit ipinatong niya sa akin ang kanyang kanang kamay at sinabi, “Huwag kang matakot! Ako ang simula at ang wakas,
18 at ang nabubuhay! Namatay ako ngunit tingnan mo, ako'y buháy ngayon at mananatiling buháy magpakailanman. Hawak ko ang mga susi ng kamatayan at ng daigdig ng mga patay.
19 Kaya't isulat mo ang iyong nakikita, ang nangyayari ngayon at ang mangyayari pa pagkatapos nito.
20 Tungkol naman sa hiwaga ng pitong bituing hawak ko sa aking kanang kamay at sa pitong ilawang ginto: ang pitong bituin ay ang mga anghel ng pitong iglesya at ang pitong ilawang ginto ay ang pitong iglesya.