3
Oj ralkꞌoꞌal ri Dios
1 Chꞌobꞌo pe alaq puwi ri saqil rutzil ukꞌuꞌx ri Qaqaw Dios, ma lik kꞌax kojunaꞌo y uyaꞌom ri kabꞌiꞌx chiqe oj ralkꞌoꞌal Rire. E uwariꞌche ri winaq e kꞌo che ruwachulew, ri kꞌamajaꞌ kakikoj rubꞌiꞌ ri Jesús, na ketaꞌam taj oj china riꞌoj chwach ri Dios, ma rike na ketaꞌam ta uwach Rire.
2 Hermanos, woꞌora oj chi ralkꞌoꞌal ri Dios, tobꞌ kꞌamajaꞌ kaqꞌalajinik saꞌ ri kojuꞌana chiqawach apanoq. Pero qetaꞌam kꞌut echiriꞌ kaqꞌalajin uwach ri Qanimajawal Jesucristo, kojuꞌana jelaꞌ pachaꞌ Rire, ma kaqilo y kaqetaꞌmaj kꞌu uwach chi utz.
3 Janipa ri kubꞌul pan kikꞌuꞌx che waꞌ, kakichomaj ri kibꞌinik kisilabꞌik chikibꞌil kibꞌ chaꞌ kuꞌana jelaꞌ pachaꞌ ruchomal rubꞌinik ri Qanimajawal.
4 Janipa kꞌu ri kemakunik e kakipalajij Rutzij Upixabꞌ ri Dios, ma ri mak e rupalajixik Rutzij Upixabꞌ ri Dios.
5 Etaꞌam chi kꞌu alaq, ri Qanimajawal Jesucristo xkꞌunik re kojresaj puqꞌabꞌ ri mak yey Rire na jinta kꞌana umak.
6 Janipa kꞌu ri kiꞌanom xa jun rukꞌ ri Qanimajawal Jesucristo, riꞌ na kakiya ta chi kibꞌ che uꞌanik ri mak. Yey janipa ri kiyaꞌom kibꞌ che uꞌanik ri mak, riꞌ na kakimaj ta usukꞌ china ri Cristo y na ketaꞌam tane uwach.
7 Alaq walkꞌoꞌal chupa rubꞌiꞌ ri Dios, makꞌo masokow e alaq. Ma e junoq katajin che uꞌanik ri utz, riꞌ jusukꞌ rubꞌinik usilabꞌik jelaꞌ pachaꞌ rubꞌinik ri Qanimajawal Jesucristo lik jusukꞌ.
8 E junoq kꞌa kꞌo pa mak, riꞌ re ritzel winaq, ma ritzel winaq lik rewi aj mak chwi xjeqiꞌ lo ruwachulew. Ruma ne kꞌu waꞌ xkꞌun Rukꞌajol ri Dios chaꞌ koluꞌsacha uwach janipa ri uꞌanom ritzel winaq.
9 Yey ri uꞌanom chi ralkꞌoꞌal ri Dios, na kuya ta ribꞌ che uꞌanik ri mak, ma ri Dios uyaꞌom chi jun kꞌakꞌ kꞌaslemal che. Ruma kꞌu riꞌ, na utz taj kꞌa kakꞌojiꞌ pa ri mak, ma uꞌanom chi ralkꞌoꞌal ri Dios.
10 Rukꞌ kꞌu riꞌ waꞌ, kaqꞌalajinik china taq ri e ralkꞌoꞌal ri Dios yey kaqꞌalajinik e china taq ri e ralkꞌoꞌal ritzel winaq. Ma e junoq na kuꞌan ta ri jusukꞌ yey na kꞌax tane kunaꞌ ri ratz-uchaqꞌ, riꞌ na ralkꞌoꞌal ta ri Dios.
Kꞌax qanaꞌa qibꞌ chinima qonoje
11 E tzij waꞌ xex chi tom wi lo alaq: Kꞌax qanaꞌa qibꞌ chinima qonoje.
12 Maqaꞌan qeꞌoj pachaꞌ ri xuꞌan ri Caín, ma rire e re ritzel winaq y ruma riꞌ xukamisaj ruchaqꞌ. ¿Suꞌbꞌe xukamisaj? Ma e taq ri xuꞌan ri Abel lik jusukꞌ chwach ri Dios; noꞌj e taq ri xuꞌan rire na chom ta uwach.
13 Alaq nu hermanos, makam animaꞌ alaq che we ri na ketaꞌam ta uwach ri Dios tzel kakil alaq.
14 Riꞌoj qetaꞌam ojelinaq chi lo chupa ri bꞌe re ri kamik yey woꞌora oj kꞌo chi chupa ri bꞌe re ri kꞌaslemal, ma kꞌax keqanaꞌ ri qa hermanos. Noꞌj e junoq na kꞌax ta kunaꞌ ru hermano, riꞌ kꞌa kꞌo chupa ri bꞌe re ri kamik.
15 Ekꞌu junoq tzel karil ru hermano, riꞌ kamisanel chwach ri Dios; yey etaꞌam alaq, e juna kamisanel na taqal ta che kayaꞌiꞌ ukꞌaslemal na jinta utaqexik.
16 Riꞌoj qamajom usukꞌ saꞌ ri saqil rutzil kꞌuꞌxaj, ma ri Jesús xukꞌut waꞌ chiqe echiriꞌ xuya ribꞌ pa kamik quma riꞌoj. Jekꞌuriꞌlaꞌ, riꞌoj chirajawaxik wi kaqaya qanimaꞌ che kitoꞌik ri qa hermanos tobꞌ ne ruma waꞌ kojkamisaxik.
17 Yey we kꞌo junoq lik kꞌo ubꞌitaq re y karilo kꞌo kajawax che ri ratz-uchaqꞌ, pero na kajuchꞌ kaꞌn ta pa ranimaꞌ, ¿kꞌo nebꞌa rutzil ukꞌuꞌx ri Dios riꞌ pa ranimaꞌ? Na jintaj.
18 Alaq walkꞌoꞌal chupa rubꞌiꞌ ri Dios, na xa ta kaqabꞌiꞌij rukꞌ uwa qeꞌ kꞌax kaqanaꞌ qibꞌ, ma ri lik chirajawaxik wi e kaqꞌalajin ri rutzil qakꞌuꞌx rukꞌ taq ri utz kaqaꞌano.
19 We ekꞌu kaqaꞌan waꞌ, kaqꞌalajinik oj re ri Qꞌijsaq yey kaqanaꞌ kꞌu riꞌ lik utz qaꞌanom chwach ri Dios.
20 Tobꞌ kꞌu kaqanaꞌ chiqakꞌuꞌx kꞌo ri na utz taj qaꞌanom, na rukꞌ ta kꞌu riꞌ, ri kubꞌiꞌij ri Dios e más kꞌo uwach chwa ri kubꞌiꞌij ri qanimaꞌ, ma ri Dios lik retaꞌam ronoje.
21 Hermanos, we kaqanaꞌ chiqakꞌuꞌx na oj jinta pa mak, kꞌo ukowil qakꞌuꞌx riꞌ chwach ri Dios.
22 Yey we kꞌo kaqatzꞌonoj che, Rire kuya na chiqe, ma e kojtajin che uꞌanikil ri kubꞌiꞌij Rutzij Upixabꞌ y e kaqaꞌan ri kukꞌul ukꞌuꞌx Rire.
23 Ekꞌu utaqanik waꞌ chiqe: Qakojo rubꞌiꞌ ri Jesucristo, Rukꞌajol ri Dios, yey kꞌax qanaꞌa qibꞌ chiqawach jelaꞌ pachaꞌ ri xojutaq Rire che uꞌanik.
24 E junoq katajin che uꞌanik ri kubꞌiꞌij Rutzij Upixabꞌ ri Dios, riꞌ puqꞌabꞌ ri Dios kꞌowi y ri Dios jeqel pa ranimaꞌ. Ruma kꞌu ri Ruxlabꞌixel uyaꞌom ri Dios chiqe, lik qetaꞌam Rire jeqel pa qanimaꞌ.