27
1 Kashin wi warukatjak tusam nekachu asam: Wikia kashin nunaka turatatjai tuuka nintimraip
2 Amek anenmamsam: Wikia pengke aintsuitjai tiip. Antsu chikich aints ainau turutiarti tita.
3 Kaya ainau tura yaikmisha meram asar, aints ainauka nuna entsakaramtai itit awajsartin ainawai.
Tura netse kajetirisha aints ainaun nuna nangkamasarang itit awajsartin ainawai.
4 Aintsu kajetirisha aints ainaun mesrartin ainawai. Tura aints nuwan kasmatina nunasha ¿yáki atsantrat?
5 Aints ainaun chichaman uutsuk chicharkatniuka niin uukar aneetniunka nangkamasang pengkeraitai.
6 Ii amikri iin anenmau asa, paan chichartamak: Ame turame nuka paseetai turama nuka pengkeraitai. Antsu ii nemase anangmak: Ameka pengke aintsuitme tayat ¿nekasash taj? tusam nekaachminuitme.
7 Aints tutuaruka wapasa yumirincha nakitawai. Tura aints yaparak pujus,
yapaunasha yuwayat, yuminua nunisketai tusa nekapratnuitai.
8 Chingki ni pasungkenia jiinki yaja weawa nuka aints ni nungkenia jiinki wekaakini wajawa nunisketai.
9 Kungkutin ukatmamkar pengker awajmamsartinuitji. Turasha ii amikri iin chichartaminak:
Pengker pujusatasam wakerakmeka tu pujusta tina nuka ii nintincha kiakatmartin ainawai.
10 Amikrumsha tura aparmi amikrisha pengke ukukiip. Tura itiurkachminnum pujakmeka yachimi jeenka weep. Ii irutkamuri arakchichu pujuina nuka ii yachi arak puja nuna nangkamasarang kakarmachu iin yaingkratin ainawai.
11 Uchiru, nekau ata. Turakmeka waramtikrustinuitme. Tura asakmin
wina pase chichartin ainaunka natsamtsuk aimkatnuitjai.
12 Aints nintipkia nuka itiurkachminiun wainak ayamrumaktinuitai.
Antsu aints nintimchauka iturkachminiun waintsuk wait wajaktinnum wetinuitai.
13 Aints nekashtai tumashmamtai, chikich aints: Wi akimiakatatjai tamatikia, nuna wejmakrin aitkam,
jurukim ukusta.
14 Aints kashik ni amikri jeen we kakaram untsumak: ¿Tsawaarumek? tamataikia,
nuka itit awajtustas tatsuash tu nintimratnuitai.
15 Nuwa jiyakratnuka kinta yumi tsawaamunam makis kitiak itit awajkartinua tumawaitai.
16 ¿Nasengka metatniukai? ¿Tura uwejjai asaitisha achikminkai? Atsa.
Turasha nu nuwa jangkenka pengke metachminuitai.
17 Aints ainau jirun chikich jirujai tsakatin ainawai.
Turasha jimiar aints mai nuwamtak chichasar pujusar yainikiartin ainawai.
18 Aints arakan araak pengker wainua nuka nerencha yuatnuitai.
Tura ni juuntrincha pengker wainua nuka niincha pengker awajsartin ainawai.
19 Aints ainau ni yapiin entsanam paan wainu wenawa nunisarang aints anturnaikiar
itiur nintimina nunasha paan nekaamawartin ainawai.
20 Aints ainauka mash jakartin ainawai. Tura asaramtai iwiartainum tuke ukusartin ainawai.
Antsu aints ainau ni wakeramuringkia: Nuke ati tusar metachartin ainawai.
21 Aya kurik juwakat tusar, turasha aya jiruk juwakat tusar, kurisha tura jirusha pengkerashi tusar,
aints ainau jiinum tseerar, jiyamun sumin ainawai. Aints ainau chikich aintsun pachisar:
Warukuita tusar nekaatasar wakerinauka, aya chicharinak: Ameka pengker aintsuitme
tinu ainauka kakarmachu nekaamawartin ainawai.
22 Netse aintsun trigo neketainam engkeawar, nekea nekea awajinamaitiat tuke netsek juwaktinuitai.
23-24 Kuikiartin ainauka tukeka kuikiartinka wajasarchartin ainawai. Tura apu uchirisha tura tirangki ainausha tukeka apuka wajaschartin ainawai. Tura asaramtai ami tangkuram ainausha tenapkesam wainkata.
25-26 Muranmaya saak mash juukakmin, yamaram saak ataksha tsapaitnuitai. Turamtai uwija uree awaram, nuwa ainau ureen kutaminak entsartintrumin wantawartin ainawai.
Turinamtai chipu ainau surukam aja sumaktinuitme.
27 Tura amesha tura uchiram ainausha
tura amijai takakminak pujuinauka kapra muntsurin umurartin ainawai.