31
Apu Lemuela Chichame
1 Masanmaya apu Lemuel naartinu chichame ni nukuri nuiniarmia nuka juwaitai:
2 Uchiru, amin jerermiajme. Wi Yusen seamtai akiinamiame. Nuna nangkamasnak ¿warinak
titajak?
3 Uchiru, ami kakarmaram nuwanam ajapawaip. Warí, nuwa ainauka aintsu apuri pimpiru wajasti tusar mesratin ainawai.
4 Uchiru Lemuela, apu ainauka umuti nekas kariau aina nuna umurchartin ainawai.
5 Tuminamtai nampekar umiktin chichaman kajinmakiar ayamrumichu ainau wait wajainamtai, itiurchat awajkarai tusan tajame.
6 Aints pimpiru ainauka tura wake mesekaru ainauka umuti kariaun umurarti tusam tsangkatkata.
7 Nu aints ainauka nuna umurar ni yuumamurin tura ni wait wajakmaurincha kajinmakiartin ainawai.
8-9 Yamrumichu ainau tura yuuminak pujuinausha, tura kuikiartichu ainausha angkan pujusarti tusam
nu aints ainaun pachisam chichasta turasha yamrukta.
Nuwa pengkeran pachis nuikiartamu
10 ¿Nuwa nekas pengkera nuna yáki wainkat? Nu nuwa ainauka kaya ákik aina nuna nangkamasarang
timiá wakeruktinuitai.
11 Nu nuwa ainauka nekasar timiá pengker asaramtai, aishrisha niin pengker nintimtumasar pujuinawai. Tura asar kuikian tura wariri ainauncha nangkami ajaptsuk tenapkesar jeanam ukuinawai.
12 Turinamtai kintajai metek aishrin paseka awajtsuk pujuinau asaramtai, aishri ainau tuke pengker
awajsartin ainawai.
13 Nu nuwa ainauka uwija ureen sumakar, tura uruchnasha sumakar, tura kutamrar, kanetinam pujusar, tarachin najanin ainawai.
14 Nu nuwa ainauka asum asar, arakia yurumkan tura warinchu ainaun ikiaaninawai.
15 Tura tsawaatsaing nantakiar ni uchirin tura ni jeen pujuinauncha yuratin ainawai.
16 Tura aja pengkeran wainkaru asar, nuna sumakar arak ainaun arawartin ainawai.
17 Ni kunturi kakaram ainawai. Tura asaramtai kakaram takakminawai.
18 Tura waririn surukar, kuikian irumramun wainkar, warutmaita tusar nekainawai.
Tura kashisha lamparingkian ikianatsuk takakminawai.
19 Kashisha kutaminawai, turasha tarachin najanatin ainawai.
20 Tura kuikiartichu ainaun tura yuuminak pujuinauncha ni yuumamurin suwinawai.
21 Micha amataikia ni weari ainauka entsati uwija uren najanamun entsarinau asar
tsetseminatsui. Turinau asar warinak entsarat tusar nintimtsuk pujuinawai.
22 Tura sekmati ainaun ningki najaninawai.
Turasha kuikiartin entsarina nujai metek entsatin entsarartin ainawai.
23 Turinau asaramtai aishrisha yaktanam chichamrin aina nujai irunin
asaramtai, mash aints ainau: Nuna aishrintai tusar nekawartin ainawai.
24 Nu nuwa ainauka entsatai ainaun tura senta ainauncha najaninak tarachin surin ainamunam surinawai.
25 Tura kakaram asar, kashin wi warukatjak tusar nintiminatsui.
26 Chichainaksha paan nintimsar chichainawai. Tura wait anengkratin asar,
chikich ainaun nuikiartinak, yaitasar nuikiartin ainawai.
27 Tura ni jeen pujuinauka itiur pujuinawa tusar wainu weenawai.
Turasha takakmatskeka pujuschartin ainawai.
28-29 Ni uchiri ainau tura aishri ainausha niin pengker nintiminau asar nuwarin chicharinak:
aina nuka untsuri irunui. Antsu ameka mash nuwa ainau nangkamasmek timiá pengkeraitme tinawai.
30 Nuwa shiiram ainau anangmaminak: Wikia chikich nuwa ainaun nangkamasnak timiá shiirmaitjai
tumamina nuka nangkamiar tinawai. Antsu nuwa Apu Yusen umirkauka timiá pengkeraitai.
31 ¡Yaktanam pujuinautiram, mash nu nuwa ainaun pachisrum: Nekasar pengker ainawai titaram!
¡Tura ni turamurijai metek pengker awajsataram!
Maaketai.