103
David: Wikia tuke nintirjai Apurun maaketai titatjai timiauri
1 Wikia tuke nintirjai Apurun maaketai titatjai.
Ni naarin pachisan tuke:
Yus pengkeraitai titatjai.
2 Wikia tuke nintirjai Apurun maaketai titatjai.
Wina pengker awajtusmia nunaka pengké kajinmakchatnuitjai.
3 Ningki wina tunaarunka mash tsangkutrurtinuitai.
Tura wina najaimiamurun mash tsuwaaratnuitai.
4 Tura mengkakai tusa tuke uwemtikrurtinuitai.
Tura ni anengkratairijai tuke pengker awajtustinuitai.
5 Tura pengker aa nuna mash surustinuitai.
Tura juunmaran pujayatnak,
kukui yakí nanamina nunisnak kakaram wajastinuitjai.
6 Chikich aintsun pasé awajinamtaisha,
ii Yusri nekas tunaarinchau asa,
nu wait wajainaunka ayamruktinuitai.
7 Moisésnasha tura Israel ainautincha ni wakeramurin tura ni turamurincha nekamtikramamiaji.
8 Ii Yusri iin wait anentramji.
Tura asa wárikia kajechuitai.
Tura iincha nukap anenmaji.
9 Yuska iinka kintajai metekka paseetme turamtsuji,
tura asa tukeka kajertamkashtinuitji.
10 Iikia tunau arining,
wait anentramu asa,
iinka amutmakchamiaji.
Tura ii pasé turamurincha yapaijtamtsuk tsangkutramramiaji.
11 Yus ni umirkautinka tuke anenmaji.
Nayaim nangkatkamurisha atsau asamtai,
Yuse anengkratairingkia pengké nangkankashtinuitai.
12 Tura tsaa taakmau tsaa jeamujai pengké tsaningchamin aa nunisang Yuska atumi tunaaringkia pengké wainkashtinuitrume tusa yaja japrutmamiaji.
13-14 Yus iin itiur najanamiaja tusa paan nekawai.
Iinka nungka tsetseri najatmau asa,
aints ni uchirin wait anentawa nunisang Yus ni umirin ainautinka wait anentramaji.
15 Aintsu pujutri nupaaya tumawaitai.
Nupaa tsapai yangkurui.
16 Tura nase kakaram nasenmatai,
yangkurka mengkawai.
Tura tuning aya tusarsha aints kichkisha nekaacharminuitai.
17-18 Antsu ni chichamen kajinmatsuk umirinauka Yuse anengkratairi tuke nangkankashtinuitai tusar nekainawai.
Tura ni weari ainauncha Yus tuke wainkatnuitai.
19 Ii Yusri keemtairi nayaimpinam pujawai.
Tura nuni keemas mash nungkanmaya ainauncha inawai.
20 Yuse awemamuri timiá kakaram ainautiram Yuse chichamen tuke antukrum umirkau asaram ii Apuri ameketme juuntam titaram.
21 Yuse awemamuri ainautiram,
ni inatiri asaram,
tura ni wakeramuri umirkau asaram,
mash ii Apuri ameketme juuntam titaram.
22 Mash najanamu ainausha mash nungkanam pujuina nu ii Apurin ameketme pengkeram tiarti.
Wikia tuke nintirjai Apurun maaketai titatjai.
Nuke ati.