22
Anutu Yintsaꞌ Abraham Nanggan Muarutsan
1 Udzuf fain ifa sib raiyi, da Anutu yintsaꞌ Abraham nanggan muarutsan i tsanganda bida arangan atangꞌa warangꞌ i Arangan ma imaꞌ. Da inuꞌ arangan ibiani, “Abraham!”
Da Abraham itaga ruan da ini binaꞌ, “Dzi rumpai.”
2 Da Anutu ini, “Wau narunggam yampi bitsintaꞌ Isak aru u maram aridagin nidzun angu ugu da wafa intap Moria. Da wais arangan funub da watsara nasu dangki naba da Dzi namingꞌ mamai mangan Dzi bungꞌ asantingꞌ agu gin.”
3 Tataꞌ maratait mangan da Abraham yuriꞌ da idumpu gai maringꞌ taida nam tsaradan gin sib da idzur impruꞌ da nam bunump santan iyab dongki gan. Da iyu mamaꞌ guman iruꞌ impruꞌ da narunggan Isak da iyung i fada mumai aru Anutu ntuanga rutin sib ugu.
4 Iyung ifan isangꞌ gubuꞌ suda iruꞌ da bits da Abraham iraꞌ i maran da itsangan mamai igi ifa ruguntiꞌ.
5 Da ini da mamaꞌ guman iruꞌ igi, “Agam wampa ani wampruꞌ da dongki, da dzi bungꞌ arut mamaꞌ aruani nafan. Da aga naidzaꞌ fagangꞌ da natsara nam da Anutu sib i naga da aga natip aba.”
6 Abraham iyu gai maringꞌ taida nam tsaradan gin da irim da narunggan Isak ibuaringꞌ. Da Abraham runggan igif dzaf da mudzuk da impruꞌ ruan yunga fadan.
7 Ifan da Isak igut i raman, “Ramangꞌ?”
Da Abraham ini, “Yaꞌ, narungꞌ. Wani.”
Da Isak ini, “Dzaf da gai maringꞌ ani, da dumpa anungꞌ i tsaradan?”
8 Abraham ini narunggan nan gan mungaꞌ ibiani, “Narungꞌ, Anutu runggan bungꞌ atangin dumpa i tsaradan.” Da ribarangan impruꞌ ruan iyung ifan.
9 Gubuꞌ ribarangan fawaꞌa mumai Anutu nida rutin ugu, da Abraham yantungꞌ tauf tsarada nam in i nigi da irants gai maringꞌ iyabin. Da idzur narunggan Isak fagan da bangin sib da isintungꞌ iyab i gai maringꞌ wagungꞌ.
10 Da irim bangin ifan da iyu mudzuk i safa narunggan wan.
11 Da bitsintaꞌ Yawe angira gan inuꞌ arangan imingꞌ gunungun ini binaꞌ, “Abraham! Abraham!”
Da Abraham ini, “Hai. Dzi rumpai.”
12 Da angira ini, “Manang bangin mangan i mamaꞌ igi maꞌ. Aruani da dzi tsangan agu sib, u atangꞌ warangꞌ i Anutu, i u wagantsi narunggam yampi bitsintaꞌ aru u maram aridagin igi i dzi u.”
13 Abraham iraꞌ i maran da itaningꞌ da itsangan dumpa arapuꞌ bits, tsiapan abira i gai uts uts bangin atangꞌa i ruan rung muntidan. Arangan ifan da yis funub da itai isu nam tsaradan iyu narunggan Isak mumai gan.
14 Ibinigi da Abraham ifaringꞌ mumai arigi bingangan Yawe Runggan Irim. Da mingꞌa gubuꞌ aruani da rungꞌ ini, “Mingꞌa Yawe mamai gan da Runggan bungꞌ arim.”
15 Da Yawe angira gan itip inuꞌ Abraham imingꞌ gunungun
16 da ini, “Yawe ini ibiani, ‘U atangꞌ warangꞌ i Dzi nan nidzun angu da u wagantsi narunggam bitsintaꞌ aru u maram aridagin yusan igi i Dzi u. Ibinigi da dzi Yawe ini nan nidzun bingan da agu:
17 Dzi bungꞌ afinti agu nidzun angu da u yangin rusam nawaꞌ nasisungꞌ nasangꞌ ngantam narun mingꞌa wagungꞌ da nasangꞌ sasanuai mingꞌa uruts ringan. U yangin rusam bungꞌ adaru gan garam ipiapan rai da nasu wain i gan gampan.
18 Da mingꞌa u yangin rusam rururungan da Dzi bungꞌ afinti garam intap utup utup santan, i u atangꞌ warangꞌ nidzun angu i Dzi.’ ”
19 Ntsupa sib da Abraham irut narunggan itip iba da gan mamaꞌ guman, da impruꞌ ruan ifa Birsiba da impa nigi gubuꞌ guntiꞌ bingan.
Nahor Narun Rusan Nan Gan
20 Raiyi da rib fain iragi Abraham rainggan Nahor narun rusan rutin ibiani, “U rainggam Nahor fininggan Milka irim narun rusan binganggan ibiani:
21 mamaꞌ miamun Uts, da rainggan Buts, da Kemuel— Aram ramanggan,
22 Keset, Hatso, Pildas, Dzitraf da Betuel.”
23 Betuel isu Rebeka ramanggan. Milka, Abraham rainggan Nahor fininggan, irim Nahor narun rusan 8 igi.
24 Da sagat guman Reuma irim arangan narun rusan marub ibiani: Tiba, Gaham, Tahas da Maka.