40
Yosef Iragi King Garaman Iruꞌ Nanggan Puafuban Wainggan Wasi
1 Gubuꞌ fain ifa sib raiyi da king Idzip garam gudzunggan iruꞌrun, mangan mpada tayangꞌ garam tipa wain gurun da mangan mpada tayangꞌ garam taida bret, inang asub imingꞌ king maranggan.
2 King Farau nugun iruaꞌ nidzun i garam gudzunggan iruꞌ igi,
3 da irim i karabus imingꞌ garam singaari gudzunggan ungaran nanga gumin, aru Yosef mpada gin ugu.
4 Da garam singaari gudzunggan itangin Yosef i mpada tayangꞌ garam iruꞌ igi, da arangan impa tayangꞌ gin.
Mpada karabus igi gubuꞌ fain sib
5 da idziang mangan, da garam iruꞌ igi— garam mpada tayangꞌ king wain gurun gan ugu da garam mpada tayangꞌ king ungaran taida bret in ugu— iguruan puafuban. Da gan nanggan puafuban iruꞌ igi wainggan ruga rugan.
6 Da gubuꞌ Yosef batsanganda ribarangan da tataꞌ, da itsangan rib iruꞌ igi wangun ibarabin da maran nidzun imais wasi.
7 Da igutin, “Wain idzuwai da agam wangum ibarabin?”
8 Da rib iruꞌ igi ini da arangan ibiani, “Aga iruꞌ ani itsangan nam puafuban da idziang ugu. Da garam imaꞌ i dziwara i wainggan da agai.”
Da Yosef ini da garam iruꞌ igi ibiani, “Anutu runtaꞌ isu wain i dziwara i nam puafuban. Da agam wani agam nanggam puafuban agam tsangandan igi da dzi.”
9 Ibinigi da garam mpada tayangꞌ king wain gurun gan ifis i nanggan puafuban da Yosef ibiani, “Mingꞌa dzi nanggangꞌ puafuban da dzi tsangan bruꞌ wain mangan muntida dzi marangꞌ.
10 Bruꞌ wain igi bangin iruꞌ da bits. Gubuꞌ marasira puꞌan da gan maraburuaban ipuꞌ inting, da sung angu da ikap da idzub inting.
11 Dzi gif King Farau kapan da igangingꞌ wain nidzun dzuban igi gurun iruꞌ gin da irim da arangan.”
12 Yosef ini da arangan ibiani, “Nigi wainggan ibiani: bruꞌ wain bangin iruꞌ da bits igi iram iyab i gubuꞌ iruꞌ da bits.
13 Gubuꞌ iruꞌ da bits bungꞌ afa sib da king bungꞌ atip ayu agu sinungꞌ karabus da natangin agu i gam gumam. Da u bungꞌ atip arim kap wain gurun da king nabi aru u nangan da mungꞌ ugu.
14 Da gubuꞌ u mpada bini, da maram wafur dzi da wagaib dzi da wafis i dzi da king i rima dzi sib i uda dzi sinungꞌ karabus ani.
15 I miamun da garam iwap dzi angu imingꞌ garam Hibru intapan da iyu dzi iba ani. Da gubuꞌ dzi mpada ani, dzi wanang asub mangan u. Irim dzi utaꞌ angu yatangꞌ karabus.”
16 Gubuꞌ garam mpada tayangꞌ ungar taida bret in ringanta i Yosef ragida nam puafuban igi wainggan bini da ini da Yosef ibiani, “Dzi binigi. Dzi puafub da dzi tsanga dzi untuda bret tsitsuꞌ fir iru da bits tatagun i ruan mingꞌa dzi gudzungꞌ.
17 Tsitsuꞌ fir mingꞌa wagungꞌ igi fungꞌ i bret mara maran i king gadan, da bitsintaꞌ apu dzuf idzuf iruꞌ da igan.”
18 Da Yosef ini, “U nanggam puafuban igi wainggan ibiani: bret tsitsuꞌ fir iruꞌ da bits igi iram iyab i gubuꞌ iruꞌ da bits.
19 Gubuꞌ iruꞌ da bits ntsupa sib da king bungꞌ asaf u wam utap da narugu u nidzunggam nayab gai, da apu dzuf bungꞌ adzuf aruꞌ da naga agu sib.”
20 Da gubuꞌ iru da bits arigi da intuang king gubuꞌ gan rinanggan apingꞌa rutin da isu nam gadan tsiraꞌ angu i gan garam guman santan da irut impruꞌ ruan iga nam. Da ifa yu garam iruꞌ rima i karabus ugu iba munti i gan garam guman santan maranggan.
21 Da king ini da garam mpada tayangꞌ wain i tipa uda gan guman aru uda mungꞌ ugu,
22 da irugu garam mpada tayangꞌ ungar bret igi iyab gai mangan imingꞌ nam manaꞌ, yatsungꞌ nan Yosef ragida wasi da ribarangan ugu.
23 Da bitsintaꞌ garam mpada tayangꞌ king wain gan maran watip ifur Yosef u. Imaꞌ. Maran isamu Yosef nidzun angu.