43
Yosef Rain Rusan Irut Benyamin Ifa Idzip
Gubuꞌ mangits rumingꞌ isu mais nidzun angu imingꞌ intap Kanan. Ibinigi da gubuꞌ Yakop da gan utupan gada witan uda i Idzip badan ugu sib, da Yakop ini da narun rusan ibiani, “Agam watip wafan da warim nam ntsuman i suba agi nam gadan gangꞌ faꞌ.”
Da bitsintaꞌ Yuda ini da arangan, “Ramangꞌ. Garam gudzun tsiraꞌ aga ini nan riniurun da aga sib ibiani, ‘Dzi anungꞌ tsanganda agam nasangꞌ agam uda rainggam igi da ruta badan.’ Bida agu tanginda aga rainggangꞌ da agai i ruta fadan, da aga bungꞌ aruꞌ da nayu nam gadan i agu. Da bida u mamida tanginda arangan da agai da aga wasangꞌ i ruꞌan u, i garam gudzun tsiraꞌ ini da aga sib ibiani, ‘Dzi anungꞌ tsanganda agam nasangꞌ agam uda rainggam igi da ruta badan.’ ”
Da Israil igutin, “Ibi anungꞌ da agam yutus barabin igi da dzi i nidan da garam igi bida agam rainggam mangan rungꞌ impai?”
Ribarangan ini arangan nan gan mungaꞌ ibiani, “Garam igi igut aga rururungan angu i aga rib idzuwai da gangꞌ utupangꞌ impruꞌ, da ini, ‘Da agam ramanggam rungꞌ impai ma imaꞌ? Da agam arangan aru nigi ma agam rainggam bits rumpai?’ Igut i agai da aga kupis nan santan wasi. Da manga busruꞌgin ibi arangan nida aga uda rainggangꞌ igi tipa ruta fadan?”
Da Yuda ini da ramanggan Israil ini binaꞌ, “Watangin Benyamin ba da dzi da aga nafa sung angu, i agu da agai da aga narungꞌ rusangꞌ anungꞌ mampa i mangits u. Dzi runggangꞌ bungꞌ asu wain i mpada tayangꞌ arangan fadan da tipa badan da agu. Da bida dzi mamida uda arangan badan da batanginda i u maranggam, da dzi bungꞌ asu wain i barabin igi santan namingꞌ u maranggam nanting. 10 U damami muntida sib i agai da aga sangꞌ fadan da badan sangꞌa iruꞌrun da aruani sib.”
11 Ibinigi da ribarangan ramanggan Israil ini rutin ibiani, “Bidanigi da agam wanang wabiani: agam wafarangꞌ nam bini bini intap ani fain bida gai gurun gaunt bini da bigub gurun da asam da wasub wasub da gai nidzun pistasio da almon— nasu nam rima nugun tsiaꞌan da arangan. 12 Wayu silva ruampi nasangꞌ uda nam gadan faꞌ da tipa rima nam ntsuman ratar farangꞌa ragun i agam bekam ugu, i mabi maran masaꞌ gin. 13 Agam wau rainggam da wafa sung da garam tsiraꞌ igi. 14 Da Anutu Nampang Wain nanang garam tsiraꞌ igi uwayantan nawaꞌ bini i agam da natip atangin agam rainggam mangan ugu nampruꞌ da Benyamin narut agam natip aba da dzi. Da bida dzi waꞌa da wangu barabin tsiraꞌ igi i narungꞌ rusangꞌ mampa sib, da nawaꞌ nabi arigi.”
15 Ibinigi da ribarangan iyu nam bini riman da Yosef impruꞌ da silva ruampi da irut Benyamin iruꞌ gamp Idzip sung angu da ifamunti Yosef maranggan. 16 Gubuꞌ Yosef tsanganda Benyamin ruta ribarangan, da ini da garam guman mpada tayangꞌ arangan ungaran ibiani, “Wau garam tuas arani nafa dzi ungarangꞌ da wais apu mangan da watip nam gadan. I ribarangan bungꞌ arut dzi naga nam da gubuꞌ wasaꞌ.”
17 Garam igi yatsung Yosef nan gan nidan da iyu ribarangan ifa Yosef ungaran. 18 Da gubuꞌ uda ribarangan fada Yosef ungaran, da ribarangan irat da ini da ruan ibiani, “Arangan iyu agi iba ani i wain maruꞌ silva farangꞌa ruꞌa agi bek witangꞌ da gubuꞌ miamun agi badan ugu. Mani bungꞌ ampung agi da nais agi da nanang agi nasu garam gum utaꞌ da nau agi dongki gangꞌ sib.” 19 Ibinigi da ribarangan ifawaꞌ da Yosef garam guman i muantsi atangꞌa ungar wasaꞌ da ini rutin ibiani, 20 “O garam tsiraꞌ, miamun da aga ruꞌ ba Idzip da aga rim nam ntsuman i nam gadan. 21-22 Da bitsintaꞌ gubuꞌ aga fadan da fagingꞌa sanab da kiraꞌa bek nam gadan da aga tsanga silva gangꞌ suba nam gadan gin ugu rururungan mingꞌa bek nifun sangꞌa ruan santan. Aga wasruꞌ i manga farangꞌa silva igi ruꞌa aga bekangꞌ. Ibinigi da aga tip iyu silva santan iba. Da aga yu silva fain impruꞌ i tipa suba nam gadan faꞌ gin.”
23 Da arangan ini ribarangan nan gan mungaꞌ ini binaꞌ, “Nan imaꞌ gin. Agam anungꞌ ratan u. Agam da ramanggam Anutu gan runggan irim silva igi iruꞌ agam bekam. Dzi yu agam silva gam sib wa.” Da arangan ifa yu Simion iwaꞌ ba da ribarangan.
24 Garam gum iyu ribarangan yatangꞌ Yosef ungaran da irim mpui da ribarangan i adzuꞌa fagan gin, da irim nam gadan da ribarangan dongki gan. 25 Ribarangan iringant i nan sib ibi Yosef bungꞌ arut ribarangan naga nam da gubuꞌ wasaꞌ namingꞌ arangan ungaran, ibinigi da ribarangan itip ruan i nanggan riman da Yosef.
26 Gubuꞌ Yosef bada ungar, da ribarangan irim nanggan uda badan ugu da arangan, da yidzaꞌ fagan da itauf maran iruꞌ intap imingꞌ arangan maran. 27 Da arangan igut i ribarangan i nanggan mpadan impa ibi anungꞌ ida igut i ribarangan i ramanggan ibiani, “Agam ramanggam fufi nida da dzi ugu impa ibi anungꞌ? Arangan rumpai bini, ma?”
28 Da ribarangan ini, “Hai, garam tsiraꞌ. U garam gumam aga ramanggangꞌ rungꞌ impa bini angu.” Da itip itauf maran iruꞌ i tsarifa arangan. 29 Yosef irarab ribarangan da itsangan rainggan Benyamin, rinanggan wain narunggan, da igutin, “Mani agam rainggam isiꞌ agam nida da dzi ugu aruani, ma?” Da arangan ini, “Narungꞌ, Anutu nafinti agu.” 30 Tsanganda rainggan isiꞌ igi da maran igaib arangan nidzun angu da inang i rangan, da itangin rain ruas da isau mumai mangan i fa ranga gin. Arangan yatangꞌ ungar wasaꞌ gan da irang. 31 Irang sib da yadzuꞌ maran da iwaꞌ ba da ya-aba i ruan angu da ini, “Warim nam gadan.” 32 Rib igi irim Yosef nanggan gadan i mumai mangan da rain rusan gan i mumai mangan. Rib Idzip ruta Yosef mpadan ugu iga nam mumai mangan, i rib Idzip wasangꞌ i ruta rib Hibru mpruꞌa ruan gada nam u. I rib Idzip nanggan pumuꞌan da itsanga rib Hibru da nanggan gadan ibi nam bubumpuadan da ipaꞌ ruan gin. 33 Yosef itangin rain ruas igi impai irants ruan yatsungꞌ udzufan mingꞌa rain tsiraꞌ da fantsupa rain isiꞌ, da impai maran ifan da arangan. Da rain ruas irunt fafun da irarab ruan i mpada bida nigi. 34 Garam gum iyu nam gadan imingꞌ Yosef maran da irim da arangan rain rusan i gadan. Da bitsintaꞌ Benyamin nanggan gadan da irim isangꞌ garam 5 gan gadan. Ibinigi da ribarangan santan irut arangan impruꞌ ruan iga nam da inum wain iyus angu da nugun itsiaꞌ.