5
Yisu Itip Garam Fagan Agadan Bits Rinin Idaum Imingꞌ Mpui Fuꞌan Betesda
1 Raiyi da garam Yuda gubuꞌ gan mararam tsiraꞌ mangan iwaꞌ, da Yisu iyab gamp tsiraꞌ Yerusalem.
2 Da mingꞌa Yerusalem igi, mingꞌa uts da muantsi tsiraꞌ faringꞌa bida Dumpa Muantsi Gan, da mpui fuꞌ bits imingꞌ igi, faringꞌa mingꞌa nifu nan Hibru nida Betesda. Da ungar tsaparangꞌ 5 itsuafiꞌ sib.
3-4 Da mingꞌa ungar tsaparangꞌ tuas arigi da garam gingꞌa rinin utup tsiraꞌ bingan igingꞌ igi ibafan, maran gampaman da urun gruꞌa ruan da fagan mampan.
5 Da garam bits gingꞌa mpui fuꞌ Betesda ringampa igi igingꞌ rinin isangꞌ udzuf 38 sib.
6 Gubuꞌ Yisu tsanganda arangan rungꞌ gingꞌan da sruꞌa gin bida rinin gingꞌan igi uda arangan gubuꞌ guntiꞌ bingan da igutin ini binaꞌ, “U maram yari i u rininggam dauman?”
7 Garam gingꞌa rinin igi ini binaꞌ, “Garam tsiraꞌ, dzi gangꞌ mangan wampai i raꞌa i dzi da tanginda dzi ruꞌa mpui fuꞌan ani da gubuꞌ mpui suda dzaradziriang u, imaꞌ. Dzi runggangꞌ yintsaꞌ i raꞌa i ruangꞌ fada sung, da bitsintaꞌ garam mangan isu miamun i ruan i ruꞌa mpui mungꞌ.”
8 Ida Yisu ini da arangan, “Wauriꞌ wayab! Da wau rabiꞌ gam da wayung!”
9 Sung bingan angu da garam igi rinin idaum da iyu rabiꞌ gan da iyung.
Nam igi iwaꞌ da gubuꞌ Sabat rururungan.
10 Ibinigi da garam Yuda gudzun rusan ini da garam rinin dauman igi ini binaꞌ, “Gubuꞌ aruani gubuꞌ Sabat! Da Nan faidagin idzur nan sib i u anungꞌ apingꞌa rabiꞌ gam yungan u.”
11 Da bitsintaꞌ garam igi ini ribigi nifunggan mungꞌa ibiani, “Garam nanga dzi rininggangꞌ dauman ugu ini da dzi ibiani, ‘Wau rabiꞌ gam da wayung!’ ”
12 Da ribigi igut i arangan ini binaꞌ, “Garam idzuwai arigi ini da agu i u yuda rabiꞌ gam da yungan?”
13 Da bitsintaꞌ garam rinin dauman igi busau runggan angu i Yisu igi wai, i gubuꞌ aru Yisu tipa arangan da waꞌa bini sib ugu da garam utup tsiraꞌ bingan imunti isisungꞌ nigi sib da Yisu iwaꞌ sinungꞌ da ifan.
14 Raiyi da Yisu itip iwaꞌ da garam arangan imingꞌ Ungar Mararam ntiangꞌ gan wasaꞌ da ini rutin, “U tsangan! Agu rininggam idaum wa. Anungꞌ tipa nanga nam maisan u, i barabin tsiraꞌ yusan mawaꞌ da agu i.”
15 Da garam arangan ifan da ini da garam Yuda gudzun rusan i Yisu angu inang da arangan rininggan idaum.
Garam Narunggan Isu Nam Mpada Maran Taꞌan Wain
16 Ibinigi da garam Yuda gudzun rusan irim ipiap i Yisu i isa funub, i wain Arangan inang da itip garam rinin idaum da gubuꞌ Sabat.
17 Da bitsintaꞌ Yisu ini da ribarangan ibiani, “Dzi Ramanggangꞌ runang gan guman ibi arigi angu da gubuꞌ santan isangꞌ bawaꞌan da aruani, da dzi binigi inang gumangꞌ ibi arigi angu.”
18 Nan wain Yisu nidan igi inang ribigi nugun iruaꞌ nidzun angu da rungꞌ isau sanab i isa Arangan funub. Yisu anungꞌ yis sanab Sabat udziꞌ angu u, da bitsintaꞌ ini Ramanggan wain Anutu, i nanga runggan sangꞌa Anutu.
19 Ibinigi da Yisu ini ibiani, “Dzi nani nan nidzun bingan da agam! Narun anungꞌ isangꞌ nanga nam mangan i rugan maranggan furan u, imaꞌ. Arangan isangꞌ i nanga nam tsanganda mingꞌa nam Ramanggan nangan angu, i nam idzuwai Raman nangan, da Narun inang ibi arigi.
20 I Raman maran yari i Narun da isantingꞌ nam sib angu runggan musa nangan rutin. Da Arangan bungꞌ asantingꞌ Narun i nam tsiraꞌ bingan nayus nam tuas aru agam tsangandan igi, da agam bungꞌ arunt fafun da nagara bangim gin.
21 I sangꞌa Raman raꞌa i rib mampan da rima nam maran taꞌan rutin, da Narun nabinigi bungꞌ arim nam maran taꞌan da rib idzuwai arangan maran fura i rima rutin.
22 I Raman runggan anungꞌ iraru garam mangan u, imaꞌ. Itangin gum raruda garam santan igi sib ifa Narunggan banginggan.
23 Raman inang ibinigi i wain Arangan ini garam gar sib angu natsarif Narun nabi tsarifa Raman. Da manga mamida i tsarifa Narun, da arangan anungꞌ itsarif Raman aru tanginda Narun igi badan ugu u.
24 “Dzi nani nan nidzun bingan da agam! Garam ringanta i dzi nan gangꞌ da muarutsa Aru tanginda dzi badan ugu iwaꞌ da nam mpada ratar ntingan sib. Ribigi anungꞌ isangꞌ muntida nam rarudan wasaꞌ u, imaꞌ. Iwaꞌ sinungꞌ nam mampan sib da iwaꞌ da nam mpada ratar wain.
25 “Nan nidzun bingan dzi ni nidan da agam! Gubuꞌ mangan isu uts i waꞌan da ibawaꞌ sib, da garam mampan bungꞌ aringant i Anutu Narunggan nifun. Da rib ringanta gin bungꞌ ampa maran taꞌan.
26 I sangꞌa Raman runggan suda wain i nam mpada maran taꞌan, da irim nampang da Narun ibinigi i runggan suda wain i nam mpada maran taꞌan.
27 Da irim nampang da Arangan i raruda garam gar, i Narun igi Garam Narunggan.
28 “Agam anungꞌ runta fafun gin u! I gubuꞌ mangan bungꞌ abawaꞌ da garam gingꞌa garam badzab gampan ugu sib angu bungꞌ aringant i Narun igi nifunggan,
29 da nawaꞌ sinungꞌ ntsufan gingꞌa gin. Rib atsungꞌa sanab bini ugu bungꞌ amunti marataꞌ da nampa maran taꞌan, da rib atsungꞌa sanab maisan ugu bungꞌ amunti marataꞌ da namunti nam rarudan wasaꞌ.
30 “Dzi runggangꞌ anungꞌ isangꞌ nanga nam mangan utaꞌ angu u; dzi raru nam isangꞌ dzi ringantagin i dzi Ramanggangꞌ gin angu. Da dzi nanggangꞌ rarudan igi irururung angu, i dzi anungꞌ yatsungꞌ rugangꞌ maranggangꞌ furan; imaꞌ, dzi yatsungꞌ Ramangꞌ aru tanginda dzi badan ugu maranggan furan.”
Nida Yisu Wasi
31 “Bida dzi runggangꞌ angu nida runggangꞌ wasi, da ampan wasangꞌ uda nan igi yaba bida nan nidzun.
32 Da bitsintaꞌ manga rumpai, dzi Ramanggangꞌ, da Arangan ibinigi ini dzi wainggangꞌ wasi. Da dzi sruꞌ i Arangan nan gan nida wasi igi nan nidzun bingan.
33 “Agam itangin garam faingꞌ ifan da Yowanis, da arangan ini nan nidzun bingan wasi iyab i dzi.
34 Dzi wau garam gar nan gan nida dzi wasi iyab u, i nan igi wasangꞌ i rima rini urun da dzi nan gangꞌ nida runggangꞌ wasi u. Da bitsintaꞌ dzi ni nan igi iyab i Yowanis i Anutu uda agam sinungꞌ nam maisan.
35 Yowanis isu dzaf bururungan da ipuatsa yari wasi, da agam nugum itsiaꞌ i arangan nanggan puatsadan igi uts angu.
36 “Da nam bini bingan yusa Yowanis nan gan igi ini dzi wasi. Nigi da gum santan Ramangꞌ tangindan i dzi nangan da ntsupan. Da gum santan dzi tida nangan igi isantingꞌ wasi i Ramangꞌ itangin dzi iba.
37 Da Ramangꞌ aru tanginda dzi badan ugu runggan ini dzi wasi. Da bitsintaꞌ agam anungꞌ iringant i Arangan nifunggan ma itsanga Arangan maran u.
38 Da agam anungꞌ iyu Arangan nan gan iruꞌ wangunggam u, i agam anungꞌ imuaruts garam aru Ramangꞌ tanginda badan ugu.
39 “Agam ifaris Anutu nan gan kakaran igi nidzun angu da yarangꞌ gin ubat, i agam maram ifur nan igi bungꞌ arim nam mpada maran taꞌan ntingan angu da agam. Da Anutu nan gan kakaran igi ini dzi aruani wasi,
40 da bitsintaꞌ agam ibugin i badan da dzi i uda nam mpada maran taꞌan.
41 “Dzi wau garam nan gan tsarifa dzi iyab u, imaꞌ.
42 Da bitsintaꞌ dzi sruꞌ i agam, i agam maram anungꞌ yari i Anutu imingꞌ gam wangunggam wasaꞌ u.
43 Dzi su Ramangꞌ maran da dzi ba, da agam anungꞌ iyu dzi iyab u. Da bitsintaꞌ bida garam manga bada i rugan binganggan, da agam bungꞌ ayu arangan nayab.
44 Agam inang da iyu nam tsarifan mingꞌa wasaꞌ i runggam iyab, da bitsintaꞌ agam anungꞌ isau nam tsarifan bada mingꞌa Anutu wain bitsintaꞌ angu gin. Ibinigi da agam nabumuaruts dzi nan gangꞌ nabianungꞌ?
45 “Agam anungꞌ bunida dzi bungꞌ asantingꞌ agam asubam wasi i Ramangꞌ maranggan u, imaꞌ. Moses, agam garamam agam nida rima agam sib ugu, bungꞌ asantingꞌ agam asubam wasi.
46 Bida agam damuaruts Moses da agam madamuaruts dzi, i arangan ikakar nan i dzi.
47 Da bitsintaꞌ agam anungꞌ imuaruts nan arangan kakaran i dzi, da agam bungꞌ abumuaruts dzi nan gangꞌ nidan nabianungꞌ?”