7
Yisu Rain Rusan Wamuaruts Arangan U
1 Intsup sib raiyi da Yisu iyung ifa gamp gamp fain mingꞌa intap Galili angu. Arangan ibugin i fada intap Yudia, i garam Yuda garam gudzun gudzun gan ini isa Arangan funub.
2 Da garam Yuda gubuꞌ gan mararam tsiraꞌ Mpada Ungar Bangub isu uts i waꞌan.
3 Da Yisu rain rusan ini rutin ibiani, “Watangin gamp ani rai da wafa Yudia, da u ribam atsungꞌa agu mpada naga isangꞌ i tsanganda nam maran mangan u nangan.
4 Garam bits maran fura i garam tsangandan da rima bingan tsiraꞌ rutin anungꞌ inang guman igi imingꞌ mara dzigin u. Bida u nanga nam bida nigi, da wakupis runggam da garam santan natsangan.”
5 I Arangan rain rusan wain anungꞌ imuaruts Arangan u.
6 Ibinigi da Yisu ini ribigi nan gan mungaꞌ ibiani, “Dzi gubuꞌ gangꞌ anungꞌ iba warip iwaꞌ u. Gubuꞌ santan ani isu agamam.
7 Garam intap ani wabugin agam u, imaꞌ! Da bitsintaꞌ ibugin dzi i dzi kupis ribarangan nanggan maisan nangan wasi.
8 Agam wafa tsanga gubuꞌ mararam tsiraꞌ igi. Dzi wasangꞌ i biaꞌan u, i dzi gubuꞌ gangꞌ rururungan waba warip iwaꞌ u.”
9 Yisu ini nan arigi sib da rungꞌ impa imingꞌ Galili.
10 Gubuꞌ Yisu rain rusan fada sib i tsanganda gubuꞌ mararam tsiraꞌ igi, da Arangan ibinigi ifa bampan. Da wasantingꞌ runggan i garam mangan faringꞌa Arangan u.
11 Da garam Yuda garam gudzun rusan isau Yisu imingꞌ gubuꞌ mararam tsiraꞌ igi da igut i ruan ini binaꞌ, “Arangan anungꞌ?”
12 Garam ampi bingan igagara i nan da ruan i Arangan, da fain ini binaꞌ, “Arangan garam bini.”
Da bitsintaꞌ fain ini binaꞌ, “Imaꞌ, arangan garam iyuꞌa garam ampi bingan.”
13 Da bitsintaꞌ ribigi rat i garam Yuda garam gudzun rusan, ibinigi da gan mangan wani Arangan wasi imingꞌ ampan santan maran u.
Yisu Ifis i Nan Imingꞌ Gubuꞌ Mararam Tsiraꞌ Mpada Ungar Bangub
14 Gubuꞌ mararam tsiraꞌ igi bungꞌ fawaꞌa wasaꞌ, da Yisu iyab ifawaꞌ Ungar Mararam da yatangꞌ i ntiangꞌ gan wasaꞌ da ifis i nan da ampan.
15 Garam Yuda gudzun rusan iringantin da igara bangin da ini binaꞌ, “Arangan iyu uwayant araga ibianungꞌ? Anungꞌ yatangꞌ i utusa ampan i Anutu nan gan u!”
16 Yisu ini ribarangan nan gan mungaꞌ ibiani, “Nan dzi fisa gin ani anungꞌ dzi nan gangꞌ u. Dzi fis i Aru tanginda dzi badan ugu nan gan.
17 Garam maran arida i atangꞌa warangꞌ i Anutu uwayantan da bungꞌ asruꞌ gin nabi nan dzi fisagin ani iba imingꞌ Anutu gin ma dzi ni nan i rugaꞌ uwayantangꞌ.
18 Garam fisa i rugan uwayantan da inang i tsarifa runggan angu. Da bitsintaꞌ manga nanga i tsarifa garam aru tanginda arangan badan ugu, arangan garam nan nidzun da rururungan.
19 Moses irim nan faidagin da agam. Da bitsintaꞌ agam manga watsungꞌ gin u. Ibianungꞌ da agam inang i isa dzi funub?”
20 Rib utup tsiraꞌ igi ini binaꞌ, “Marapayam maisan iyantsang agu! Manga nang i isa agu funub?”
21 Yisu ini ribigi nifunggan mungaꞌ ibiani, “Dzi nang nam maran mangan bitsintaꞌ angu da agam santan igara bangim gin ugu.
22 Moses itangin nan faidagin safa rini ubit da agam (da bitsintaꞌ anungꞌ iba imingꞌ Moses u — iba imingꞌ agi tafangꞌ rusangꞌ gin). Ibinigi da bida gubuꞌ safa mamaꞌ mitan marub mangan rini ubitan waꞌan da gubuꞌ Sabat, da agam inang da isaf mamaꞌ mitan igi rini ubitan da gubuꞌ Sabat igi.
23 Bida agam safa mamaꞌ mitan rini ubitan da gubuꞌ Sabat i anungꞌ isa Moses nan gan faidagin udziꞌ, da ibianungꞌ da agam nugum iruaꞌ i dzi nanga garam mangan rininggan santan dauman da gubuꞌ Sabat?
24 Anungꞌ raruda nam yaba i nam maran tsangandan angu u; wararu nam i sanab rururungan.”
Yisu igi Arangan Kristus?
25 I nan Yisu nidan igi da garam Yerusalem fain igut i ruan ini binaꞌ, “Mani garam ribigi nanga i isa funub ugu igi, ma?
26 Aitsangan! Garam arangan arigi, imunti ifis i nan ampan tsiraꞌ maran da manga watip ini nan manga gin u. Garam gudzun ruas masruꞌ i arangan Kristus, Garam Anutu ragadan, ma imaꞌ?
27 Da bitsintaꞌ agi sruꞌ i garam igi gan bada gin. Gubuꞌ Kristus badan da garam mangan wasangꞌ sruꞌa i arangan gan bada gin.”
28 Gubuꞌ Yisu rungꞌ fisa i nan mingꞌa Ungar Mararam ntiangꞌ gan wasaꞌ da inuꞌ nifun tsiraꞌ bingan ibiani, “Agam ini agam sruꞌa i dzi da dzi gangꞌ bada gin sib wa, da bitsintaꞌ dzi waba i rugangꞌ binganggangꞌ u, imaꞌ! Anutu itangin dzi iba, da Arangan nan nidzun wain. Agam anungꞌ isruꞌ i Arangan,
29 da bitsintaꞌ dzi sruꞌ i Arangan, i dzi rut impai da itangin dzi iba.”
30 Ribigi ringanta i nan igi, da fain inang i mpunga Arangan, da manga wangif Arangan u, i Arangan gubuꞌ gan anungꞌ ibawarip iwaꞌ u.
31 Da bitsintaꞌ rib ampi bingan mingꞌa ampi tsiraꞌ igi wasaꞌ imuaruts Arangan da ini, “Garam ani inang nam maran mangan ampi bingan, da garam mangan wasangꞌ nanga nam maran mangan yusa arangan u. Mani Kristus arangan aruani?”
32 Garam Farisai iringant i garam igi gagarada i nan da ruan gin yaba i Arangan, da irut garam pumuꞌa Anutu wain gudzun rusan itangin garam singaari ruas mpada tayangꞌ Ungar Mararam iba i mpunga Arangan.
33 Ibinigi da Yisu ini binaꞌ, “Dzi bungꞌ arut agam nampa isiꞌ pas angu da dzi bungꞌ atip nafan da Aru tanginda dzi badan ugu.
34 Agam bungꞌ asau dzi, da agam wasangꞌ i tsanganda dzi u. Da gamp dzi fada gin, da agam anungꞌ isangꞌ i fawaꞌa gin.”
35 Da garam Yuda gudzun rusan ini da ruan, “Garam ani nabuni fada anungꞌ da agi anungꞌ isangꞌ i tipa tsanganda arangan? Arangan mani fadan da agi ribangꞌ fain dzarangan da ruta rib Grik mpada intap faingꞌ aga da utusa garam Grik?
36 Wain ibianungꞌ da arangan ini nan ani, ‘Agam bungꞌ asau dzi, da agam wasangꞌ i tsanganda dzi,’ da ‘Gamp dzi fada gin, da agam anungꞌ isangꞌ i fawaꞌa gin’?”
37 Da gubuꞌ mararam tsiraꞌ igi gubuꞌ gan bampa sib iwaꞌ, da gubuꞌ arigi tsiraꞌ bingan iyus gubuꞌ fain ugu. Da Yisu imunti da inuꞌ nifun tsiraꞌ ini binaꞌ, “Bida garam mangan wan tsaraꞌan, da arangan naba da dzi da nanum.
38 Manga muarutsa dzi, da mpui maran taꞌan bungꞌ afringfring nawaꞌ arangan wangunggan wasaꞌ nabi Anutu Nan Gan Kakaran nidan ugu.”
39 Ini nan igi iyab i Marapayam Mararam aru rib muarutsa Arangan ugu bungꞌ amus udan. Gubuꞌ arigi da Marapayam anungꞌ iwarip iba u, i Yisu anungꞌ iwarip iyu bingan tsiraꞌ u.
40 Garam ringanta i nan igi gan fain ini binaꞌ, “Nan nidzun bingan, garam ani arangan Profet agi rima marangꞌ gin ugu.”
41 Da fain ini, “Arangan Kristus.”
Da fain ini, “Kristus nabuwaꞌ Galili nabianungꞌ naba?
42 Nan Kakaran ini i Kristus bungꞌ awaꞌ Tafit utupan namingꞌ Betlehem, Tafit gampan wain.”
43 Ibinigi da ribaranga iyu uwayant mara maran i Yisu da yudzungꞌ i nan da ruan.
44 Garam fain ini i mpunga Arangan, da bitsintaꞌ gan manga wangif Arangan u.
Garam Yuda Garam Gudzun Rusan Anungꞌ Imuaruts U
45 Da garam singaari ruas mpada tayangꞌ Ungar Mararam ugu itip ifan da garam pumuꞌa Anutu gudzun rusan da garam Farisai ruas. Da garam gudzun ruas igi igutin ini binaꞌ, “Ibianungꞌ da agam imami mpunga arangan da uda badan?”
46 Garam singaari ruas ini nan mungaꞌ ibiani, “Aga rarab garam mangan nan gan nidan wafasangꞌ garam aga nan gan nidan u.”
47 Da Farisai ruas ini ribarangan nan gan mungaꞌ ibiani, “Mani arangan ma-yiyuꞌ agam ampruꞌ?
48 Aga garam gudzun ma Farisai ani fain mamuaruts arangan? Imaꞌ angu!
49 Da bitsintaꞌ ampi tsiraꞌ ani angu imuaruts arangan da wasruꞌ i nan faidagin u. Da ribarangan bungꞌ awaꞌ da Anutu wangunggan sasusan.”
50 Da Nikodimus, ribigi gan mangan aru fadan da Yisu ugu, igutin ini binaꞌ,
51 “Agi nan gangꞌ faidagin ini agi raruda garam gar sanga angu, ma? Ini agi naringant i arangan nan gan mungꞌ da nasruꞌ i nam arangan nangan.”
52 Ribigi ini arangan nifunggan mungaꞌ ibiani, “Mani garam Galili gan bits agu? Wasau da watsangan nan kakaran ugu, da agu bungꞌ awaꞌ da nan bida profet manga wasangꞌ i waꞌa mingꞌa Galili u!”
53 Da ribarangan itangin ruan rai da idzarang ifa gan gampan wain ruga rugan.