6
Ayeye nhenhe angkentye Christ-kenhe aneme ampe areyeke, meye itnekenhe uthene akngeye itnekenhe utheneke-arlke
1 Ampe areyaye, ayenge awerrirraye! Arrantherre Jesus-kenhe, arrantherre Ikwerenhe aneme. Anwerne mwerre akwete Ikwere anerrirretyeke. Alakenhe ikwerenge anteme arrantherre akangkwe-irretyeke meye uthene akngeye utheneke, nhenge re-atherre arrenhantherrenhe ilemele arne iwenhe apeke renhe mpwaretyeke, alakenhe ikwere-arle Jesus ahentye-aneme arrantherre mpwaretyeke.
2-3 Payepule-le alakenhe ileme, “Anwerne meye uthene akngeye utheneke akangkwe-irremele awemele anetyeke arratye.” Nhenge Ngkartele Ayeye Akngerre Ikwerenhe antheke artwe ampwe Moses-eke, Ngkartele ikwere alhileke-anteye alakenhe angkemele, “Ampe akwekele apeke mikwe uthene anyikwe uthene awemele, ampe akweke yanhe anteme akangkentye-arle anetyenhe, re anetyenhe arlenge ulkere-arle apmere ahelhe nhenhele.” Exodus 20:12, Deuteronomy 5:16.
4 Meye uthene akngeye uthene ampe-akerte areye, ayenge awerrirraye! Ampe akweke arrekantherrenheke akwetethe arnterre iltetyalaye, itneke apelkele ahele-irretyalaye! Itnenhe mwerrantye amangkelhe-ilerrirraye, itnenhe akaltyele-antherlte-anaye Jesus Anwerneke-artweye-akerte nhenge itne Renhe awemele mwerre anetyenhenge.
Ayeye nhenhe angkentye Christ-kenhe-akerte, pwathe areye utheneke warrkene itnekenhe areyeke-arlke
5 Ngkarte-kenhe areyaye, tyile-arenye areye-arteke urrkaperlte-aneme, ayenge awerrirraye! Arrantherre anteme warrke impene anthurre akwete mpwarerlte-anaye alartetye arrekantherrenhe areyeke apmere ahelhe nhenhele, nhenge arrantherre-arle Christ-eke akangkentyele warrke-irremele-arteke. Alakenhe-arteke anteme arrantherre urrkaperlte-anaye alartetye arrekantherrenhe areyeke, iwenhe apeke ikwere-arle itne angkemele, kele arrantherre awemele aneme. Itneke akenge mpwaretyalaye. Itneke akwete urrkaperlte-anemele anaye Ngkarte anteme arrekantherre akangkentye anetyenhenge.
6 Alartetye arrekantherrenhe awerrirraye, warrke itneke mwerre mpwaretyeke. Nhenge itne arrenhantherrenhe areme warrke mwerre mpwarerlenge, kele imerte itne arrekantherre akangkentye-arle aneme. Nhenge itne apeke anetyakenhe arrekantherrenge, kenhe arrantherre akwete-arle warrke-irrerlte-anaye. Nhenheke itirrewarre: Arrantherre warrkene Christ-kenhe areye, arrantherre Ikwerenhe aneme. Ngkarte arrekantherre ahentye-aneme Ikwere ware mwerre anetyeke, arrantherre anteme mwerre antime anetyeke ahentye-aneme Ikwere. Alakenhe ikwerenge anteme arrantherre mwerre akwete mpwarerlte-anetyeke alartetye arrekantherrenheke.
7 Nhenge arrantherre alakenhe warrke-irremele arrantherre tyerrtye arrpenhe areyeke-ante mpwaretyakenhe, arrangkwe-arle. Arrantherre-arle Jesus Alartetyeke-arlke-arle warrke-irremele. Alakenhe ikwerenge anteme, nhenge arrantherre alartetye arrekantherrenheke warrke-irremele, mwernte-irretyale itneke-ketye, itneke akwete warrke-irraye.
8 Kele arrpenheme arrantherre tyile-arenye areye-arteke urrkaperlte-aneme, kenhe arrpenhe areye apeke apwerte ngkweltye akngerreke warrke-irrerlenge. Warrke arnterre anteme mpwarewarraye ingkirrenyekele! Arrantherre akaltye anthurre urreke-arle Jesus anwerneke-artweyele anwernenhe arne mwerre akngerre areye anthetyenhe nhenge anwerne warrke mwerre mpwarerlenge apmere ahelhe nhenhele. Alakenhe ikwerenge anteme, arnterre akwete warrke-irrerlte-anetyeke, mwernte-irretyale.
9 Kenhe arrantherre alartetye areye-arle, warrkene areye-akerte, nhenge warrkene arrekantherrenhe yanhe areye apeke tyile-arenye areye-arteke warrke-irremele arrekantherre, itneke mwerre anaye, ahele-irretyale. Itnenhe akwetethe ware iltetyale. Arrantherre, warrkene arrekantherrenhe areyele-inpe alartetye anyente ware atnyeneme, Ngkarte anwerneke-artweye re, alkerele-arle aneme. Re arrekantherre ingkirreke anthurreke ahentye-anemele, alartetye areye-ante kwenye, arrangkwe-arle. Alakenhe ikwerenge anteme arrantherre warrkene arrekantherrenhe impetyeke, itneke ahele-irretyale.
Paul-ele tyerrtye itnenhe akaltyele-antheme nthakenhe-akenhe rlterrke-irretyeke arrentye Satan-ketye
10 Ngkarte anwerneke-artweye rlterrke anthurre. Utnenge Ikwerenhe-arle akngerre anthurre-arle. Arrantherre akenhe Ikwerele-arlenge akwete anetyeke Renhe arratye itelaremele, Rarle arrenhantherrenhe ngangkere Ikwerenhele rlterrke-iletyeke.
11 Ngkarte ahentye-anemele ngangkere akngerre Ikwerenhe arrenhantherrenhe anthetyeke rlterrke anthurre tnerrirretyenhenge. Renhe apayuthnaye nhenge Re arrenhantherrenhe ngangkere akngerre Ikwerenhe anthetyeke arrantherre anteme rlterrke tnetyenhenge, arrentye Satan-ele imerte arrenhantherrenhe uyarne uternetyenhenge. Arrentye Satan-arle akwete itirremele arrenhantherrenhe inetyeke Ngkarte-ketye.
12 Alakenhe ikwerenge anteme, apmere ahelhe nhenhele, nhenge anwerne arrpenhe areye-ketye ayene-ilelhemele anwernenhe akurne mpwaretyale uternerlenge, anwerne ayene-ilelheme arrentye areye-ketyenge-arlke. Arrentye areye apmere alkere akertnele-arle anemeke, ngangkere akngerre-akerte antime anemele, ingwemerteke-artweye areye-arlke, itne tyerrtye areye akurne mpwaretyeke ahentye-aneme arrkernemele uternerlte-anetyeke apmere ahelhe akngerre nhenhele. Arrentye yanhe areyele anteme anwernenhe arrkernemele untyeme-iletyeke ahentye-aneme Ngkarte-ketyenge.
13 Alakenhe ikwerenge anteme arrantherre utnenge akngerre Ngkarte-kenhe akwetethe atnyenetyeke. Nhenge Ngkartele arrenhantherrenhe utnenge akngerre Ikwerenhe antherlenge, Ikwere mwernte-irretyale, renhe alhule-iwetyale. Arlte arrpe-anenhele arrentye Satan apetyetyenhe, arrenhantherrenhe akwetethenhe-akwetethe uternemele Ngkarte-ketye untyeme-irretyeke, arrantherre apeke untyemurle-irreme anteme akurne mpwaretyeke irremele. Arrantherre akenhe ngangkere Ngkarte-kenhe-akerte, arrantherre imerte tnerrirremele ayene-ilelhemele arrentye Satan-ketye. Arrantherre rlterrke tneme Satan-ketye, arrentye arrpenhe itne-ketye-arlke akwete iltemele atwemele, itnenhe akwete aywepemele nhenge itne arrenhantherrenhe akwete Ngkarte-ketye untyeme-ileketye. Kele imerte arrantherre mwerre anteme anemele Ngkarteke, rlterrke akwete tnemele.
14 Arrantherre mwerre akwete anteme Ngkarteke anerlte-anaye irraweye areye-arteke, itnekenge atwerretyeke-urletye. Ayeye arratye Ngkarte-kenhe akwetethe anthurre awerlte-anaye. Ayeye Ikwerenhe-arle irrketye-arteke thultye areye-arle irrpeme nhenge atwerretyeke alhemele mantere itnekenhe atnyeketye. Alakenhe re-arteke anteme anaye, arnterre akwete itirremele angkentye Ngkarte-kenheke arrantherre Ikwere arratye akwete anerlte-anetyeke. Alakenhe ipenhele anteme thultye areye-arteke anerrirraye akwete, alkwerte-arteke arrweke-arleke arrernemele arerre arrekantherrenhe, arne nhenge re anteme arrenhantherrenhe mwantyele atnyeneme nhenge Satan-ele arrenhantherrenhe inintyeme-ketye ikwere-werne atheke ilemele, re anteme akenhe arrenhantherrenhe uyarne ineme.
15 Akwete-ante mpwaretyeke-aye, akangkemele akwete tyerrtye arrpenhe areyeke iletyeke Ayeye Mwerre Ngkarte-kenhe. Nhenge arrantherre apeke alhemele Ayeye Mwerre nhenhe renhe iletyeke tyerrtye arrpenhe areyeke itnenhe ilaye mwerre anetyeke tyerrtye arrpenhe areyenge, arrantherre anteme thultye areye-arteke nhenge ingke-kenhe-akerte anemele rlterrke anthurre nhenge untemele tyerrtye arrpenhe areye-werne atheke nhenge atwerretyeke-arteke.
16 Ngkarte renhe akwete arratye itelarerrirraye arrantherre rlterrke akwete tnetyeke arrentye-ketye renhe ayakemele anteye arrenhantherrenhe uterneme-ketye untyeme-irretyeke Ngkarte-ketye. Arrentye apeke arrekantherre apetyemele, re tyerrtye-arteke apetyeme arne irrtyarte alkngenthe-akerte-arteke iwerle-apeme arrekantherre-werne atheke. Kele nhenhe akenhe arrantherre akwete Ngkarte arratye itelarerlenge, arrantherre aneme thultye areye-arteke arne alkwerte-akerte-arteke tneme-arle. Alkwerte-akerte arrantherre tnemele arrantherre mwerre akwete-arle tneme, arrantherre tneme alkwertele ilpelhemele Arrentyele arrenhantherrenhe alkngenthele nhenge werlenge.
17 Ngkarteke akwete itirrewarraye, Rarle arrenhantherrenhe mwantyele atnyenerlenge, akayake-ilemele, Arrentye Satan-ketye. Nhenge Ngkartele arrenhantherrenhe alakenhe-arteke akayake-ilemele, arrantherre-arle thultye areye-arteke nhenge akapertele mwekarte rlterrke-akerte-arle ilpelhetyeke. Akwetethe anteme akaltye-irremele Ayeye Mwerre Ngkarte-kenheke nhenge Utnenge Akngerrele-arle arrenhantherre anthemeke. Arrantherre akaltye nthakenhe-akenheke-arle anwernenhe Ngkartele mwantyele atnyeneme. Ayeye Ngkarte-kenhe-arle alyweke arrirlpe-arteke-arle Arrentye renhe-arle ntertelhe-ilemele renhe ayakemele.
18 Alkngwirretyale, Ngkarteke angkerlte-anetyeke Renhe apayuthnemele arrenhantherrenhe mwantyele akwete atnyenetyeke. Renhe apayuthnaye tyerrtye arrpenheke-arlke arne iwenheke apeke arrantherre-arle ahentye-anemeke. Utnenge Akngerrele arrenhantherrenhe akaltyele-antheme nthakenhe Ngkarteke angketyeke. Akwetethe anthurre Ngkarteke angketyeke. Mwantye arelhewarraye, akwetethe anthurre Ikwere angkemele arrantherre akurne mpwareketye. Akwetethe anthurre angketyeke tyerrtye arrpenhe Ikwerenhe areyeke-arlke.
19 Ngkarteke angkerlte-anaye atyenge-inpe, tharle tyerrtye arrpenhe areyeke atnerrele ileme-arle Ayeye Mwerre Jesus-akerte, ayeye nhenge rarle Ikwere-arrpe atnyenetyarteke. Nhenge arrantherre angkerrirreme atyenge Ngkarteke, Re anteme ayenge antheme angkentye iwenhe angketyeke.
20 Alakenhe ikwerenge anteme Ngkartele ayenge inemele akngakeke Ikwere warrke-irretyeke. Arrule anthurre Re ayenge yerneke apmere arrpe-anenhe-werne alhetyeke nhenge the Ayeye Mwerre ilerle-apetyeke tyerrtye arrpenhe areyeke. Alakenhe ikwerenge anteme ayenge itne tyile nhenheke akwerneke. Ikwere akwete angkaye atyenge nhenge ayenge ayeye akengentye angketyakenhe Ikwere-akerte. Ikwere angkaye the akwete itneke atnerrele iletyeke Ayeye Mwerre Jesus-akerte.
Paul-ele pipe nhenhe Ngkarte-kenhe Ephesus-arenye areyeke uyerrelhe-ileme
21-22 The artwe arrpenhe nhenhe anteme yerneme Tychicus-arle arritnye apmere arrekantherrenhe-werne anteme. The renhe yerneme nhenge Re arrekantherre iletyeke ayenge-arle tyile nhenhele akwete anemenge. Re atyewe anwerne-kenhe anwerne ikwere ahentye anthurre anemele. Re Jesus-kenhe aneme, ikwere akwetethe warrke-irremele, Ngkarte-kenhe areye rlterrke-iletyenhenge. Re apmere arrekantherrenheke irretye-alhemele, arrekantherre iletyenhenge warrke iwenhe-arle anwerne mpwaremeke, atyenge-akerte-arlke iletyeke. Alakenhe ikwerenge anteme the renhe arrekantherre-werne yerneme, arrenhantherrenhe akangkentye mpwaretyeke nhenge arrekantherre ayeye nhenhe-akerte ilemele arne nhenhe areye-akerte, arrenhantherrenhe atnerre-iletyeke.
23 Atyewe Ngkarte-kenhe atyinhe areye-aye, ayenge akwete angkeme Ngkarteke-arlke Jesus Christ anwerneke-artweyeke-arlke, nhenge arrantherre akangkemele apurte anetyenhenge anyenteke-irremele nhenge Re arrenhantherrenhe rlterrke anthurre iletyenhenge. Ayenge Ikwere-atherre akwete angkeme nhenge arrantherre mwerre anthurre anetyenhenge, arrantherre akwete Renhe-atherrenhe arratye itelaretyeke.
24 Arrantherre akwete anthurre Jesus Christ-eke ahentye-anemele Renhe impetyakenhe. Ayenge akwete anthurre Ngkarteke angkerle-aneme nhenge Re akwetethenhe-akwetethe arrenhantherrenhe mwantye-mwantye-iletyeke mwantyele arntarnte-aretyeke arrenhantherrenhe.
Kele yanhe ayenge angkeke.