17
Moses-ele kwatye apwerte-ngentyele ineme
1 Israel-arenye areye apmere arrangkethe ikwerele Sin arritnyele anetyarte. Nhenge YAHWEH-ele itnenhe ileke apmere arrpenhe-werne alhetyeke, itne anteme alherlte-iweke. Ikwere-iperre anteme itne apmere Rephidim-ele inteke. Kenhe yanhe ikwerele akenhe kwatyeke arrangkwe-arle aneke tyerrtye areyele antywetyeke.
2 Lyarrke-lyarrke anthurre irremele itne Moses-eke ahele-irreke, ikwere angkemele, “Anwernenhe kwatye anthaye.”
Moses itneke angkirtnerlenge, “Iwenhenge-ame arrantherre atyenge ahele-irreme? Arrantherre apeke YAHWEH arratye itelaretyakenhe Renhe arrkernemele ware? Arrantherre-ame itirreme nhenge Re apekele anwernenhe impeke arntarnte-aretyakenhele? Arrantherre apeke alakenhe itirreme, Re arrekantherre ahele-irretyenhenge!”
3 Tyerrtye areye kwatyeke angkethakwe anthurre irreke. Itne Moses-eke ahele-irreke angkemele, “Iwenhenge-arle-ame unte anwernenhe Egypt-ngentyele arratelhe-ileke? Iwenhenge-ame unte anwernenhe nhenhe-werne akngetyeke, ampe anwerne-kenhe, yepe-yepe, pweleke, nanikute anwerne-kenhe areye-arlke anwernenhe irrerlknge atwetyeke apeke? Nthenhenge-ame anwerne antywetyenhe?”
4 Moses-ele anteme YAHWEH apayuthneke, “Nthakenhe-ame ayenge tyerrtye nhenge areyeke irreye? Itne ayenge awetyakenhe, itne ayenge irrerlknge apwertele weme!”
5 YAHWEH anteme Moses-eke angkeke, “Artwe akngerrepate areye apurtelhe-ilaye. Tyerrtye areyenge arrwekele untherle-apaye akngerrepate areye-akerte. Atneme ngkwinhe akngaye, nhenge unte-arle Egypt-ngentyele akngetyekeke nhenge unte Lhere Akngerre Nile atweke. Iparrpe alhaye!
6 Apwerte akngerre nhenge Sinai-werne alhaye. Yanhe ikwerele unte apwerte arlwe aretyenhenge. Ayenge arrekantherrenge arrwekele tnetyenhe apwerte arlwe yanhe ikwerele. Apwerte yanhe renhe atneme ngkwinhele atwaye. Kwatye anteme arrateme, tyerrtye areyele anteme kwatye renhe antyweme.” Moses YAHWEH-eke awelheke, re alhemele apwerte yanhe renhe atweke artwe akngerrepate areyele renhe arerlenge. Kwatye apwerte-ngentyele thelelheke.
7 Moses apmere yanhe renhe atniweke “Massah,” arritnye yanhe ileme, “Itne Ngkarte arrkerneke.” Israel-arenye yanhe areye kwatyeke arrangkwe aneke iperre, itne Ngkarte arrkernetyame, Moses arlkaremele, “YAHWEH-ame nhenhe akwete anwernekenge? Re-ame anwernenhe akwete arntarnte-areme?” Alakenhe ikwerenge anteme Moses-ele apmere renhe arritnye arrpenhe antheke “Meribah,” arritnye nhenhe ileme “Itne arlkarentye-ileke.”
Israel-arenye areyele Amalekite areye atweme
8 Nhenge Israel-arenye areye apmere Rephidim-ele anerlenge, Amalekite areye apmere yanhele irraweye aneke, itnenhe atwetyeke-urletye.
9 Moses Joshua-ke angkeke, “Artwe arrpenheme akngakaye arrantherre nhenge atwerretyeke alhetyenhenge Amalekite areyenge. Ingwenthe ayenge alheme apwerte akertne nhakwele tnetyeke. The atneme atyinhe akngetyenhe Ngkartele-arle ayenge atnyenetyeke anthekeke. The arne renhe akertne-antepe atnyenetyenhe, the arrekantherre-werne thiletyenhe arrantherre anteme itnenhe atwetyenhenge.”
10 Joshua anteme Moses-eke awelheke, re artwe areye akngakeke atwerretyeke Amalekite areyenge. Urreke itne atwerretyeke alhetyenhenge, Moses Aaron-enge apwerte akertneke antyeke, artwe arrpenhe Hur arritnye-akerte anteye.
11-12 Re arne atneme iltye ikwerenhele akertne-ileke, renhe akapertenge akertne atnyenemele. Nhenge re arne renhe alakenhe renhe arntwirrkemele, Israel-arenye areyele Amalekite areye irrerlknge atwetyame. Moses artwe ampwe aneke iltye ikwerenhe apurrke-irremele. Re atneme renhe uyarne anthurre akertne atnyeneme. Nhenge iltye ikwerenhe kwene-irremele, Amalekite areyele akenhe Israel-arenye areye irrerlknge atwerlenge. Alakenhe re irreme-ketye, Aaron uthene Hur uthenele apwerte akngerre anthurre ineke Moses arrernelhetyenhenge. Ikwere-iperrele anteme, Aaron uthene Hur uthenele amulte Moses-kenhe arntwirrkerle-anerretyeme re arne atneme renhe akwete arntwirrketyenhenge nhenge artwe areye atwerretyamenge. Aaron itere itwele tneke, kenhe Hur akenhe itere arrpenhele tneke. Alakenhe ikwerenge artwe ratherre amulte atherre Moses-kenhe arntwirrkerle-anerretyame uterne-ante irrpetyeke-atwetye.
13 Alakenhenge re-anteme Joshua uthene thultye ikwerenhe areye uthenele Amalekite areye irrerlknge atweke.
14 YAHWEH anteme Moses-eke angkeke, “Ayeye nhenhe renhe pipe-ke intelhe-ilaye nhenge tyerrtye areye ikwere itirretyenhenge urreke, ikwere alkngwirretyakenhele. Ayeye nhenhe renhe Joshua-ke akwetethenhe ilaye. Renhe ilaye The Amalekite areye akethe-ante arrernetyenhe, anyente-ante itethe anetyakenhe anetyenhe ahelhe nhenhele!”
15 Ikwere iperrele anteme, Moses-ele apwerte arrpenheme ineme aharle-iwemele YAHWEH tnaketyeke. Apmere yanhe renhe arritnye antheke “YAHWEH NISSI!” Arritnye nhenhe ileme, “YAHWEH-ele ayenge artengele-areme-arle.”
16 Moses anteme angkeke, “The kwenhe atneme atyinhe akertne atheke arntwirrketyame YAHWEH-arle aneme-werne. YAHWEH-ele kwenhe Amalekite areye akwetethe anthurre irrerlknge atwerle-anetyenhe!”