13
Alartetye arrekantherrenhe aywerrkele awetyeke
1 Ye, Ngkarte ingkirreke anthurreke alartetye aneme. Kenhe alartetye government-kenhe areye alartetye aneme Ngkartele-arle itnenhe arrernekenge. Kele nhenge alartetye government-kenhe areye angkerlenge, nhenge ingkirrekele kwenhe aywerrkele awetyeke mpwaremele itne-arle angkekenge.
2 Kele nhenge arrpenheme alartetyeke ayene-ilelhemele, re kwenhe Ngkarteke ayene-ilelheme Rarle itnenhe arrernekenge-arle alartetye anetyeke. Nhenge tyerrtye anteme apeke alartetyeke ayene-ilelheme, ikwere-arrpe arlkarentye-irremele.
3 Yanhe kwenhe arratye-arle, nhenge yanhe areyele arne mwerre mpwareme-arle alartetye-ketye atere-irretyakenhele, kenhe yanhe areyele-ante-arle arne akurne areye mpwareme. Nhenge arrantherre apeke alartetye areye-ketye atere-irretyakenhe anetyeke ahentye aneme, kele arne mwerre areye-ante ware mpwarerlte-anaye, itne anteme arrenhantherrenhe tnaketyenhenge.
4 Arratye-arle, Ngkartele-arle itnenhe alartetye anetyeke arrerneke, itne warrke Ikwerenhe mpwareme. Warrke itnekenhe aneme ngenhe mwerrentye arntarnte-aretyeke. Kenhe unte apeke akenhe arne akurne nhenge mpwaremele unte kwenhe itne-ketye atere-irreme, alartetye yanhe areyele-arle kwenhe ngenhe atwetyenhenge unte-arle arne akurne mpwarekenge. Alartetye yanhe areye Ngkarteke warrke-irreme. Ngkartele itnenhe atwetyeke yerneke yanhe areyele-arle arne akurne mpwaremenge.
5 Kele nhenge alartetye government-kenhe areye angkerlenge arrantherre kwenhe aywerrkele awetyeke imerte mpwaremele itne arrenhantherrenhe ilerlenge, Ngkarte arrekantherre ahele-irreketye arrantherre-arle kele itelarerlenge nthakenhe-arle mwerre anetyeke.
6 Alakenhe ikwerenge anteme arrantherre government-eke apwerte ngkweltye tax antheme nhenge itne arrenhantherrenhe ileme iperre. Alartetye government-kenhe yanhe areye kwenhe Ngkarteke warrke-irreme itne arrenhantherrenhe arratyentye arntarnte-aretyeke.
7 Kele nhenge alartetye areyele tax ngkweltyeke apayuthnerlenge, arrantherre kwenhe itnenhe iparrpe anthetyeke. Nhenge alartetye arrpenhele arrenhantherrenhe ngkweltyeke tax-eke apayuthnerlenge renhe anthaye ayene-ilelhetyale. Itneke tyele angketyale, itnenhe aywerrkele aweme-tetye, itne kwenhe alartetye arrekantherrenhe aneme.
8 Nhenge arrpenhele apeke re ngenhe apwerte ngkweltye ware antherlenge, alkngwirretyale anaye nhenge renhe anthirtnetyeke.
Arntarnte-arerremele anerrirraye
Arrantherre kwenhe akwetethe nhenge arntarnte-arerretyeke. Arrantherre-arle kwenhe nhenhe-arteke anerlte-anemenge arrantherre arratye apenterlte-anetyenhenge angkentye nhenge Ngkartele-arle Moses antheke.
9 Angkentye nhenhe areye, arne yanhe areye nhenge Ngkartele-arle anwernenhe ileke mpwaretyale, alakenhe kwenhe aneme, “Mpwenyele alwirrelhe-iletyale anaye. Arrpenhe itethe-kwenyeke atwetyale anaye. Arne arrpenhe areye-kenhe anyelkngele inetyale anaye. Nhenge unte apeke arne tyerrtye arrpenhe-kenhe aremele renhe aretyalaye ikwerenheke ahentye anetyale.” Exodus 20:13-15,17.
Angkentye nhenhe areye, angkentye arrpenhe areye-arlke, ingkirreke nhenge Ngkarte angkeke-arle, itne ingkirreke anyente-irrerlenge, anyente-arle alakenhe angkeme,
“Unte kwenhe arrpenhe areyeke tyenye anetyeke, unte-arrpe tyenye aneme-arteke.” Leviticus 19:18.
10 Nhenge unte tyerrtye areyeke ahentye anemele, itnenhe mwantye-mwantye-ilemele, unte itnenhe piwetyakenhe itneke akurne irretyeke. Ye, unte apeke itnenhe mwantye-mwantye-ileme-arteke unte angkentye ingkirreke arratye atnyeneme Ngkartele-arle Moses antheke.
Christ-arle ilengare apetye-alpetyenhe-akerte
11 Kele arrpenhe areyeke akwete ahentye anerlte-anaye the arrekantherre ileke-arteke, arlte-arle itwe-irrerlenge nhenge Alartetye Jesus-arle apetyalpetyenhe re anwernenhe mwantyele akngirtnetyenhele. Arlte yanhe ikwerenge re apetyalperlenge, rarle itwe-ame-itwe-ame-irreme anwerne renhe arratye itelarekenge iperre.
12 Nhenhe-arteke, ingwele uyerreke atheke-arteke, akethe-akethe-irreme anteme, aherlkintyeme, unte ankwenge-ntyele akarre-irremele. Yanhe-arteke, arlte nhenge Jesus apetyalperlenge itwe-ame-itwe-ame-irreme. Anwerne kwenhe yanhe areye angwaretyale anetyeke ingwemertele anerlte-anemeke-arle areye, arrantherre itelareme yanhe areyele nhenge akwetethe-arle arne akurne mpwarerlte-anemeke. Anwerne arne akurne areye impetyeke imerte akwetethe akarelhemele, artwe irraweye anthurre-arteke Satan-ketye ilpelhetyeke.
13 Arrpenhe areye nhenge ingwemertele anerlte-aneme kwenhe akwetethe arne akurne areye-ante ware mpwarerlte-anemele. Kenhe anwerne akenhe alakenhe-arteke anetye-kwenye. Anwerne arratye anetyeke-tetye alkngenthele-arlenge arlte mpwepeke-arteke. Anwerne kwenhe ngkwarle akngerre antywetyale, atwerrirremele anteme. Arrpenhe mpwenyele alwirrelhe-iletyale, ingkerte-ingkerte-irretyale aneye atwerretyenhenge anteme.
14 Anwerne kwenhe Alartetye Jesus-arteke anetyeke, arne akurne areye-ketyenge untyeme-irremele. Kenhe anwerne akurne mpwaretyeke ayene-ilelhetyeke, akurne ikwere-ketyenge untyeme-irretyeke, renhe impemele.