3
1 Jew arrantherre apeke alakenhe itirreme, “Iwenhe ikwerenge-arle anwerne alakenhe aneme Jew areye-arteke? Ware apeke-ame anwerne Jew areye artwe-irreke ampe akweke-anteye?”
2 Arrangkwe, Jew anwerne kwenhe atyeperre anthurre aneme anwerne-kenhe iwerre mwerre anthurre-arle. Ayenge kwenhe nhenhe angkeme Ngkartele-arle Jew anwernenhe angkentye ikwerenhe antheke anwerne renhe arratye atnyenetyenhenge.
3 Kenhe Jew arrpenhemele Ngkarte ayene-ileme, itne Renhe arratye itelaretyakenhe. Kele nhenhele uyarne akngarte-iweme iwenhe Ngkartele mpwareke. Re alhileke Rarle Abraham-eke-artweye areye arntarnte-aretyeke.
4 Ngkarte kwenhe akwetethe arratye angkerle-aneme, Re urrtyirretyakenhele aneme. Kenhe anwerne-tetye urrtyirremele angkerlte-aneme. Arrule anthurre David-ele Ngkarte-akerte alakenhe intelhe-ileke,
“Nhenge Unte angkemele akenhe tyerrtye ingkirreke akenhe itirrerlenge,
‘Ngkarte kwenhe angkemele, Re arratye angkeme arne akurne areye tyerrtye areyele-arle mpwareme-akerte.’
Nhenge Unte tyerrtye areye court-eke arrernemele itneke itirrentye akngerre, Unte itneke arratye itirrentye akngerre.” Psalm 51:4.
5 Alakenhe ikwerenge anteme tyerrtye arrpenhe areye apale itirreme alakenhe re:
“Mwerre kwenhe anwerne-arle arne akurne akwetethe mpwarerlte-anemeke nhenge tyerrtye arrpenhe areyele-arle anwernenhe arerlenge nhenge itne anteme itelareme nhenge Ngkarte-ante ware-arle mwerre anemeke, Re anwerne-arteke anetyakenhe aneme. Yanhe ikwerenge-ntyele anteme apeke Ngkarte anwerneke akangkemele anetyenhe anwernenhe arriletyakenhele anwerne-arle akurne mpwarekenge.”
Ye, alakenhe re kwenhe tyerrtye arrpenheme itirreme.
6 Arrangkwe-arle! Nhenhe kwenhe apale itirrentye aneme. Ngkarte kwenhe akangkemele anetyakenhe aneme nhenge tyerrtye areyele akurne mpwaremenge. Nhenge Re apeke anwernenhe arriletyakenhele aneme, nhenge anwerne arne akurne mpwarerlenge kele Re arrpenheke arrangkwe uyarne arrileme.
7 Arrpenheme apeke itirreme:
“Atyenge mwerre urrtyirremele iletyeke nhenge tyerrtye ingkirreke itirretyenhenge Ngkarte-ante ware akwele arratye angkentye akngerre anemeke, itne anteme renhe tnaketyenhe. Alakenhe ikwerenge apeke akwele Ngkartele ayenge irrerlknge atwetyakenhe anetyenhe nhenge ayenge impemele ayenge-arle urrtyirremele angkerle-anemenge.” Itirrentye nhenhe akurne-arle.
8 Arrpenheme apeke atyenge akengentye angkeme. Ayenge aweke-arle iperrele arrantherre angkentye atyinhe akngarte-arle-iwerle-aneme alakenhe angkerrerlte-anemele, “Anwerne arne akurne mpwarerlte-akwete-aneye nhenge ingkirrekele Ngkarte tnaketyenhenge Re anyentele ware kwenhe arne mwerre areye mpwarerle-anemenge.” Kenhe ayenge akenhe alakenhe angketyakenhele aneke. Ngkarte anteme arrekantherre arratye ahele-irreme arrantherre-arle urrtyirremele angkerlte-anemenge, Re-anteme arratye anthurre arrenhantherrenhe arriletyenhe nhenge iwenhe-arle arrantherre mpwarekenge.
Arrpenhe arratye anetyakenhe
9 Kele nthakenhe-arle-ame Jew anwerne itirreye? Ngkarte-ame Jew anwerneke-ante ware akangkeme, arrpenhe areyeke ahentye anetyakenhele? Arrangkwe anthurre-arle. The kwenhe arrenhantherrenhe kele alakenhe ileke, “Tyerrtye Jew areye, Jew anetyakenhe arrpenhe ingkirreke kwenhe akurne-anteye aneme, akwetethe iwerre akurnele alherlte-aneme. Angwenhele apeke re ayene-ilelhemele nhenge akurne mpwareme-ketye. Arrangkwe anthurre-arle.”
10 The itelareme nhenhe arratye aneme arrpenhele-arle kwenhe ayeye yanhe renhe-anteye arrule anthurre Bible-ke intelhe-ilekenge. Alakenhe kwenhe angkeme,
“Tyerrtye ingkirreke kwenhe akurne aneme, arrangkwe apmere ahelhe nhenhele-arle aneme areye kwenhe mwerre aneme.
11 Arrpenhe akaperte altywere anetyakenhe.
Arrpenhe Ngkarteke akaltye-irretyeke ahentye-anetyakenhe.
12 Tyerrtye ingkirreke kwenhe Ngkarte-ngentyele artepe untyeme-irreke Renhe ipmentye impeke,
itne itirrerlte-aneme nhenge arne akurne-ante ware mpwarerlte-anetyeke.
Arrpenhe arratye mwerre anetyakenhe, ingkirrekele arne akurne ware mpwarerlte-aneme.” Psalm 14:1-3, 53:1-3.
13 Ayeye akweke arrpenhe aneme Bible-nge rante-rante ileme,
“Angkentye nhenge tyerrtye areye-arle angkeme kwenhe akurne anthurre. Itne kwenhe ntyeme iperte irrerlknge-kenhe-arteke nhenge arrpenhele-arle altywere-ileke.
Itne nhenge angkemele, itne urrtye akwetethe angkentye akngerre. Psalm 5:9.
Itne apale angkeme arrpenhe areye atwemele, apmwele-arteke tyerrtye uthneme, itnenhe irrerlknge atweme. Psalm 140:3.
14 Itne-arle arrpenhe areye akwetethe artimperre-iweme, itneke akengentye angkerlte-anemele. Psalm 10:7.
15 Itne iparrpe anthurre ahele-irreme, tyerrtye areye irrerlknge atwemele.
16 Apmere arrpe-anenhele untherle-apemele, itne arne akurne akwete mpwareme, tyerrtye areye atnerte akngarte-anthurre-iwemele.
17 Itne kwenhe akaltye anetyakenhe nhenge nthakenhe mwerrentye anetyeke nhenge tyerrtye arrpenhe areyenge. Isaiah 59:7-8.
18 Nhenge itne Ngkarteke itirrerlenge itne Ikwerenge atere-arle-irretyakenhe, itne-tetye Ikwere anyurre-irreme.” Psalm 36:1.
Ye, arrpenhele kwenhe angkentye nhenhe areye pipe Bible-ke arrule anthurre intelhe-ileke.
19-20 Kenhe Ngkartele akenhe Jew areye angkentye antheke itne akaltye-irretyenhenge mwerrentye anetyeke. Alakenhe ikwerenge anteme arrpenhe areye uyarne angkeme rarle angkentye nhenheke akutne. Nhenge angwenhe apeke-arle itirreme rarle angkentye nhenhe akwele arratye apenteme, kele mwerre-arle aneme. Kenhe Ngkarte akenhe angketyakenhe tyerrtye arratye anerlenge rarle angkentye nhenhe renhe arratye apentemenge akwele. Angkentye Moses-kenhe itneke angkeme itne itelaretyeke itne-arle arne akurne mpwaremenge. Kenhe Ngkarte akenhe angkeke tyerrtye ingkirreke anthurrele-arle akurne mpwareke-arle. Angkentye yanhele kwenhe anwernenhe arratye-iletyakenhe, re anwerne ingkirrekeke imerneme anwerne-arle akurne mpwarekenge.
Nthakenhe-ame Ngkarte angkeme tyerrtye areye-arle Ikwere arratye aneme Ikwerenhe areye irretyeke?
21 Ngkarte angketyakenhe anwerne arratye aneme anwerne-arle arratye mpwarerlenge iwenhe apeke renhe angkentye Moses-kenhele ilemenge. Ngkartele akenhe anwerneke iwerre arrpenhe imerneke-arle, iwerre yanhele anwerneke imerneke nthakenhe Re angketyenhenge anwerne-arle arratye aneme. Arrule anthurre Moses uthene arrpenhe areye uthenele nhenge angkentye Ngkarte-kenhe awemele ilerle-apetyarte, iwerre arrpenhe nhenhe-akerte Bible-nge kele intelhe-ilekeke.
22 Iwerre arrpenhe nhenhe-arteke aneme; Ngkarte angkeme tyerrtye areye-arle Ikwere arratye anemenge itne-arle Jesus arratye itelaremenge ante iwenhe Re itneke mpwareke-arle. Ngkarte kwenhe angkeme tyerrtye ingkirreke arratye anemenge itne-arle Jesus arratye itelaremenge, Jew areye-arlke-arle Jew anetyakenhe areye-arlke-arle rante-rante anemenge.
23 Tyerrtye ingkirrekele kwenhe akurne mpwareke itne Ngkarte-ngentyele akngakelhemele. Alakenhe ikwerenge anteme arrpenhe areye uyarne arratye aneme Ngkarte-arteke.
24 Ngkartele anwernenhe mwantye-mwantye anthurre ileke. Re Jesus Christ yerneke, arne arntarlkweke-arlenge anwerneke ilwetyeke. Lyete anteme Ngkartele anwernenhe arratye akeme anwerne Ikwerenhe anemenge iwenhe renhe-arle Jesus-ele mpwarekenge. Jesus anwerneke piwelhemele ilweke Ngkartele anwernenhe irrerlknge atwetyakenhe anetyenhenge, Re anwernenhe ipmentye impetyenhenge itethe anetyeke.
25-26 Ngkartele Alere ikwerenhe yerneke anwerneke ilwetyeke anwerne-arle arne akurne mpwarekenge. Nhenge Jesus ilweke anwerne kwenye, alhwe ikwerenhe thelelheke Ngkarte-arle atnerte ulthetyenhenge, nhenge anwerne Jesus arratye itelareme, Ngkartele anteme akurne anwerne-kenhe areye urrparetyenhenge, anwerneke ahele-irretyakenhele anteme aneme. Nhenhe-ngentyele anteme anwerne itelaretyenhenge Ngkarte-arle akwetethe arratye aneme. Arrule-ngentyele, Ngkartele akwenpele ware aretyarte-arteke nhenge tyerrtye areyele-arle arne akurne areye mpwarerlte-anetyarte. Kenhe lyete Re Jesus yerneke anwerneke ilwetyeke. Renhe-arle itelareke-arle-iperrele anwerne mwerre anteme anetyenhe Ngkartenge ularre. Alakenhe anteme anwerne akaltye anthurre aneme Ngkarte-arle akwetethe arratye aneme.
27 Arrpenheme arrantherre apeke apale itirreme arrantherre-arle kwenhe tnakelhetyeke arrantherre-arle arratye anemenge Ngkartenge ularre. Arrangkwe-arle! Kenhe arrpenheme arrantherre apale itirreme arrantherre-arle akwele tnakelhetyeke arrantherre-arle angkentye Moses-kenhe arratye apentemenge. Arrangkwe-arle! Ngkarte kwenhe angkeme anwerne-arle arratye aneme anwerne-arle Jesus arratye itelarerlenge.
28 Anwerne kwenhe akaltye aneme Ngkarte-arle angkeme nhenge tyerrtye areye-arle arratye aneme itne-arle Jesus arratye itelaremenge ware. Re kwenhe angketyakenhe tyerrtye areye arratye-arle anemeke itne-arle awemele mpwarekenge nhenge iwenhele angkentye Moses-kenhele itnenhe mpwaretyeke ileme.
29 Alakenhe apeke kwenhe arrantherre apale itirreme, “Ngkarte kwenhe Jew areyeke-ante ware alartetye aneme.” Arrantherre akenhe apale itirreme, Ngkarte kwenhe alartetye aneme, Jew areyeke-ante kwenye, tyerrtye ingkirreke anthurreke.
30 Ngkarte anyente kwenhe aneme. Re Jew areyeke, Jew anetyakenhe areyeke-arlke alartetye. Nhenge anwerne Jew areyele Jesus arratye itelareme Re angkerlenge, “Atyengenge ularre arrantherre arratye aneme.” Nhenge arrantherre Jew anetyakenhe areyele Jesus arratye itelareme Re akenhe alakenhe-anteye arrekantherre angketyenhenge.
31 Kele Jesus-arle itelareke-iperrenge, anwerne-ame angkentye Moses-kenhe-ngentyele untyeme-irreye? Arrangkwe-arle, nhenge Jesus arratye itelareke-arle anwerne alakenhe itirreme, “Jesus arratye itelareke-arle, anwerne akaltye-irreke-arle angkentye Moses-kenhe arratye anemenge, anwerne anteme renhe apenteme mpwaremele iwenhe-arle re ilemenge.”