6
Anwerne itethe aneme Christ-ngentyele ware
1 Arrpenhemele areke-arle-iperre iwenhe-arle the intelhe-ilekenge alakenhe apeke kwenhe apale itirreme, “Anwerne kwenhe arne akurne areye akwetethe mpwarerlte-aneye Ngkartele anwernenhe akwetethe mwantye-mwantye-iletyeke, anwernekenge ipeltye-irrerle-anemele.”
2 Arrangkwe-arle! Ngkarteke atyewe areye-irreke-arle, anwerne kwenhe akwetethe akurne areye mpwarerlte-anetyakenhe anetyeke. Anwerne Jesus arratye itelareke-ipenhele, Ngkartele imerte anwernenhe iwerre akurne-aketye akngemele iwerre mwerrele arrerneke Renhe apentetyenhenge. Itirrewarraye, nhenge tyerrtye ilwemele re akurne mpwarentye impelhemele. Alakenhe renhe anwerne akurne-ketye impelhetyeke.
3-4 Arrantherre ingkirreke akaltye aneme, nhenge anwerne Jesus arratye itelaremele kwatye kweneke irrpemele baptise-irretyeke, Ngkartele anwernenhe ingkirreke Christ-enge anyente-ileke. Nhenge anwerne kwatye kweneke irrpeke, anwerne-arle Christ-nge apurte ilweke-arle-arteke, anwerne-arle apurte ikwerenge ipertele arteke-anteye-arteke. Arrantherre itelareme nthakenhe-arle Ngkartele renhe Utnenge Akngerrele renhe itethe akemelhe-ilirtneke. Kele alakenhe-anteye-arle nhenge anwerne kwatye-ngentyele arratemele anwerne kwenhe ikwerenge apurte akeme-irreke, kele anwerne akngarte-iwelhemele akwetethe anteme arne mwerre areye mpwarerlte-anemele arratye anemele.
5 Ye, Christ-nge apurte-irreke-iperrele anwerne-arle kwenhe ikwerenge ilweke-anteye-arteke. Kenhe Ngkartele akenhe Jesus akemelhe-ileke itethe-ilirtnemele-arteke re irrerlknge-arle inteke-ipenhele, kele alakenhe-anteye-arle Re anwernenhe akemelhe-iletyenhe itethe-ilirtnemele nhenge irrerlknge-arle inteke-ipenhele.
6 Anwerne akaltye-anteye aneme, itirrentye anwerne-kenhe-arle akwetethe-arle akurne anetyarte, anwerne arne akurne areyeke itirretyartele, itnenhe mpwaretyeke. Kenhe nhenge Christ-arle akenhe arne arntarlkweke-arlenge ilwemele anwerne-anteye ikwerenge apurte ilweke-arteke. Alakenhe ikwerenge anteme anwerne ahentye-anetyakenhe arne akurne areye awethe mpwaretyeke.
7 Arrantherre itelareme, nhenge tyerrtye areye ilwemele itne arne akurne areye awethe mpwaretyakenhe-arle aneme. Alakenhe re-arteke, nhenge anwerne Jesus Christ-nge apurte ilwemele anwerne arne akurne areye awethe mpwaretyeke ahentye anetyakenhe.
8 Ye, anwerne Christ-nge apurte ilweke-arteke, yanhe ikwerenge-ntyele anteme anwerne itirremele, “Arratye kwenhe anwerne apurte ikwerenge ilweke-arle, anwerne itethe-anteye akeme-irrirtneme, ikwerenge anteme itethe aneme.”
9 Anwerne itelareme Ngkartele-arle Christ itethe-ilirtneke rarle irrerlknge inteke-ipenhele, kele lyete re itethe aneme. Re awethe ilwetyakenhe anetyenhe re akwete-ante itethe anetyenhe.
10 Nhenge Christ-arle ilwemele, re anyente-ngare ilweke tyerrtye ingkirrekeke. Re Satan ayaketyeke ilweke tyerrtye areye uterneketye akurne mpwareme-ketye. Kenhe lyete akenhe re itethe-arle-irreke aneme re akwetethe-arle Ngkarteke anerle-aneme.
11 Arrantherre-inpe kwenhe alakenhe itirretyeke, “Anwerne Christ-nge apurte ilweke, anwerne imerte arne akurne mpwarentye impelheke. Lyete kwenhe anwerne itethe-anteye-arle irrirtneke apurte Christ-nge anwerne Ngkarteke-ante ware anetyeke.”
12 Alakenhe ikwerenge anteme arrantherre arne akurne akwetethe mpwarerlte-anetyakenhe anetyeke. Itelaraye, arrantherre kwenhe ahelhe nhenhele arlte urtekeke ware aneme nhenge tyerrtye arrekantherrenhe uyerremele. Kele nhenge arrantherre arne akurne mpwaretyeke ahentye anemele, akwenpele awerlte-anaye, akurne yanhe areye mpwaretyale anaye.
13 Arrantherre apeke arne akurne mpwaretyeke ahentye aneme. Kele, arrantherre akurne-ketye mpwarentye impelhewarraye! Arne akurne areye iltyele anpetyale, arrakertele angkentye ulperte angketyale, arne akurne areye alkngele aretyale, akurne areye irlpele awetyale anaye. Arrantherre ilweke-arle iperre Ngkartele arrenhantherrenhe itethe-ilirtneke Jesus-arteke. Alakenhe ikwerenge anteme arrantherre Ngkarte anthelhetyeke Ikwere-ante ware arratye anetyeke.
14 Arrantherre awelhetyakenhe arne akurne mpwaretyeke arrantherre-arle kwenhe angkentye Moses-kenhe ipmentye impelheke. Angkentye angkweye yanhe kwenhe arrekantherre alartetye anetyakenhe. Lyete akenhe Ngkarte arrekantherre alartetye aneme, Re-ante ware arrekantherre mwerre anerle-aneme. Alakenhe ikwerenge anteme arrantherre arne akurne impelhetyeke, Ngkarteke mwerre anerlte-anetyeke.
Anwerne warrkene Ngkarte-kenhe areye arratyentye anerlte-aneye
15 Arrantherre arrpenheme apeke alakenhe apale itirrerlte-aneme, “Mwerre akwele anwerne apeke arne akurne akwete mpwarerlte-anemele anwerne-arle angkentye Moses-kenhe ipmentye impelheke. Ngkarte anteme anwernenhe atnyeneme mwantyele arntarnte-aremele.” Arrangkwe-arle! Alakenhe itirretyale anaye.
16 Arrantherre itelareme, nhenge arrantherre kwenhe alartetyeke warrke-irreme arrantherre aywerrkele mpwaremele alartetyele-arle ileme. Alakenhe-anteye anteme arrantherre apeke arne akurne areye aywerrkele mpwareme arrentye Satan-ele-arle arrenhantherrenhe mpwaretyeke ileme, re anteme arrekantherre alartetye anetyenhenge. Re apeke arrekantherre alartetye aneme, arrantherre anteme ilwetyenhe Ngkarte-kwenye. Kenhe arrantherre-ingarle apeke Ngkarte awemele aywerrkele mpwaremele Rarle ileme, Re anteme arrekantherre alartetye anetyenhe, arrantherre arratye anetyenhenge.
17 Lyete kwenhe the Ngkarte tnakeme anthurre, arrantherre-arle Ikwere arratye anerlenge. Arrwekele-arle arrantherre akurne areye-ante ware mpwaretyeke ahentye aneme, iwerre arratyele anetyakenhe aneke. Kenhe nhenge arrpenheme areye akenhe arrekantherre Angkentye Mwerre Jesus-akerte angkemele, arrantherre akngarte-iwelheke, angkentye renhe awemele aywerrkele mpwaremele iwenhe itne arrenhantherrenhe akaltyele-antheke.
18 Kele Ngkartele arrenhantherrenhe iwerre akurne-ketye akngirtneke arrantherre-arle apentetyame, iwerre mwerrele arrerneke, arrantherre Ikwere warrke-irretyenhenge arratye anemele arne mwerre areye-ante ware mpwarerlte-anetyeke. Alakenhe ikwerenge anteme the Ngkarte arnterre tnakeme.
19 Ngkarte-kenhe areyaye, arrantherre kwenhe akweke ware itelareme. Alakenhe ikwerenge ayenge arrekantherre mwantye angkeme arrantherre arratye awetyeke. Arrantherre kwenhe akwetethe itirretyarte arne akurne areye mpwarerlte-anemele. Lyete akenhe, arrantherre kwenhe Ngkarteke arratye anetyeke iwenhe apeke renhe-ante ware mpwaremele Re arrenhantherrenhe ileme.
20 Urreke arrantherre Ngkarte-kenhe anetyenhenge, arrantherre kwenhe arne akurne areye akwetethe mpwaretyarte, arne akurne areyeke-ante ware mpwaretyeke itirretyarte. Arrantherre kwenhe arne arratye areyeke itirretyakenhe arrantherre-arle Ngkarteke akutne anekeke.
21 Nhenge arne akurne-arle mpwareke-iperrele arrantherre-ame akangkemele aneke? Arrangkwe, arrantherre anteme apure anthurre awelhemele nhenge arrantherre itirremele arne akurne areye mpwareke-akerte. Arrantherre apeke arne akurne akwete mpwareke akwele, arrantherre Ngkarte-kwenye akwete-arle ilwemere, Ikwerenge akwete-ante akalke-irremele aneme re.
22 Kele lyete anteme arrantherre-ingarle arne akurne areye mpwaretyeke ahentye-anetyakenhe Ngkartele-arle kwenhe arrenhantherrenhe iwerre akurne-ketye akngetye-alpeme utepelhe-ilerlenge arrantherre-arle apentetyamenge, arrenhantherrenhe iwerre arratye Ikwerenhele arrernemele Ikwere akwetethe warrke-irretyeke. Lyete anteme Ngkartele arrekantherre imerneme nthakenhe-arle Ikwere arratye anetyeke. Alakenhe ikwerenge anteme arrantherre itethe akwete-ante Ikwerenge anetyenhe.
23 Arrantherre-ame itelareme? Arrantherre itelareme, nhenge nthakenhe-arle tyerrtye apeke warrke-irremele re apwerte ngkweltye inemele. Angwenhele-arle arne akurne akwetethe mpwarerle-anemele ilwetyenhe. Re Ngkarte-ketye re akwete-ante akalke-irretyenhe. Kenhe Ngkarteke iwerre-arle arrpenhe aneme, Re Jesus Christ Alere Ikwerenhe anwernenhe antheme, anwerne Ikwere warrke-irretyakenhe aneme Renhe inetyeke. Nhenge anwerne Renhe arratye itelaremele anwerne Ngkartenge akwete-ante anetyenhenge.