9
Ngkartele Jew areye akngakeme Ikwerenhe areye anerrirretyeke
1 Awerrirraye! Ayenge kwenhe arrekantherre arratye angkeme ayenge-arle Christ-nge anyente-irrekenge. Utnenge Akngerre utnenge atyengele-arlenge aneme re itelareme ayenge-arle arrekantherre urrtyirretyakenhe.
2 Ayenge utnengenge arrangkeme akwetethe alhwarrpe awelherle-aneme tyerrtye atyinhe areyeke-arrpe, tyerrtye Israel-arenye areyeke.
3 Ye, ayenge kwenhe arratye alhwarrpe anthurre awelheme Israel-arenye atyinhe areyeke itne-arle Jesus ipmentyele iweke-arlenge. Itneke alhwarrpe-irrekenge ayenge alakenhe itirreme, “Ayenge apeke Ngkarteke alakenhe angketyeke, ‘Ngkarte-aye, Unte apeke ayenge akngakeme-arteye Christ-ketye akalke-akalke anetyeke, itne anteme tyerrtye Ngkwinhe-irretyenhenge Christ arratye itelaremele.’ ”
4 Jew areye kwenhe akwerrke-ipenhe Jacob-eke aneme; Israel arritnye arrpenhe-arle. Ngkartele kwenhe itnenhe akngakeke itnenhe altye-ileke alere uthene ampe uthene Ikwerenhe areye anetyeke. Utnenge Akngerre Ikwerenhele re itneke akwetethe imernelhetyarte nhenge itne unthepunthetyarte apmere ahurratye ikwerele, re itnenhe alhileke Rarle akwele itnenhe arne areye anthurre anthetyenhe, itne renhe aywerrkele awetyenhenge. Re itnenhe angkentye Ikwerenhe antheke Apwerte Sinai-nge, itnenhe akaltyele-anthemele apurte-irretyeke. Re itneke imerneke nthakenhe-arle itne Renhe arratye utyernemele tnaketyeke. Re alhileke Rarle itnenhe arntarnte-aretyenhe.
5 Arrenge-arrenge itnekenhe arrule anetyarte-arle kwenhe Abraham, Isaac, Jacob-arlke nhenhe areye atningke-ame-atningke-irreke, itne Jew areye-anteme-irreke. Nhenheke-artweye areye-ngentyele anteme Christ-arle tyerrtye-irreke re itne-arteke aneke. Kenhe Jew areye itne akenhe renhe ipmentyele iweke ikwere-aketye untyeme-arle-irreremele.
Ye, arratye kwenhe aneme, Ngkarte kwenhe arne ingkirrekeke alartetye impene aneme, kele anwerne akwetethe renhenhe tnakerlte-aneye.
6 Arrantherre apeke itirreme Ngkarte-arle urrtyirrekeke-athene nhenge Re angkemele Rarle akwele Israel-eke akwerrke ipenhe areye atnyenetyeke. Kenhe Ngkartele akenhe arratye alhileke-arle, re kwenhe urrtyirremele angketyakenhele. Arrpenheme ware, ingkirreke kwenye, akwerrke-ipenhe Jacob-eke areye-arle kwenhe Ngkarte-kenhe areye aneme, itne akwele ilelheme Israel-arenye areye.
7 Alakenhe-anteye-arle aneme, ingkirreke kwenye akwerrke-ipenhe Abraham-eke areye-arle Ngkarte-kenhe aneme. Arrpenheme-ante kwenhe Ngkarte-kenhe areye aneme. Ngkarte Abraham-eke alakenhe angkeke, “Akwerrke-ipenhe Isaac-eke areye kwenhe atyene atyinhe areye anetyenhe.”
8 Abraham-ele alere arrpenhe atnyeneke, arelhe nhenge Hagar-engentyele, Ishmael arritnye, akwerrke-ipenhe ikwere areye Ngkarte-kenhe areye anetyakenhe aneke. Kele akwerrke-iperre Isaac-eke areye warele Ngkarte-kenhe aneke-tetye. Sarah-ele ampe akweke atnyeneke Ngkartele-arle renhe alhileke-iperrele ware kwenhe. Re ampwe anthurre irreke nhenge re Isaac-arle atnyeneke iperre.
9 Nhenge Ngkartele-arle Abraham alakenhe alhileke, “Nhenge Ayenge apetye-alpemele alakentyele year arrpenhenge, Sarah-ele kele ampe urreye akweke anteme atnyenerlenge.”
10 Ampe urreye kwenhe Isaac aneke. Re Rebecca anewe akemele re ampe urreye rante-rante akweke atherre atnyeneke. Ngkartele anteme awethe imerneke angwenhe areye-arle atyene Ikwerenhe areye arratye aneke.
11-12 Itelaraye, urreke ampe akweke rante-rante-arle intetyenhenge Ngkarte Rebecca-ke angkeke, “Unte kwenhe lyete atnyeneme ampe urreye atherrame, ingkerne-iperre kwenhe alartetye anetyenhe, kake ikwerenge akngerre-ulkere anthurre anteme irretyenhenge.” Urreke urreye ratherre arne arrpenheme mpwarerle-anerretyenhenge, nhenge mwerre apeke, akurne apeke, Ngkartele kwenhe ingkernenye akngakeke alartetye anetyeke. Nhenge Ngkartele nhenhe mpwaremele Re imerneke Rarle akngakemele angwenhe apeke ikwere Re ahentye anemeke; Re kwenhe tyerrtye akngaketyakenhe aneke iwenhe apeke renhe-arle warele rarle mpwarekenge.
13 Alakenhe ikwerenge anteme arrule anthurre arrpenhele Bible-ke intelhe-ileke, “The Jacob akngakeke, The akenhe Esau-arle ipmentyele iwemele.” Malachi 1:2-3.
14 Kele re kweye? Ngkartele-ame akurne mpwareke Rarle Esau ipmentyele iwekenge Jacob-ante akngakemele? Arrangkwe anthurre-arle!
15 Itelaraye, arrule anthurrele Ngkartele Moses-eke alakenhe angkeke, “Ayenge kwenhe atnerte alhwarrpe awelheme angwenhe apeke ikwere-arle ayenge ahentye anemeke. The kwenhe arrpenhe mwantye-mwantye-ileme ayenge-arle ahentye anemeke.” Exodus 33:19.
16 Ngkartele kwenhe tyerrtye areye akngakeme itnenhe mwantye-mwantye-ilemele Rarle ahentye anemeke ware. Kenhe tyerrtyele kwenhe Ngkarte uyarne uterneme renhe akngaketyeke.
17 Arrule anthurre Moses-ele Bible-ke intelhe-ileke nthakenhe-arle Ngkartele Pharaoh ileke, “The kwenhe ngenhe arrerneke Egypt-eke alartetye anthurre anetyeke, The ngkwenge Utnenge Akngerre atyinhe imernetyeke, yanhe-ngentyele anteme tyerrtye areyele apmere arrpe-anenhe-ngentyele Atyenge-akerte awemele Ayenge utyernemele tnaketyeke.” Exodus 9:16.
18 Yanhe-ngentyele anteme anwerne itelareme Ngkartele-arle arrpenheme akngakeme itnenhe mwantyele arntarnte-aremele. Anwerne itelareme-anteye Rarle arrpenhe areye Ikwere-ketye mwernte-ilemele, renhe aweketyenge.
19 Nhenhe aweke-arle-iperrele, arrpenhele apeke ayenge alakenhe apayuthneme-ketye, “Ngkartele apeke tyerrtye areye akngakeme Rarle ahentye-anemele, kele iwenhenge-arle-ame Re itnenhe ilpernemele nhenge itne arne akurne mpwaremenge? Itne mpwareme ware iwenhe apeke renhe-ante Rarle itnenhe mpwaretyeke uterneke.”
20-21 Ayenge anteme ikwere angkirtneme, “Arrangkwe, alakenhe angketyale. Unte kwenhe tyerrtye ware, iwenhenge-arle-ame unte alakenhe angkeme? Ngkartele kwenhe ngenhe mpwareke, unte akenhe Ngkarte tyenirtnetyale anetyeke. Tyerrtyele-ame Ngkartele mpwareke-arle renhe tyenirtneme angkemele, ‘Iwenhe ikwere-ame Unte ayenge alakenhe mpwareke?’ ” Arrangkwe anthurre-arle! Arrantherre itelareme nthakenhe-arle arelhele arne arrpenhe areye mpwareme arne anyente-ngentyele. Re apeke pmware anyente merne atnyenetyeke mpwareme, re imerte atneme mpwaremele. Re iwenhe apeke renhe mpwareme ahentye anemele arne anyente ikwerenge-ntyele.
22 Alakenhe-anteye-arle, Ngkartele tyerrtye areyeke mpwareme iwenhe apeke-arle Re mpwaretyeke ahentye aneme. Kele anwerne anteme Ngkarteke uyarne tyenirtneme. Re kwenhe ahele anthurre irreme tyerrtye areyele-arle arne akurne areye mpwaremenge, kele Re-anteme itnenhe Utnenge Akngerre Ikwerenhele arratye-ileme. Kenhe tyerrtye yanhe areyele-arle akenhe arne akurne mpwarerlte-aneme, nhenge irrerlknge atwetyeke. Kenhe Ngkartele areke iperre iwenhe-arle itne mpwaremenge itnenhe impeme. Re itnenhe iparrpe uyerrelhe-iletyakenhe.
23 Re kwenhe alakenhe mpwareke imernetyeke nthakenhe-arle Re mwantye-mwantye-ilentye aneme nhenge Re tyerrtye areye arntarnte-aremele. Re anwernenhe arrwekele akngakeke-iperrele kele anwerne mwerre anthurre Ikwerenge apurte akwete-ante anetyenhenge.
24 Re kwenhe anwernenhe akngakeke tyerrtye Ikwerenhe areye anetyeke, arrpenheme Jew areye-ngentyele, arrpenheme Jew anetyakenhe areye-ngentyele anteye.
25 Artwe nhenge angkentye Ngkarte-kenhe ilentye akngerre Hosea arritnye, re arrule anthurre intelhe-ileke iwenhe-arle Ngkarte angkekenge,
“Tyerrtye arrpenheme yanhe areye-arle atyene atyinhe areye anetyakenhe,
Ayenge yanhe areyeke alakenhe angkeme, ‘Arrantherre kwenhe lyete aneme atyene atyinhe areye anteme!’
Arrwekele kwenhe the itneke imernetyakenhe Ayenge-arle itneke ahentye aneme,
lyete anteme ayenge itneke alakenhe angkeme, ‘Ayenge kwenhe arrekantherre ahentye anthurre aneme.’ ” Hosea 2:1, 2:23.
Hosea-le alakenhe-anteye intelhe-ileke:
26 “Apmere nthenhele-arle Ngkartele itneke arrwekele-ulkere angkeke kwenhe alakenhe, ‘Arrantherre kwenhe atyene atyinhe areye anetyakenhe.’
Apmere akwetethe ikwerenge anteme-anteye, Ngkarte awethe itneke angketyenhe,
‘Arrantherre kwenhe alere uthene ampe atyinhe areye anetyenhe.’ ” Hosea 1:10.
27 Artwe Isaiah arritnye anteme alakenhe angkeke,
“Tyerrtye Israel-arenye areye kwenhe atningke-ame-atningke anthurre irretyenhe, yerre areye-arteke anetyenhe, arratye atningke anthurre.
Kenhe Ngkartele akenhe urrpetye ware itethe atnyenetyenhe.
28 Alakenhe ikwerenge anteme Re angkeke, Re kwenhe akwete-ante akarelhetyakenhe anetyenhe re kwenhe atningke itneke-ngentyele uyerrelhe-iletyenhe.” Isaiah 10:22-23.
29 Arrule anthurre Isaiah alakenhe-anteye angkeke,
“Ngkartele apeke Israel-arenye anwernenhe ingkirreke uyerrelhe-ileme-ketye Re apeke ahentye anemele,
nhenge Rarle irrerlknge uyerrelhe-ileke-arteke tyerrtye Sodom-arenye areye-arlke Gomorrah-arenye areye-arlke ingkirreke.” Isaiah 1:9.
Tyerrtye Israel-arenye areye, Ayeye Mwerre-arlke-akerte
30 Awerrirraye, anwerne kwenhe arrekantherre ahentye anthurre aneme itelaretyeke. Tyerrtye Jew anetyakenhe areye kwenhe arrwekele ahentye-anetyakenhe iwerre Ngkarte-kenhe arratye apentetyeke, itne arratye anetyakenhe anerrirretyarte. Ikwere-iperrele anteme Ngkarte angkeke itne arratye anemenge, Re itnenhe Ikwerenhe atyewe akeme itne-arle Jesus arratye itelarekenge.
31 Kenhe Jew areye akenhe apale itirreke Ngkartele-arle itnenhe arratye aketyenhenge akwele itne-arle angkentye Moses-kenhe apentewarrerlenge. Yanhe arratye anetyakenhe-arle. Itne uyarne anthurre arrkernetyarte.
32 Itne kwenhe Ngkartenge uyarne arratye-ilelheme angkentye ware apentewarreke. Itne kwenhe Jesus arratye itelaretyeke akwele renhe apentetyenhenge. Itne-arle Jesus impentyele arekenge, re apwerte-arteke iwerrele inteme, itnenhe tyelpelhe-ilemele itne anteme itnyetyenhe.
33 Arrule anthurre Isaiah-ele Jesus-akerte intelhe-ileke itnenhe alkngarre-iletyeke:
“Awerrirraye, The kwenhe artwe Jerusalem-eke arrernetyeke apwerte-arteke anetyeke iwerre-arle intemenge tyerrtye areye anteme tyelpelhe-ilemele.
Apwerte nhengele tyerrtye areye tyelpelhe-ilerle-anetyenhe itnyetyeke.
Kenhe tyerrtye areyele artwe nhenge arratye itelaremele apure kwenye tnetyenhe akangkemele anthurre Ngkartenge ularre
Re-anteme itnenhe akwetethe arntarnte-arerle-anetyenhe.” Isaiah 8:14, 28:16.