14
Daoq mee nia phaq ge nia nail ganl
1 Goil nail gaiq-a nail haoqnao laijai laijai-ail tsaothe yaoq. Aqhaqlal phao khe kovpavq bhai oil movq deedee yaoq. Iqsanl nee maqtsil Miqyail nail haqbhoil gedan nail kovpavq bhai oil movq yaoq.
2 Daoq mee nia phaq ge nia nail tsaol-aq neq, tsaol-aq bhai daoq ge tsaoq nail maq ngel-ail. Miqyail nee mail ge tsaoq nail ngaol. Tsaol-aq teevq gaq-ail aivq-i mail ge nail daoq bhai maq gov heeq nia-ail. Oil tsail-ai thaq nail juq bhai Aqhaqlal Miqyail bhaqda nee aivq ge nail thail nail ngaol.
3 Miqyail nail haqbhoil gedan nail tsaol-aq neq, tsaol-aq yaq bhai daoq ge tsaoq nail ngel-i mail, aqyu juq bhai bhi eeq bhi heel lal nail ngaol. Daoq al juq neq, gaq bivq nail nee ovqtavq, neesal bhiq ovq nail ngaol.
4 Daoq mee nia phaq ge nia nail tsaol-aq yovqgavq bhai yovqgavq bhi eeq bhi heel lal nail ngaol. Thailhai ngaol-aoq, Miqyail nail haqbhoil gedan nail tsaol-aq neq, Khali yaq munl bhai bhi eeq bhi heel lal nail ngaol.
5 Nuljuq iqsanl mail daoq mee nia phaq ge nia nail bhai ngal oil movq-ail nial. A dai nee maqtsil, nuljuq Miqyail nail haqbhoil gedan nia dai, ngal oil movq jaiq-ail nial. Daoq meeq nia phaq ge nia nail tsaol-aq, Khali yaq munl eeq lal heel lal dai, daoqceevq maq oil dov bhiq kivq haq neq, Miqyail nail haqbhoil gedan nail gaq aivq nee maqtsil ganl tsoiq jaiq nail ngaol.
6 Aqivq jaqbheq juq-ol, ngal nuljuq jaol nail bha lal khi, daoq mee nia phaq ge nia haq neq, nuljuq nail haqbhoil ganl tsoiq naol laiq. Miqyail-i mail phaodaiq lavq-a nail daoq, maodai phaq heeq nia nail phaq, Miqyail nail haqbhoil gedan nail daoq, cavq bhiq cov bhiq nail daoq, niil heel nail daoq teevq daoq ganav ngal nuljuq bhai maq cavq bhiq haq neq, nuljuq nail haqbhoil ganl maq tsoiq-ail.
7 Alhai dul dai, aqdoevq maq ngel nail tsil lil maqkhaiq, dil-nvq maqkhaiq, aqthel maljiaov dai maq dov lal haq neq, khul phaq nail aqthel bhi dov lal movq nail dai, khalhai khi heeq kivq heeq.
8 Nqbho jiiv nail aqthel iqsanl maljiaov dai, maq jiiv dol lavq haq neq, genl dev ail nail dai, khaq sil gaq lainq nail-aiq.
9 Alhai dul dai, nuljuq daoq ge-u phao, yu gov heeq nia dai maq ge haq neq, naol ge nail daoq bhai khaq sil ga heeq nia nail-aiq. Nuljuq aqnieivq bhai ge bhiq nail khe-ai dul nail ngaol.
10 Miltsaq kovtavq bhai daoq mee nia phaq jiav nail ngaol. Daoq al juq nail lavqkhoel, daoqceevq maq bhao nail teevq daoq-ail maq jiav-ail.
11 Thailhai ngaol-aoq, daoq al juq nail daoqceevq bhai ngal maq heeq kivq haq neq, daoq ge thailthaiq nail gaq nail sivtavq bhai ngal yaoq khaoq yaoq mil yaoq khe tsaol-aq pevq khi, daoq ge thailthaiq nail al gaq iqsanl, ngaq nail sivtavq bhai yaoq khaoq yaoq mil yaoq khe tsaol-aq pevq nail ngaol.
12 Alhai dul dai, nuljuq iqsanl, aqhaqlal phao khe kovpavq bhai oil movq deedee nail tsaol-aq ngel-i mail, Khali yaq munl bhai bhi eeq bhi heel lal nail kovpavq juq bhai, laijai laijai-ail halpov yaoq.
13 Alheel ngel-i mail, daoq mee nia phaq ge nia nail tsaol-aq iqsanl, daoqceevq oil dov kivq dai, geeqlaoq hal nail tsaq nail ngaol.
14 Khul khi mail dai ngal-aq, ngal daoq mee nia phaq ge ge-ail geeqlaoq hal haq neq, ngaq nail aqhaqlal geeqlaoq hal khi ngaol-aoq, ngal neema maq kev-ail.
15 Thailhai phal-iq neq, khalhai khi heeq. Ngaq nail aqhaqlal geeqlaoq hal nail ngaol. Ngaq nail neema iqsanl, geeqlaoq hal nail ngaol. Ngaq nail aqhaqlal gul khi tsiqeeq nail ngaol. Ngaq nail neema iqsanl gul khi tsiqeeq nail ngaol.
16 Naoq nail aqhaqlal taivq-ail Miqyail bhai tsiqeeq haq neq, aqhaqlal phao khe kovpavq maq ya-a nail tsaol-aq teevq gaq, naol tsiqeeq nail daoq bhai maq gov heeq nia nail ngel-i mail, Aqmiq dai, khalhai khi ge nia nail-aiq.
17 Naol aqmeeq-ai tsiqeeq khi ngaol-aoq, tsaol-aq al gaq bhai maq bhi eeq maq bhiq heel lal nia-ail.
18 Ngal nuljuq iqsanl nee maqtsil daoq mee nia phaq ge kivq nail ngel-i mail, Miqyail bhai tsiqeeq naol.
19 Thailhai ngaol-aoq, Khali yaq munl jil lai-u phao, daoq mee nia phaq ge nail lavqkhoel nee, daoq teevq meel-nvq daoq ge nail nee maqtsil ngal yu bhai cavq bhiq cov bhiq kivq dai, saol-nvq saol-nvq-ail daoq ngaq daoq taivq-ail ge movq-ail nial.
20 Aqivq jaqbheq juq-ol, nuljuq neenoeq noeq pov noeq phal nail phao neq, yaqnoil khe-ai thaq pevq. Haqeiv nail phao neq, yaqbeiv khe-ai pevq yaoq. Thailhai ngaol-aoq, neenoeq noeq pov noeq phal nail phaoq neq, yovkav juq khe-ai, pevq yaoq.
21 Jalliq lavqkhoel bhai niailhai gevq-ai thaq nail ngaol:
“Heeqphaq Miqyail ge nail:
‘Yu nail daoq
ge nia nail tsaol-aq bhai
juq nail lavqkhoel,
ngaq nail tsaol-aq
niil juq bhai
ngal daoq ge tsao
lee nail ngaol.
Yaoq khaoq yaoq
mil yaoq bhai jaol nail
yu nail moeqthaoq
bhai juq khi
aqyu juq bhai ngal daoq
ge tsao khi ngaol-aoq,
ngaq nail daoq bhai
maq naldaiq-ail’ dai,
ge-ai thaq nail ngaol”.
22 Alheel ngel-i mail, daoq mee nia phaq ge nia nail phaq neq, Yeiqsul bhai neema thaqtsaol nail tsaol-aq nail haqbhoil bhi heeq bhi moel nail phaq pevq nail maq ngel-ail. Yeiqsul bhai neema maq thaqtsaol nail tsaol-aq juq nail haqbhoil bhi heeq bhi moel nail phaq pevq nail ngaol. Miqyail nail haqbhoil gedan nail phaq neq, Yeiqsul bhai neema maq thaqtsaol nail tsaol-aq nail haqbhoil maq ngel-ail. Yeiqsul bhai neema thaqtsaol nail tsaol-aq nail haqbhoil ngaol.
23 Khali yaq munl munl lao-ail jil lai khi yaoq gaq yaoq-ao nee daoq mee nia phaq ge thailthaiq-u phao, maq heeq nia nail tsaol-aq khi Yeiqsul bhai neema maq thaqtsaol nail tsaol-aq aol lal-u phao, nuljuq bhai naiquq uq-ail gil-aoq thaq nail ngaol dai, maq ge lal-ail laiq.
24 Thailhai ngaol-aoq, yaoq gaq yaoq-ao nee Miqyail nail haqbhoil gedan thailthaiq-u phao, Yeiqsul bhai neema maq thaqtsaol nail tsaol-aq juq khi maq heeq nia nail tsaol-aq aol lal khi ngaol-aoq, daoq al bhai ya gaiq-a nail bhaqda nee, aqyu juq nail oeqbal phaodaiq bhiq-a nail ngel-i mail, “Ngal oeqbal aol laoq thaq nail ngaol” dai, yovqgavq bhai yovqgavq noeq heeq noeq moel lal bhiq nail ngaol.
25 Aqyu juq nail neema lavqkhoel bhai oil tsail-ai thaq nail juq iqsanl phaodaiq dol lavq nail lavqkhoel nee, peevqceevq kovdoiq doiq nail lavqkhoel nee gaolbeiv khi Miqyail bhai uqhuq thaoq nail ngaol. “Miqyail nuljuq nee mail maldil jaol-ail nial” dai, aqyu juq ge nail ngaol.
Uqhuq thaoq nail ganl
26 Thailhai phal-iq neq, aqivq jaqbheq juq-ol, nuljuq jil lai-u phao, gul gul-ail tsiqeeq nail, cavq bhiq cov bhiq nail, phaodaiq bhiq nail, daoq mee nia phaq ge nail, al nail daoqceevq oil dov nail, yaoq gaq yaoq-ao nee teevq gaq teevq phaq nl nail ngaol. Yu eeq lal heel lal dai, yaoq phaq yaoq-ao nee nl yaoq.
27 Daoq mee nia phaq ge nia nail tsaol-aq jaol haq neq, nvq gaq hail gaq bhai taivq-ail bhi ge yaoq. Teevq gaq gil haq teevq gaq ge gaq haq neq, teevq gaq neq, daoqceevq bhi oil dov yaoq.
28 Thailhai ngaol-aoq, daoqceevq oil dov nail tsaol-aq maq jaol haq neq, daoq mee nia phaq ge nail al gaq Khali yaq munl lavqkhoel bhai aqtsi tsu dai bhiq naq lai khi, Miqyail khi mail aivq nail gaiqlaq bhai taivq-ail, ge nail tsaq nail ngaol.
29 Miqyail nail haqbhoil gedan nail tsaol-aq nvq gaq hail gaq bhi ge khi, yaoq juq yaoq neq, daoq al bhai bhi saol-nvq daiq yaoq.
30 A bhai jaoldeel-nvq thaq nail tsaol-aq teevq gaq ganav Miqyail-i mail phaodaiq bhiq nail teevq phaq ganav ya haq neq, daoq ge thailthaiq nail gaq bhai teevq yanq bhiq naq lai yaoq.
31 Tsaol-aq iqsanl saol oil khi, gaq kav lal dai, nuljuq iqsanl teevq gaq khi-a teevq gaq, Miqyail nail haqbhoil gedan kivq nail ngaol.
32 Miqyail nail haqbhoil gedan nail tsaol-aq aivq nail kovpavq yuq-u phao, yovqgavq bhai yovqgavq ya gaq lai nail ngaol.
33-34 Khul khi mail dai ngal-aq neq, Miqyail neq, suqsaq nail phaq bhi dov lal nail gaq pevq nail maq ngel-ail. Aivq neq, neesal-ovq nail phaq bhi dov lal nail gaq pevq nail ngaol. Khali yaq munl lavqkhoel bhai aol jiav nail khe-ai, uqhuq thaoq-u phao, yaqmai-aq juq neq, daoq maq ge dai, aqtsi tsu dai jaol nail tsaq nail ngaol. Aoldaoq kovqdaoq nail lavqkhoel bhai gevq-ai thaq nail khe-ai, yu nail kov-uvq bhai ya jaol nail ngaol.
35 Aqyu juq teevq phaq ganav heeq kivq movq haq neq, ilkhaol bha kovq ail khi, yovqgavq nail yaqyov-aq bhai naldaiq nail tsaq nail ngaol. Khul khi mail dai ngal-aq neq, uqhuq thaoq-u phao, daoq ge nail neq, haqsil heeq phaq-ail tsaq nail ngaol.
36 Miqyail nail daoq nuljuq nail lavqkhoel nee dov lal nail laiq. Maq ngel haq neq, nuljuq jaol nail bha taivq-ail kev lee nail laiq.
37 Tsaol-aq teevq gaq ganav, “Ngal neq, Miqyail nail haqbhoil gedan nail gaq ngaol” dai, noeq nail maqkhaiq, “Ngal neq, Aqhaqlal phao khe kovpavq ya-a nail ngaol” dai, noeq nail maqkhaiq, ngaq-i mail nuljuq bhai gevq bhoel-ai lavq-a nail juq neq, Yeiqsul-i mail bivq-a nail daoq ngaol dai, aivq heeq nia nail tsaq nail ngaol.
38 “Ngal maq heeq kivq-ail” dai, aivq ge haq neq, nvjuq iqsanl aivq bhai maq heeq kivq-ail.
39 Alheel ngel-i mail, ngaq nail aqivq jaqbheq juq-ol, Miqyail nail haqbhoil gedan nail kovpavq bhai oil movq deedee yaoq. Daoq meeq nia phaq ge nia nail bhai iqsanl thaq lav tsoiq.
40 Thailhai ngaol-aoq, yaoq phaq yaoq-ao nee heldaiq meeq dai, aivq nail jaol duq bhai tsaq dai nl yaoq.