16
Khali yaq nail haqbhoil phul danq nail ganl
1 Miqyail nail tsaol-aq nail haqbhoil phul danq nail ganl neq, niailhai ngaol. Gaqlaqtil milkhaoq bhai jaol nail Khali yaq munl juq bhai ngaq-i mail ge bhiq-ai thaq nail khe-ai, nuljuq iqsanl danq yaoq.
2 Ngal lal kev-u phao, nuljuq bhai phul maq ya tavq dai, niailhai nl yaoq. Jaol n teevq jao nail lavqkhoel iqmoeq khe n-gaol, nuljuq yaoq gaq yaoq-ao nee, yovqgavq-i mail ya-ai thaq nail khe-ai phul danq nail haqbhoil oil dov khi lainq thaq-ai yaoq.
3 Ngal lal kev-u phao, nuljuq-i mail danq-ai thaq nail phul al, Yeiqlulsaqlaiq meenq bha bhi oil ha lai nail dai, nuljuq neema tsaq nail tsaol-aq bhai tsel khi, aqyu juq nail haqbhoil salkhil khanq nail haoqgavq gevq gaq haq neq, ngal aqyu juq bhai bhi oil ha lai nail ngaol.
4 Ngal iqsanl lai heeq phaq-ail tsaq haq neq, aqyu juq ngaq-ai nee mail lai nia nail ngaol.
Paolluv-i mail lai nail gailkhaol nail ganl
5 Ngal Maqgeiqdaolnil milkhaoq bhai tsao gaq haq neq, nuljuq jaol nail bha lee naol. Khul khi mail dai ngal-aq neq, ngal Maqgeiqdaolnil milkhaoq bhai lai heeq phaq-ail tsaq nail ngaol.
6 Ngal kha phao ya ail khi ngaol-aoq, nuljuq ngal loq nail phaq bhai lainq lavq khi iqmoeq phao hevq ha-ail lavq dai, ngal nuljuq jaol nail bha micil tsaq dai jaol naol dai, noeq-ai thaq nail ngaol. Coevqjieiv jieiv nail yanq bhai nuljuq jaol nail bha jaol naol dai, noeq-ai thaq nail ngaol.
7 Khul khi mail dai ngal-aq neq, niil aq-il nuljuq jaol nail bha teevq yanq taivq-ail nalga lal khi iqmoeq phao gaoq ail nail neq, ngaq bhai neekhaol maq sil lal-il. Miqyail neema tsaq haq neq, ngal nuljuq jaol nail bha micil tsaq dai jaol naol dai, noeqthunq-ai thaq nail ngaol.
8 Bheiqdeiqgoldeiq bhaoqaiq lav sav-u phao kev dai, ngal niilniai Eilpheilsu meenq bhai jaol naol.
9 Khul khi mail dai ngal-aq neq, ngal ganl aqmeeq-ai nl kivq dai, gailkhaol phao-ai thaq nail ngaol. Lav tsoiq nail tsaol-aq iqsanl maodai jaol nail ngaol.
10 Tilmolseiq nuljuq jaol nail bha kev lal haq neq, aivq nuljuq nee mail jaol-u phao, khaoq maq ya laol dai, lav sav bhiq yaoq. Khul khi mail dai ngal-aq neq, aivq iqsanl ngaq-ai khe-ai, Miqyail nail ganl nl nail tsaol-aq ngaol.
11 Alheel ngel-i mail, teevq gaq-ail aivq bhai maq ev dai, thaq nl bhiq. Aivq nvjuq jaol nail bhai aqmeeq-ai kovq kev lee nia dai, tsaojao-ai bhiq yaoq. Ngal khi aqivq jaqbheq Khali yaq juq, aivq bhai daonq thailthaiq nail ngaol.
12 Ngaq nail jaqbheq Aqpaolluv nail ganl neq, niailhai ngaol. Aqivq jaqbheq nee mail Gaolliqthu meenq bhai lai yaoq dai, ngal aivq bhai hal deedee khi ngaol-aoq, aivq niil aq-il nuljuq jaol nail bha lal movq nail neema teevq peivq-ail maq aol-il. Aqyanq tsaq lal haq neq, aivq nuljuq jaol nail bha lal nail ngaol.
Haoqnao naosaq khe daoq
13 Aqgeel geel dai, jaol yaoq. Neema thaqtsaol nail lavqkhoel ivqdao dai jaol yaoq. Geesil nail neema maq aol dai, doevq yaoq. Gaq teevq bhee bhi aol yaoq.
14 Nuljuq-i mail khal nl nail yaoq phaq yaoq-ao nee goil nail gaiq-a nail lavqkhoel nee nl yaoq.
15 Aqivq jaqbheq juq-ol, nuljuq heeq nia nail khe-ai, Aqgaqyal milkhaoq lavqkhoel bhai iqmoeq ilmoeq Khali yaq pevq lal-a nail juq neq, Saqteiqphaq phaqyaq mayaq ngaol. Miqyail nail tsaol-aq nail haqbhoil ganl nl nail dai khi, aqyu juq nail aqmaol av bhiq-ai thaq nail bhai iqsanl, nuljuq heeq nia nail ngaol.
16 Nuljuq alheel nail tsaol-aq nail kov-uvq bhai maqkhaiq, aqyu juq khe-ai ganl nl nail tsaol-aq nail kov-uvq bhai maqkhaiq, aqmeeq-ai jaol yaoq dai, ngal nuljuq bhai hal nail ngaol.
17 Saqteiqphaq, Phaoqdulnav khi Aqgaqyaqgul aqyu juq ngal jaol nail bha kev lee-a nail ngel-i mail, ngal lavqkhiq tsail deedee-ail nial. Khul khi mail dai ngal-aq neq, ngal nuljuq bhai maq ya moel khi ngaol-aoq, aqyu juq bhai ya moel-a nail ngel-i mail, neema sal-ail nial.
18 Aqyu juq neq, ngaq nail neema bhai iqsanl, nuljuq nail neema bhai iqsanl aqsal bhi sal lal nail ngaol. Niil heel nail tsaol-aq bhai ev yaoq.
19 Aqsil-aq milkhaoq bhai jaol nail Khali yaq munl juq nuljuq bhai noeq moel naol dai, daoq cavq cavq bhoel-ai lavq-a nail ngaol. Aqgullav, Bhilgillav aqyu nvq maolyaq khi aqyu nvq gaq nail ilkhaol bhai jil lai nail Khali yaq munl iqsanl, Yeiqsul nail lavqkhoel nee nuljuq bhai noeq moel deedee naol dai, daoq cavq cavq bhoel-ai lavq-a nail ngaol.
20 Aqivq jaqbheq Khali yaq iqsanl mail nuljuq bhai noeq moel naol dai, daoq cavq cavq bhoel-ai lavq-a nail ngaol. Nuljuq teevq gaq nee teevq gaq meeq nail haol nail lavqkhoel aqlavq he yaoq.
21 Ngal neq, Paolluv ngaol. Nuljuq bhai noeq moel naol dai, ngaq nail aqlavq-i mail nuljuq bhai haoqgavq niil gevq bhoel-ai lavq-a nail ngaol.
22 Tsaol-aq teevq gaq ganav Yeiqsul bhai maq gaiq-a haq neq, geeqlaoq aqdoil ya dei-eiq. Heeqphaq-ol, lee yaoq dei-eiq.
23 Heeqphaq Yeiqsul nail geeqlaoq eeljaol nuljuq nail kovtavq bhai jiav dei-eiq.
24 Ngaq nail goil nail gaiq-a nail phaq Yeiqsul Khali nail lavqkhoel bhai nuljuq iqsanl nail kovtavq bhai jiav dei-eiq. Aqmiq.