2
Eeq deedee nail hevqkovq nail phaq nail ganl
1 Alheel ngel-i mail, ngadao-i mail ya gaiq-a nail daoq bhai, maq ya jiiv dov-ail dai, aqmeeq-ai ya naldaiq nail ngaol.
2 Miqyail-i mail nqtavq gaqkhoel bhai bhi ge-a nail daoq al daoq neq, ivq nail ngel-i mail, daoq al daoq bhai nl bheeq nail khul phaq maqkhaiq, maq naldaiq nail khul phaq maqkhaiq, alhai maq meeq nail phaq nl nail tsaol-aq juq bhai, yovqgavq bhai geel-nvq nail khe-ai, Miqyail-i mail yalkhaq dal lavq nail bhai ya daq nail ngaol.
3 Thailhai phal-iq neq, ngadao mao-ail eeq mao-ail meeq nail hevqkovq nail niil phaq bhai maq naldaiq haq neq, khalhai khi jel-ail nia nail-aiq. Iqmoeq-u phao nee, hevqkovq nail ganl al ganl Heeqphaq Yeiqsul ge bhiq-a nail ngaol. Al bhai ya gaiq-a nail tsaol-aq, “Ganl al maldil tsaq nail ngaol” dai, nvjuq bhai ge lavq-a nail ngaol.
4 Miqyail iqsanl, bhi heeq bhi moel nail juq, noeq-u maq dov nail juq, bhaqaoq mao-ail eeq nail ganl juq khi, aivq neema tsaq nail khe-ai, Meeqnail Haolnail Aqhaqlal nail kovpavq juq bhoil bhiq-a nail al juq nl nail lavqkhoel nee, aivq salkhil tsao khanq-a nail ngaol.
Hevqkovq nail phaq ya dai, hevqdaiq nail gaq
5 Yaqhao khe jiav lee nail miltsaq nail ganl niil aq-il nvjuq ge thailthaiq nail ngaol. “Miltsaq al bhai uvthaiq yaoq” dai, Miqyail nqtavq gaqkhoel bhai maq khoel-ail.
6 Thailhai ngaol-aoq, tsaol-aq teevq gaq, Jalliq teevq dao nail lavqkhoel bhai niailhai salkhil khanq-ai thaq nail ngaol:
“Miqyail-ol, naol
tsaol-aq yaq nail haqbhoil
saol-nvq nail neq,
tsaol-aq yaq neq,
khul pevq nail-aiq.
Naol tsaol-aq nail
Yaqyov bhai
heldaiq phail lee-a nail neq,
Tsaol-aq nail Yaqyov neq,
khul pevq nail-aiq.
7 Naol aivq bhai
teevq yanq nail lavqkhoel,
nqtavq gaqkhoel nee
micil thaqtheq-ai thaq-al
teevq-eel ngaol.
A bhai nee ngal-aq,
seiqleiq khaoqsail khi
tsiqeeq tsiqheel
bhiq nail heel uqtsaoq,
naol aivq bhai
bhi tsaoq-a nail ngaol.
8 Naol yaoq phaq yaoq-ao nee
aivq nail aqkhil
kov-uvq bhai bhi jaol
bhi jiav-a nail ngaol” dai,
ge-ai thaq nail ngaol.
Yaoq phaq yaoq-ao nee aivq nail kov-uvq bhai bhi jaol bhi jiav-a nail dai ge nail neq, aivq nail kov-uvq bhai maq bhi jaol maq bhi jiav-a nail teevq phaq iqsanl maq jiav-ail dai, ge movq nail ngaol. Yaoq phaq yaoq-ao nee aivq nail kov-uvq bhai bhi jaol bhi jiav-a nail bhai niil aq-il ngadao maq ya moel haq-al.
9 Thailhai ngaol-aoq, Yeiqsul neq, Miqyail nail geeqlaoq eeljaol bhaqda nee, tsaol-aq yaq iqsanl nail haqbhoil sildan nail dai khi, teevq yanq nail lavqkhoel, nqtavq gaqkhoel nee micil thaqtheq-ai thaq-al teevq-eel ngaol. Aivq sil nail bhai kev dai, ya daq gaq-a nail ngel-i mail, seiqleiq khaoqsail khi tsiqeeq tsiqheel nail heel uqtsaoq, aivq bhai bhi tsaoq-a nail bhai, ngadao ya moel-a nail ngaol.
10 Khul khi mail dai ngal-aq neq, Miqyail aivq nail yaq maodai bhai seiqleiq khaoqsail jiav duq bhai hel-aivq-u phao, aqyu juq bhai hevqkovq khi hel-aivq nail gaq, haq nail aoq nail phaq daq nail lavqkhoel, Miqyail aivq bhai bhi bhee lal-a nail neq, tsaq deedee nail ngaol. Yaoq phaq yaoq-ao nee, Miqyail nail haqbhoil ngaol. Al juq iqsanl mail aivq-i mail teivq-ai thaq nail ngaol.
11 Bhi meeq bhi haol lal nail gaq khi aivq-i mail bhi meeq bhi haol lal-a nail juq, teevq gaq nail lavqkhoel nee taivq-ail dov lal-a nail ngaol. Alheel ngel-i mail, “Ngaq nail aqivq jaqbheq ngaol” dai, aqyu juq bhai khul nail bhai aivq maq haqsil-ail.
12 Aivq ge nail:
“Ngal ngaq nail
aqivq jaqbheq bhai
naoq nail aqmil
ge bhiq naol.
Aqyu juq jil lai khi
jaol nail gaoltsi bhai
ngal naoq bhai daoqsel
gul khi tsiqeeq naol” dai,
ge nail ngaol.
13 Aivq teevq pov gaoq ge nail:
“Ngal aivq bhai juq naol” dai,
ge nail ngaol.
Al ovqtavq, teevq pov gaoq ge nail:
“Heldaiq dei-eiq.
Ngal khi Miqyail-i mail
ngaq bhai bivq
lavq-a nail yaq juq
niilniai jaol naol” dai,
ge nail ngaol.
14 Yaq al juq aqsivq haqjoil phi-nq thaq nail ngel-i mail, aivq iqsanl alhai dul dai, aqsivq haqjoil phi lee-a nail ngaol. Sil nail phaq bhai uvthaiq-ai thaq nail neivq heeqphaq nail bhaqaoq bhai lav cov-a nail haqbhoil, aivq alhai phi khi sil-a nail ngaol.
15 Al ovqtavq, sil nail phaq bhai geesil nail ngel-i mail, teevq yeel yaqkav yaq jiovq nail tsaol-aq bhai bhi jel-ail nail dai khi, aivq aqsivq haqjoil ya phi-a nail ngaol.
16 Khul khi mail dai ngal-aq, nqtavq gaqkhoel bhai tsaojao-ai nail dai khi, aivq lee-a nail maq ngel-ail. Aqbhaqlaqhaq nail jeq-e jaq-a bhai tsaojao-ai lee-a nail ngaol.
17 Alheel ngel-i mail, aivq Miqyail nail ganl nl nail lavqkhoel gaoqhaq gaiq-a nia nail nee ovqtavq, saljial ivq nail Philma jiovq jiovq-ail, tsaol-aq nail oeqbal bhai phaiq bhiq nia dai, aivq yaoq phaq yaoq-ao nee nail lavqkhoel-ai aivq nail aqivq jaqbheq khe-ai, ya jiovq nail ngaol.
18 Khul khi mail dai ngal-aq neq, aivq neq, khoeq nail jiovq nail juq khi jalmul mul nail bhai ya daq daiq-a nail ngel-i mail, jalmul mul nail bhai ya daq thailthaiq nail tsaol-aq bhai tsaojao-ai nia nail ngaol.