8
Yeiqsul neq, ngadao nail Philma aqivq gaq ngaol
1 Ngaq-i mail ge movq nail ganl ganl ma neq, niailhai ngaol. Niilheel nail Philma ngadao jaol nail ngaol. Aivq neq, nqtavq kovtavq bhai jaol khi, iqsanl bhai uvthaiq nail Miqyail nail doiqbev bev ma nail lavqmal phao jaoldeel-nvq thaq nail ngaol.
2 Aivq neq, meeq nail haol nail saiqgov gov ma nail lavqkhoel bhai Miqyail nail ganl nl thailthaiq nail ngaol. Maldil saiqgov gov ma al neq, tsaol-aq-i mail cov-a nail maq ngel-ail. Miqyail-i mail cov-a nail ngaol.
3 Danq nail phaq bhi danq khi, laol nail phaq bhi laol nail dai khi, Miqyail-i mail Philma yaoq gaq yaoq-ao bhai tsel dov-ai thaq nail ngaol. Alheel ngel-i mail, Philma Yeiqsul iqsanl laol bhiq nail teevq phaq ganav ya jiav nail ngaol.
4 Aivq miltsaq kovtavq bhai jaol nail kheel nul neq, Philma maq ya jiovq-ail. Khul khi mail dai ngal-aq neq, aoldaoq kovqdaoq ge-ai thaq nail khe-ai laol bhiq nail Philma juq jaol nail ngaol.
5 Aqyu juq neq, nqtavq kovtavq bhai jiav nail saiqgov gov ma khe-ai dul nail saiqgov lavqkhoel bhai ganl nl thailthaiq nail ngaol. Saiqgov al neq, nqtavq kovtavq bhai jiav nail saiqgov gov ma nail maolkhoel ngaol. Molseiq saiqgov gov ma cov nail dai, khi-u phao, “Gaoqjaoq kovtavq-ai naoq bhai bhi moel-a nail maolkhoel khe-ai dul dai iqsanl bhai, aqmeeq-ai cov yaoq” dai, Miqyail Molseiq bhai ge bhiq-a nail ngaol.
6 Miqyail khi aivq nail tsaol-aq nail gaiqlaq bhai Yeiqsul-i mail lainq-ai thaq nail daoqma saljial al neq, meeq jaiq bhee jaiq nail saljial nail daoq bhai juq khi nl-ai thaq nail ngel-i mail, daoqma saljial aqlil nee maqtsil meeq jaiq bhee jaiq nail daoqma saljial pevq nail ngaol. Alhai dul dai, Philma al juq-i mail nl nail ganl nee maqtsil eeq jaiq nail ganl, Yeiqsul bhai av bhiq-a nail ngaol.
7 Iqmoeq-u phao ge bhiq-a nail daoqma saljial al ge duq maq jiav-ail, kheel nul neq, nvq pov teevq pov daoqma saljial ge bhiq nail maq loq-ail.
8 Thailhai ngaol-aoq, Miqyail aqyu juq bhai oeqbal thaq thaq-ail ge nail:
“Heldaiq yaoq.
Ilsaqleiqlal nail
jeq-e jaq-a khi
Yuldav nail
jeq-e jaq-a bhai,
daoqma saljial aqsivq
ngal jaq nail aqn
kev lee nail ngaol.
9 Daoqma saljial
aqsivq al neq,
aqyu juq nail
aqphiq aqbhal nail
aqlavq bhai nieivq thaiq khi
Iljiltuv milkhaoq
lavqkhoel nee
hevq dol-aivq-u phao,
ngal aqyu juq bhai
jaq-a nail daoqma
saljial khe-ai, maq dul-ail.
Khul khi mail dai
ngal-aq neq,
ngaq-i mail jaq-a nail
daoqma saljial khe-ai,
aqyu juq maq nl-ail.
Alheel ngel-i mail,
ngal aqyu juq bhai
khaonq ha-a nail ngaol dai,
Heeqphaq Miqyail
ge nail ngaol.
10 Aqyanq al jel ail-u phao,
ngal Ilsaqleiqlal nail
jeq-e jaq-a bhai
daoqma saljial aqsivq
niailhai jaq-a nail ngaol.
Ngaq nail aoldaoq kovqdaoq
aqyu juq nail neenoeq
needul lavqkhoel bhai
oil bhoel bhiq khi,
aqyu juq nail
neema kovtavq bhai
gevq bhiq nail ngaol.
Ngal neq, aqyu juq nail
Miqyail pevq khi,
aqyu juq iqsanl
ngaq nail tsaol-aq
pevq nail ngaol.
11 ‘Heeqphaq Miqyail bhai
heeq kivq thaq-ai yaoq’ dai,
yovqgavq nail
jeq-e jaq-a nail
gaiqlaq bhai maqkhaiq,
aqivq jaqbheq nail
gaiqlaq bhai maqkhaiq,
teevq gaq nee teevq gaq
cavq bhiq cov bhiq nail
maq loq-ail.
Khul khi mail dai
ngal-aq neq,
aqyu juq nail lavqkhoel khe
eeq yaq nil yaq iqsanl mail
ngaq bhai heeq nia nail ngaol.
12 Ngal aqyu juq nail oeqbal
phaiq bhiq khi mail
aqyu juq-i mail
nl-a nail laiq nail
tsa nail phaq bhai
maq noeq thaq-ail” dai,
Miqyail ge-ai thaq nail ngaol.
13 Miqyail daoqma saljial aqsivq bhai jaq-u phao, iqmoeq-u phao ge bhiq-a nail daoqma saljial al aqlil ngaol dai, ge movq nail ngaol. Maoq lal khi aqlil lil lal-a nail phaq neq, peivq-ail nail aqjail jail lal-aoq nail ngaol.