Yuldav
Gevq-a nail gaq
Haoqgavq niil keiv iqmoeq ilmoeq bhai Yuldav aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq jemao iqsanl, Yuldav-i mail gevq-a nail ngaol dai, noeq nail ngaol. Yuldav niil gaq neq, Yeiqsul nail jaqbheq ngaol. Thailhai ngaol-aoq, Yeiqsul nail jaqbheq dai maq ge mail, aivq nail algao Yaqkov khe-ai, yovqgavq bhai yovqgavq “Yeiqsul Khali nail yaqkav” ngaol dai, gevq-ai thaq nail ngaol. Yaqkov khi mail Yuldav neq, Yeiqsul nail jaqbheq ngaol. Alheel ngel-i mail, “Ngal neq, Yeiqsul Khali nail yaqkav khi mail Yaqkov nail mailnail Yuldav ngaol” dai, gevq-ai thaq nail ngaol.
Gevq-a nail aqyanq
Gevq-a nail aqyanq neq, A.D. 65-68 kovq nail gaiqlaq bhai ngaol. Yuldav haoqgavq khi mail 2 Bheiqtuvluv nail haoqgavq niil nvq keiv maodai dul lai nail ngel-i mail, teevq pav ganav juq neq, haoqgavq niil nvq keiv yanq mao-ail maq khaiq-ail nail dai, gevq thaq nail niil dai, noeq nail ngaol.
Khaq sil gaq bhai gevq bhiq-a nail
Haoqgavq niil keiv neq, khaq sil gaq bhai gevq bhiq-a nail dai, aqmil maq gevq bhoel-ai thaq khi ngaol-aoq, Miqyail-i mail khul-ai thaq nail tsaol-aq juq bhai haoqgavq niil keiv gevq bhoel-ai leevq-a nail ngaol dai, gevq-ai thaq nail ngaol. Alheel ngel-i mail, khal ngel nail bhai jaol nail Khali yaq juq bhai gevq bhiq thaq nail haoqgavq niil dai, noeq nail ngaol.
Khul bhai noeqthunq khi gevq-a nail
Haoqgavq niil keiv neq, neema thaqtsaol nail phaq nail haqbhoil laijai deedee yaoq dai, gaq bivq-a nail nee ovqtavq, Miqyail bhai maq ev nail tsaol-aq aqdoil teevq juq aol khoiq lal thailthaiq nail bhai yaolphaol yaoq dai, gevq bhiq-a ngaol. Al ovqtavq, Miqyail bhai maq ev nail tsaol-aq al juq neq, Jalliq aqlil nail lavqkhoel khe aol nail, haoqnao naosaq bhai kev dai, aqmeeq-ai maq nl nia-a nail tsaol-aq al juq khe-ai, dul nail ngaol dai, bhi heeq nia nail haqbhoil iqsanl, gevq-a nail ngaol.
1
Iqmoeq ilmoeq khe daoq
1 Ngal neq, Yeiqsul Khali nail yaqkav khi mail Yaqkov nail jaqbheq Yuldav ngaol. Miqyail-i mail khul-ai thaq nail nuljuq bhai haoqgavq niil gevq bhoel-ai leevq-a nail ngaol. Aqbhu Miqyail nuljuq bhai gaiq-a khi, Yeiqsul Khali nuljuq bhai heldaiq phail nail ngaol.
2 Gaoqhaq gaiq-a nail phaq, neesal-ovq nail phaq khi mail, goil nail gaiq-a nail phaq nuljuq nail lavqkhoel teevq pov nee teevq pov maol lal dei-eiq.
Maldil saqlaq maq ngel nail juq nail ganl
3 Ngal mailma-ail gaiq-a nail aqtsaoq juq-ol, Miqyail ngadao juq bhai hevqkovq lavq-a nail ganl ngal nuljuq bhai gevq bhoel-ai leevq movq deedee-ail nial. Thailhai ngaol-aoq, Miqyail-i mail teevq pov taivq-ail aivq nail tsaol-aq juq bhai av bhiq-ai thaq nail neema thaqtsaol nail phaq nail haqbhoil laijai deedee yaoq dai, ngal nuljuq bhai gaq bivq nail lavqkhoel haoqgavq niil gevq bhoel-ai leevq-a nail ngaol.
4 Khul khi mail dai ngal-aq neq, tsaol-aq teevq pav ganav juq nuljuq nail lavqkhoel bhai aol khoiq lal-a nail ngaol. Miqyail bhai maq ev nail tsaol-aq al juq neq, haqeiv nail phaq khi mail, aqjiivq aqcavq phaq ya nl dai, Miqyail nail geeqlaoq eeljaol bhai lav phal-a nail ngaol. Yeiqsul Khali taivq-ail ngadao bhai uvthaiq nail gaq khi mail, ngadao nail Heeqphaq pevq nail bhai, aqyu juq khaonq ha-a nail ngaol. Aqyu juq neq, yalkhaq dal nail bhai ya daq naol dai, aq-u nee mail Jalliq lavqkhoel bhai gevq-ai thaq nail ngaol.
5 Ilsaqleiqlal tsaol-aq juq bhai Iljiltuv milkhaoq lavqkhoel nee Heeqphaq Miqyail khalhai hevqkovq bhiq khi, haoqnao aqyu juq nail lavqkhoel khe neema maq thaqtsaol nail tsaol-aq juq bhai lav luq lav seil bhiq-a nail bhai ya daq-a nail ganl al nuljuq heeq nia nail ngaol. Thailhai ngaol-aoq, ngal nuljuq bhai teevq pov gaoq ge noeq movq nail ngaol.
6 Al ovqtavq, yovqgavq nail alyaq bhai khaonq ha khi yovqgavq nail jaol duq nee mail tsaol-aq nail nqtavq gaqkhoel bhai, nqmaq maqluv halyeel ivq nail hailcav-i mail pheethaiq khi, navtsee deel jaol duq bhai laol thaiq-ai thaq nail ngaol. Yalkhaq dal nail aqn n ma kev lal-u kev dai, aivq aqyu juq bhai alhai laol thaiq-ai thaq nail ngaol.
7 Alhai dul dai, Saoldoq meenq, Gaolmaollav meenq khi mail, aqjail bhai jiav nail meenq juq iqsanl, ngadao juq nail haqbhoil saol oil duq pevq nail ngaol. Meenq al juq nail lavqkhoel bhai jaol nail tsaol-aq juq neq, khaqmiq sev deedee khi, aqsivq haqjoil phao khe maq nl khaoq nail mee nia phaq nl-a nail ngel-i mail, nqmaq maqluv halyeel tovq thailthaiq nail miqjaq nail lavqkhoel, khoeq nail jiovq nail bhai ya daq nail ngaol.
8 Maldil maq ngel nail saqlaq juq iqsanl alhai dul dai, nvmav mav moel-a nail phaq bhai juq juq-ail, yovqgavq nail aqmaol bhai yovqgavq oeqbal nl-a nail ngaol. Aqyu juq neq, Miqyail uvthaiq nail bhaqaoq bhai khal nl movq-ail nl khi, nqtavq kovtavq bhai jaol nail seiqleiq khaoqsail eeq nail juq bhai khal ge movq-ail ge-a nail ngaol.
9 Nqtavq gaqkhoel juq nail lavqkhoel yu nee maqtsil eeq jaiq nail nqtavq gaqkhoel Milkheiqlal neq, sil thaq nail Molseiq nail aqmaol nail ganl nee tavq lai khi, neivq heeqphaq nee jil pheeljaq-u phao, aivq bhai khal ge movq-ail ge ge-ail yalkhaq maq dal tseq-ail. “Heeqphaq Miqyail naoq bhai khaq dei-eiq” dai, neivq heeqphaq bhai ge bhiq-a nail ngaol.
10 Thailhai ngaol-aoq, tsaol-aq niil juq neq, aqyu juq maq heeq nia nail phaq nail ganl bhai khal ge movq-ail ge nail ngaol. Aqyu juq neq, khul teevq phaq iqsanl maq saol-nvq nia nail haqtsoiq jaiqyaq khe-ai, yovqgavq-i mail heeq nia nail phaq nail haoqnao taivq-ail tsaothe nail ngel-i mail, luq-ail seil-ail nail ngaol.
11 Aqyu juq neq, geeqlaoq aqdoil ya nail ngaol. Khul khi mail dai ngal-aq, aqyu juq Gaqilnav nail haoqnao tsaothe nail ngaol. Al ovqtavq, aqyu juq phul heel bhai neekhaol jiav nail lavqkhoel, Bhaqlaq nl bheeq-a nail haoqnao tsaothe tsaothe-ail nl-a nail ngaol. Gaollav Miqyail bhai pheeq-a nail khe-ai, aqyu juq iqsanl pheeq-a nail ngel-i mail, ya luq ya seil-ail nail ngaol.
12 Nuljuq goil nail gaiq-a nail bhaoqaiq lav sav khi, jaq thailthaiq-u phao, Khali yaq juq nail seiqleiq khaoqsail bhai lav jiivq lav cavq nail phaq pevq nail ngaol. Aqyu juq jaq tavq daol tavq-u phao, yu bhai maq haqsil nail nee ovqtavq, yu bhai maq ev dai, yovqgavq nail yaol yaq bhai maq heldaiq mail, yovqgavq nail haqbhoil taivq-ail saol-nvq nail ngaol. Aqyu juq neq, lilmoel-i mail, bhoel-aivq thailthaiq nail maoq-aol maq aol nail nqdil khe-ai dul nail ngaol. Aqheeq heeq nail yanq bhai aqheeq maq heeq lee nail ngel-i mail, daoqthaoq nee mail bhi ngaoq bov khi nvq pov sil-a nail aqheeq aqbhaol khe-ai iqsanl, dul nail ngaol.
13 Aqyu juq neq, iqyaq iqma lavqkhoel eelkhaol thaoq deedee-u phao, bheelmevq dov lal nail khe-ai, aqyu juq yovqgavq-i mail haqsil nail phaq bhai, yovqgavq bhi dov lal-a nail ngaol. Aqyu juq neq, yovqgavq nail gailkhaol bhai yovqgavq maq tsaiq nail aqgil khe-ai, dul nail ngaol. Aqyu juq nail haqbhoil navtsee deel jaol duq bhai nqmaq maqluv halyeel lav sav-ai thaq nail ngaol.
14 Aqdaq nee mail aqceevq ge khal leevq-u phao, sivq yeel teevq yeel nail lavqkhoel bhai jaol-a nail Eilnaov iqsanl aqyu juq nail ganl niailhai gedan-ai thaq nail jiav nail ngaol: “Heldaiq dei-eiq, Heeqphaq Miqyail neq, aivq nail meeq nail haol nail tsaol-aq aqmeel-nvq aqsainv gaq nee mail yavq kha lee nail ngaol.
15 Tsaol-aq iqsanl bhai yalkhaq dal lee nail dai khi, aivq lee nail ngaol. Aqyu juq Miqyail bhai maq ev dai nl-ai hal-ai thaq nail ngel-i mail maqkhaiq, Miqyail bhai maq ev nail oeqbal yaq juq-i mail aivq bhai khal ge movq-ail ge doil-a nail ngel-i mail maqkhaiq, aqyu juq khoeq nail jiovq nail bhai ya daq nail ngaol” dai, gedan-ai thaq nail ngaol.
16 Tsaol-aq al juq neq, khaq mao iqsanl meel nul khi, yu bhai oeqbal thaq nail ngaol. Yovqgavq nail aqsivq haqjoil nail neekhaol sil nail haoqnao tsao the nail ngaol. Yovqgavq nail ganl bhai khaoqsail he khi, yovqgavq phao meeq lal dai, yu bhai ge meeq nia nail ngaol.
Bhi yaolphaol nail daoq khi mail gaq bivq nail daoq
17 Thailhai ngaol-aoq, ngal mailma-ail gaiq-a nail aqtsaoq juq-ol, jel lal-u phao, ngadao nail Heeqphaq Yeiqsul Khali nail gaqkhoel juq-i mail ge thaq-ail ceevq-a nail daoq bhai nuljuq thaq nioil peivq dei-eiq.
18 Aqyu juq ge nail: “Haoqnao naosaq nail yanq lavqkhoel Miqyail bhai maq ev dai, aqsivq haqjoil nail neekhaol sil dai, nl nail nee ovqtavq, uqhuq thaoq nail aol bhai khal meelnaq movq-ail meelnaq nail tsaol-aq juq dov lal nail ngaol” dai, nuljuq bhai ge bhiq-ai thaq nail ngaol.
19 Tsaol-aq al juq neq, nuljuq nail munl bhai lav pav nail tsaol-aq ngaol. Aqyu juq nail lavqkhoel bhai Aqhaqlal Miqyail maq jaol nail ngel-i mail, aqsivq haqjoil phao taivq-ail tavq lai nail phaq nl nail ngaol.
20 Ngal mailma-ail gaiq-a nail aqtsaoq juq-ol, nuljuq meeq dee haol deedee nail neema thaqtsaol nail phaq nail lavqkhoel eeq lal heel lal khi, Meeqnail Haolnail Aqhaqlal nail lavqkhoel geeqlaoq hal hal-ail jaol yaoq.
21 Miqyail nail goil nail gaiq-a nail phaq nail lavqkhoel bhai jaol ivq yaoq. Nqmaq maqluv halyeel doevq nail phaq ya dai, ngadao nail Heeqphaq Yeiqsul Khali nail gaoqhaq gaiq-a nail phaq bhai daonq daonq-ail jaol yaoq.
22 Neema thaqtsaol nail phaq bhai maq ivq nail tsaol-aq juq bhai, gaoqhaq bhiq yaoq.
23 Tsaol-aq teevq pav ganav juq ya jel-ail dai, miqjaq lavqkhoel nee he dov bhiq yaoq. Al ovqtavq, tsaol-aq teevq pav ganav juq bhai, geesil nail neema aol khi, gaoqhaq bhiq yaoq. Thailhai ngaol-aoq, aqsivq haqjoil nail neekhaol nl nail aqjiivq aqcavq phaq leivq nail aqyu juq nail aqgaq aqdoi bhai bhe yaoq.
Geeqlaoq bivq nail daoq
24 Nuljuq maq ya laiq-ail dai, Miqyail nuljuq bhai heldaiq phail nia nail ngaol. Nuljuq oeqbal thaq duq maq jiav dai, aivq nail seiqleiq khaoqsail teevq bhee jiav nail jaol duq bhai, lavqkhiq teevq tsail ya jaol lai dai iqsanl, aivq lav sav nia nail ngaol.
25 Ngadao bhai hevqkovq lavq-a nail teevq gaq teevq-eel pevq nail Miqyail, ngadao nail Heeqphaq Yeiqsul Khali bhaqda nee, seiqleiq khaoqsail maqkhaiq, eeq nail heel nail phaq maqkhaiq, bhaqaoq maqkhaiq, uvthaiq nail phaq maqkhaiq, iqmoeq ilmoeq-u nee maqkhaiq, niil aq-il maqkhaiq, nqmaq maqluv halyeel maqkhaiq, aivq nail kovtavq bhai jiav dei-eiq. Aqmiq.