4
Miltsaq nail aol bhai aqtsaoq thaq tsaoq
1 Khul khi mail nuljuq nail lavqkhoel teevq gaq nee teevq gaq neejiav jiav nail khi mail iqdaiq iqtsai dov thailthaiq nail-aiq. Aqsivq haqjoil nail neekhaol nuljuq nail aqmaol lavqkhoel bhai dev pheeljaq thailthaiq nail ngel-i mail, dov lal nail maq ngel-ail laiq.
2 Nuljuq oil movq nail phaq maq ya-a nail ngel-i mail, yu bhai heivq-a nail ngaol. Nuljuq yu nail nlmaoq bhai maivjeel jeel nail khe-ai maq ya-a nail ngel-i mail, iqdaiq iqtsai dov lal-a nail ngaol. Nuljuq Miqyail bhai maq hal-a nail ngel-i mail maq ya-al.
3 Nuljuq hal khi ngaol-aoq, maq ya-ail. Khul khi mail dai ngal-aq, nuljuq aqsivq haqjoil nail neekhaol sil dai taivq-ail, nl movq nail ngel-i mail, hal laiq nail ngaol.
4 Bheeq nail leel nail tsaol-aq juq-ol, miltsaq nail aol bhai aqtsaoq tsaoq tavq nail tsaol-aq, Miqyail bhai neejiav jiav nail tsaol-aq ngaol dai, nuljuq maq heeq kivq-ail laiq. Miltsaq nail aol bhai aqtsaoq tsaoq movq nail khul gaq maqkhaiq, Miqyail bhai neejiav jiav nail tsaol-aq pevq lal-a nail ngaol.
5 “Ngadao nail lavqkhoel bhai Miqyail-i mail oil bhoel lavq-a nail aqhaqlal bhai aivq gaiq-a deedee khi aivq nail taivq-ail bhi pevq nail ngaol” dai, Jalliq lavqkhoel bhai gevq-ai thaq nail daoq al daoq neq, aqnieivq-ail gevq-ai thaq nail niil dai, nuljuq noeq nail laiq.
6 Miqyail ngadao juq bhai geeqlaoq eeljaol maodai bivq lavq nail ngaol.
“Miqyail neq,
neema eeq nail
heel nail tsaol-aq bhai
lav tsoiq nail ngaol.
Thailhai ngaol-aoq,
neema thaqtheq nail
juq bhai neq,
geeqlaoq eeljaol
bivq nail ngaol” dai,
Jalliq lavqkhoel bhai gevq-ai thaq nail ngaol.
7 Alheel ngel-i mail, Miqyail uvthaiq nail lavqkhoel bhai aqmeeq-ai jaol yaoq. Neivq heeqphaq bhai lav tsoiq yaoq. Lav tsoiq haq neq, aivq nuljuq jaol nail nee tsaoq dol-aivq nail ngaol.
8 Miqyail nail aqjail bhai tuv dai jiil lavq yaoq. Alhai jiil lavq haq neq, aivq iqsanl nuljuq nail aqjail bhai jiil leevq nail ngaol. Oeqbal yaq juq-ol, nuljuq nail aqlavq tsiqhaol yaoq. Neenoeq nvq noeq noeq nail tsaol-aq juq-ol, nuljuq nail neema bhi haol lal yaoq.
9 Noeqhaq deedee khi nioilkhaoq khaoq nail lavqkhoel nee nioil deedee yaoq. Nuljuq-i mail helsil nail phaq nioil nail phaq bhi pevq-ail khi, lavqkhiq tsail nail phaq bhai noeqhaq nail phaq bhi pevq-ail yaoq.
10 Heeqphaq Miqyail nail sivtavq bhai neema thaqtheq khi jaol yaoq. Alhai jaol haq neq, aivq nuljuq bhai thaqeeq thaqheel lavq nail ngaol.
Aqivq jaqbheq nail kovtavq bhai oeqbal thaq thaq
11 Aqivq jaqbheq juq-ol, teevq gaq nee teevq gaq thaq ge doil. Aqivq jaqbheq Khali yaq juq bhai ge doil nail tsaol-aq maqkhaiq, oeqbal thaq nail tsaol-aq maqkhaiq, aoldaoq kovqdaoq bhai ge doil khi, oeqbal thaq nail tsaol-aq ngaol. Naol aoldaoq kovqdaoq nail kovtavq bhai oeqbal thaq haq neq, naol aoldaoq kovqdaoq bhai maq hav bhoel mail, aoldaoq kovqdaoq bhai yalkhaq dal nail tsaol-aq pevq lal nail ngaol.
12 Thailhai ngaol-aoq, aoldaoq kovqdaoq bivq lavq-a nail Miqyail teevq gaq taivq-ail yalkhaq dal nail aqkhaoqanq jiav nail ngaol. Aivq neq, bhi jel-ail nia nail bhaqaoq maqkhaiq, lav cov nail bhaqaoq maqkhaiq, jiav nail ngaol. Alheel ngel-i mail, naoq nail aqjail bhai jaol nail tsaol-aq nail kovtavq bhai oeqbal thaq nail tsaol-aq-ol naol neq, khalheel nail tsaol-aq pevq nail-aiq.
Sivtavq phao khe ganl bhai neema thaq eeq
13 “Yanqgaol maq ngel haq neq, niaohao nvjuq meenq teevq meenq ganav bhai teevq kovq jaol ail naol. A bhai jaiqgaiq gaiq khi, jailjeq ya lal nail ngaol” dai, nuljuq teevq pav ganav ge thailthaiq nail ngaol. Alhai ge nail tsaol-aq juq-ol, aqmeeq-ai naldaiq yaoq.
14 Niaohao khul pevq lal nail dai, nuljuq maq heeq nia-ail. Nuljuq aqdoevq doevq nail phaq neq, khul phaq khe-ai dul nail ngel-ail. Teevq yanq taivq-ail ya moel khi, peivq-ail nail ulcuvq eelhaq khe-ai dul nail ngaol.
15 “Miqyail neema tsaq haq neq, nvjuq aqdoevq doevq khi niailhai alhai nl naol” dai, nuljuq ge nail tsaq nail ngaol.
16 Thailhai ngaol-aoq, nuljuq neema eeq eeq-ail yovqgavq nail aqmaol bhai yovqgavq tsiqeeq thailthaiq nail ngaol. Alhai neema eeq nail phaq iqsanl mail haqeiv nail phaq pevq nail ngaol.
17 Alheel ngel-i mail, aqmeeq phaq nl dai, heeq nia khi ngaol-aoq neq, maq nl nail tsaol-aq aivq nail haqbhoil oeqbal ngaol.