11
Yeiqsul geeqlaoq hal nail ganl cavq bhiq cov bhiq-a nail
1 Teevq pov neq, Yeiqsul jaol duq teevq dao bhai jaol khi geeqlaoq hal-a nail ngaol. Aivq geeqlaoq hal gaq-u phao, aivq nail yaqlaol teevq gaq ge nail: “Heeqphaq-ol, Yaolhaq aivq nail yaqlaol bhai geeqlaoq khalhai ya hal nail ganl cavq bhiq cov bhiq-a nail khe-ai, nvjuq bhai iqsanl, cavq lavq cov lavq yaoq” dai, Yeiqsul bhai hal-a nail ngaol.
2 Aq-u phao, Yeiqsul ge nail: “Nuljuq geeqlaoq hal-u phao niailhai hal yaoq.
‘Aqbhu-ol,
naoq nail aqmil bhai
bhi ev dei-eiq.
Naol heeqphaq jiovq khi
uvthaiq nail milkhaoq
bhi kev lee yaoq.
3 Nvjuq loq nail
jaq nail daol nail phaq,
yaoq n yaoq n nee
nvjuq bhai bivq lavq yaoq.
4 Nvjuq nail oeqbal bhai
phaiq lavq yaoq.
Khul khi mail dai
ngal-aq neq,
nvjuq bhai
nl bheeq lavq bheeq
lavq-a nail tsaol-aq nail
oeqbal bhai
nvjuq phaiq
bhiq-a nail ngaol.
Oeqbal jalmul
mul nail haoqnao
nvjuq bhai thaq
bhi ail lavq-o’ dai,
hal yaoq” dai,
aqyu juq bhai cavq bhiq cov bhiq-a nail ngaol.
5 A bhai nee ngal-aq, Yeiqsul yaqlaol juq bhai niailhai tsiq ceiv khi gaoq ge bhiq-a nail ngaol: “Nuljuq nail lavqkhoel khe teevq gaq ganav hul-iq tsilma yovqgavq nail aqtsaoq nail ilkhaol bhai ail khi, ‘Aqtsaoq-ol, ngaq bhai khaqmul hail heeq bhee dai, phal lavq-o.
6 Ngaq nail aqtsaoq teevq gaq ngal jaol nail bha lal dov khi, aivq bhai khul teevq phaq iqsanl, bhi jaq nail maq jiav-il’ dai, ge bhiq-u phao,
7 ilheel gaq ge nail: ‘Ngaq bhai thaq lav suqsaq lal. Lolgov pheeqthaiq gil-aoq nail ngaol. Ngaq nail yaq ngaq-ai nee mail iqthaiq nail ngaol. Ngal thul khi, naoq bhai maq bivq kivq-ail’ dai, ge bhiq-a nail ngaol.
8 Ngal nuljuq bhai ge lavq bhel. Aivq neq, aqtsaoq pevq khi ngaol-aoq, thul iqsanl maq thul, bivq iqsanl maq bivq-al. Thailhai ngaol-aoq, tsaol-aq al gaq maq naq lai dai, hal thailthaiq nail ngel-i mail, thul khi, al gaq khal loq nail phaq bhai bivq-a nail ngaol.
9 Ngal nuljuq bhai ge lavq bhel. Hal yaoq. Hal haq neq, ya nail ngaol. Halpov yaoq. Halpov haq neq, moel nail ngaol. Lolgov bhai kov yaoq. Kov haq neq, phao lavq nail ngaol.
10 Khul khi mail dai ngal neq, hal nail tsaol-aq yaoq gaq yaoq-ao nee ya nail ngaol. Halpov nail tsaol-aq iqsanl, moel nail ngaol. Lolgov bhai kov nail tsaol-aq nail haqbhoil iqsanl, lolgov phao lavq nail ngaol.
11 Nuljuq nail lavqkhoel khe, aqbhu khul gaq maqkhaiq, yovqgavq nail yaqyov delgil hal haq neq, delgil nail haqbhoil eellel nieivq bhiq naol laiq.
12 Yavuv hal haq neq, bhoiqkeiv lavqmav nieivq bhiq naol laiq.
13 Nuljuq haqeiv nail tsaol-aq ngaol-aoq, yovqgavq nail yaq bhai yalkav aqmeeq bivq nia nail ngaol. A dai nee maqtsil, nqtavq bha jaol nail nuljuq nail Aqbhu bhai, khal hal nail tsaol-aq nail lavqkhoel bhai, aivq Meeqnail Haolnail Aqhaqlal bhi jaol lee nail ngaol” dai, aqyu juq bhai ge bhiq-a nail ngaol.
Yeiqsul khi mail Bheiqsaqbhullav nail ganl
14 Teevq n neq, yaqjaoq bhi jaoq-ail nail neivq bhai, Yeiqsul the dov-a nail ngaol. Neivq al maol dov ail-u phao, yaqjaoq al gaq daoq ge nia lal-a nail ngel-i mail, tsaol-aq iqsanl mail noeq-u maq dov dai, pevq ail-a nail ngaol.
15 Tsaol-aq teevq pav ganav juq ge nail: “Aivq neq, neivq heeqphaq Bheiqsaqbhullav bhai juq juq-ail, neivq bhai the dov nail niil” dai, ge nail ngaol.
16 Teevq pav ganav juq neq, aivq bhai laonqdaiq nail dai khi, “Nqtavq kovtavq khe bhi heeq bhi moel nail phaq nl daiq lavq yaoq” dai, ge bhiq-a nail ngaol.
17 Yeiqsul aqyu juq nail neenoeq bhai heeq nia nail ngel-i mail, aqyu juq bhai ge bhiq-a nail: “Yovqgavq nail gaiqlaq bhai bhoilpav khi, maq tsaq maq jil lai nail milkhaoq yaoq khaoq yaoq-ao nee luq-ail seil-ail nail ngaol. Maq tsaq maq jil lai nail ildaoq iqsanl, pav-ail sav-ail nail ngaol.
18 Bheiqsaqbhullav bhai juq juq-ail khi neivq bhai the dov nail niil dai, nuljuq ngaq bhai ge nail ngaol. Neivq Saqdaq neq, aqyu juq bhai aqyu juq maq tsaq maq jil lai haq neq, aivq nail milkhaoq khalhai khi ivqdao dai, jiav nia nail-aiq.
19 Ngal Bheiqsaqbhullav nail bhaqaoq bhai juq juq-ail, neivq bhai the dov nail ngel haq neq, nuljuq nail tsaol-aq juq neq, khaq sil gaq nail bhaqaoq bhai juq juq-ail khi the dov nail-aiq. Alheel ngel-i mail, nuljuq ge nail maq tsaq-ail dai, aqyu juq yalkhaq dal lal nail ngaol.
20 Thailhai ngaol-aoq, ngal Miqyail nail bhaqaoq bhai juq juq-ail, neivq bhai the dov nail ngel haq neq, Miqyail Milkhaoq nuljuq jaol nail bha kev lee-aoq nail ngaol.
21 Gaq mao-ail kav nail teevq gaq, khen kha-ao teevq bhee jiav khi aivq nail ilkhaol bhai lovq-u phao neq, yu aivq nail yalkav maq khoiq nia-ail.
22 Thailhai ngaol-aoq, aivq nee maqtsil gaq kav nail teevq gaq lal khi, aivq bhai gaq lai khi, aivq-i mail gaq juq nail khen kha-ao bhai luv dov haq neq, aivq nail yalkav bhai khoiq kivq nail ngaol.
23 Ngal jaol nail phao maq jaol nail tsaol-aq, ngaq bhai neejiav jiav nail phao jaol nail ngaol. Ngaq-ai nee mail maq gov jil-a nail tsaol-aq, gov ha nail tsaol-aq ngaol” dai, ge bhiq-a nail ngaol.
Neivq aqcavq maol kovq lal-a nail ganl
24 Yeiqsul gaoq ge nail: “Neivq aqcavq teevq maol tsaol-aq teevq gaq nail lavqkhoel nee dov ail khi, geelee deldeel jaol duq bhai gaqnaq naq duq halpov ail-u phao, maq halpov moel-al. Aq-u phao, ‘Ngaq-i mail dov lee-a nail, ngaq nail ilkhaol bhai kovq lai naol’ dai, ge khi, kovq lai-a nail ngaol.
25 Aivq kovq lai-u phao, ilkhaol al il aqmeeq-ai lav sav-ai thaq nail nee ovqtavq, yavphail-ai thaq nail bhai, ya moel-a nail ngaol.
26 Aq-u phao, aivq nee maqtsil haqeiv nail neivq sivq maol bhai khul ail khi jaol lai-a nail ngaol. Alheel ngel-i mail, tsaol-aq al gaq nail haqbhoil iqmoeq-u nee maqtsil haoqnao khe pov neq, khoeq jaiq nail ngaol” dai, ge bhiq-a nail ngaol.
Maldil geeqlaoq eeq nail juq
27 Yeiqsul alhai ge thailthaiq-u phao, tsaol-aq munl munl ma nail lavqkhoel khe yaqmai-aq teevq gaq mailma-ail ge nail: “Naoq nail aqma neq, geeqlaoq eeq nail ngaol” dai, aivq bhai ge bhiq-a nail ngaol.
28 Yeiqsul ge nail: “Maldil geeqlaoq eeq nail juq neq, Miqyail nail daoq naldaiq nail juq ngaol” dai, ge bhiq-a nail ngaol.
Mao-ail haqeiv nail niil yeel neq, bhiq heeq bhiq moel nail phaq hal nail ngaol
29 Tsaol-aq munl munl ma juq mao lal thailthaiq-u phao, Yeiqsul ge nail: “Niil yeel khe tsaol-aq neq, mao-ail haqeiv nail tsaol-aq ngaol. Alheel ngel-i mail, aqyu juq bhi heeq bhi moel nail phaq hal nail ngaol. Thailhai ngaol-aoq, Yaolnav nail bhi heeq bhi moel nail phaq maq ngel haq neq, yaoq phaq yaoq niil yeel bhai maq bhi moel-ail.
30 Yaolnav neq, Nilnaqbheiq meenq bhai jaol nail tsaol-aq juq nail haqbhoil, bhi heeq bhi moel nail phaq pevq nail khe-ai, Tsaol-aq nail Yaqyov iqsanl, niil yeel nail tsaol-aq nail haqbhoil bhi heeq bhi moel nail phaq pevq nail ngaol.
31 Yalkhaq dal-u n-gaol, pul-nvq phao jiav nail milkhaoq khe heeqphaqma, niil yeel nail tsaol-aq nee mail thul lal khi, niil yeel khe tsaol-aq bhai yalkhaq dal nail ngaol. Khul khi mail dai ngal-aq neq, neenoeq neekha mao-ail eeq nail heeqphaq Saollavmoq nail daoq naldaiq lal nail dai khi mail, nqjail miljail nee mail aivq lal thaq nail ngaol. Niilniai Saollavmoq nee maqtsil eeq nail gaq jaol nail ngaol.
32 Yalkhaq dal-u n-gaol, Nilnaqbheiq meenq bhai jaol nail tsaol-aq juq, yeel niil yeel khe tsaol-aq nee mail thul lal khi, niil yeel nail tsaol-aq bhai yalkhaq dal nail ngaol. Khul khi mail dai ngal-aq neq, Yaolnav-i mail daoq cavq daoq cov cov bhiq-a nail ngel-i mail, aqyu juq oeqbal noeq pov-a nail ngaol. Niilniai Yaolnav nee maqtsil eeq jaiq nail gaq jaol nail ngaol” dai, ge bhiq-a nail ngaol.
Aqmaol khe aqbhaq
33 Yeiqsul gaoq ge nail: “Phalmanq tovq khi, bhallal phao tsiq thaq nail maqkhaiq, pheeqdeel-i mail movqtsaoq-ail nail maqkhaiq, teevq gaq iqsanl maq nl daiq-al. Khal aol lal nail tsaol-aq iqsanl mail aqbhaq bhai ya moel dai, daqmoe bha tsiq dav-ai nail ngaol.
34 Maivneev neq, aqmaol nail phalmanq pevq nail ngaol. Naoq nail maivneev moel kivq haq neq, naoq nail aqmaol maol lao-ail aqbhaq aqmeeq-ai ya nail ngaol. Naol maivneev maq moel kivq haq neq, naoq nail aqmaol maol lao-ail navtsee dai, pevq-ail nail ngaol.
35 Alheel ngel-i mail, naoq nail lavqkhoel bhai aol nail aqbhaq navtsee dai maq ya pevq-ail dai, yaolphaol yaoq.
36 Naoq nail aqmaol maollao-ai navtsee dai maq jiav-ail, aqbhaq taivq-ail aol haq neq, phalmanq nail aqbhaq naoq bhai bhaq nail khe-ai naoq nail aqmaol aqbhaq bhaq nail ngaol” dai, ge bhiq-a nail ngaol.
Yeiqsul Phaqliqsail juq khi aoldaoq kovqdaoq cavq nail cov nail juq bhai khaq nail ganl
37 Yeiqsul alhai ge gaq-u phao, “Ngaq nail ilkhaol bhai aoq jaq lal yaoq” dai, Phaqliqsail teevq gaq Yeiqsul bhai khul-a nail ngaol. Alheel ngel-i mail, Yeiqsul aol lai khi, aoq jaq tavq lai-a nail ngaol.
38 Aoq jaq nail maq kev lal-u phao, Yeiqsul aqlavq maq tsiq nail bhai, Phaqliqsail al gaq ya moel khi, noeq-u maq dov dai, pevq ail-a nail ngaol.
39 Aq-u phao, Yeiqsul aivq bhai ge bhiq-a nail: “Nuljuq Phaqliqsail juq neq, maiqgaoq kovqlaol bhai lavqniil phao aqmeeq-ai tsiqhaol nail ngaol. Thailhai ngaol-aoq, nuljuq nail lavqkhoel phao neq, maivjeel jeel nail phaq khi haqeiv nail phaq teevq bhee aol nail ngaol.
40 Yaqjaoq khaq lal miqthoi juq-ol, lavqniil phao teivq-a nail gaq, lavqkhoel phao iqsanl teivq-a nail maq ngel-ail laiq.
41 Lavqkhoel bhai aol nail juq, haq yaq aoq yaq juq bhai bivq yaoq. Alhai bivq haq neq, nuljuq nail haqbhoil, yaoq phaq yaoq-ao nee haol nail ngaol.
42 Phaqliqsail juq-ol, nuljuq geeqlaoq aqdoil ya nail ngaol. Nuljuq laolhaol haoldao, gaollaol yasaol khi, kha gaoq kha jal yaoq phaq yaoq-ao nee tsel bhoil teevq bhoil danq nail ngaol. Thailhai ngaol-aoq, daolcoev dai nl nail phaq khi Miqyail bhai gaiq-a nail phaq bhai, nuljuq aqphoiq maq thaq kav-il. Nuljuq niil juq bhai nl heeq phaq-ail tsaq nail nee ovqtavq, yaoq phaq yaoq-ao bhai iqsanl, aqphoiq thaq kav nail tsaq nail ngaol.
43 Phaqliqsail juq-ol, nuljuq geeqlaoq aqdoil ya nail ngaol. Khul khi mail dai ngal-aq neq, nuljuq uqhuq thaoq nail ilkhaol lavqkhoel bhai sivtavq phao jiav nail khaoqsail eeq nail doiqbev bhai jaoldeel movq-ai bhiq nail ngaol. Leiv lavqkhoel bhai tsao-u phao, yu nuljuq bhai bhi ev movq-ai bhiq nail ngaol.
44 Nuljuq geeqlaoq aqdoil ya nail ngaol. Khul khi mail dai ngal-aq neq, nuljuq neq, tsaol-aq maq moel nia nail luqdaol khe-ai dul nail ngaol. Luqdaol al bhai naoq naoq-ail tsao nail tsaol-aq juq, luqdaol niil dai, aqyu juq maq heeq nia-ail” dai, ge bhiq-a nail ngaol.
Yeiqsul aoldaoq kovqdaoq cavq nail cov nail juq bhai khaq-a nail ganl
45 Aq-u phao, aoldaoq kovqdaoq cavq nail cov nail teevq gaq ge nail: “Saqlaq-ol, naol niailhai ge nail neq, nvjuq bhai iqsanl khal ge movq-ail ge nail ngaol” dai, Yeiqsul bhai ge bhiq-a nail ngaol.
46 Yeiqsul ge kovq bhiq-a nail: “Aoldaoq kovqdaoq cavq nail cov nail nuljuq iqsanl, geeqlaoq aqdoil ya nail ngaol. Khul khi mail dai ngal-aq neq, maq phi tsaol nail yalkav, nuljuq yu bhai nieivq phi bhiq nail ngaol. Nuljuq neq, lavqnoil taivq-ail iqsanl maq thoiqtsi-ail.
47 Nuljuq geeqlaoq aqdoil ya nail ngaol. Khul khi mail dai ngal-aq neq, nuljuq nail aqphiq aqbhal juq neq, Miqyail nail haqbhoil gedan nail juq bhai deeq heivq-a nail ngaol. Nuljuq neq, aqyu juq nail luqdaol bhai kaovq-a nail ngaol.
48 Alheel ngel-i mail, nuljuq neq, nuljuq nail aqphiq aqbhal juq-i mail nl-ai thaq nail juq bhai, neema tsaq naol dai, nuljuq salkhil khanq nail ngaol. Khul khi mail dai ngal-aq neq, aqyu juq neq, Miqyail nail haqbhoil gedan nail juq bhai deeq heivq-a nail ngaol. Nuljuq neq, luqdaol al juq bhai kaovq-a nail ngaol.
49 Alheel ngel-i mail, Miqyail nail neenoeq neekha daoq niailhai ge-ai thaq nail ngaol: ‘Ngal aqyu juq jaol nail bha ngaq nail haqbhoil gedan nail juq khi gaqkhoel juq bhai khoel-ai leevq naol. Thailhai ngaol-aoq, aqyu juq Miqyail-i mail khoel-ai leevq-a nail tsaol-aq teevq pav ganav juq bhai, khoeq bhiq jiovq bhiq khi teevq pav ganav juq bhai deeq heivq nail ngaol’ dai, ge-ai thaq nail ngaol.
50-51 Alheel ngel-i mail, Aqbheiqlal nail aqsivq nee mail, laol duq khi mail meeq dee haol deedee nail jaol duq nail gaiqlaq bhai deeq heivq-a nail, Saqkhaqlil nail aqsivq bhai kev dai, miltsaq teivq-u n-gaol nee mail khal leevq-a nail Miqyail nail haqbhoil gedan nail tsaol-aq al juq nail aqsivq, niil yeel nail tsaol-aq nail kovtavq bhai kev lee nail ngaol. Ngal nuljuq bhai ge lavq bhel. Aqsivq al neq, niil yeel nail tsaol-aq nail kovtavq bhai maldil kev lee nail ngaol.
52 Aoldaoq kovqdaoq cavq nail cov nail juq-ol, nuljuq geeqlaoq aqdoil ya nail ngaol. Khul khi mail dai ngal-aq neq, nuljuq neenoeq neekha nail taovq taovqphoil nieivq thaiq-ai thaq nail ngaol. Nuljuq maq aol lai nail nee ovqtavq, aol lai movq nail tsaol-aq bhai lav tsoiq nail ngaol” dai, ge bhiq-a nail ngaol.
53-54 Yeiqsul a bhai nee dov ail-u phao, aoldaoq kovqdaoq cavq nail cov nail juq khi mail Phaqliqsail juq neq, Yeiqsul bhai neejiav jiav nail lavqkhoel nee, aivq daoq ge bheeq nail bhai halpov moel kivq dai, Yeiqsul bhai mailma-ail naldaiq naldaiq-ail khi, ganl mee nia phaq bhi ge khi, khoiq heldaiq nail ngaol.