4
Yeiqsul jalmul mul nail bhai ya daq-a nail ganl
1 Yeiqsul neq, Meeqnail Haolnail Aqhaqlal teevq bhee aol nail lavqkhoel nee, Yaoldaq laoljaol nee kovq lai-u phao, Aqhaqlal Miqyail aivq bhai haqtsoiq haqyal bha hel-aivq-a nail ngaol.
2 Aq-u phao, aivq liq tsel n bhee dai, neivq heeqphaq jalmul mul nail bhai ya daq-a nail ngaol. Yanq yaqlao al nail lavqkhoel bhai, aivq khul iqsanl maq jaq dai, jaol-a nail ngaol. Aqn al juq jel ail-u phao, aivq aoq moevq lal bhiq-a nail ngaol.
3 Aq-u phao, neivq heeqphaq Yeiqsul bhai ge bhiq nail: “Naol Miqyail nail Yaqyov ngel haq neq, lovmav niil juq bhai, khaqmul pevq lal yaoq dai, daoq bivq-ai thoq” dai, ge bhiq-a nail ngaol.
4 Yeiqsul aivq bhai ge bhiq-a nail: “Jalliq lavqkhoel bhai niailhai gevq-ai thaq nail ngaol: ‘Jaq nail phaq bhaqda nee taivq-ail, tsaol-aq aqdoevq doevq kivq nail maq ngel-ail’ ” dai, ge kovq bhiq-a nail ngaol.
5 Aq-u phao, neivq heeqphaq aivq bhai gaoqjaoq daqmoe bha hevq dal laivq khi, miltsaq kovtavq bhai khal jiav nail milkhaoq iqsanl mail, teevq yanq lavqkhoel aivq bhai bhi moel khi ge bhiq-a nail:
6 “Bhaqaoq niil juq iqsanl khi mail, milkhaoq niil juq khe seiqleiq khaoqsail iqsanl mail, ngal naoq bhai bivq naol. Niil juq iqsanl mail, ngaq bhai av lavq gil-aoq nail ngel-i mail, ngal bivq movq nail gaq bhai, ngal bivq kivq nail ngaol.
7 Alheel ngel-i mail, naol ngaq bhai uqhuq thaoq haq neq, niil juq iqsanl naoq nail pevq lal nail ngaol” dai, Yeiqsul bhai ge bhiq-a nail ngaol.
8 Aq-u phao, Yeiqsul aivq bhai ge bhiq-a nail: “Jalliq lavqkhoel bhai niailhai gevq-ai thaq nail ngaol: ‘Naol naoq nail Heeqphaq Miqyail bhai taivq-ail uqhuq ya thaoq khi, aivq nail ganl taivq-ail ya nl nail ngaol’ ” dai, ge kovq bhiq-a nail ngaol.
9 Aq-u phao, neivq heeqphaq Yeiqsul bhai Yeiqlulsaqlaiq meenq bha hel-aivq khi mail, uqhuq thaoq nail ilkhaol il ma nail khaolpoiv bha hevq dav-ai thaq khi ge bhiq-a nail: “Naol Miqyail nail Yaqyov ngel haq neq, tev kha ail yaoq.
10 Khul khi mail dai ngal-aq neq, Jalliq lavqkhoel bhai niailhai gevq-ai thaq nail ngaol:
‘Naoq bhai bhi lav sav
bhi heldaiq
phail nail dai khi,
naoq nail haqbhoil
aivq nail nqtavq
gaqkhoel bhai,
aivq khoel-ai
thaq nail ngaol.
11 Naoq nail aqkhil
lovmav bhai maq ya
ga yao-ail dai,
aqyu juq naoq bhai
tsiq nail ngaol’ ” dai,
ge bhiq-a nail ngaol.
12 Aq-u phao, Yeiqsul aivq bhai ge bhiq-a nail: “Jalliq lavqkhoel bhai niailhai gevq-ai thaq nail ngaol:
‘Naol naoq nail
Heeqphaq Miqyail bhai
thaq laonqdaiq’ ” dai,
ge kovq bhiq-a nail ngaol.
13 Neivq heeqphaq Yeiqsul bhai yaoq phaq yaoq-ao nee jalmul mul gaq-al ngal-aq neq, Yeiqsul bhai teevq yanq taivq-ail khaonq-ail ceevq khi, dov ail-a nail ngaol.
Yeiqsul iqmoeq ilmoeq ganl nl-a nail
14 Yeiqsul neq, Aqhaqlal Miqyail nail bhaqaoq aol nail lavqkhoel nee, Gaqliqlail milkhaoq bha kovq lai-a nail ngaol. Aivq nail ganl milkhaoq khaoq lao gaiq doi ail-a nail ngaol.
15 Yeiqsul aqyu juq nail uqhuq thaoq nail ilkhaol juq nail lavqkhoel bhai cavq bhiq cov bhiq-u phao, tsaol-aq iqsanl mail Yeiqsul bhai tsiqeeq nail ngaol.
Naqsaqlail meenq yaq Yeiqsul bhai maq hav-al
16 Yeiqsul aivq eeq lal-a nail Naqsaqlail meenq bhai ail kev-u phao, aivq aol jiav nail khe-ai jaol n n-gaol uqhuq thaoq nail ilkhaol bha lai-a nail ngaol. Jalliq ge nail dai khi, aivq thul lai-a nail ngaol.
17 Aq-u phao, yu aivq bhai Miqyail nail haqbhoil gedan nail Ilsaqyal-i mail gevq-ai thaq nail haoqgavq al yov bivq-a nail ngaol. Aivq Jalliq al yov pheel-u phao, niailhai gevq-ai thaq nail dao bhai moel-a nail ngaol:
18 “Miqyail nail Aqhaqlal
ngaq nail kovtavq bhai
jaol nail ngaol.
Alheel ngel-i mail,
haq nail aoq nail
tsaol-aq bhai,
lavqkhiq tsail nail
geeqlaoq daoq
bhi cavq nail khi mail,
aivq ngaq bhai
tsel dov lavq-a nail ngaol.
Pheethaiq-ai thaq nail
tsaol-aq bhai
pheel bhi khi,
maivpeivq
peivq nail tsaol-aq
maivneev moel lal
nia dai maqkhaiq,
khoeq nail keiv nail bhai
ya daq thailthaiq nail
tsaol-aq bhai bhi
jel-ail dai maqkhaiq,
daoq cavq
cavq-ail yaoq dai,
aivq ngaq bhai khoel-ai
leevq-a nail ngaol.
19 Heeqphaq Miqyail
geeqlaoq bivq nail
yanq yaqlao nail ganl
daoq cavq cavq-ail dai,
aivq ngaq bhai khoel-ai
leevq-a nail ngaol” dai,
ge nail ngaol.
20 Yeiqsul haoqgavq al, aqmeeq-ai laiqyov khi, uqhuq thaoq nail ilkhaol bhai heldaiq nail gaq bhai bivq kovq khi mail jaoldeel-a nail ngaol. Uqhuq thaoq nail ilkhaol bhai jaol nail tsaol-aq iqsanl aivq bhai heldaiq cov-ai thaq nail ngaol.
21 Yeiqsul aqyu juq bhai cavq bhiq-a nail: “Nuljuq-i mail ya gaiq-a nail Jalliq daoq niil daoq neq, yanqgaol nuljuq nail sivtavq bhai bhee lal-aoq nail ngaol” dai, ge bhiq-a nail ngaol.
22 Tsaol-aq iqsanl mail aivq bhai aqmeeq nial dai, ge nail ngaol. Khul khi mail dai ngal-aq neq, aivq nail moeqthaoq lavqkhoel nee dov lal-a nail gaoqhaq gaiq-a nia nail daoq juq bhai, noeq-u maq dov dai, pevq ail-a nail ngaol. Thailhai ngaol-aoq, tsaol-aq al juq gaoq ge nail: “Tsaol-aq niil gaq neq, Yaolsai nail yaqyov maq ngel-ail laiq” dai, aqyu juq nail gaiqlaq bhai ge pheeljaq nail ngaol.
23 Yeiqsul aqyu juq bhai ge bhiq-a nail: “Nuljuq-i mail daoqdaq daq khal leevq-a nail khe-ai, ‘Jagaq coev nail saqlaq-ol, naoq nail nalgoel bhai naol iqmoeq lav meeq yaoq. Nvjuq-i mail ya gaiq-a nail khe-ai, Gaqbheiqneiqoq meenq bhai, naoq-i mail nl-a nail ganl juq, yovqgavq nail jaol duq bhai iqsanl nl yaoq’ dai, nuljuq ge lal nail bhai dai, ngal heeq kivq nail ngaol.
24 Ngal nuljuq bhai maldil dai, ge lavq bhel. Miqyail nail haqbhoil gedan nail khul gaq maqkhaiq, yovqgavq nail jaolkhaoq jaollaoq bhai khaoqsail maq ya-ail.
25 Ngal nuljuq bhai maldil dai, ge lavq bhel. Eillilya nail yeel bhai hail kovq ovqtavq teevq pav kev dai, maoq-aol maq aol lee dai, milkhaoq khaoq lao moevq dee sivq deedee nail phaq kev lee-u phao, Ilsaqleiqlal nail jeq-e jaq-a nail lavqkhoel, miqtsiq miqma maodai gaq jaol nail ngaol.
26 Thailhai ngaol-aoq, Miqyail Eillilya bhai aqyu juq teevq gaq jaol nail bhai iqsanl maq khoel gai-aivq-al. Sildoq milkhaoq bhai jiav nail, Saqleiqbhal meenq bhai jaol nail miqtsiq miqma al gaq jaol nail bhai taivq-ail khoel gai-aivq-a nail ngaol.
27 Miqyail nail haqbhoil gedan nail Eillilsail nail yeel bhai iqsanl, Ilsaqleiqlal nail jeq-e jaq-a nail lavqkhoel bhai niaoqbhaoq daol nail maodai gaq jaol nail ngaol. Thailhai ngaol-aoq, aqyu juq nail lavqkhoel khe teevq gaq bhai iqsanl, maq bhi meeq maq bhi haol lal-al. Neiqmaq dai khul nail Sulliv tsaol-aq al gaq bhai taivq-ail, bhi meeq bhi haol lal-a nail ngaol” dai, ge bhiq-a nail ngaol.
28 Aivq alhai ge nail bhai, uqhuq thaoq nail ilkhaol bhai jaol nail tsaol-aq iqsanl mail, daoq al daoq ya gaiq-u phao, neema phail deedee lal bhiq-a nail ngaol.
29 Aqyu juq tsaoq thul lal khi, Yeiqsul bhai meenq lavqniil phao he dol-aivq khi, aqyu juq-i mail meenq daq-ai thaq nail gaoqjaoq al jaoq nail bhaqga bhai doeq kha ail nail khi mail, aivq bhai hel-aivq-a nail ngaol.
30 Thailhai ngaol-aoq, aivq neq, aqyu juq nail gaoltsi nee ail pav gai-aivq khi, dov ail-a nail ngaol.
Neivq aqcavq aol nail teevq gaq nail ganl
31 Aq-u phao, Yeiqsul Gaqliqlail milkhaoq bhai jiav nail Gaqbheiqneiqoq meenq bhai ail khi, jaol n n-gaol aivq aqyu juq bhai cavq bhiq cov bhiq-a nail ngaol.
32 Aqyu juq Yeiqsul-i mail cavq nail cov nail bhai noeq-u maq dov dai, pevq ail-a nail ngaol. Khul khi mail dai ngal-aq neq, aivq neq, bhaqaoq aol nail lavqkhoel nee, cavq bhiq cov bhiq-a nail ngaol.
33 Uqhuq thaoq nail ilkhaol al il nail lavqkhoel bhai, neivq aqcavq aol nail teevq gaq jaol nail ngaol. Aivq gul gul-ail khi ge nail:
34 “Al lol-oq, Naqsaqlail meenq yaq Yeiqsul-ol, naol nvjuq nee khalhai tavq nail-aiq. Nvjuq bhai lav cov lee-a nail laiq. Ngal naoq bhai heeq kivq naol. Naol neq, Miqyail nail Tsaolmeeq Tsaolhaol ngaol” dai, gul nail ngaol.
35 Aq-u phao, Yeiqsul neivq al maol bhai khaq khaq-ail khi ge nail: “Naol aqtsi tsu dai jaol khi aivq nail lavqkhoel nee dov ail yaoq” dai, ge bhiq-a nail ngaol. Aq-u phao, neivq al maol tsaol-aq al gaq bhai, tsaol-aq al juq nail sivtavq bhai thaiqphuq dai doeqtsuq gai-aivq khi, aivq bhai khul-ail maq lav thaoq maq lav nal dai, dov ail-a nail ngaol.
36 Aqyu juq noeq-u maq dov dai, pevq-ail khi, teevq gaq nee teevq gaq ge pheeljaq nail: “Daoq niil daoq neq, khalheel nail daoq meeq. Mao-ail eeq mao-ail kav nail bhaqaoq aol aol-ail, aivq neivq aqcavq juq bhai daoq bivq-u phao, dov ail-il” dai, ge nail ngaol.
37 A bhai nee ngal-aq, Yeiqsul nail aqmil milkhaoq khaoq lao gaiq doi ail-a nail ngaol.
Yeiqsul Bheiqtuvluv nail khoeq-oel aqma bhai bhi meeq lai-a nail
38 Yeiqsul uqhuq thaoq nail ilkhaol nee dov ail khi, Silmoq nail ilkhaol bhai aol ail-a nail ngaol. Silmoq nail khoeq-oel aqma coevqsil deedee nail ngaol. “Aivq bhai lav meeq bhiq yaoq” dai, aqyu juq Yeiqsul bhai hal nail ngaol.
39 Yeiqsul yaqmai-aq al gaq nail aqjail bhai thulphaol khi, coevqsil nail al bhai khaq-u phao, coevqsil nail al meeq lai-a nail ngaol. Yaqmai-aq al gaq teevq pov taivq-ail thul lal khi, aqyu juq bhai aoqbhaol laol bhiq-a nail ngaol.
Yeiqsul tsaol-aq maodai gaq bhai lav meeq bhiq-a nail ganl
40 Nlma ga bhoel-ail gaq-u phao, nalgoel maodai phaq nal nail tsaol-aq maodai bhai, Yeiqsul jaol nail bha hevq ha lal-a nail ngaol. Yaoq gaq yaoq-ao nee nail kovtavq bhai aivq aqlavq bavq dav bhiq khi, iqsanl bhai bhi meeq lai-a nail ngaol.
41 Neivq juq iqsanl: “Naol neq, Miqyail nail Yaqyov ngaol” dai, gul gul-ail khi tsaol-aq maodai gaq nail lavqkhoel nee dov ail-a nail ngaol. Aivq Khali ngaol dai, aqyu juq heeq nia nail ngel-i mail, Yeiqsul aqyu juq bhai daoq maq bhi ge-al.
Yeiqsul daoq cavq cavq ail-a nail ngaol
42 Nqbhaq bhaq lal-u phao, Yeiqsul a bhai nee dov ail khi, tsaol-aq maq jaol nail bha ail-a nail ngaol. Tsaol-aq munl munl ma juq, aivq bhai halpov halpov-ail khi, aivq jaol nail bha ail kev-u phao: “Nvjuq nee mail thaq pav-ail lavq-o” dai, aqyu juq aivq bhai hal nail ngaol.
43 Thailhai ngaol-aoq, aivq ge nail: “Ngal neq, meenq khi mail julgu juq bhai iqsanl, Miqyail Milkhaoq nail ganl lavqkhiq tsail nail geeqlaoq daoq ya cavq ail nail ngaol. Khul khi mail dai ngal-aq neq, Miqyail ngaq bhai niailhai bhi nl nail dai khi, khoel-ai leevq-a nail ngaol” dai, aqyu juq bhai ge bhiq-a nail ngaol.
44 A bhai nee ngal-aq, aivq Yuldav milkhaoq bhai jiav nail uqhuq thaoq nail ilkhaol juq nail lavqkhoel bhai daoq cavq cavq ail-a nail ngaol.