10
Khaqma kovq nail ganl, Yeiqsul cavq bhiq cov bhiq-a nail
1 Aq-u phao, Yeiqsul jaol duq al dao nee mail dov ail-a nail ngaol. A bhai nee ngal-aq, Yaoldaq laoljaol a phao lelkhel ceiv ail khi, al nail lao tsao ail kha khi, Yuldav milkhaoq bhai ail kev-a nail ngaol. Tsaol-aq munl munl ma aivq jaol nail bha jil lee khi, aivq khaq mao iqsanl cavq bhiq cov bhiq nail khe-ai, aqyu juq bhai cavq bhiq cov bhiq-a nail ngaol.
2 Aq-u phao, Yeiqsul bhai laonqdaiq nail dai khi, Phaqliqsail teevq pav ganav juq aivq jaol nail bha lal khi, “Yovjil neq, yovqgavq nail khaqma bhai kovq khaoq naol laiq” dai, naldaiq bhiq-a nail ngaol.
3 “Molseiq nuljuq bhai, daoq khalhai bivq-ai thaq nail-aiq” dai, Yeiqsul aqyu juq bhai naldaiq-a nail ngaol.
4 “Kovq nail haoqgavq teevq keiv gevq bhiq gaq haq neq, kovq kivq naol dai, Molseiq daoq bivq-ai thaq nail ngaol” dai, aqyu juq aivq bhai ge kovq bhiq-a nail ngaol.
5 Yeiqsul aqyu juq bhai ge bhiq-a nail: “Nuljuq neema gaol nail ngel-i mail, nuljuq nail haqbhoil daoq al daoq gevq thaq-ail ceevq-a nail ngaol.
6 Thailhai ngaol-aoq, Miqyail nqtavq miltsaq teivq-u phao, yaqyov-aq khi mail yaqmai-aq bhai teivq-a nail ngaol.
7 Alheel ngel-i mail, yaqyov-aq neq, yovqgavq nail aqbhu aqma nee gaoq ail khi, yovqgavq nail khaqma nee mail jaol ail nail ngaol.
8 Aqyu nvq gaq teevq gaq taivq-ail pevq lal nail ngaol dai, gevq-ai thaq nail ngaol. Aq-u phao, aqyu nvq gaq neq, nvq gaq maq ngel yaoq-aol. Teevq gaq teevq-eel ngaol.
9 Miqyail-i mail oil jil-ai thaq nail bhai, tsaol-aq yaq maq ya lav pav-ail” dai, ge bhiq-a nail ngaol.
10 Aqyu juq ilkhaol bhai kovq kev ail-u phao, yaqlaol juq Yeiqsul bhai, ganl al naldaiq-a nail ngaol.
11 Aq-u phao, Yeiqsul ge nail: “Tsaol-aq teevq gaq yovqgavq nail khaqma kovq khi yaoq gaq yaoq bhai hevq haq neq, yovqgavq nail khaqma bhai nl bheeq nail phaq nl-aoq nail ngaol.
12 Alhai dul dai, khaqma teevq gaq yovqgavq nail yovjil bhai kovq khi, yaoq gaq yaoq bhai maol ail haq neq, yovqgavq nail yovjil bhai nl bheeq-a nail phaq pevq nail ngaol” dai, Yeiqsul aqyu juq bhai ge bhiq-a nail ngaol.
Yeiqsul yaqnoil juq bhai geeqlaoq bivq-a nail ganl
13 Tsaol-aq teevq pav ganav juq, Yeiqsul-i mail bhi thoiqtsi nail haqbhoil, yaqnoil juq bhai hevq khi, aivq jaol nail bha lal-a nail ngaol. Thailhai ngaol-aoq, yaqnoil hevq ha lal-a nail tsaol-aq al juq bhai, yaqlaol juq-i mail khaq bhiq-a nail ngaol.
14 Alhai khaq bhiq nail bhai, Yeiqsul ya moel-u phao, neema phail lal bhiq khi yaqlaol juq bhai niailhai ge bhiq-a nail ngaol: “Yaqnoil juq ngal jaol nail bha bhi lal yaoq. Aqyu juq bhai thaq lav tsoiq. Khul khi mail dai ngal-aq neq, Miqyail Milkhaoq neq, aqyu juq kheel yaqnoil juq bhai ovq nail ngaol.
15 Ngal nuljuq bhai maldil dai, ge lavq bhel. Yaqnoil khe-ai Miqyail Milkhaoq bhai maq hav bhoel nail tsaol-aq khul gaq maqkhaiq, a bhai maq ya aol lai-ail” dai, ge bhiq-a nail ngaol.
16 A bhai nee ngal-aq, yaqnoil al juq bhai aivq tsiq khi, aqyu juq nail kovtavq bhai aqlavq bavq dav khi geeqlaoq bivq-a nail ngaol.
Hulmeeq hulbhao juq khi mail Miqyail Milkhaoq nail ganl
17 Yeiqsul gailkhaol dov ail nail khi-u phao, tsaol-aq teevq gaq tsaol leevq khi, aivq nail sivtavq bhai peevqceevq kovdoiq doiq khi ge nail: “Meeq nail saqlaq-ol, nqmaq maqluv halyeel doevq nail phaq ya kivq dai, ngal khul phaq ya nl nail-aiq” dai, Yeiqsul bhai naldaiq bhiq-a nail ngaol.
18 Yeiqsul ge nail: “Khul khi mail naol ngaq bhai meeq nail saqlaq dai, khul nail-aiq. Miqyail maq ngel nail neq, meeq nail teevq gaq-ail maq jaol-ail.
19 Naol aoldaoq kovqdaoq heeq nia nail ngaol. Yu bhai thaq lav heivq. Yu nail khaqma nee thaq bheeq thaq leel. Yu nail nlmaoq thaq khoiq. Yu bhai maq tsaq nail salkhil thaq khanq. Yu bhai goiqbhaoq bhaoq khi thaq geel jaq. Naoq nail aqbhu aqma bhai ev yaoq” dai, ge bhiq-a nail ngaol.
20 “Saqlaq-ol, ngal yaqnoil-ail jiav-u phao nee, aoldaoq kovqdaoq al juq iqsanl mail, naldaiq gil-aoq nail ngaol” dai, tsaol-aq al gaq Yeiqsul bhai ge kovq bhiq-a nail ngaol.
21 Yeiqsul aivq bhai heldaiq khi aivq bhai gaiq-a nail ngel-i mail, ge bhiq-a nail: “Naol teevq phaq loq-ai haq nail niil. Naol kovq ail khi naoq nail ildaoq maoqgaiq iqsanl mail gaoq ha khi, haq yaq aoq yaq juq bhai bhoil bhiq yaoq. Alhai nl haq neq, nqtavq kovtavq bhai mao-ail phoiq nail naoq nail phul heel ildaoq maoqgaiq jiav lal naol. Aq-u phao, naol kovq lal khi, ngaq nail haoqnao tsaothel lavq yaoq” dai, ge bhiq-a nail ngaol.
22 Tsaol-aq al gaq daoq al daoq ya gaiq-u phao, maivphaoq niaq laq khel dai pevq ail khi, noeqhaq deedee nail lavqkhoel nee kovq ail-a nail ngaol. Khul khi mail dai ngal-aq neq, aivq neq, ildaoq maoqgaiq maodai jiav nail ngaol.
23 Yeiqsul aivq nail yaqlaol juq jaol nail phao tsiq phaoq khi, “Hulmeeq hulbhao juq, Miqyail Milkhaoq lavqkhoel bhai aol lai nail neq, khadai haq nail ngel-ail” dai, ge bhiq-a nail ngaol.
24 Daoq al daoq bhai yaqlaol juq ya gaiq-u phao, noeq-u maq dov dai, pevq ail-a nail ngaol. Thailhai ngaol-aoq, Yeiqsul gaoq ge nail: “Ngaq nail yaq juq-ol, Miqyail Milkhaoq bhai aol lai nail neq, khadai haq nail ngel-ail.
25 Laolthao geevqjieivq geeq naq bhai aol lai nail neq, hulmeeq hulbhao juq Miqyail Milkhaoq lavqkhoel bhai aol lai nail nee maqtsil ngaq-aiq jaiq nail ngaol” dai, ge bhiq-a nail ngaol.
26 Aqyu juq daoq al daoq bhai ya gaiq-u phao, noeq-u maq dov dai, gaoq pevq deedee-ail khi, “Thailhai phal-iq neq, khaq sil gaq hevqkovq nail phaq ya nia nail-aiq” dai, aqyu juq nail gaiqlaq bhai naldaiq pheeljaq-a nail ngaol.
27 Yeiqsul aqyu juq bhai heldaiq khi ge nail: “Niil neq, tsaol-aq yaq nl nia nail phaq maq ngel-ail. Thailhai ngaol-aoq, Miqyail nl nia nail ngaol. Miqyail maq nl nia nail teevq phaq iqsanl maq jiav-ail” dai, ge bhiq-a nail ngaol.
Yaqlaol juq ya nail phaq
28 Aq-u phao, Bheiqtuvluv ge nail: “Heldaiq yaoq. Nvjuq yaoq phaq yaoq-ao nee khaonq ha-ail ceevq khi, naoq nail haoqnao tsaothe thailthaiq nail ngaol” dai, ge bhiq-a nail ngaol.
29 Yeiqsul ge nail: “Ngal nuljuq bhai maldil dai, ge lavq bhel. Ngaq nail haqbhoil khi mail lavqkhiq tsail nail geeqlaoq daoq nail haqbhoil, yovqgavq nail ilkhaol, aqivq jaqbheq, aqbhu aqma, yaqmiq yaqyov khi daiyal, niil juq bhai khaonq ha-ail ceevq-a nail tsaol-aq khul gaq maqkhaiq,
30 yeel niil yeel nail lavqkhoel ilkhaol, aqivq jaqbheq, aqma, yaqmiq yaqyov, daiyal, niil juq teevq yal bhoil ya kovq nail ngaol. Alheel nee mail teevq gaq khe-ai, khoeq nail jiovq nail phaq iqsanl ya daq nail ngaol. Yaqhao khe yeel lavqkhoel bhai neq, nqmaq maqluv halyeel doevq nail phaq iqsanl ya nail ngaol.
31 Thailhai ngaol-aoq, niil aq-il yu nail iqmoeq jaol nail tsaol-aq maodai yu nail haoqnao ya jaol nail ngaol. Niil aq-il yu nail haoqnao jaol nail tsaol-aq maodai yu nail iqmoeq ya jaol nail ngaol” dai, ge bhiq-a nail ngaol.
Yeiqsul aivq ya sil nail ganl, hail pov teevq pov ge-a nail
32 A bhai nee ngal-aq, aqyu juq Yeiqlulsaqlaiq meenq bha lai-a nail ngaol. Gailphail bhai lai thailthaiq-u phao, Yeiqsul aqyu juq nail iqmoeq lai-a nail ngaol. Yaqlaol juq noeq-u maq dov-ail pevq-ail khi, haoqnao phao tsaothe jaol nail tsaol-aq juq neq, geesil nail ngaol. Aq-u phao, Yeiqsul gaqkhoel tsel-nvq gaq bhai khul khi, aivq khalhai ya daq nail ganl iqsanl, aqyu juq bhai ge bhiq-a nail ngaol.
33 “Naldaiq yaoq. Ngadao juq Yeiqlulsaqlaiq meenq bha lai thailthaiq nail ngaol. Tsaol-aq nail Yaqyov neq, a bhai Philma juq khi mail aoldaoq kovqdaoq cavq nail cov nail juq nail aqlavq lavqkhoel bhai, yu-i mail av bhiq nail bhai ya daq nail ngaol. Aivq ya sil dai, aqyu juq yalkhaq dal nail ngaol. A bhai nee ngal-aq, yu nail jeq-e nail aqlavq lavqkhoel bhai av bhiq nail ngaol.
34 Aqyu juq aivq bhai khal nl movq-ail nl nail ngaol. Thaiqkhaq iqsanl thaiqbav khi, aivq bhai neeqtsaq-i mail jiivq gaq haq neq, heivq nail ngaol. Thailhai ngaol-aoq, hail n kev lal haq neq, aivq gaoq doevq kovq lal nail ngaol” dai, Yeiqsul aqyu juq bhai ge bhiq-a nail ngaol.
Yaqkov khi mail Yaolhaq jaol duq aqmeeq hal nail ganl
35 Aq-u phao, Seiqbheiqdail nail yaqyov Yaqkov khi mail Yaolhaq Yeiqsul jaol nail bha lal khi, “Saqlaq-ol, nv-nvq mail-i mail hal nail khe-ai nv-nvq mail bhai, bhi nl lavq movq-ail nial” dai, aivq bhai ge bhiq-a nail ngaol.
36 “Nul-nq nvq mail nail haqbhoil ngal khul bhi nl bhiq movq nail-aiq” dai, Yeiqsul aqyu nvq mail bhai, naldaiq bhiq-a nail ngaol.
37 Aqyu nvq mail ge nail: “Seiqleiq khaoqsail eeq nail milkhaoq lavqkhoel, naoq nail joiqjaq doiqbev kovtavq bhai naol jaoldeel-u phao, nv-nvq mail bhai lavqmal phao teevq gaq, lavqtsel phao teevq gaq dai, bhi jaoldeel lavq yaoq” dai, hal-a nail ngaol.
38 Yeiqsul ge nail: “Nul-nq nvq mail hal nail phaq bhai nul-nq nvq mail maq heeq nia-ail. Nul-nq nvq mail ngal ya daol nail khaoqanq daol tsaol naol laiq. Nul-nq nvq mail ngal ya daq nail khoeq bhiq jiovq bhiq nail phaq, daq tsaol naol laiq” dai, aqyu nvq mail bhai naldaiq bhiq-a nail ngaol.
39 “Daq tsaol daol tsaol naol” dai, aqyu nvq mail ge kovq bhiq-u phao, Yeiqsul gaoq ge nail: “Nul-nq nvq mail ngal ya daol nail khaoqanq ya daol naol. Al ovqtavq, nul-nq nvq mail ngal ya daq nail khoeq bhiq jiovq bhiq nail phaq ya daq naol.
40 Thailhai ngaol-aoq, ngaq nail lavqmal phao lavqtsel phao bhi jaoldeel dai, ngal maq nl kivq-ail. Jaol duq al neq, Miqyail-i mail tsel dov-ai thaq nail tsaol-aq nail haqbhoil lav sav-ai thaq nail ngaol” dai, aqyu nvq mail bhai ge bhiq-a nail ngaol.
41 Aqyu nvq gaq nail aqtsaoq yaqlaol tsel gaq ganl al ya gaiq-u phao, Yaqkov khi mail Yaolhaq aqyu nvq mail bhai neema phail lal bhiq-a nail ngaol.
42 Alheel ngel-i mail, Yeiqsul aqyu juq iqsanl bhai khul jil khi, niailhai ge bhiq-a nail ngaol: “Yu nail jeq-e nail heeqphaq heeq ma juq neq, milkhaoq yaq juq nail kovtavq bhai uvthaiq nail bhaqaoq jiav khi, aqivq aqtsu jiovq khi uvthaiq nail juq iqsanl yovqgavq khal noeq nail khe-ai uvthaiq nia nail bhaqaoq jiav nail ngaol dai, nuljuq heeq nia nail ngaol.
43 Thailhai ngaol-aoq, nuljuq alhai maq ya khi-ail. Nuljuq nail lavqkhoel yu nee maqtsil eeq movq heel movq nail khul gaq maqkhaiq, nuljuq nail yaqkav ya jiovq nail ngaol.
44 Nuljuq nail lavqkhoel aqivq jiovq movq nail khul gaq maqkhaiq, tsaol-aq iqsanl nail yaqkav ya jiovq nail ngaol.
45 Khul khi mail dai ngal-aq, Tsaol-aq nail Yaqyov neq, yu aivq nail yaqkav bhi jiovq nail dai khi, lee-a nail maq ngel-ail. Aivq yu nail yaqkav jiovq lee khi, tsaol-aq maodai bhai ul kovq lee nail dai khi, sildan lee-a nail ngaol” dai, ge bhiq-a nail ngaol.
Maivpeivq peivq nail Bhaqthilmail maivneev moel nia lal-a nail ganl
46 A bhai nee ngal-aq, Yeiqsul khi mail aivq nail yaqlaol juq Yeiqlilkhol meenq bhai ail kev khi pultavq, aqyu juq tsaol-aq munl munl ma juq nee mail, Yeiqlilkhol meenq nee dov ail-a nail ngaol. Aq-u phao, Thilmail nail yaqyov Bhaqthilmail dai mil-ai thaq nail maivpeivq peivq nail teevq gaq, gailkhaol gailbhaq bhai jaoldeel-nvq thaq nail ngaol. Aivq neq, hal jaq hal daol nail tsaol-aq ngaol.
47 A bhai ail thailthaiq nail al gaq, Naqsaqlail meenq yaq Yeiqsul ngaol dai, Bhaqthilmail ya gaiq-u phao, “Daqbhil nail Yaqyov Yeiqsul-ol, ngaq bhai gaoqhaq lavq yaoq” dai, aivq bhai aqkav kav dai, gul bhiq-a nail ngaol.
48 Yu maodai aivq bhai khaq bhiq khi, “Aqtsi tsu dai jaol yaoq” dai, ge bhiq-a nail ngaol. Thailhai ngaol-aoq, aivq maq naldaiq dai, iqmoeq-u nee maqtsil gul kav lal khi, “Daqbhil nail Yaqyov-ol, ngaq bhai gaoqhaq lavq yaoq” dai, gul bhiq-a nail ngaol.
49 Aq-u phao, Yeiqsul naq lai khi, “Aivq bhai khul lavq yaoq” dai, ge bhiq-a nail ngaol. Aqyu juq maivpeivq al gaq bhai khul khi ge bhiq lai-a nail: “Gaq maq bhaq dai, thul yaoq. Aivq naoq bhai khul thailthaiq nail ngaol” dai, ge bhiq-a nail ngaol.
50 Tsaol-aq al gaq aivq nail phailkhaoq heelma loev ha-ail ceevq khi, tsaoq thul khi mail, Yeiqsul jaol nail bha lal-a nail ngaol.
51 “Naoq nail haqbhoil ngal khul bhi nl bhiq movq nail-aiq” dai, Yeiqsul aivq bhai naldaiq-u phao, “Saqlaq-ol, ngaq nail maivneev moel lal dai, bhi nl lavq movq-ail nial” dai, hal bhiq-a nail ngaol.
52 “Kovq ail yaoq. Naol ngaq bhai neema thaqtsaol nail ngel-i mail, meeq lai-a nail ngaol” dai, Yeiqsul aivq bhai ge bhiq-a nail ngaol. Tsaol-aq al gaq teevq pov taivq-ail maivneev moel lal khi, Yeiqsul nail haoqnao tsaothel-aivq-a nail ngaol.