12
Aqheeq tsilju nail gaoqkhail khi mail al nail lavqkhoel bhai ganl nl nail juq nail ganl
1 A bhai nee ngal-aq, Yeiqsul aqyu juq bhai daoqma uqhuq daoq niil daoq ge bhiq-a nail ngaol: “Aq-u phao, tsaol-aq teevq gaq jaol lao thaq nail ngaol. Teevq n neq, aivq aqheeq tsilju nail aqjiiv kha khi, gaoqkhail aqmeeq-ai nl tsoiq khi, aqheeq tsilju nail ullul naoq dov duq lav sav khi, gaoqkhail bhai lovq nail ilkhaol daqmoe teevq il cov-a nail ngaol. A bhai nee ngal-aq, gaoqkhail nl nail juq bhai ngaq bhiq-ail ceevq khi, yaoq khaoq yaoq mil yaoq bhai ail-a nail ngaol.
2 Aqheeq tsilju nail aqheeq mi lal khi koevq nail yanq tsaq lal-u phao, gaoqkhail al khail khe aqheeq tsilju aqheeq aivq bhai ovq nail juq ya dai, gaoqkhail nl nail juq jaol nail bha aivq nail yaqkav teevq gaq bhi lai-a nail ngaol.
3 Thailhai ngaol-aoq, gaoqkhail nl nail juq yaqkav al gaq bhai, nieivq thaiq khi deeq khi aqnieivq-ail bhi kovq ail-a nail ngaol.
4 Yaoq pov yaoq, yaqkav yaoq gaq yaoq bhai aqyu juq jaol nail bha gaoq bhi lai-a nail ngaol. Aqyu juq yaqkav al gaq nail uqhuq deeq pav khi, khal nl movq-ail nl bhiq-a nail ngaol.
5 Yaoq pov yaoq, yaqkav yaoq gaq yaoq bhai aqyu juq jaol nail bha gaoq bhi lai-u phao, aqyu juq aivq bhai deeq heivq-a nail ngaol. Yaqkav yaoq juq yaoq mee nia gaq bhai gaoq bhi lai-u phao, aqyu juq teevq pav ganav juq bhai deeq khi, teevq pav ganav juq bhai, deeq heivq-a nail ngaol.
6 Aq-u phao, aivq mailma-ail gaiq-a nail aivq nail yaqyov teevq gaq taivq-ail jail lal-a nail ngaol. ‘Aqyu juq ngaq nail yaqyov bhai ev-ail jaol-aq’ dai, ge khi, haoqnao naosaq khe pov neq, aivq nail yaqyov bhai bhi lai-a nail ngaol.
7 Thailhai ngaol-aoq, gaoqkhail nl nail juq ge nail: ‘Aivq neq, jaiqbhoil ovq nail gaq ngaol. Yaoq. Aivq bhai heivq bhel. Alhai nl haq neq, aivq nail jaiqbhoil ngadao juq ya nail ngaol’ dai, aqyu juq nail gaiqlaq bhai ge nail ngaol.
8 A bhai nee ngal-aq, aqyu juq aivq bhai nieivq khi, heivq khi, gaoqkhail lavqniil phao he ha ail-a nail ngaol.
9 Gaoqkhail nail ilheel gaq gaoqkhail nl nail juq bhai khalhai nl bhiq nail dai, nuljuq noeq nail-aiq. Aivq kovq lal khi, aqyu juq bhai heivq khi, gaoqkhail al khail yaoq juq yaoq bhai, gaoq ngaq bhiq nail ngaol.
10-11 ‘Ilkhaol cov nail
tsaol-aq-i mail
bavq ha-a nail
lovmav al heeq,
jioivqloiv daoqthaoq bhai
kaovq-a nail
lovmav heeq ma
pevq lal nail ngaol.
Heeqphaq Miqyail-i mail
alhai nl-ai thaq al neq,
ngadao nail sivtavq bhai
noeq-u maq dov nail phaq
pevq nail ngaol’ dai,
Jalliq lavqkhoel bhai gevq-ai thaq nail bhai nuljuq maq ge daiq al laiq” dai, ge bhiq-a nail ngaol.
12 “Daoqma uqhuq daoq niil daoq ngadao juq bhai ge movq nail niil” dai, Yuldav tsaol-aq nail aqivq aqtsu juq heeq nia nail ngel-i mail, aqyu juq Yeiqsul bhai nieivq movq-ai bhiq nail ngaol. Thailhai ngaol-aoq, aqyu juq tsaol-aq munl munl ma bhai geesil nail ngel-i mail, aivq bhai maq nieivq dai, dov ail-a nail ngaol.
Heeqphaq Gailsaq bhai khaon dov bhiq nail ganl
13 Aq-u phao, khalhai khi mail Yeiqsul daoq ya ge bheeq dai, Yuldav tsaol-aq nail aqivq aqtsu juq Phaqliqsail teevq pav ganav juq khi mail Heiqlol nail tsaol-aq teevq pav ganav juq bhai, Yeiqsul jaol nail bha khoel gai-aivq-a nail ngaol.
14 Aqyu juq lal khi ge nail: “Saqlaq-ol, naol neq, maldil tsaq nail daoq taivq-ail ge nail ngaol. Naol teevq gaq bhai iqsanl maq geesil-ail dai, nvjuq heeq kivq naol. Naol maivphaoq eeq nil maq tsel dai, Miqyail nail gailkhaol daolcoev dai, cavq bhiq cov bhiq nail ngaol. Heeqphaq Gailsaq bhai khaon dov bhiq nail tsaq naol laiq. Maq tsaq-ail laiq. Ngadao juq khaon ya dov bhiq naol laiq. Maq ya dov bhiq-ail laiq” dai, Yeiqsul bhai naldaiq bhiq-a nail ngaol.
15 Aqyu juq moeqthaoq teevq phaq ge khi, neema teevq phaq aol nail bhai Yeiqsul heeq nia khi ge bhiq-a nail: “Khul khi mail nuljuq ngaq bhai laonqdaiq nail-aiq. Ngal ya moel dai, phul teevq bavq oil lavq daiq yaoq” dai, aqyu juq bhai ge bhiq-a nail ngaol.
16 Aqyu juq iqsanl oil lavq-a nail ngaol. “Khaq sil gaq nail maolkhoel, khaq sil gaq nail aqmil aol nail ngel-aiq” dai, Yeiqsul aqyu juq bhai naldaiq-u phao, “Heeqphaq Gailsaq nail niil” dai, aqyu juq ge kovq bhiq-a nail ngaol.
17 “Gailsaq bhai tavq nail phaq neq, Gailsaq bhai bivq yaoq. Miqyail bhai tavq nail phaq neq, Miqyail bhai bivq yaoq” dai, Yeiqsul aqyu juq bhai ge bhiq-u phao, aqyu juq aivq bhai noeq-u maq dov dai, pevq ail-a nail ngaol.
Gaoq doevq kovq lal nail ganl, Yeiqsul bhai naldaiq-a nail
18 A bhai nee ngal-aq, sil thaq nail tsaol-aq maq doevq kovq lal nia-ail dai, ge nail Saqduqgail teevq pav ganav juq, Yeiqsul jaol nail bha lal khi, niailhai naldaiq lal-a nail ngaol:
19 “Saqlaq-ol, Molseiq ngadao nail haqbhoil niailhai gevq-ai thaq nail ngaol. Tsaol-aq teevq gaq nail algao, yaq maq jaol lee-u nee sil haq neq, algao gaq nail jeq-e jaq-a maq ya peivq-ail dai, jaqbheq gaq aivq nail aqtsu bhai ya hevq nail ngaol dai, gevq-ai thaq nail ngaol.
20 Jel lal-u phao, mailnail sivq gaq jaol-a nail ngaol. Aqivq ivqsaq gaq khaqma hevq khi, yaq maq jaol lee-u nee mail, sil-a nail ngaol.
21 Nvq gaq teevq gaq iqsanl yaqmai-aq al gaq bhai hevq khi, yaq maq jaol lee-u nee mail sil-a nail ngaol. Hail gaq teevq gaq iqsanl alhai sil-a nail ngaol.
22 Alhai dul dai, mailnail sivq gaq sivq gaq-ail yaq maq jaol lee-al. Mailnail al juq sil gil-a ngal neq, yaqmai-aq al gaq iqsanl sil-a nail ngaol.
23 Thailhai phal-iq neq, sil thaq nail tsaol-aq gaoq doevq kovq lal-u n-gaol, yaqmai-aq al gaq khaq sil gaq nail khaqma pevq nail-aiq. Khul khi mail dai ngal-aq neq, aqyu juq mailnail sivq gaq sivq gaq-ail yaqmai-aq al gaq bhai hevq-a nail ngaol” dai, ge bhiq-a nail ngaol.
24 Yeiqsul aqyu juq bhai ge kovq bhiq-a nail: “Nuljuq neq, Jalliq bhai iqsanl, Miqyail nail bhaqaoq bhai iqsanl maq heeq nia nail ngel-i mail noeq bheeq-ai thaq nail niil.
25 Sil thaq nail tsaol-aq gaoq doevq kovq lal-u n-gaol, hevq pheel maol pheeljaq nail phaq maq bhao-ail. Nqtavq gaqkhoel khe-ai pevq lal nail ngaol.
26 Sil thaq nail tsaol-aq gaoq doevq kovq lal nail ganl ge lavq bhel. Miqyail Molseiq bhai ge bhiq-a nail khe-ai, Molseiq-i mail gevq-ai thaq nail haoqgavq lavqkhoel-ai nuljuq maq ge daiq al laiq. Jiavbuv nail ganl gevq-ai thaq nail al dao bhai, niailhai gevq-ai thaq nail ngaol: ‘Ngal neq, Aqbhaqlaqhaq nail Miqyail, Ilcav nail Miqyail khi mail Yaqkov nail Miqyail ngaol’ dai, Miqyail Molseiq bhai ge bhiq-a nail ngaol.
27 Aivq neq, sil-a nail tsaol-aq nail Miqyail maq ngel-ail. Aqdoevq doevq nail tsaol-aq nail Miqyail ngaol. Alheel ngel-i mail, nuljuq noeq bheeq deedee-ai thaq nail niil. Khul khi mail dai ngal neq, sil-a nail tsaol-aq neq, gaoq doevq kovq lal nail ngaol” dai, ge bhiq-a nail ngaol.
Aoldaoq kovqdaoq iqsanl nail lavqkhoel khe eeq jaiq nail daoq
28 Aq-u phao, aoldaoq kovqdaoq cavq nail cov nail teevq gaq, aqyu juq jil pheeljaq nail bhai ya gaiq khi, Yeiqsul aqyu juq bhai aqmeeq-ai ge kovq bhiq nail bhai ya moel-a nail ngaol. A bhai nee ngal-aq, aivq Yeiqsul jaol nail bha lal khi, “Aoldaoq Kovqdaoq iqsanl nail lavqkhoel bhai, khul daoq eeq jaiq nail-aiq” dai, aivq bhai naldaiq bhiq-a nail ngaol.
29 Yeiqsul aivq bhai ge kovq bhiq-a nail: “Eeq jaiq nail daoq neq, niailhai ngaol. Ilsaqleiqlal nail tsaol-aq juq-ol, naldaiq yaoq. Ngadao nail Heeqphaq Miqyail neq, aivq teevq gaq taivq-ail Heeqphaq ngaol.
30 Naoq nail neema iqsanl, naoq nail aqhaqlal iqsanl, naoq nail neenoeq needul iqsanl khi, naoq nail gaq iqsanl mail naoq nail Heeqphaq Miqyail bhai gaiq-a yaoq.
31 Nvq daoq teevq daoq neq, ‘Naoq nail aqmaol bhai gaiq-a nail khe-ai, naoq nail aqjail bhai jaol nail tsaol-aq bhai gaiq-a yaoq.’ Aoldaoq Kovqdaoq niil nvq daoq nee maqtsil eeq jaiq nail daoq, maq jiav-ail” dai, ge bhiq-a nail ngaol.
32 Aoldaoq kovqdaoq cavq nail cov nail al gaq ge nail: “Tsaq naol. Saqlaq-ol, Miqyail teevq gaq taivq-ail jaol khi, aivq maq ngel haq neq, Miqyail yaoq gaq yaoq maq jaol-ail dai, naol ge nail neq, tsaq deedee-ail nial.
33 Al ovqtavq, neema iqsanl, neenoeq needul iqsanl khi, gaq iqsanl aivq bhai gaiq-a khi, naoq nail aqmaol bhai gaiq-a nail khe-ai, naoq nail aqjail bhai jaol nail tsaol-aq bhai gaiq-a nail neq, miqjaq bhai bavq poiv khi laol bhiq nail iqsanl dai khi, laol bhiq nail yaoq juq yaoq nee maqtsil eeq nail ngaol” dai, Yeiqsul bhai ge bhiq-a nail ngaol.
34 Aivq aqmeeq-ai saol-nvq saol-nvq-ail, ge kovq nail bhai Yeiqsul ya moel-u phao, “Naol neq, Miqyail Milkhaoq bhai mao-ail maq eq-aoq thaq nial” dai, aivq bhai ge bhiq-a nail ngaol. A bhai nee ngal-aq, tsaol-aq teevq gaq-ail, Yeiqsul bhai khul teevq phaq iqsanl maq naldaiq tseq dai, pevq ail-a nail ngaol.
Daqbhil nail Heeqphaq khi mail Daqbhil nail Yaqyov nail ganl
35 Yeiqsul uqhuq thaoq nail ilkhaol il ma nail khainl lavqkhoel bhai cavq bhiq cov bhiq-u phao, aivq ge nail: “Khali bhai Daqbhil nail Yaqyov ngaol dai, khul khi mail aoldaoq kovqdaoq cavq nail cov nail juq ge nail-aiq.
36 Daqbhil neq, Meeqnail Haolnail Aqhaqlal bhai juq juq-ail ge nail:
‘Heeqphaq Miqyail
ngaq nail Heeqphaq bhai
ge bhiq-a nail:
Naoq bhai neejiav
jiav nail tsaol-aq bhai
naoq nail aqkhil
kov-uvq bhai
ngal bhi jaol-u
n-gaol kev dai,
ngaq nail lavqmal phao
jaoldeel yaoq’ dai,
ge bhiq-a nail ngaol.
37 Daqbhil Khali bhai Heeqphaq dai, khul nail ngaol. Thailhai phal-iq neq, aivq khalhai khi Daqbhil nail yaqyov pevq nia nail-aiq” dai, naldaiq bhiq-a nail ngaol.
Aoldaoq Kovqdaoq cavq nail cov nail juq bhai yaolphaol yaoq
Tsaol-aq munl munl ma al munl, aivq nail daoq bhai naldaiq movq-ail bhiq nail ngaol.
38 Aivq cavq bhiq cov bhiq thailthaiq-u phao, Yeiqsul teevq pov gaoq ge nail: “Aoldaoq kovqdaoq cavq nail cov nail juq bhai yaolphaol yaoq. Khul khi mail dai ngal-aq neq, aqyu juq neq, phailkhaoq heelma doi doi-ail tsao movq nail ngaol. Leiv lavqkhoel bhai tsao-u phao, yu aqyu juq bhai bhi ev movq nail ngaol.
39 Aqyu juq neq, uqhuq thaoq nail ilkhaol lavqkhoel bhai sivtavq phao jiav nail khaoqsail eeq nail doiqbev bhai jaoldeel movq-ai bhiq nail ngaol. Bhaoqaiq lav sav-u phao, khaoqsail eeq nail jaol duq bhai, jaoldeel movq-ai bhiq nail ngaol.
40 Aqyu juq neq, miqtsiq miqma juq nail ilkhaol khi ildaoq maoqgaiq iqsanl bhai khoeq jaq kav jaq khi, yu ya moel dai, geeqlaoq heelma ma dai hal nail ngaol. Aqyu juq neq, yu nee maqtsil yalkhaq dal nail bhai ya daq naol” dai, ge bhiq-a nail ngaol.
Miqtsiq miqma teevq gaq phul danq-a nail ganl
41 Aq-u phao, Yeiqsul phul danq duq nail sivtavq phao jaoldeel khi, tsaol-aq maodai phul danq lal nail bhai heldaiq thailthaiq nail ngaol. Hulmeeq hulbhao maodai gaq phul maodai oil bhoel lal-a nail ngaol.
42 Aq-u phao, haq nail aoq nail miqtsiq miqma teevq gaq lal khi, giqheel meivbhaiq nvq bhaiq oil bhoel-a nail ngaol.
43 Yeiqsul aivq nail yaqlaol juq bhai khul khi, ge bhiq-a nail: “Ngal nuljuq bhai maldil dai, ge lavq bhel. Niai khe phul danq-a nail tsaol-aq iqsanl nail lavqkhoel nee, haq nail aoq nail miqtsiq miqma niil gaq neq, yu nee maqtsil danq-a nail ngaol.
44 Khul khi mail dai ngal-aq neq, tsaol-aq al juq neq, maodai jiav nail lavqkhoel nee oil dov khi, danq-a nail ngaol. Thailhai ngaol-aoq, yaqmai-aq niil gaq neq, mao-ail haq nail lavqkhoel nee, aivq aqdoevq doevq nail haqbhoil khal jiav nail iqsanl mail oil dov khi danq-a nail ngaol” dai, ge bhiq-a nail ngaol.