2
Khil sil lavq sil sil nail teevq gaq bhai lav meeq bhiq-a nail ganl
1 Mee nia n bhee lal-u phao, Yeiqsul Gaqbheiqneiqoq meenq bhai gaoq kovq ail khi, aivq ilkhaol bhai jaol nail ganl gaiq doi ail-a nail ngaol.
2 Tsaol-aq maodai jil lal-a nail ngel-i mail, ilkhaol lavqkhoel bhai maq dail lai nail nee ovqtavq, lavqniil phao iqsanl jaol duq maq jiav-ail. Yeiqsul tsaol-aq al juq bhai Miqyail nail daoq cavq bhiq cov bhiq thailthaiq nail ngaol.
3 Aq-u phao, tsaol-aq liq gaq, khil sil lavq sil sil thaq nail tsaol-aq teevq gaq bhai, Yeiqsul jaol nail bha bal lavq-a nail ngaol.
4 Tsaol-aq teevq bhee jaol nail ngel-i mail, aqyu juq Yeiqsul jaol nail bhai maq aol lai nia-ail. Alheel ngel-i mail, Yeiqsul jaol nail teevq daol bhai, khaolpoiv bheq pav khi, bheq pav-a nail al dao nee, aqyu juq khil sil lavq sil sil nail al gaq bhai iqjial bheebhaoq nee mail phaiq kha gai-aivq-a nail ngaol.
5 Aqyu juq a dai dai-ail neema thaqtsaol nail bhai Yeiqsul ya moel-u phao, khil sil lavq sil sil nail al gaq bhai, “Yaqyov-ol, naoq nail oeqbal phaiq gaq-ao nail ngaol” dai, ge bhiq-a nail ngaol.
6 Aq-u phao, a bhai jaoldeel-nvq thaq nail aoldaoq kovqdaoq cavq bhiq cov bhiq nail teevq pav ganav juq neq, yovqgavq nail neema lavqkhoel bhai niailhai saol-nvq thailthaiq nail ngaol.
7 “Tsaol-aq thoil gaq, khalhai khi thailhai ge tseq nail meeq. Thoil neq, Miqyail bhai khal ge movq-ail ge nail khe-ai dul nail ngaol. Miqyail maq ngel nail neq, khaq sil gaq oeqbal phaiq nia nail-aiq” dai, noeq nail ngaol.
8 Aqyu juq alhai saol-nvq thailthaiq nail ganl bhai, Yeiqsul teevq pov taivq-ail heeq nia khi, niailhai ge bhiq-a nail ngaol: “Nuljuq nail neema lavqkhoel bhai khul khi mail, thailhai saol-nvq thailthaiq nail-aiq.
9 Khil sil lavq sil sil-a nail tsaol-aq niil gaq bhai khalhai ge bhiq nail, ngaq-aiq jaiq nail-aiq. ‘Naoq nail oeqbal phaiq gaq-ao nail ngaol’ dai, ge bhiq nail ngaq-aiq jaiq nail laiq. ‘Thul khi, naoq nail iqjial bavq khi tsaol-aivq yaoq’ dai, ge bhiq nail, ngaq-aiq jaiq nail laiq.
10 Tsaol-aq nail Yaqyov neq, miltsaq niil nail kovtavq bhai oeqbal phaiq nail bhaqaoq jiav nail ganl, ngal nuljuq bhai bhi heeq bhiq moel nail haqbhoil nl naol” dai, Yeiqsul ge bhiq-a nail ngaol. A bhai nee ngal-aq, khil sil lavq sil sil nail tsaol-aq al gaq bhai, ge bhiq-a nail:
11 “Thul khi, naoq nail iqjial bavq khi, ilkhaol bha kovq ail yaoq dai, ngal naoq bhai ge lavq bhel” dai, ge bhiq-a nail ngaol.
12 Aqyu juq iqsanl mail heldaiq thailthaiq-u phao, tsaol-aq al gaq thul lal khi, aivq nail iqjial lavqtsail mail bavq khi dov ail-a nail ngaol. Aqyu juq iqsanl mail, noeq-u maq dov dai, pevq-ail khi, Miqyail bhai tsiqeeq nail lavqkhoel nee ge nail: “Niilheel teevq thal-iq maq moel daiq-al” dai, ge nail ngaol.
Yeiqsul Leiqbhil bhai khul-a nail ganl
13 Yeiqsul Gaqliqlail ngaqkha daolbhaq bhai teevq pov gaoq ail-a nail ngaol. Tsaol-aq munl munl ma aivq jaol nail bha jil lal khi, aivq cavq bhiq cov bhiq-a nail ngaol.
14 Aivq iqmoeq phao gaoq ail-u phao, khaon tavq nail ilkhaol bhai, Aqlaqphail nail yaqyov Leiqbhil jaoldeel-nvq thaq nail bhai, ya moel-a nail ngaol. “Ngaq nail haoqnao tsaothel lavq yaoq” dai, Yeiqsul aivq bhai ge bhiq-u phao, aivq tsaoq thul khi, Yeiqsul nail haoqnao tsaothel-aivq-a nail ngaol.
15 A bhai nee ngal-aq, Leiqbhil nail ilkhaol bhai Yeiqsul khi aivq nail yaqlaol juq aoq jaoq jaoq khi, aoq jaq thailthaiq-u phao, khaon tavq nail tsaol-aq juq khi mail oeqbal yaq maodai iqsanl, aqyu juq nee mail jaol khi, jaq thailthaiq nail ngaol. Khul khi mail dai ngal-aq neq, aqyu juq maodai Yeiqsul nail haoqnao tsaothe nail ngaol.
16 Yeiqsul oeqbal yaq khi khaon tavq nail tsaol-aq nee jaol khi aoq jaq nail bhai, Phaqliqsail nail munl bhai tavq nail aoldaoq kovqdaoq cavq nail cov nail juq ya moel-u phao, “Khul khi mail thoil gaq khaon tavq nail tsaol-aq khi oeqbal yaq nee mail, jaq tavq daol tavq nail-aiq” dai, Yeiqsul nail yaqlaol juq bhai naldaiq bhiq-a nail ngaol.
17 Yeiqsul daoq al daoq bhai ya gaiq-u phao, aivq aqyu juq bhai ge kovq bhiq-a nail: “Jaol hal dov nail tsaol-aq, jagaq coev nail saqlaq maq loq-ail. Nal nail tsaol-aq taivq-ail loq nail ngaol. Tsaq nail daol nail tsaol-aq bhai khul nail dai khi, ngal lee-a nail maq ngel. Oeqbal yaq bhai khul nail dai khi, ngal lee-a nail ngaol” dai, ge bhiq-a nail ngaol.
Maq jaq nail aol nl nail ganl yu naldaiq nail
18 Aq-u phao, Yaolhaq nail yaqlaol juq khi Phaqliqsail juq maq jaq nail aol nl nail ngaol. Yu Yeiqsul jaol nail bha lal khi, “Yaolhaq nail yaqlaol juq khi Phaqliqsail juq nail yaqlaol neq, maq jaq nail aol nl khi ngaol-aoq, naoq nail yaqlaol juq neq, khul khi mail maq nl nail-aiq” dai, naldaiq-a nail ngaol.
19 Yeiqsul aqyu juq bhai ge kovq bhiq-a nail: “Khaqma hevq nail gaq, aivq nail aqtsaoq juq nee jaol-u phao, aqyu juq maq jaq nail aol nl naol laiq. Aivq aqyu juq nee khal jaol-u kev dai, maq jaq nail aol maq nl nia-ail.
20 Khaqma hevq nail gaq bhai aivq nail aqtsaoq juq nee mail hevq pal-aivq nail aqn kev lee nail ngaol. Aq-u n-gaol kev lee haq neq, aqyu juq maq jaq nail aol nl nail ngaol.
21 Tsaol-aq teevq gaq iqsanl, aqgaq aqdoi aqkhail bhai haqphal aqsivq-i mail phaltsaol maq dovq-ail. Dovq haq neq, dovq thaq nail phaltsaol al tsaol, aqgaq aqdoi aqkhail bhai bhi pav-ail nail ngaol. Pav-ail nail al neq, iqmoeq-u nee maqtsil pav jaiq-ail nail ngaol.
22 Alhai dul dai, tsaol-aq teevq gaq iqsanl bavkov eelpheeq aqlil bhai aqheeq tsilju nail ullul aqsivq maq hoel bhoel daiq haq-al. Hoel bhoel haq neq, aqheeq tsilju nail ullul al, bavkov eelpheeq bhai bhi pav-ail nail ngel-i mail, aqheeq tsilju nail ullul khal-ail khi, bavkov eelpheeq iqsanl cov-ail nail ngaol. Aqheeq tsilju nail ullul aqsivq neq, bavkov eelpheeq aqsivq bhai ya hoel bhoel nail ngaol” dai, ge bhiq-a nail ngaol.
Jaol n n-gaol nail ganl naldaiq nail
23 Jaol n n-gaol, Yeiqsul gov gov yal bhai ail pav-u phao, aivq nail yaqlaol juq gov gov nail cev cev-ail, tsaothe jaol nail ngaol.
24 Phaqliqsail juq Yeiqsul bhai ge bhiq-a nail: “Heldaiq. Jaol n n-gaol maq nl khaoq nail phaq, khul khi mail aqyu juq nl nail-aiq” dai, ge bhiq-a nail ngaol.
25 Yeiqsul ge kovq bhiq-a nail: “Daqbhil khi aivq nail aqtsaoq juq aoq moevq lal bhiq khi, khul teevq phaq iqsanl jaq nail maq aol-u phao, khalhai khi-a nail bhai, nuljuq teevq pov iqsanl maq ge daiq haq-al laiq.
26 Daqbhil Miqyail nail ilkhaol bhai aol lai khi, Philma Philyaq juq maq ngel nail neq, teevq gaq iqsanl maq jaq khaoq nail Miqyail bhai laol bhiq-ai thaq nail khaqmul oil jaq khi, aivq nail aqtsaoq juq bhai iqsanl bhi jaq-a nail ngaol. Ganl niil neq, Aqbhaqtaq Philma jiovq-u phao, pevq lal-a nail ganl ngaol” dai, ge bhiq-a nail ngaol.
27 Al ovqtavq, Yeiqsul ge nail: “Jaol n neq, tsaol-aq nail haqbhoil teivq-ai thaq nail ngaol. Tsaol-aq bhai neq, jaol n nail haqbhoil teivq-ai thaq nail maq ngel-ail.
28 Alheel ngel-i mail, Tsaol-aq nail Yaqyov neq, jaol n n-gaol bhai iqsanl uvthaiq nail Heeqphaq ngaol” dai, aqyu juq bhai ge bhiq-a nail ngaol.