5
Neivq aol nail Gaqdaqlal tsaol-aq teevq gaq bhai bhi meeq lai-a nail ganl
1 A bhai nee ngal-aq, aqyu juq ngaqkha a phao lelkhel bha jiav nail Gaqdaqlal milkhaoq bhai ail kev-a nail ngaol.
2 Yeiqsul laovq nee mail dov lal-u phao, neivq aqcavq aol nail tsaol-aq teevq gaq teevq pov taivq-ail luqdaol nee dov lee khi, Yeiqsul bhai thaoqphuq lee-a nail ngaol.
3 Tsaol-aq al gaq luqdaol bhai taivq-ail jaol nail ngaol. Tsaol-aq teevq gaq iqsanl, aivq bhai maq pheethaiq nia-ail. Hailcav-i mail pheethaiq khi ngaol-aoq, maq pheethaiq nia-ail.
4 Yu aivq bhai hailcav oil khi aqkhil aqlavq bhai mee nia pov pheethaiq khi ngaol-aoq, aivq nail aqlavq bhai pheethaiq-ai thaq nail hailcav he ceiv khi, aivq nail aqkhil bhai pheethaiq-ai thaq nail hailcav iqsanl ngaoq keivq nail ngaol. Aivq gaq kav deedee khi, tsaol-aq teevq gaq iqsanl aivq bhai maq lav goil nia-ail.
5 Nqkiv n-gaol maqkhaiq, luqdaol bhai khi mail gaoqjaoq doi dai gul gul-ail tsao khi, lovmav-i mail aivq nail aqmaol bhai khaoq pav khaoq sav nail ngaol.
6 Yeiqsul eqyal bha lal thailthaiq nail bhai, tsaol-aq al gaq ya moel-u phao, Yeiqsul nail sivtavq bhai tsaol-aivq khi, uqhuq thaoq-a nail ngaol.
7 Aivq mailma-ail gul gul-ail: “Iqsanl nail kovtavq bhai eeq jaiq heel jaiq nail Miqyail nail Yaqyov Yeiqsul-ol, naol ngaq bhai khalhai tavq nail-aiq. Naol ngaq bhai thaq khoeq thaq jiovq lavq dei-eiq dai, Miqyail nail sivtavq bhai ngal naoq bhai hal naol” dai, ge bhiq-a nail ngaol.
8 Khul khi mail alhai ge nail dai ngal-aq neq, neivq aqcavq al, aivq nail lavqkhoel nee dov ail yaoq dai, Yeiqsul aivq bhai ge bhiq-a nail ngaol.
9 “Naol khul dai mil-ai thaq nail-aiq” dai, Yeiqsul aivq bhai naldaiq-u phao, “Nvjuq mao-ail mao nail ngel-i mail, mao-ail mao nail genl dev nail munl munl ma dai, khul nail ngaol” dai, ge kovq bhiq-a nail ngaol.
10 “Milkhaoq niil khaoq nail lavqkhoel nee nvjuq bhai thaq the dov lavq dei-eiq” dai, aqyu juq Yeiqsul bhai hal deedee nail ngaol.
11 Gaoqjaoq al jaoq nail beivkhaiq bhai wavq mao deedee nail teevq munl gavjaq thailthaiq nail ngaol.
12 “Wavq al juq nail lavqkhoel, nvjuq bhai bhi aol ail lavq yaoq” dai, neivq aqcavq al juq Yeiqsul bhai hal-a nail ngaol.
13 Aq-u phao, Yeiqsul neivq al juq bhai bhi dov ail-a nail ngaol. Neivq aqcavq al juq dov ail khi, wavq al juq nail lavqkhoel bhai aol ail-a nail ngaol. Wavq al juq beivkhaiq bhai tsao khal-aivq khi, ngaqkha bhai ga puvq heivq gil ail-a nail ngaol. Wavq al juq neq, nvq hinl maol niidai bhee nail ngaol.
14 Wavq bhai lovq nail juq neq, tsaoq kol-aivq khi, meenq juq, julgu juq bhai ganl al ge gaiq bhiq lai-a nail ngaol. Alheel ngel-i mail, pevq lal-a nail ganl al bhai heldaiq duq nail dai khi, tsaol-aq maodai lal-a nail ngaol.
15 Aqyu juq, Yeiqsul jaol nail bha lal kev-u phao, neivq aol daiq-a nail tsaol-aq al gaq, aqgaq aqdoi doi khi jaoldeel-nvq thaq nail bhai ya moel-a nail ngaol. Aivq neema aqlil khe-ai pevq kovq lal-a nail bhai iqsanl, ya moel-a nail ngel-i mail, geesil deedee lal bhiq-a nail ngaol.
16 Iqmoeq-u nee ganl al bhai khal ya moel-a nail tsaol-aq juq, neivq aol daiq-a nail tsaol-aq al gaq khalhai pevq lal-a nail ganl khi mail, wavq al juq khalhai pevq ail-a nail ganl, yu bhai ge daiq bhiq-a nail ngaol.
17 “Nvjuq nail milkhaoq lavqkhoel nee mail dov ail lavq yaoq” dai, aqyu juq Yeiqsul bhai hal-a nail ngaol.
18 Yeiqsul laovq bhai aol ail-u phao, neivq aol daiq-a nail al gaq, “Naoq-ai nee mail bhi jaol lavq yaoq” dai, Yeiqsul bhai hal deedee-a nail ngaol.
19 Thailhai ngaol-aoq, Yeiqsul aivq bhai maq bhi jaol dai ge bhiq-a nail: “Naoq nail ilkhaol bha kovq ail khi, Heeqphaq Miqyail naoq bhai khadai gaoqhaq lavq-a nail ganl naoq nail jeq-e jaq-a bhai ge bhiq ail yaoq” dai, ge bhiq-a nail ngaol.
20 A bhai nee ngal-aq, aivq kovq ail khi, Yeiqsul aivq bhai khadai tsaojao-ai lavq-a nail ganl, Deiqgaqbhaollil milkhaoq doi dai ge bhiq-a nail ngel-i mail, tsaol-aq iqsanl mail noeq-u maq dov dai, pevq ail-a nail ngaol.
Yaqillu nail yaqmiq khi mail Yeiqsul nail phailkhaoq bhai thoiqtsi-a nail ganl
21 Yeiqsul laovq jeeq khi nia phao lelkhel bhai gaoq ceiv lal-a nail ngaol. Aivq ngaqkha daolbhaq bhai jaol-u phao, tsaol-aq munl munl ma aivq jaol nail bha jil lal-a nail ngaol.
22 Aq-u phao, Yaqillu dai mil-ai thaq nail gaq Yeiqsul jaol nail bha lal-a nail ngaol. Aivq neq, uqhuq thaoq nail ilkhaol bhai heldaiq nail aqivq teevq gaq ngaol. Aivq Yeiqsul bhai ya moel-u phao, aivq nail aqkhil daoqthaoq bhai peevqceevq kovdoiq doiq nail lavqkhoel nee gaolbeiv khi uqhuq thaoq-a nail ngaol.
23 Aivq Yeiqsul bhai ge bhiq-a nail: “Ngaq nail yaqmiq sil-aiq nail ngaol. Aivq meeq lai khi ya doevq dai, naol aivq nail kovtavq bhai aqlavq bavq dav lee lavq yaoq” dai, hal deedee nail ngaol.
24 Alheel ngel-i mail, Yaqillu nail haoqnao Yeiqsul tsaothel-aivq-a nail ngaol.
Yeiqsul nail haoqnao tsaothe jaol nail tsaol-aq mao deedee nail ngel-i mail, aivq nail teevq jaoq tsaol-aq maq thaoq pav tsaol dai, tsao jaol-nvq thaq nail ngaol.
25 Aq-u phao, tsel-nvq kovq bhee dai, aqsivq dov dov-ail nal thailthaiq nail yaqmai-aq teevq gaq jaol nail ngaol.
26 Jagaq coev nail saqlaq maodai gaq-i mail bhi lav sav daiq thaq nail ngaol. Aivq khal jiav nail phaq iqsanl mail gaoq jaq khi lav sav khi ngaol-aoq, maq meeq lai bhiq-a nail nee ovqtavq, gaoq nal jaiq lal bhiq thaq nail ngaol.
27 Aivq Yeiqsul nail ganl ya gaiq daiq-a nail ngaol. Alheel ngel-i mail, tsaol-aq munl munl ma nail gaoltsi bhai aivq aol ail khi, Yeiqsul nail haoqnaol phao nee, Yeiqsul nail phailkhaoq phaildaoq bhai thoiqtsi ail-a nail ngaol.
28 “Aivq nail phailkhaoq phaildaoq bhai taivq-ail ngal ya thoiqtsi khi ngaol-aoq, ngaq nail nalgoel niil meeq lai naol” dai, yaqmai-aq al gaq, aivq bhai aivq ge nail ngaol.
29 Yeiqsul nail phailkhaoq phaildaoq bhai thoiqtsi-a ngal-aq, teevq pov taivq-ail, aivq aqsivq dov dov-ail nal thailthaiq nail nalgoel al teevq pov taivq-ail tsil lai khi, “Ngal meeq lai-aoq nial” dai, aivq bhai aivq heeq nia-a nail ngaol.
30 “Ngaq nail lavqkhoel khe bhaqaoq dov ail-aoq nial” dai, Yeiqsul heeq nia nail ngel-i mail, aivq tsaol-aq munl munl ma bhai haoqnaol naolkovq kovq daiq khi, “Ngaq nail phailkhaoq bhai khaq sil gaq thoiqtsi-a nail-aiq” dai, naldaiq bhiq-a nail ngaol.
31 “Tsaol-aq munl munl ma juq, naoq bhai thaoq gaiq thaoq tsi thailthaiq khi ngaol-aoq, ngaq bhai khaq sil gaq thaoq tsi-a nail-aiq dai, naol naldaiq nail laiq” dai, aivq nail yaqlaol juq Yeiqsul bhai ge bhiq-a nail ngaol.
32 Thailhai ngaol-aoq, aivq nail phailkhaoq bhai thoiqtsi-a nail gaq bhai ya moel dai, Yeiqsul neq, jaoqlaol jaoqlaol dai, heldaiq-a nail ngaol.
33 Yaqmai-aq al gaq aivq nail aqmaol khalhai pevq lal-a nail bhai heeq nia-a nail ngel-i mail, geesil khi aqjuq juq juq-ail aqyu juq nail lavqkhoel nee dov lal khi, Yeiqsul nail aqkhil daoqthaoq bhai peevqceevq kovdoiq doiq nail lavqkhoel nee gaolbeiv khi, ganl iqsanl mail daolcoev dai, ge dov bhiq gil-a nail ngaol.
34 “Yaqmiq-ol, naol ngaq bhai neema thaqtsaol nail ngel-i mail, meeq lai-a nail ngaol. Neesal-ovq nail lavqkhoel nee kovq ail yaoq. Naoq nail nalgoel meeq lai-aoq nail ngaol” dai, Yeiqsul aivq bhai ge bhiq-a nail ngaol.
35 Yeiqsul alhai ge thailthaiq-u phao, Yaqillu nail ilkhaol nee tsaol-aq teevq juq lal khi, “Naoq nail yaqmiq sil-aoq nail ngaol. Saqlaq bhai thaq gaoq lav suqsaq” dai, Yaqillu bhai ge gaiq bhiq lal-a nail ngaol.
36 Tsaol-aq al juq alhai ge khi ngaol-aoq, Yeiqsul neq, Yaqillu bhai: “Khaoq thaq laol. Ngaq bhai neema thaqtsaol yaoq” dai, ge bhiq-a nail ngaol.
37 A bhai nee ngal-aq, Bheiqtuvluv, Yaqkov, Yaqkov nail jaqbheq Yaolhaq, aqyu juq maq ngel nail neq, yu teevq gaq bhai iqsanl aivq nail haoqnao maq bhi tsaothel lavq dai, bhi jaol ail ceevq-a nail ngaol.
38 Yeiqsul uqhuq thaoq nail ilkhaol bhai heldaiq nail aqivq gaq pevq nail Yaqillu nail ilkhaol bhai ail kev-u phao, nioilkhaoq khaoq khaoq-ail suqsaq thailthaiq nail bhai ya moel-a nail ngaol.
39 Yeiqsul ilkhaol lavqkhoel bhai aol lai khi, aqyu juq bhai ge bhiq-a nail: “Nuljuq khul khi mail nioilkhaoq khaoq khaoq-ail suqsaq thailthaiq nail-aiq. Yaq niil gaq sil-a nail maq ngel-ail. Iqthaiq kov-ai thaq nail niil” dai, ge bhiq-a nail ngaol.
40 Thailhai ngaol-aoq, aqyu juq Yeiqsul bhai helsil nail ngaol.
Yeiqsul aqyu juq bhai the dov khi, yaq al gaq nail aqbhu aqma khi aivq-i mail hel laivq-a nail al hail gaq bhai hevq khi, yaq al gaq bavq thaq-ai thaq nail bhai aol lai-a nail ngaol.
41 A bhai nee ngal-aq, Yeiqsul yaqmiq al gaq nail aqlavq bhai nieivq thaiq khi, “Daqlil daq gulmil” dai, ge bhiq-a nail ngaol. Daoqceevq neq, “Yaqmiq-ol, thul yaoq” dai, ge movq nail ngaol.
42 Aq-u phao, yaqmiq al gaq teevq pov taivq-ail thul lal khi gailkhaol tsaol-aivq-a nail ngaol. Aivq nail aqkovq neq, tsel-nvq kovq bhee nail ngaol. Alhai pevq lal-a nail bhai ya moel-u phao, tsaol-aq al juq noeq-u maq dov dai, pevq deedee ail-a nail ngaol.
43 “Ganl niil teevq gaq bhai iqsanl thaq ge bhiq dei-eiq” dai, Yeiqsul aqyu juq bhai daoq aqkav kav dai bivq-a nail nee ovqtavq, “Yaqmiq niil gaq bhai aoq bhi jaq yaoq” dai iqsanl, aqyu juq bhai ge bhiq-a nail ngaol.