19
Khaqma kovq nail ganl Yeiqsul cavq bhiq cov bhiq-a nail ganl
1 Yeiqsul ganl al juq cavq bhiq cov bhiq gaq al nee ngal-aq, aivq Gaqliqlail milkhaoq nee mail dov ail khi, Yaoldaq laoljaol a phao lelkhel ceiv ail khi, al nail lao tsao ail kha khi, Yuldav milkhaoq bhai ail kev-a nail ngaol.
2 Tsaol-aq munl munl ma juq, Yeiqsul nail haoqnao tsaothel-aivq khi, aivq aqyu juq nail nalgoel bhai lav meeq bhiq-a nail ngaol.
3 Aq-u phao, Yeiqsul bhai laonqdaiq nail dai khi, Phaqliqsail teevq pav ganav juq aivq jaol nail bha lal khi, “Yovjil neq, khul nail ganl nee maqkhaiq, yovqgavq nail khaqma bhai kovq khaoq naol laiq” dai, naldaiq bhiq-a nail ngaol.
4 Yeiqsul ge nail: “Iqsanl bhai teivq-a nail Miqyail neq, iqmoeq-u nee mail yaqyov-aq khi mail yaqmai-aq bhai teivq-a nail ganl, Jalliq lavqkhoel bhai nuljuq maq ge daiq al laiq.
5 ‘Alheel ngel-i mail, yaqyov-aq neq, yovqgavq nail aqbhu aqma nee gaoq ail khi, yovqgavq nail khaqma nee mail jaol ail nail ngaol. Aqyu nvq gaq teevq gaq taivq-ail pevq lal nail ngaol.’
6 Aq-u phao, aqyu nvq gaq neq, nvq gaq maq ngel yaoq-aol. Teevq gaq teevq-eel ngaol. Miqyail-i mail oil jil-ai thaq nail bhai tsaol-aq yaq maq ya lav pav-ail” dai, ge bhiq-a nail ngaol.
7 “Thailhai phal-iq neq, ‘Kovq nail haoqgavq teevq keiv gevq bhiq gaq haq neq, kovq kivq naol’ dai, khul khi mail Molseiq daoq bivq-ai thaq nail-aiq” dai, Phaqliqsail juq Yeiqsul bhai gaoq naldaiq-a nail ngaol.
8 Yeiqsul ge nail: “Nuljuq neema gaol nail ngel-i mail, yovqgavq nail khaqma kovq kivq naol dai, Molseiq aqkhaoqanq bivq-a nail ngaol. Thailhai ngaol-aoq, maldil dai, nq teivq mil teivq teivq-u phao neq, alhai maq ngel-ail.
9 Ngal nuljuq bhai ge lavq bhel. Yu nee mail bheeq nail leel nail phaq maq ngel nail neq, yovqgavq nail khaqma bhai kovq khi, yaoq gaq yaoq bhai hevq nail tsaol-aq khul gaq maqkhaiq, yovqgavq nail khaqma bhai nl bheeq nail phaq pevq nail ngaol” dai, ge bhiq-a nail ngaol.
10 “Hevq pheel maol pheeljaq nail phaq, a dai maldil haq nail ngel haq neq, maq hevq mail jaol nail neq, meeq jaiq ail nial” dai, yaqlaol juq Yeiqsul bhai ge bhiq-a nail ngaol.
11 Aq-u phao, Yeiqsul ge kovq bhiq-a nail: “Tsaol-aq yaq iqsanl mail daoq al daoq bhai maq khanqtsaol-ail. Aqkhaoqanq ya-a nail juq taivq-ail khanqtsaol nail ngaol.
12 Khaqma hevq nail ganl neq, teevq gaq nee teevq gaq maq dul-ail. Teevq pav ganav juq neq, doevq lee-u nee mail maq hevq dai jaol nail ngaol. Teevq pav ganav juq neq, tsaol-aq yaq-i mail nl-a nail bhaqda nee, maq hevq dai jaol nail ngaol. Teevq pav ganav juq neq, Nqtavq Milkhaoq nail haqbhoil ganl nl nia dai, khaqma maq hevq dai jaol nail ngaol. Niil juq bhai khanq tsaol nail tsaol-aq neq, khanq dei-eiq” dai, ge bhiq-a nail ngaol.
Yeiqsul yaq juq bhai geeqlaoq bivq-a nail ganl
13 Yeiqsul yaqnoil juq nail kovtavq bhai aqlavq bavq dav khi geeqlaoq bhi bivq nail dai khi, yu yaqnoil juq bhai Yeiqsul jaol nail bha hel lavq-a nail ngaol. Thailhai ngaol-aoq, yaqlaol juq neq, yaqnoil hevq khi lal-a nail juq bhai khaq bhiq-a nail ngaol.
14 Aq-u phao, Yeiqsul ge nail: “Yaqnoil juq ngal jaol nail bha bhi lal yaoq. Aqyu juq bhai thaq lav tsoiq. Khul khi mail dai ngal-aq, Nqtavq Milkhaoq neq, aqyu juq kheel yaqnoil juq bhai ovq nail ngaol” dai, aqyu juq bhai ge bhiq-a nail ngaol.
15 Yeiqsul yaqnoil al juq nail kovtavq bhai aqlavq bavq dav khi geeqlaoq bivq gaq al nee ngal-aq, a bhai nee dov ail-a nail ngaol.
Hulmeeq hulbhao teevq gaq nail ganl
16 Aq-u phao, yaqyov-aq teevq gaq, Yeiqsul jaol nail bha lal khi, “Saqlaq-ol, ngal nqmaq maqluv halyeel doevq nail phaq ya dai, ganl aqmeeq khul phaq ya nl nail-aiq” dai, naldaiq bhiq-a nail ngaol.
17 Yeiqsul ge kovq bhiq-a nail: “Naol khul khi mail ngaq bhai aqmeeq phaq nail ganl naldaiq nail-aiq. Aqmeeq neq, Miqyail teevq gaq taivq-ail jaol nail ngaol. Naol doevq nail phaq lavqkhoel bhai aol lai movq haq neq, aoldaoq kovqdaoq bhai naldaiq khi, tsaothe yaoq” dai, ge bhiq-a nail ngaol.
18 “Aoldaoq kovqdaoq khul daoq bhai ya tsaothe nail-aiq” dai, aivq gaoq naldaiq bhiq-u phao, Yeiqsul ge nail: “ ‘Yu bhai thaq lav heivq. Yu nail khaqma nee thaq bheeq thaq leel. Yu nail nlmaoq thaq khoiq. Yu bhai maq tsaq nail salkhil thaq khanq.
19 Naoq nail aqbhu aqma bhai ev yaoq. Naoq nail aqmaol bhai gaiq-a nail khe-ai, naoq nail aqjail bhai jaol nail tsaol-aq bhai gaiq-a yaoq’ dai, ge nail aoldaoq kovqdaoq niil juq bhai tsaothe yaoq” dai, ge bhiq-a nail ngaol.
20 “Ngal aoldaoq kovqdaoq al juq iqsanl mail naldaiq gil-aoq nail ngaol. Ngal khul phaq gaoq loq-ai haq nail-aiq” dai, Yeiqsul bhai gaoq naldaiq bhiq-a nail ngaol.
21 Yeiqsul aivq bhai ge bhiq-a nail: “Naol khul ge duq maq jiav dai, nl bhee movq haq neq, kovq ail khi naoq nail ildaoq maoqgaiq iqsanl mail gaoq ha-ail khi, haq yaq aoq yaq juq bhai bhoil bhiq yaoq. Alhai nl haq neq, nqtavq kovtavq bhai mao-ail phoiq nail naoq nail phul heel ildaoq maoqgaiq jiav lal naol. Aq-u phao, naol kovq lal khi, ngaq nail haoqnao tsaothel lavq yaoq” dai, ge bhiq-a nail ngaol.
22 Yaqyov-aq al gaq daoq al daoq ya gaiq-u phao, noeqhaq deedee nail lavqkhoel nee kovq ail-a nail ngaol. Khul khi mail dai ngal-aq, aivq neq, ildaoq maoqgaiq maodai jiav nail ngaol.
23 Aq-u phao, Yeiqsul aivq nail yaqlaol juq bhai ge bhiq-a nail: “Ngal nuljuq bhai maldil dai, ge lavq bhel. Hulmeeq hulbhao juq, Nqtavq Milkhaoq lavqkhoel bhai aol lai nail neq, haq deedee nail ngaol.
24 Ngal nuljuq bhai gaoq ge lavq bhel. Laolthao geevqjieivq geeq naq bhai aol lai nail neq, hulmeeq hulbhao juq Miqyail Milkhaoq lavqkhoel bhai aol lai nail nee maqtsil ngaq-aiq jaiq nail ngaol” dai, ge bhiq-a nail ngaol.
25 Yaqlaol juq daoq al daoq ya gaiq-u phao, noeq-u maq dov dai, pevq-ail khi, “Thailhai phal-iq neq, khaq sil gaq hevqkovq nail phaq ya nia heeq” dai, naldaiq nail ngaol.
26 Yeiqsul aqyu juq bhai heldaiq khi ge nail: “Niil neq, tsaol-aq yaq nl nia nail phaq maq ngel-ail. Thailhai ngaol-aoq, Miqyail neq, yaoq phaq yaoq-ao nee nl nia nail ngaol” dai, ge bhiq-a nail ngaol.
Yaqlaol juq ya nail ganl
27 Aq-u phao, Bheiqtuvluv ge nail: “Heldaiq yaoq. Nvjuq yaoq phaq yaoq-ao nee khaonq ha-ail ceevq khi, naoq nail haoqnao tsaothe thailthaiq nail ngaol. Alheel ngel-i mail, nvjuq khul ya nail-aiq” dai, naldaiq bhiq-a nail ngaol.
28 Yeiqsul aqyu juq bhai ge bhiq-a nail: “Ngal nuljuq bhai maldil dai, ge lavq bhel. Iqsanl mail aqsivq sivq dai pov lal phal lal khi, Tsaol-aq nail Yaqyov seiqleiq khaoqsail jiav nail doiqbev bev ma bhai jaoldeel-u phao, ngaq nail haoqnao tsaothe nail nuljuq iqsanl, doiqbev bev ma tsel-nvq bev bhai jaoldeel khi, Ilsaqleiqlal nail jeq-e tsel-nvq jeq-e bhai yalkhaq dal nail ngaol.
29 Ngal bhaqda nee, yovqgavq nail ilkhaol, aqivq jaqbheq, aqbhu aqma, yaqmiq yaqyov khi mail daiyal, niil juq bhai khaonq ha-ail ceevq-a nail tsaol-aq yaoq gaq yaoq-ao nee, a dai nee maqtsil teevq yal bhoil ya nail nee ovqtavq, nqmaq maqluv halyeel doevq nail phaq ya nail ngaol.
30 Thailhai ngaol-aoq, niil aq-il yu nail iqmoeq jaol nail tsaol-aq maodai yu nail haoqnao ya jaol nail ngaol. Niil aq-il yu nail haoqnao jaol nail tsaol-aq maodai, yu nail iqmoeq ya jaol nail ngaol” dai, ge bhiq-a nail ngaol.