6
Haq yaq aoq yaq bhai bivq nail ganl
1 Yeiqsul gaoq ge nail: “Nuljuq aqmeeq phaq nl-u phao, tsaol-aq bhi moel naol dai taivq-ail noeq khi, aqyu juq nail sivtavq bhai nl nail phaq thaq bhi pevq. Alhai nl haq neq, nqtavq kovtavq bhai jaol nail nuljuq nail Aqbhu nail geeqlaoq bhai nuljuq maq ya-ail.
2 Alheel ngel-i mail, naol haq yaq aoq yaq bhai bivq-u phao, goiqbhaoq bhaoq nail tsaol-aq khe-ai thaq nl. Aqyu juq neq, yu bhi tsiqphoiq nail dai khi, uqhuq thaoq nail ilkhaol bhai maqkhaiq, gailphail lail ma bhai maqkhaiq, yu bhai gul gaiq nail ngaol. Ngal nuljuq bhai maldil dai, ge lavq bhel. Tsaol-aq al juq neq, tsaol-aq yaq-i mail bivq-a nail geeqlaoq taivq-ail ya nail ngaol.
3 Naol haq yaq aoq yaq bhai bivq-u phao, yu maq bhi moel dai, lavqmal lavq nl nail, lavqtsel lavq bhai thaq bhi heeq nia.
4 Naol alhai nl-u phao, yu teevq gaq iqsanl maq heeq nia-ail. Thailhai ngaol-aoq, tsaol-aq yaq maq moel nia nail bhai moel nia nail naoq nail Aqbhu Miqyail naoq bhai geeqlaoq bivq lavq nail ngaol” dai, ge bhiq-a nail ngaol.
Geeqlaoq hal nail ganl
5 Yeiqsul gaoq ge nail: “Nuljuq geeqlaoq hal-u phao, goiqbhaoq bhaoq nail tsaol-aq khe-ai thaq nl. Aqyu juq neq, yu bhi moel dai, uqhuq thaoq nail ilkhaol bhai maqkhaiq, gailkhaol gail tsil bhai maqkhaiq, thulphaol khi geeqlaoq hal movq-ai bhiq nail ngaol. Ngal nuljuq bhai maldil dai, ge lavq bhel. Tsaol-aq al juq neq, tsaol-aq yaq-i mail bivq-a nail geeqlaoq taivq-ail ya nail ngaol.
6 Thailhai ngaol-aoq, naol geeqlaoq hal-u phao, sunq lavqkhoel bhai aol lai khi, lolgov pheeqthaiq khi, maq moel lal nail naoq nail Aqbhu Miqyail bhai geeqlaoq hal yaoq. Tsaol-aq yaq maq heeq maq moel nia khi ngaol-aoq, yaoq phaq yaoq-ao nee heeq nia moel nia nail naoq nail Aqbhu Miqyail naoq bhai geeqlaoq bivq lavq nail ngaol.
7 Nuljuq geeqlaoq hal-u phao, laolkivq yaq juq neivq thaol thaol nail khe-ai thaq nl. Aqyu juq neq, ganl maq tsoiq nail daoq maodai thaol nail ngaol. Aqyu juq daoq maodai thaol nail bhaqda nee, ‘Nvjuq-i mail thaol nail khe-ai ya naol’ dai, noeq nail ngaol.
8 Aqyu juq khe-ai thaq nl. Khul khi mail dai ngal-aq neq, nuljuq loq nail phaq nuljuq maq hal-u nee mail nuljuq nail Aqbhu Miqyail heeq nia nail ngaol.
9 Alheel ngel-i mail, nuljuq geeqlaoq niailhai hal yaoq:
‘Nqtavq kovtavq
bhai jaol nail
nvjuq nail Aqbhu-ol.
Naoq nail aqmil bhai
bhi ev dei-eiq.
10 Naol heeqphaq jiovq khi
uvthaiq nail milkhaoq
bhi kev lee yaoq.
Nqtavq kovtavq bhai
naol neema
tsaq nail phaq
bhee nail khe-ai,
miltsaq kovtavq
bhai iqsanl
bhi bhee lee yaoq.
11 Yanqgaol loq nail
jaq nail daol nail phaq
yanqgaol nvjuq bhai
bivq lavq yaoq.
12 Yu nvjuq bhai
nl bheeq lav bheeq
lavq-a nail oeqbal bhai
nvjuq phaiq
bhiq-a nail khe-ai,
nvjuq nail
oeqbal bhai iqsanl
naol phaiq lavq yaoq.
13 Oeqbal jalmul
mul nail haoqnao
nvjuq bhai
thaq bhi ail lavq.
Haqeiv nail
lavqkhoel nee
nvjuq bhai
bhi jel-ail lavq yaoq.
[Uvthaiq nail phaq,
bhaqaoq khi mail
seiqleiq khaoqsail
iqsanl mail,
nqmaq maqluv halyeel
naoq nail ngaol.
Aqmiq]’ ” dai,
ge bhiq-a nail ngaol.
Oeqbal phaiq nail ganl
14 Yeiqsul gaoq ge nail: “Yu nuljuq bhai nl bheeq lav bheeq lavq-a nail oeqbal bhai nuljuq phaiq bhiq haq neq, nqtavq kovtavq bhai jaol nail nuljuq nail Aqbhu iqsanl nuljuq-i mail nl bheeq lav bheeq-a nail oeqbal juq bhai phaiq lavq nail ngaol.
15 Thailhai ngaol-aoq, yu-i mail nl bheeq-a nail oeqbal bhai, nuljuq maq phaiq bhiq haq neq, nuljuq nail Aqbhu Miqyail iqsanl nuljuq-i mail nl bheeq-a nail oeqbal bhai maq phaiq lavq-ail” dai, ge bhiq-a nail ngaol.
Maq jaq nail aol lav sav nail ganl
16 Yeiqsul gaoq ge nail: “Nuljuq maq jaq nail aol lav sav-u phao, goiqbhaoq bhaoq nail tsaol-aq khe-ai maivphaoq niaq laq khel dai, thaq jaol. Aqyu juq neq, aqyu juq aoq maq jaq dai, jeeq thailthaiq nail ganl, yu bhai bhi heeq bhi moel nail dai khi, maivphaoq iqsanl aqjiivq aqcavq-ail jaol nail ngaol. Ngal nuljuq bhai maldil dai, ge lavq bhel. Aqyu juq neq, tsaol-aq yaq-i mail bivq-a nail geeqlaoq taivq-ail ya nail ngaol.
17 Nuljuq maq jaq nail aol lav sav-u phao, maiv puvq puvq haol khi, uqkeiv keiv yaoq.
18 Alhai nl haq neq, nuljuq maq jaq nail aol nl thailthaiq nail bhai, yu maq heeq nia-ail. Thailhai ngaol-aoq, tsaol-aq yaq maq moel nia nail bhai jaol nail, naoq nail Aqbhu Miqyail moel nia nail ngaol. Al ovqtavq, tsaol-aq yaq maq moel nia nail bhai moel nia nail naoq nail Aqbhu Miqyail nuljuq bhai geeqlaoq bivq lavq nail ngaol” dai, ge bhiq-a nail ngaol.
Nqtavq kovtavq khe phul heel ildaoq maoqgaiq halpov jil-ai thaq yaoq
19 Yeiqsul gaoq ge nail: “Nuljuq yovqgavq nail haqbhoil miltsaq kovtavq bhai phul heel ildaoq maoqgaiq thaq halpov jil-ai thaq. Miltsaq kovtavq bhai halpov jil-ai thaq haq neq, haol jaq lai nia, bhoiq jaq lai nia, khoiqbhaoq iqsanl bhaoq lai nia nail ngaol.
20 Thailhai ngaol-aoq, nqtavq kovtavq bha nuljuq nail phul heel ildaoq maoqgaiq halpov jil-ai thaq yaoq. A bhai neq, haol iqsanl maq jaq lai nia, bhoiq iqsanl maq jaq lai nia, khoiqbhaoq iqsanl maq bhaoq lai nia-ail.
21 Khul khi mail dai ngal-aq neq, naoq nail phul heel ildaoq maoqgaiq khal halpov jil-ai thaq nail bhai, naoq nail neema jiav nail ngaol” dai, ge bhiq-a nail ngaol.
Aqmaol nail phalmanq
22 Yeiqsul gaoq ge nail: “Maivneev neq, aqmaol nail phalmanq pevq nail ngaol. Maivneev moel nia haq neq, naoq nail aqmaol maol lao-ail, aqbhaq aqmeeq-ai ya nail ngaol.
23 Thailhai ngaol-aoq, naoq nail maivneev maq moel nia haq neq, naoq nail aqmaol maol lao-ail navtsee dai, pevq ail nail ngaol. Alheel ngel-i mail, naoq nail lavqkhoel khe aol nail aqbhaq al navtsee dai pevq-ail haq neq, aqnav al neq nav deedee nail ngaol” dai, ge bhiq-a nail ngaol.
Miqyail khi mail phul heel ildaoq maoqgaiq nail ganl
24 Yeiqsul gaoq ge nail: “Tsaol-aq khul gaq maqkhaiq, heeqphaq nvq gaq nail yaqkav maq jiovq nia-ail. Teevq gaq bhai neejiav jiav haq neq, teevq gaq bhai gaiq-a nail ngaol. Teevq gaq bhai ev haq neq, teevq gaq bhai khal ge movq-ail ge nail ngaol. Alheel ngel-i mail, nuljuq Heeqphaq Miqyail nail yaqkav khi mail phul heel ildaoq maoqgaiq nail yaqkav teevq pov nee, maq jiovq kivq-ail” dai, ge bhiq-a nail ngaol.
Khaoqlaol nail ganl
25 Yeiqsul gaoq ge nail: “Alheel ngel-i mail, ngal nuljuq bhai ge lavq bhel. Khalhai ya jaq ya daol heeq meeq dai, nuljuq aqdoevq doevq nail haqbhoil khaoq thaq laol. Khalhai ya gaq ya doi heeq meeq dai, nuljuq nail aqmaol nail haqbhoil iqsanl khaoq thaq laol. Aqdoevq doevq nail phaq neq, jaqjaq daoldaol nee maqtsil phoiq khi, aqmaol iqsanl aqgaq aqdoi nee maqtsil phoiq nail maq ngel-ail laiq.
26 Nqtavq phao bhail nail keivq-avq bhai heldaiq yaoq. Keivq-avq al juq neq, gov maq kha, gov maq gaiq, govjil bhai iqsanl gov maq phi bhoel-ail. Thailhai ngaol-aoq, nqtavq kovtavq bhai jaol nail nuljuq nail Aqbhu keivq-avq al juq bhai bhi jaq bhi daol nail ngaol. Nuljuq neq, keivq-avq al juq nee maqtsil phoiq jaiq nail maq ngel-ail laiq.
27 Nuljuq nail lavqkhoel khul gaq maqkhaiq, khaoqlaol nail bhaqda nee yovqgavq nail yeel yovqgavq teevq cav heel lal dai, khaq sil gaq nl nia nail-aiq.
28 Khul khi mail aqgaq aqdoi nail ganl nee nuljuq khaoqlaol nail-aiq. Haqtsoiq bhai doevq nail aqeiv khalhai eeq lal nail ganl bhai saol-nvq daiq yaoq. Aqeiv aqbhaol al juq neq, ganl maq nl-ail. Haqlaq iqsanl maq gaol-ail.
29 Thailhai ngaol-aoq, ngal nuljuq bhai ge lavq bhel. Seiqleiq khaoqsail eeq nail heeqphaq Saollavmoq-i mail doi nail phoiq deedee nail aqgaq aqdoi neq, aqeiv al teevq eiv dai iqsanl maq heldaiq meeq-ail.
30 Neema thaqtsaol nail phaq gaq bhaq nail tsaol-aq juq-ol, yanqgaol doevq khi, niaohao miqjaq nail lavqkhoel bhai liv poiv nia nail pavqkhuq lovkhuq bhai Miqyail aqdai dai-ail lav sav meeq bhi haq neq, a dai nee maqtsil nuljuq bhai bhiq gaq bhiq doi lavq nail, maq ngel-ail laiq.
31 Alheel ngel-i mail, khalhai ya jaq ya daol nail ganl khi mail, khalhai ya gaq ya doi nail ganl bhai khaoq thaq laol.
32 Laolkivq yaq juq neq, al juq iqsanl bhai halpov nail ngaol. Nuljuq al juq iqsanl bhai loq nail ngaol dai, nqtavq kovtavq bhai jaol nail nuljuq nail Aqbhu heeq nia nail ngaol.
33 Miqyail Milkhaoq khi mail aivq nail tsaq nail daol nail phaq bhai iqmoeq halpov yaoq. Alhai halpov haq neq, al juq iqsanl mail aivq nuljuq bhai bivq lavq nail ngaol.
34 Alheel ngel-i mail, niaohao nail haqbhoil yanqgaol khaoq thaq laol. Khul khi mail dai ngal-aq neq, niaohao nail haqbhoil niaohao khaoqlaol nail phaq jiav nail ngaol. Khaoqlaol nail phaq neq, teevq n nail haqbhoil teevq n lovq nail ngaol” dai, ge bhiq-a nail ngaol.