5
Miqyail nail yaol mavqmav bhai heldaiq phail yaoq
1 Ngal nuljuq Khali yaq munl bhai heldaiq phail nail aqivq aqtsu juq bhai hal movq-ail nial. Ngal iqsanl, nuljuq khe-ai Khali yaq munl bhai heldaiq phail nail aqivq teevq gaq ngaol. Khali ya daq deedee-a nail bhai ngal ya moel-a nail ngaol. Yaqhao khe dov lee nail seiqleiq khaoqsail bhai ngal iqsanl ya nail ngaol.
2 Nuljuq nail kov-uvq bhai jaol nail Miqyail nail yaol mavqmav bhai aqmeeq-ai heldaiq phail yaoq. Maq heldaiq phail mail khul maq khi kivq nail ngel-i mail, heldaiq phail nail phaq thaq bhi pevq. Miqyail nail ganl nl nail khe-ai, lavqkhiq teevq tsail heldaiq phail yaoq. Phul heel ya lal nail gal duq taivq-ail maq ngel-ail dai, noeq khi neema lavqkhoel nee nl nail phaq bhi pevq yaoq.
3 Naoq nail yaol mavqmav nail kovtavq bhai naoq nail alyaq yuq khi thaq uvthaiq. Yaol mavqmav saol oil duq jiav dai, nl daiq hal daiq bhiq yaoq.
4 Alhai nl haq neq, yaol lovq juq iqsanl nail kovtavq bhai heldaiq phail nail gaq dov lee-u phao, seiqleiq khaoqsail jiav nail heel uqtsaoq nuljuq ya nail ngaol. Heel uqtsaoq al tsaoq neq, maq khuq maq kov-ail nia-ail.
5 Alhai dul dai, yaqyov-aq yaqnoil juq-ol, joiqmaoq mavmaoq juq nail kov-uvq bhai aqmeeq-ai jaol yaoq. Nuljuq yaoq gaq yaoq-ao nee teevq gaq nail kov-uvq bhai teevq gaq yaqkav khe-ai, thaqtheq nail neema aol yaoq. Khul khi mail dai ngal-aq neq,
“Miqyail neema eeq nail
heel nail tsaol-aq bhai
lav tsoiq nail ngaol.
Thailhai ngaol-aoq,
neema thaqtheq nail
juq bhai neq,
geeqlaoq eeljaol
bivq nail ngaol” dai,
gevq-ai thaq nail ngaol.
6 Alheel ngel-i mail, aqyanq tsaq lal-u phao, Miqyail nuljuq bhai thaqeeq thaqheel lavq nail haqbhoil, aivq nail bhaqaoq eeq nail aqlavq kov-uvq bhai neema thaqtheq khi jaol yaoq.
7 Miqyail nuljuq nail haqbhoil saol-nvq nail ngel-i mail, nuljuq-i khaoqlaol nail yaoq phaq yaoq-ao nee aivq bhai av bhiq yaoq.
8 Yaolphaol khi aqgeel geel dai jaol yaoq. Nuljuq bhai neejiav jiav nail neivq heeqphaq neq, geeq nail allaqjaqsil khe-ai, nuljuq bhai keivq heivq jaq nail dai khi, jaoq jaoq-ai halpov nail ngaol.
9 Neema thaqtsaol nail phaq ivq nail lavqkhoel nee, aivq bhai lav tsoiq yaoq. Miltsaq kovtavq-ai jaol nail nuljuq nail aqivq jaqbheq Khali yaq juq iqsanl niailhai ya daq thailthaiq nail ngaol dai, heeq kivq thaq-ai yaoq.
10 Geeqlaoq eeljaol teevq bhee aol nail Miqyail Khali bhai juq khi, nqmaq maqluv halyeel ivq nail seiqleiq khaoqsail bhai aol lai kivq dai, nuljuq bhai khul-a nail ngaol. Alheel ngel-i mail, nuljuq teevq yanq taivq-ail ya daq gaq haq neq, aivq nuljuq bhai bhi bhee lal, bhi ivq lal khi, gaq bivq kovq lavq nail ngaol.
11 Miqyail neq, nqmaq maqluv halyeel bhaqaoq jiav dei-eiq. Aqmiq.
Haoqnao naosaq khe daoq
12 Saljial ivq nail ngaol dai, ngaq-i mail saol-nvq-ai thaq nail aqivq jaqbheq Siqlav bhai juq khi, ngal nuljuq bhai haoqgavq davqnil nil dai, gevq bhoel-ai leevq-a nail ngaol. Nuljuq bhai gaq bivq khi, nuljuq-i mail hav bhoel gaq-a nail geeqlaoq eeljaol al, maldil Miqyail nail geeqlaoq eeljaol ngaol dai, salkhil khanq nail dai khi, haoqgavq niil gevq bhoel-ai leevq-a nail ngaol. Geeqlaoq eeljaol al nail lavqkhoel bhai ivqdao dai, jaol yaoq.
13 Miqyail nuljuq bhai tsel dov-a nail khe-ai, tsel dov-ai thaq nail Bhaqbhulloq meenq bhai jaol nail munl, nuljuq bhai noeq moel naol dai, daoq cavq cavq bhoel-ai leevq-a nail ngaol. Ngaq nail yaqyov Maqkul iqsanl, nuljuq bhai noeq moel naol dai, daoq cavq cavq bhoel-ai leevq-a nail ngaol.
14 Nuljuq teevq gaq nee teevq gaq goil nail gaiq-a nail lavqkhoel nee, aqlavq he yaoq. Khali nail lavqkhoel bhai jaol nail nuljuq iqsanl nail kovtavq bhai neesal-ovq nail phaq jiav dei-eiq.