7
Esdras niina kumpaji aidaujai Jerusalén jegamu
1 Persia nugka apuji Artajerjes pujujakua nunú tsawantin Seraíasa uchiji Esdras daagtin pujujakui. Tuja Seraíasa patayi aidauk juju aajaku ainawai:
Asarias, Hilquías
2 Salum, Sadoc, Ahitub,
3 Amarías, Azarías, Meraiot,
4 Seraías, Uzí, Buquí,
5 Abisúa, Finees, Eleazar aatus. Tuja Aarón yama nagkamchak sacerdote aajakua nunashkam shiig patayi aajakui.
6 Apajuí Moisésan chicham umiktinun susauwa nuna Esdrasak yacha aajakui. Tuja niinak Tuke Pujuu niina Apajuíjiya nunú yaijakui. Nuadui apu Artajerjes Esdras sumamunak ashí susauwai. Dutikam Babilonia nugkanum pujau,
7 apu Artajerjes inabaujin siete mijan ejeyu ai, Israel aents aidaujai, sacerdote aidaujai, Leví wegantu aidau, kantamtan yacha aidau, Apajuí emematku ijuntai jegamkamun waitijin kuitamin aidau, nuigtu aents nunú jeganum takau aidau aatus ijunag Jerusalén wakitkiajui.
8 Nunik mijan sietetin nantu cinco takau ai, Jerusalén jegauwai.
9 Babilonia nugkanum batsatu waketjauwa nunak mijan nagkamnamu, yama nagkamchak nantu taka makichik tsawan tsawaju ai, nunú tsawantin jiinki, nantu cinco taka makichik tsawan tsawaju ai, Apajuí wait anenkagtina nunú kuitamsam Jerusalén jegauwai.
10 Esdrasak Tuke Pujuu chichame umiktin agagbauwa nuna wisha shiig unuimajan umiakun Israel aents aidaun jintintuatjai, dutika ai ditashkam nuna umiktinme tusa puyatjujakui.
Apu Artajerjes papiin agag Esdrasan susamu
11 Apu Artajerjes papiin agag sacerdote Esdras jintinkagtin chicham umiktin agagbaun yacha aajakua nuna susauwa duka juju aajakui:
12 “Apu Artajerjes, sacerdote Esdrasan Apajuí nayaimpinum pujuuwa nuna chichame agagbaun yacha, jintinkagtina nuna kumpamak, aatus tawai:
13 Ashí Israel aents aidau mina nugkajui batsata nunú Jerusalén amejai wetag tuidauk wetinme. Tuja Leví wegantu aidaush, sacerdote aidaushkam wetag tuinakug wetinme.
14 Wi mina aentsug chichagkagtin siete aina nujai, chichama umikan Judá nugken aents batsata dusha, tuja Jerusalén batsata dusha chicham umiktin agagbaun Apajuí atumin amasua nunash betekash umiina nunú dekata tusan amina awemajame.
15 Tuja apu niina aentsji chichagkagtin aidaujai anentaimas, Israel aents aidaun ememattai Apajuí Jerusalén puja nunú iish susami tusag, platan, oron amasagtata nunú jukim wetá.
16 Tuja plata aidau, oro aidau Babilonia nugkanum yaakat ayá nuwiya ikamkugmek ashí jukitajum. Nuigtushkam tikich aents aidau, sacerdote aidau, diták anentaimas Apajuí emematku ijuntai jegamkamu Jerusalén awa nuwi takastinun amainakuig ashí yajuakta.
17 Dutika yajuakam nunú kuichkia duwi toro tsakat aidau, uwig aishmag tsakat, uwig múun aidaujai, nuigtu ajak juukbau aidau, vino aina nujai ijumjam sumakta. Dutikam nunú Apajuí emematku ijuntainum altar awa nuwi apeakjum atumi Apajuíjum Jerusalén puja nunú emematminjum.
18 Tuja oro, plata aina nunú ampinkuig, amina kumpajum aidaujai chichasam Apajuí wakegamush tukita nunú dutikatajum.
19 Untsu amina Apajuíjum emematku ijuntainum waya, nii emematku takastin aidaun amasag duka, Apajuí Jerusalén pujuuwa nunú susattame.
20 Tuja nunú jeganum takastinush waji atsumtatme nuniakmek apu aidau takastin ijumjamu aina nuwiya jukita.
21 Apajuí nayaimpinum pujuuwa nuna chichame umiktin agagbauwa nuna yacha, sacerdote Esdras sumamuk makichkish intimjuttsuk ashí susatajum, tusan wi apu Artajerjesan aents kuichki kuitamin aidau namak eufratesnum etsa akaetaiya nuni batsatutigminak ashí tajime.
22 Tuja duka juju aidau susattagme: Tres mil trescientos kilo plata, veintidos mil litro trigo, dos mil doscientos litro vino, dos mil doscientos litro aceite, tuja weenash wajupak atsumit duka imatiksagmek susattagme.
23 Apajuí nayaimpinum pujuuwa nunú niina jenia atinun sumakuig duka wamak ashí sunastatui, wagki nunú umiatsjinig, Apajuín suwimkega nunú apu uchijin, tuja niina inamtaiji nugka múunta nuwi suwimak iyanjamain asamtai.
24 Nuigtushkam juju dekatajum: Sacerdote aidauk, Leví wegantu aidauk, kantamtam yacha aidauk, jega Apajuí emematku ijuntain kuitamin aidauk, tuja nunú jeganum takau aidauk, nuniachkush tikich aentskesh nunú jeganum takau aidaushkam, apu kuichkiji atin akikmaktajum tusa waitkamuk makichkish atsuttawai.
25 Untsu Esdrasah, aminak Apajuí shiig anentaimsa takatan amasua duwi shiig anentaimsam, apu chichama epegkin aidau, nuigtu nugka yaig aidaun apuji gobernador aidaujai adaijata. Dutikawamin dita utugchat ataish epegkeatnume. Nunú aidau ashí tikich nugka yaig aidau namak eufratesnum etsa akaetaiya nuni ayá nuwish, amina Apajuígmin chichame umiktin agagbauwa nunash betekash umikajat nuna diistinme. Untsu nunú chichaman dekachu aina duka ame jintintuata.
26 Ashí aents aidau Apajuí chichame umiktin agagbauwa nuna umiachuk, tuja apu chichamenash umiachuk wamkeuch mantamnattawai, dutikachkuish tikich nugkanum sujunkattawai, nuniachkush kuichkin akikmaktatui, nuniachkush aents achika chimpitainum achika egkeam agtatui”, tusa apu Artajerjes agajui.
Esdras Apajuín ausamu
27 Aatus apu papiin agag umikmatai, Esdras Apajuín aujak:
“¡Tuke Pujuu iina muunji aajaku aina nuna Apajuíji emematiagmi! ¡Nunuwai dekas pegkejam wait anenkagtinuk, wagki nii apu Artajerjesa anentain antintuk, Apajuí emematku ijuntai Jerusalégnum awa nuna eme anentus diisti tumamtikiu asamtai!
28 Tuja minashkam nii yaintsamtai, apu niina aentsji chichagkagtin aidaujai, nuigtu tikich aents aidau apu inamtaijin takau eme anentsa diitai aina dushakam ashí wait anenjujaje. Nuadui dita yaintsagmatai, Israel aents eme anentsa diitai aidaun wijai Jerusalén waketjatnume tusan ijumjajai”, tiuwai.