2
1 Nunik atumi yatsum aidau waketug kaunawagmatai
atum chichagkujum:
“Apajuín aentsji aidau” titinaitjume.
Untsu nuwa aidau chichagkujum:
“Wait anenjamu aidau” titinaitjume.
Israel aents aidau Apajuín umigkachagbau
2 Nuigtu Apajuí chichaak:
“¡Wika Israel aents aidaunak
nuwa nuwatkamua numamtin anentiajai,
tujash ima minakek umigtukchau ainawai.
Nuadui wika yamaik pachikchagtatjai.
¡Atum dita uchiji aidautijum apu chichaman
epegkin aidaunum chicham egketuatajum.
Niig yamaik mina duwagchauwai,
tuja wishakam niina aishichuitjai!
Untsu wainak nuwa akika dutiktaijai betek wajá puja nuna idaisati!
¡Niina pakiji aidaun shiig anemtika pujutsuk idaisati!
3 Nuna nuniachkuig, jáanchjin awitkan
nii yama akiinak wisu akiinauwa nunin awajsattajai.
¡Dutikan uwejush nugka buku takasa pujumainchau awajsattajai!
Dutika ai kitakai jinattawai.
4 Tuja niina uchiji aina duka mina uchigchau ainawai,
nunak nii pegkegchaun takamak wekagas uchigmaju asamtai,
wika ditanak wait anenjachagtatjai.
5 Israel aents aidauk nuwa akika dutiktai
datsantainkachua nunin ainawai.
Nunin asag chichainak:
‘Mina pakig aidaun egaktajai,
wi atsumamu aidaunak dita:
yujumkan, yumin, jáanch lana najanamun,
lino najanamun, aceiten, vinon, kugkuin aidaun
aatus sujuinak wi wakegamun umigtin ainawai’,
tuinawai.
6 Tuidau asagmatai, jiinki yujasag pakijin igkugkainum tusan,
jintanak jagki awajsattajai.
7 Dutika ai, dita pakijin igkugtag tuinakush
igkugchagtatui, tuja nuigtush wainkachagtatui.
Nuninak: ‘Yama nagkamchakun aishinauwaitag nujai
ima shiig pujuyajai, dekas niyai wakitkitjai’, titinai.
8 “Tuja wika niina kuitamu asan,
nii yuwatnunak, nii atsumamujinash
ashí suwaitag nunak niig anentaimas diyatsui.
Wika niinak oronash, platanash suwaitjai.
Dutika aish nuna yajuak nii ememattin aidaun
dakumag najanauwai.
9 Nunin asamtai, wi nii yuatnun trigon, vinon,
tuja nii asepaktinun lana, lino najanamu aidaun
susauwaitag nunak imatiksanuk ashí atanjattajai,
10 dutikakun niina pakiji aidau emtin wisu awikan inatsagtatjai.
¡Nuna dutikai niina ayamjumainuk makichkish atsuttawai!
11 Tuja maki makichik semanatin,
maki makichik nantutin,
maki makichik mijantin jiistamtaya nunak
jiistamashti titatjai.
Nuadui nuna jiistamak dakujinuwe nunak
ataktuk nunikchattawai.
12 Higo ajakbau ayá nuna, uva ajakbau ayá nujai pachis:
Juka mina pakiig aidau sujusbau ainawai
tusa emema puja nunak unuptuktatjai,
dutika ai ikamia kuntin aidau ashí amutkatnai.
13 Tuja dakumkamu aidaun emematak incienson apejakui,
nuigtush mina kajimatjuki,
niina pakijin pataetak
patakumtain patakuma,
nugkutain nugku nugkus iwagmamag weawai.
Nuni wekagu asamtai wi suwimkan susattajai.
Witjai Tuke Pujuun, nunak dekas tajai.”
Apajuík niina aentsji Israel aents aidaunak aneawai
14 “Aatus mina aentsug pegkegchaunum wekaekuish,
wi jukin uwegshunum emattajai,
dutikan ataktu mina anenti tusan
shiig kuitamkattajai.
15 Dutika unuinakan,
niina nugken uva ajakbau ayá nunak
imatiksanuk awagtuktatjai.
Tuja muja Acoran pakaji pegkegchauwa nunak
pegkeg awajsattajai,
dutika ai nuwiyan yuwa pujustinai.
Nuniak ataktu nagkama
yama nagkamchak aya iman atatui,
nuniak egiptunmaya jiinki shiig aneeya
imanun anentaimtatui.
16-17 Nuadui ataktu awagkig:
‘Baaldauwaitjai’ tichatnai,
dekas: ‘Wika aminuitjai’, tujuttinai.
Ataktu awagkig wainka apajuímtai aidaun daajinak
adaikashtin ati tusan idaimitkastatjai.
Witjai Tuke Pujuu Israel aents aidaun Apajuíjinuk.
Nunak dekas uminkatnun tajai.
18 “Nunú tsawan jegamtaig,
mina aentsug aidauk shiig agkan maaniamu atsaunum batsamsatnume tusan kuitamkagtatjai.
Tuja kuntin aidau ditan waitkamainush atsutnai.
19 “Israelah, wika aminak waji nuwaitkuish
ataktu nuwatkattagme,
ajumaish amek tuke mina duwag atinaitme.
Wika aminak shiig senchi aneajame,
nuadui amek dekas mina shiig duwag
wi chicham umikbaunum nuwenin aina
nujai betek nuwatkamu atatme.
20 Wika aminak mina duwajun kuitamainaitag
imatiksan kuitamkattagme,
dutikakun ima aminak anettagme,
nunú diisam, dekas juwapita mina apujuk tujuttinaitme.
21 Israel aents aidauwah, nunú tsawan atina duwi
wi yumin yutumtijatnaitjai,
22 dutika ai, trigo, aceite, vino aatus shiig kuashat aitnai.
Aatus Jezreel nugka duka shiig pegkeg
ajak tsapau wajastinai.
Witjai Tuke Pujuu Israel aents aidaun Apajuíjinuk.
Juna taja nunak dekaskenum tajai.
23 Mina aentsug aidaunak Israel nugkanum
ima midauk agtinun batsastinaitjai.
Dutikan chichagkun:
‘Atumek mina aentsjuchu ayugme,
tujash yamaik mina aentsug ainagme’, titinaitjai.
Untsu dita chichagtuinak:
‘¡Ametme iina Apajuíjig!’ tujutiagtinai.”