Job niina kumpaji aidaujai chichasbau
3
(3—27)
Job senchi waitiak kajeka chichakbau
1-2 Jopak imanik waitiakush, chichatsuk pujau tikima atsanmainchau dekapeak chichakui. Nuniak:
“Wika akiinmainchaunas
akiinawabiagtai tajai.
3 ¡Tsawan wi akiinamua
duka pegkegchau atin ati!
Tuja wi akiinamtai kashi chichainak:
Aishmag akiinae tujutiu aina dushakam
pegkegchau atin ati.
4 ¡Wi akiinawaitag nunú tsawannak
Apajuí suwe emamainnas aikachamiatai,
Apajuí nunú tsawantan kajimatkiu ataik,
tsawaumainchaun tsawajui!
5 ¡Wagkag nunú tsawantinish
makichik suwe dupajam iyagchabi!
¡Nunú tsawannak yujagkim suwe ijia
emegkaumainnas aikachamiatai!
¡Etsa etsantun epenak suwe ishamain
emama imatika emegkaumainnas aikachamiatai!
6 ¿Wagkag nunú kashia duwi mina dukug
ejapjukua dusha, suwe wajas megkaekachabi?
¡Nunú tsawantin kashi mina dukug
mina ejapjutkauwa duwi nagkamsag
tsawan aidauk, nantu aidauk, mijan aidauk
dekapamainchaus ayatai!
7 “¡Mina dukujuk nunú kashia duwik
ejapjuchu wemainnas nunikchamiatai,
nunikuitkuig makichik aentskesh
aishmag akiinae tusag tumainchau wajakajui!
8 ¡Tunchi aidau, makichik kuntin múun
nayants puju Leviatán tutaya nuna iwishtug
nii wakegamu dutikati
tumainnas dutikachajabiatai!
Nunú tunchi aidaush
¿wagkag nunú kashi aajakua nunash emesjachajabi?
dutikau agtaik mina
dukujuk ejapjumainchau wajakui.
9 ¡Yaya tsawagtatak etsantin aidau,
mina dukug ejapjutkamtai,
ejampek etsanjau aina
nunak etsanmainchaus ayatai.
Tsawan tsawagmatai, etsa jiinu
wainna duka wainnamainchau wajakui!
10 ¡Mina dukug kashi ejapjutkauwa nunú
kashia duka pegkegchau atin ati!
wagki jakati tutsuk
akiinati tusa tujutiu asamtai,
nunú kashi aajakua duwi akiina pujusan,
senchi waitiag ankatin asamtai.
11 ¿Wagkanuk mina dukujui
egkemsanuk jakachamiaja?
Nuniachkunush ¿wagkanuk
yama akiinmawaik jakachamiaja?
12 ¿Wagkag wi akiinamtaish,
mina dukujush kuitamjukabi?
¿Wagkag muntsujinash amunstuawabi?
13 Yama akiinmawaik jakauwaitkunuk,
utugchatji atsugbau shiig kanak tepemaina
numamtuk, yamai ayamkun tepemainaitjai.
14 Yaunchuk jakauwaitkunuk apu aidau,
dita atuwe aidaujai,
jega múun aidaun jegamjau aidau
jinawajua nujai ijunja pujumain wajajai.
15 Nuniachkunush maki makichik nugka apuji
aajaku aidau, dita pujusa
inamtaiji aajakunum oro
aidaun, jiju plata aidaun
utuamajaku aina nujai
ijunjan pujumain wajajai.
16 ¿Wagkag uchi jakau akiidaun
ukusa ajapin aina dutika ajapjuachajabi?
17 Aents pegkegchau jakauk,
pegkegchaunak taka pujumaitsui,
tuja tikich aentsnashkam
pegkegchaunum inakug waitkamaitsui.
Tuja aents pimpiki yaweja
pujaushkam jakug ayamui.
18 Nuwi batsamas achikbau
aajaku aidauk agkan batsatui,
wagki takata apuji senchi takatsjume,
tusa jiyaku suwimchamu asag.
19 Nuwig batsatui aents
eme anentsa diitai aidau,
imanchaush aidaushkam betekmas batsatui.
Inaku waitkatai jinau aidaush
apuji waitkascham agkan batsatui.
20 “¿Wagkag Apajuísh aents
waittsatnunash akiinati tawa?
¿Wagkag aents kuashat waitiaunash
iwaku pujusti tawa?
21 Aents jakatatus egauk wamak jatsui,
waji pegkeg akik uukbaun wainkatatus
egama imatika jakatatus egakush jatsui.
22 Nunú aents shiig aneamujiya duka
jakamtai ukusam megkaga nunuwai.
23 Niinash waji utugchatak ajiti nunak
Apajuík dekamtiktsui.
Nuadui aents wainmachujai betek,
jinta wetai epenbaunum
wetakama tujimaina numamtuk wajawai.
24 “Yujumak yumainun idaikun,
wake besemag dekapeakun buutjai,
umutain umakun pujumainun
senchi waitiakun kajeajai.
25 Ashí mina ishamtaig ayá nunú,
dekas mina uwaktin ayá nunú
yamai waitkajawai.
26 Makichkish ayamainchau dekapeajai,
mina anentaijun ichichtujug
shiig anemtijumainuk atsawai.
Shiig aneasan agkan pujumainchau,
ayatak waugkamin dekapeajai”, tiuwai Job.