5
Kuashat namak achikbau
(Mt. 4.18-22; Mr. 1.16-20)
1 Jesús kucha Genesaretnum uwet wekagai, kuashat aents Apajuí chichamen antukagtatus tuwakag chanuidau.
2 Nuniamunum jimag barca kaamatak tepaun Jesús wainkauwai, namaká main aidau redjin nijainak jiinjá ukukbaun.
3 Nunik makichik Simogka barcajiya nui egkemag, machik ejapen inananta tusa, nui ekeemas aents namaká uwet tuwakun jintintu.
4 Nunik chichamun ashimak, Simogkan chichajak:
—Wiyankam kuchanum ejapeantam redjum ajugkam namak maata, tau.
5 Tama Simón ayaak:
—Maestroh, kashi red ajú ajunkawa tsawampakuish makichkish maachmaji, tujash ame chichamjumin ajugtajai, tau.
6 Tusag ajukmag, shiig kuashat namakan chimpikaju, imatikamu asa rednak ichiau.
7 Nunitai ditá kumpají tikich barcanmayan iwiyaidau, taawag yaimpaktinme tusag. Dutikam kautuawaju, nunikag namaknak barcanmag mai aimkaju, dutikam tepeattak wajau.
8 Imanitai Simón Pedro nuna wainak, Jesusa eemtin tikishmag:
—Apuh, ukugkita minak, wika tudauwaitjai, tiu.
9 Namakan imatika kajegká ishamkau, nunisag ashí niijai yujaidaushkam,
10 nuniamunum Jacobo, Juan Zebedeo uchijí Simogka kumpají aina dushakam nunikaju. Nunitai Jesús Simogkan chichajak: —Ishamkaipa, yamai nagkamsamek namak maatasa wekaetam anmamtuk, Apajuí chichame etsegkum aents aidau minai ikautjin atatme, tiu.
11 Nunikag barca aidaunak anugkag, ashí ukuinak, Jesusjai weajui.
Aents lepragtinun Jesús etsagagbau
(Mt. 8.2-4; Mr. 1.40-45)
12 Tikich tsawantai, Jesús makichik yaaktanum pujai, aents lepragtin tajuauwai, nunik Jesusan wainak tikishmag tsuntsumá, nijayin nugká antig pujusá:
—Apuh, wakegakmek etsaentumainaitme, tau.
13 Tama Jesuschakam uwejin antiak:
—Wakegajai, pegkeg wajastá, tiuwai.
Tusa tamawaik leprak megkaekauwai.
14 Dutika: Makichkish ujakaipa, sacerdote jegajuam wantintukta, nuniakum ofrenda susata ame pegkeg webaugmin Moisés tibauwa dutiksamek, ditashkam waipakag, dekas tsagaje tujamtinme, tiuwai.
15 Tujash ni dutikamua duka nuní nagkaemas naatu, nuniau asamtai kuashat aents tuwajuidau ni chichamen antugkagtatus nuigtú dita jaamujinash etsaentugti tusag.
16 Tujash nigka nugka agkantu aidaunum wegau, nunik Apajuin auju.
Jesús aents wekaechau etsagagbau
(Mt. 9.1-8; Mr. 2.1-12)
17 Makichik tsawantai Jesús jintinkagtau, nuniamunum fariseo aidau, maestro chicham umiktinun jintinkagtin aidau eketaidau, nunú aidauk ashí yaakat yaijuch galileanmaya, Judeanmaya nuigtú Jerusalegnumia aina nuiya kaunawajui. Nuniamunum Apu Apajuí senchijin Jesús iwaidau aents aidau etsagamunum.
18 Nuniamunum ujumak aents aidau, aents wekaechaun camillanum pataidiag itawag, awayatag tuidau Jesús wajamunum ejentuntatus.
19 Tujash kuashat aents tuwakú asa waimainchau asamtai, jegá tuntupen wakaju, nunikag ujajag aagkawag, wekaechauwa nuna camillanum akakiaju, dutikawag ejapen Jesusa eemtin aepsaju.
20 Jesús dita dekaskeapi tabaujin wainak chichajak:
—Aishmagkuh, amina tudaujum aidauk tsagkugnaje, tau.
21 Nuna tutai chicham umiktinun jintinkagtin aidau, fariseo aidaujai ditak anentaimsag: “¿Niish ya asaya Apajuinash pegkegchaunash chichajua? ¿Ya tudau aidaunash tsagkugkagtumainaita imá Apajuikeajama?”, tuidau.
22 Tu anentaimaidaun Jesús dekau asa ditan chichajak:
—¿Wagka annush anentaimjume?
23 ¿Tuwaita imá yupichuch tumainush, amina tudaujum aidauk tsagkugnaje taja dukaih, atsa nantakim wetá tumainaitag dukaih?
24 Tujash Aentsmaga akiinauwa nu, ju nugka juwish tudau aidaunash tsagkugkagtumaina nu dekaatajum.
Tusa wekaechaun chichajak:
—Amina tajame, nantakim camillajum jukim jeemin wakitkita, tiuwai.
25 Tusa tamawaik ditash wainainaig nantakiuwai, nunik camillajin juki Apajuin emematki jeen weuwai.
26 Dutikamtai ashí aents aidauk puyatkaju, nunikag Apajuin emematiaju, nunik ishamkag, chichainak:
—¡Yamai anentai jegagmainchau wainkaji!, tuidau.
Jesús Leví untsukbau
(Mt. 9.9-13; Mr. 2.13-17)
27 Nuna dutika ukuak jiinkiu, nunik wekamá Leví apú kuichkiji atinun akikmagtai ijumak ekeemtatman wainkauwai, nunik chichajak:
—Wegajai mina jintintaig aminum, tiuwai.
28 Tama ni takataijinak ashí ukuak niijai weuwai.
29 Nunik nunú tsawantaik Jesusan eme anentus ajamsatatus niina jeen yutain shiig umikú, dutikamunum Leví kumpají, apu romanmaya kuichkiji atinun ijumin aidaushkam, nuigtú tikich aidaujai mesanum pekajaidau.
30 Nuniagtai maestro chicham umiktinun jintinkagtin aidau fariseo aidaujai, Jesusa jintintaiji aidaun chichajuinak:
—¿Wagka atumesh apú kuichkiji atinun ijumin, nuigtú tudaugtin aidaujai ijunjajum yuwakjumesh, umutash umagme?, tuidau.
31 Tiagtai Jesús ayaak:
—Jamamtuchu aidauk ampijatnunak atsumatsui, jau aidau atsumawai.
32 Wika aents pegkejan takau aidau untsuktasan minichuitjai, wika aents tudaugtin aidau tudaujin idaiyinak mina nemagtuktinme tusan tauwaitjai, tiuwai.
Ayuno pachisa iniimsamu
(Mt. 9.14-17; Mr. 2.18-22)
33 Jesús tutai dita aiinak:
—¿Wagka Juagká jintintai aidauk, kuashtá ayunainak Apajuinash aujin agmae nunisag fariseo aidaushkam, tujash amina jintintaijum aidauk ayatak yuwinak, umutnash umú yujainawa?, tuidau.
34 Tutai Jesús ayaak:
—¿Nuwenbaunum ipaamu aidaush, nu nuwenu ditajai pujaigkish, ayunatajum tumainuk ainajum?
35 Tujash tsawan jegattawai nuwena nunú juwam atata nu, nunikmatai ayunawagtatui, tiuwai.
36 Tusa junashkam augmatus:
—Makichkish nugkutai yamagman tsupikag nugkutai mamujunmag adujtuchu ainawai, dutikamak nugkutai yamagmaitak besemain asamtai, tuja yamajam tsupikbau mamujunum adujtamashkam shiig juwamaitsui.
37 Dutiksaik vino yamagmashkam, duwap apagbau ajutnumag yajashtaiyai, dutikamak vino yamajam ichiimainai nunik ukaemainai, nunitai duwapshakam ajapnamainai.
38 Nuadui vino yamagmak duwap yamagmanum yajataiyai, dutikamu asa mai betek amainai.
39 Tuja umutai kajiau umin aidauk, yamá kajiaunak wakegainatsui, wagki: “Kajiau imá pegkejai” tuidau asag, tiuwai.