9
Israel aents aidau tudaujin Esdras etsegtukbau
1 Nantu sieteya nunú takau ai, tsawan veinticuatrotin Israel aents aidau yujumka yutsuk batsamas Apajuín ausagtatus ijunjajui. Nuninak jáanch pegkegchaun nugkujag, buuken nugka yukukuntun yukumajag,
2 aents tikich nugkanmaya dita wegantuchu aidau ijunbaun ukukiag, ditash kanakag ijunas dita pegkegchau takamsamu aidaun, dita muunji aajaku aidau pegkegchau takamsau aidaujai ashí etsegtumakajui.
3 Tuja nunisag ijunaig chicham umiktin agagbaun Tuke Pujuu dita Apajuíji ditan susauwa nuna kampatum horayai ausajui. Tuja tikich kampatum horaya duwi dita pegkegchau takamsamu aidaujin etsegtumakajui. Nunikag nuadui Tuke Pujuu dita Apajuíjin emematiajui.
4 Nuna inagnakag, Leví wegantu aidau: Josué, Binuy, Cadmiel, Sebanías, Binuí, Serebías, Baní, Quenaní aatus numi yakí papamunum wakajui. Nunikag nuwi ijunas senchi untsumak, Tuke Pujuu dita Apajuíjin ausajui.
5 Dutikawag Leví wegantu aidau: Josué, Cadmiel, Binuy, Hasabnías, Serebías, Hodías, Sebanías, Petahías aatus aidau chichainak:
“¡Wajaitajum, nunika ijuntsajum Apajuí Tuke Pujuuwa nunú yamaish ajumaish tuke ememattajum! ¡Apajuí daaji dekas tikich aidaun nagkaesau ima pegkegma nunú kantamjakjum shiig ememattajum!” tiajui.
6 Tusa tiagmatai Esdras chichaak:
“Tuke Pujuuwah, tikich apajuí amejai betekak makichkish atsawai, ima ameketme Tuke Pujuumek. Ame nayaimpik najanauwaitme, tuja nuna nagkaiki awa dushakam ame najanauwaitme, dutikam ashí yaya aidaushkam najankauwaitme. Nugkashkam, tuja nugkanum ayá dushakam ashí ame najanauwaitme. Tuja nayants aidaushkam najanam nuwi ayá dushakam najankauwaitme. Ashí waji aina duka ame pujutak suwame. Nuadui yaya nayaimpinum ayá duka amina emematjamainawai.
7 Tuke Pujuuwah, ame Abram etegkauwaitme. Dutikau asam caldeo aents aidau yaaktaji Ur aajakua nuwi pujau, ame jiikim niina daaji yapagtuam Abraham adaikauwaitme.
8 Dutikam ima aminig kajinas anentaimu wainu asam, niijai ame chicham umiakum:
Canaágnumia aents aidaun nugke, hitita aents aidaun nugke, amorreo aents aidaun nugke, ferezeo aents aidaun nugke, Jebús aents aidaun nugke, gergeseo aents aidaun nugke aatus aina nuna ame wegantu aidaun susatnaitjai tusam, anagkuawaitam duka betek umikuitme.
9 Iina muunji aajaku aidau Egipto nugkanum batsamas waitujaku aina duka amek wainkauwaitme. Tuja nayants kapantu tutainum jegawag buutuidaush ame antugkauwaitme.
10 Nuadui faraón ashí niina inake aidaujai, tuja nunú nugkanmaya aidau ashí suwimak suwakum ishamain wainchatai aidau iwainajuitme, wagki Israel aents aidaun shiig pegkegchaunum waitkaidau asagmatai. Dutikau asam yamaik ameketme dekas pegkegnum augmattaimek.
11 Ditash wainainai nayants jimaituk akanka buku awajsabiume. Dutikamunum katiajajui. Untsu shiwag aidau ditan pataetukajua duka nayantsa ejapeen dekas shiig kunajin kayajai betek aepá emegkagmayume.
12 Dutika ayamjukam tsawai shimakui, yujagkim emtika awantamin, nuna diisag shimuyanume, untsu kashi jii kegau emtika awantamin jintan tsaaptin emamtai, shiig shimuyanume.
13 Tuja tikich tsawantin muja Sinaínum akaikiuwaitme. Tuja nayaimpinum pujusam ditajai chichasuitme. Nuwi susauwaitme chicham umiktin shiig pegkeg aidau agagbau.
14 Tuja tsawan ayamtai ame etegkauwaitam nunú jegakuig, nunú tuké dutikin atajum tusam jintintuawaitme. Tuja chicham dekaskenum umiktin agagbau Moisés susauwaitme, nuna umiktinme tusam.
15 Tuja nuigtushkam dita yapajainak waituinakuish, nayaimpinmaya pag susauwaitme, nuna yuwawag ichichmamjatnume tusam. Tuja kitamainakuish uwagtinme tusam, kayanmaya yumi susauwaitme. Nuigtushkam nugkan amastinaitjime tusam anagkuawaitam nunú jukitajum tiuwaitme.
16 Tujash iina muunji aajaku aina duka emebau, antakchau wajasu aajaku ainawai. Nuadui amina chichamem umiktin agagbaunash umikchau ainawai.
17 Nunidau asag amina chichamjum umitan dakitjag, ame dita yayaakum wainchatai ishamain aidau iwainajuitam nunashkam kajimatkiajui. Nunidau asag amina chichama intimjutpakiag, tikich apun adaikajabi ataktu Egipto nugkanum awagtamki waitkam batsabiag nuwig ejetamatnume tusag. Tujash amek tsagkugkagtin, anejatin, wait anenkagtin, nuigtush kakajus kajechuitam duwi kajimatkimek idaisachuitme.
18 Jiju ukuijag baka tsakatan dakumak najanawag, jujuwai apajuí, ii Egipto nugkanum waitkam batsatutin jiigmajajua duka tusag emematuinak pegkegchaun takainakuish,
19 uwegshunum jinaati tusamek idaitsuk wait anenjauwaitme.
Dutikam tsawai dita shimamunum yujagkim wajantun wejakua dusha, tuja kashi shimamunum yujagkim keeka wejakua dushakam emegkakchauwaitme.
20 Nuigtushkam Wakani Pegkeji ditan jintintuatin susabiume, tuja dita yapajak yuwawagtin nayaimpinmaya yutai maná akaketkabiume, tuja kitamainakuishkam dita uwagtinuk sumayume.
21 Tuja cuarenta mijan uwegshunum yujasag yuwawagtinush ame susabiume, tuja jáanchjigkesh mamugchagmayi, nawenigkish iyagchagmayi.
22 Nugka múun aidau susauwaitme. Dutikau asam nunú akaantujam tesagkam maki makichik wegantu aidau tinamkauwaitme. Tuja apu Sihón aajakua nuna nugke Hesbón aajakua nunú, apu Og aajakua nuna nugke Basán aajakua nujai ame susauwaitme, dutikam nuna jukiag nuwi batsamsaju ainawai.
23 Nuigtush nayaimpinum yaya ayá iman kuashat uchigtin atinme tusam tiuwaitme. Tuja dita muunji aajaku aidau anagkuakum, nugka atumdau atinun amastinaitjime tiuwaitam nunú umiakum, yajuakam nunú nugkanum ejegauwaitme.
24 Dutikamu asag nunú nugkanum utsanawag Canaán nugkan jukiajui. Tuja nuwiya aents aidauk chichaka ayamjumakchamin awajsauwaitme. Tuja dita apuji aidaushkam nuwiya aents aidaujai ashí Israel aents aidau, dita wakegamun dutikatnume tusam ditai idaisauwaitme.
25 Nuigtushkam yaakat peejamu aidaun, nugka pegkeg ajak tsapau aidaun, jeganum waji pegkeg piyaku aidaun, yumi taimu aidaun, uva ajakmakbau aidaun, olivo ajakbau aidaun, aatus nuigtu tikich ajak jigkayi yujutai aidaun, shiig kuashat yajuakajui. Dutikawag nuna shiig yuwawag duwekajui. Aatus ame wait anenja kuitabau asag shiig batsamsajui.
26 Nunik batsatiatak, aminak umigtamkachu ainawai. Nunidau asag amejai shiwagmagawag, chicham umiktin ame susauwaitam nunak dakitug idaisau ainawai. Tuja nuigtushkam amina chichamjumin etsejin profeta aidau ditan chichajak, aní batsamtsuk Apajuí nemagkatajum tusa dita pegkegchaujin paan etsegtamu asag kajegku ainawai. Dutikaidau asamtai, ameshkam dita kajegkauwaitme.
27 Nuadui dita shiwaaji aidau waitkastinme tusam idaisauwaitme.
Dutikam batsamas waituinak amina segapajabi. Tusa segapainakui, amina anenkem múunta iman asamtai, nayaimpinum pujusam dita sumamu antugkam, ditan ayamjuk agkanmitkatin aidau aents etegtujuitme.
28 Dutika ayamjukam machik agkan pujamuik, amina ataktu pegkegchaun takamjutpagmayi. Nunidau asagmatai dita shiwaaji aidau waitkastinme tusam idaisabiume. Dutikam waituinak ataktu amina segapainakui, amek wait anenkagtin wajasuitam iman asam, dita sumamu nayaimpinum pujusa antugkam kuashta ayamjukam agkanmitkauwaitme.
29 Tuja chicham umiktin agagbauwa nunú umiktajum tusameshkam ujayume. Tujash ditak eme anenmamaidau asag, amina chichamjum umiktin agagbaunak ajantusagkesh diischau ainawai. Nunidau asag amina chichamem pujutan sukagtina nunak umikchaju ainawai. Nuninak intimkiu antakchau wajasag, nunú chicham umitnak dakitjau ainawai.
30 Imanik pegkegchaun takamainakuish, kuashat mijadai atsanjauwaitme. Nuadui aminí Wakan awa nujai, tuja amina chichamjumin etsejin profeta aidaujai ankaigpa tusam ujayume. Tujash ditak antukchaju ainawai. Nuadui aents nugka múun aidaunmaya ditan depetuk waitkastinme tusam idaisauwaitme.
31 ¡Dutikau ayatkum ame wait anenkagtutaigmek múunta iman asamtai, ashí ijintsuk, nuigtush ima ditakek idaitsuk kuitamkauwaitme, wagki amek Apajuí kakagchauch, wait anenkagtinaitam iman asam!
32 ¡Nuadui iina Apajuíjiyah, amek múun, senchigtin, ishamain, ame chicham tibauk imatiksamek uminaitme, tuja amina anenkagmek múuntai! Jutiin apuji aidau, tikich apu aidau, sacerdote aidau, amina chichamjumin etsejin profeta aidau, iina muunji aajaku aidau, nuigtu ashí aents aidau, Asiria nugkan apuji pujujakua duwi nagkamas waitujaku aina nunisaik yamaishkam waitiaji.
33 Tujash ii imanika kuashat waittsa minag duka utugchatak aminuchui. Ii pegkegchau takasu asajin, amek amina chichamjum betek umiau asam suwimkak sukagtame.
34 Iina apuji aidau, tikich apu aidau, sacerdote aidau, iina muunji aajaku aina dushakam, chicham umiktin agagbaunak umikchaju ainawai. Tuja pegkegchau takasaigpa, suwimak jukittagme tusa ame ujamash antukchaju ainawai.
35 Nunidau asag ame apu emam apusamuitak, tuja nuigtush shiig kuashat waji aidau susamaitak, nuigtush nugka pegkeg shiig tsapau susamuitak, nunak kajimatug emematjamchaju ainawai. Nunidau asag pegkegchau takamujinash idaisachu ainawai.
36 ¡Diista nijah, ame iina muunji aidau nugka susauwaitme ajakmawag yuwatnume, nuninak wajigtin atinme tusam! ¡Nunú nugkanum batsamsa iina pegkegchaujin yamaikish wainka inaku waitkatai batsatji!
37 Ii ajakmamu shiig kuashat juwag duka iina pegkegchaujin ame apu aidau sukagtusu asamin, dita yuwatin ajaaku waitiaji. Ii aidautinak nunú apu aidau iina tagkuji aidaujai niinu etamak waitkagmainawai. Nuadui shiig pujuschamin dekapeakun waitiaji”, tiuwai Esdras.
Chicham umiktin agagbauwa nunú umikmi tusag Israel aents aidau tumamiagbau
38 Imanika waituidau asaja dekas chicham umiktin agagbauwa nunú umikmi tusa tumamainaji. Nuadui nunú pachisa papiinum agaji. Nunú papii agaja umikbaun iina apuji aidau, Leví wegantu aidau, sacerdote aidau aatus dita daajin apujawag firmainawai.