145
Ashí aents aidauk Apajuín ememattinme
David kantamamu
1 Mina apug Apajuíyah,
amina daajum ajumaish tuke atina
nuna pachisan etsegkatjai.
Tuja amina daagminak tuké pegkegnum
chichagtinaitjai.
2 Ashí tsawantai aminak pegkegnum chichagtatjame,
nuniakun amina daagmin tuke ememattinaitjai.
3 Tuke Pujuuk dekas múuntai,
iman asa ima nigki emematam amainai,
iman asamtai anentaimsaish, kakajus dekamaitsui.
4 Uchi akiinak wegagtina duka
ame pegkeg iwainajuitam nuna emematiagtinai.
Tuja amina senchigmejai
wainchatai ishamain aidau
iwainajuitam nunú etsegnaktinai.
5 Amina imanjumin tsaaptinjumjai pachisag
etsejiagtinai.
Nuninakui wishakam
ame iwainajuitam nuna pachisan chichattajai.
6 Amina senchigmin shiwaajum aidau
depetnaitam nuna pachisag chichagtinai.
Nuninakui wishakam ame múuntaitam
nuna pachisan chichattajai.
7 Amina wait anenkagtutaigmin
pachisag etsejiagtinai;
nuninak shiig aneas kantamainak:
¡Apajuíyai pegkegmak! tujamiagtinai.
8 Tuke Pujuuk kakagchauch, wait anenkagtin;
wamak kajechu anentak wajasui.
9 Tuke Pujuuk ashí aents aidaun kuitamui;
tuja tikich nii najankamu aina nunashkam puyatjus kuitamui.
10 ¡Tuke Pujuuwah,
ashí ame najankamu aidau emematjamtinme!
¡Tuja amina umigtamin aidaushkam
pegkegnum chichagtamtinme!
11 ¡Amina inamtaijum pegkegma nuna
pachisag chichatnume!
¡Tuja amina senchigmejai
wainchatai ishamain aidau
iwainajuitam nuna pachisag chichagtatui!
12 ¡Tuja amina senchigmea nuna,
ame inamtaijum pegkegma nujai
ashí aents aidau dekaatnume!
13 Amina inamtaigmea duka
ajumaish tuke atinai,
nuadui ajumaish amek tuke inamtinaitme.
14 Tuke Pujuu aents wake besemag pujaunash yayawai,
tuja kakakchau wajas pujaunash senchimtikawai.
15 Apujuh, ashí aents aidauk
amina dakagmainawai, yutain sujamsati tusa.
16 Nuninakui ame shiig aneasam suwame,
nuna ashí iwaku aidauk
yuwawag ejemakag shiig anenawai.
17 Tuke Pujuuk ashí
nii anagkagtuamunak betek uminai,
tuja nii najankamu aina nunak
shiig anentawai.
18 Tuke Pujuuk aents niina dekaskenum
segau aina nujai ijutkawai.
19 Tuja niina eme anentus umijin aina nunú
segamak antujuk yaigka uwemtikui.
20 Tuke Pujuuk niina aneen aidaun kuitamui;
untsu aents pegkegchau aidaunak ijina utsawai.
21 ¡Wika kantamkun Tuke Pujuun ememattatjai!
¡Ashí aents nugkanum batsamin aidauk
Apajuí daaji pegkegma nuna pachisag
tuké ajumaish ememattin atinme!