2
Ametme mina uchigmek
1 ¿Wagka aents pegkegchau aidaush
Tuke Pujuujai shiwagmagainakush
ijunjash pampandayinawa?
¿Wagka chicham jegamainchaunash
wainkash tuu yujawa?
2 Nugkanmaya apu aidau
yaakta apuji aidaujai ijunag
Apajuín kajejuinak, nii etegka
apu adaikauwa nunashkam
shiwagmainak wakenmataik
chichaman umijuinawai.
3 Nuninak senchi untsumkag:
“¡Achikbaujai betek batsatag
duka ankanmagawagmi!
¡Tuja jigkaja emetuamujai betek
batsatag dushakam
agkanmagawagmi!” wajainawai.
4 Imatiagtai Apajuík niina pujusa inamtaijin
nayaimpinum pujus dushikiawai.
5 Dutikak kajejuk uwakeawai,
untsu nuni senchi kajejuk chichajak:
6 “Wi etegkan apu emamugnak
muja etegkamua nuwi Jerusalén
pujus inamjati tusan
wi apusajai”, tawai.
7 Tuja Tuke Pujuu mina tujutma
nuna etsegkatjai.
Tuke Pujuu chichagtak:
“Ametme mina uchigmek,
amek wi akiinati tima akiinauwaitme.
8 Ame wakegamu segatta,
Wi nunak imatiksanuk ashí nugkanmaya
aents aidaun amastatjame aminu atinun.
9 Ichinak najanamu shigki basegbauwai
awati tsaimaina numamtuk,
apu pegkegchau aina duka
ame tsaika utsagtatme”, tujutmae.
10 ¡Apu nugkanum inamin aidauwah,
shiig antuktajum, nunikjum
juju chicham shiig unuimagtajum!
11 Nuniakjum Apajuí
eme anentsajum umigkujum
shiig aneasjum ememattajum.
12 Apajuí eme anentsajum ememattajum
kajegtamkainum, nii kajegtamkamtaig
jinumain ainagme, wagki nii kajeamujig
makichkish imijtumaitsui.
Aents Apajuíyai kajinas anentaimaidauk
nii kuitamsam pujuidau asag,
shiig aneas pujusagtinai.