LIBRO IV
90
(Salmos 90—106)
Aentsuk Apajuí tuke pujuuwa nuninchauwai
Moisés Apajuí etegkamu aajakua nunú Apajuín ausamu
1 Apuh, amek yaunchuk nagkamsam
jutiik tuké yaijatnaitme.
2 Tuja muja aidaush najaneatsaig, nugkashkam najaneatsaig,
yaunchuk nagkamsam,
yamaya juish, tuja atakea duishkam
ameketme Apajuímek.
3 Amina chichamjuminig
aents aidauk jakag nugka najanenawai.
4 Ame diismak mil mijana duka
makichik tsawan nagkaema nuninai;
tuja mil mijana duka
kiyag tsawak megkagama
numamtuk nagkaemawai.
5 Amek namak chichigmajai betek
aents aidauk utsame,
tuja iina pujutjig kajanum kajamja
shintaku ukutiama nujai betekai.
6 Aents aidauk dupajai betek ainawai,
dupa kashikmas yagkujuk,
etsa akagai kagaka
jinuwama numamtuk wajaji.
7 Ame kajekbaugmin amujatme,
tuja ame kajekamin ishamka
imaanjaujai betek pujaji.
8 Iina tudauji pegkegchauwa duka
ame shiig dekame.
9 ¡Ame kajegkagtukaminig
ii iwaku batsatag duka,
mayai mayati ajaptayama
numamtuk jaka megkaemainaitji!
10 Iik ayatak setenta mijan pujusa jainaji,
tuja nuni wajiu aidau ochenta mijan jegainawai;
tujash imaan mijan pujakuish,
ima waitiamua duke utugchatjai igkunui.
¡Mijanak jutii pujutjijai betek
wamak nagkaemawai!
11 Ame senchi kajeamugminash
¿ya dekamainaita?
Ame kajekbaujum ishamaina nunash
¿yaki dekamainaita?
12 ¡Iik tuke jakatnapitji tusa,
shiig dekau ata nunú jintinkagtuata!
¡Nunú dekau asaja,
pegkegnum pujuta nunú puyatjukagmi!
13 ¡Tuke Pujuuwah, ataktu yaijatkata!
¿Wajupa asamea yaijatkattame?
¡Juju amina inakem aina nunú wait anenjata!
14 Kashikmasa nagkamsam
amina anenkagmea nunú sukagtusta,
dutikagtuawaminig ashí tsawantai,
shiig aneasa tuké kantamtinaitji.
15 Kuashat mijanai waitujakuitag
imatiksamek shiig aneasa pujut sukagtusta.
16 ¡Juju amina inakem aina nunú
dita wegantu aidaujai amina imanjumin
senchigmejai wainkatnume tusam iwaintukta!
17 ¡Iina Apajuíji Tuke Pujuuwa
nuna wait anenkagtutaijig jutinii asati!
¡Apajuíjuh, iina takatjish pegkegnum yumigsata!
¡Ehe, dekas iina takatjig pegkegnum yumigsata!