8
I Hesus Ya Pinakabari Tam
1-3 A kumanin mantu ya pake ikayat ku uhohugan tekamuy: ittan ya kadakalan na padi tam ta kuman na nebar kun ta ayanin, a mappya ta neatang na ya bari na en ta Namaratu gafu ta liwat tam kiden, te maski am inya ya mesaad ta kadakalan na padi a gagangay ta itta ya iatang na. A ta ayanin a nesaad ya kadakalan na padi tam ta kanawan na dama na en nga magturay ta langitewan. A intu hapa ya pinakabari tam ta pake agyan na Namaratu ewan, te bakkan ta agyan na gagangay na kapilya nga paddayan na tolay ta lutakin.
4 A ta ketta para la ni Hesus ta lutakin a awena mabalin ta magpadi ta gagangayen kapilya, te ya magLebi kiden la ya magpadi ikid na mangatang ta kapilya in yen ta kuman na nebar na lintigen nga mangpapadi tekid.
5 Ammi ye-yen na kapilya nga nagtarabakun na padi kiden a bakkan ta yen ya kakurugan na agyan na Namaratu, te yen la ya neunnan na Namaratu ta kuman na keangarigan la na agyan na en ta langit. Te ya uhohug na Namaratu te mina Moses tentu en ange namadday ta gagangayen kapilya a
“A pake itam, Moses, am paddayam ya kapilya en, te megitta mina ta nepaitaken teko ta utun na bagetayen,” kunna.
Ya Bagu En Tulag Na Namaratu
6 A ya tarabaku ni Hesus ta ayanin ta pake agyan na Namaratu ewan a pake mapmappya ammi ta tarabaku na nagpadi kiden ta lutakin, te pake mapmappya hapa ya bagu en tulag nga idulot na ammi ta napolu en tulag nga nedulot na popolu kiden nagpadi. A kakurugan ta mapmappya ya bagu en tulag, te pake mapmappya hapa ya ikari na Namaratu nga mehulun tentu ammi ta napolu en tulag na.
7 Te am angarigan ta awan mina ta kurang na napolu en a awena mina netali ya mekaduwa en.
8 Ammi kuman na nehuya na ya napolu en tulag na gafu ta tolay kiden, te ya uhohug na en tekid a
“Itta sangaw ya araw am mamaddayak ta bagu na tulag ku ta Istralita kiden ikid na taga Huda kiden.
9 Ammi bakkan sangaw ta kuman na dana en tulag ku ta dadagkal da kiden teyaken nangiuhet tekid ta lugar na Egipto,
te aweda haman kinurug ya tulag ken tekid, a yen ta pinagorayan ku kid hapa,” kunna.
10 “A ya tulag ku sangaw ta tolay ku kiden a
Iyak hapa la sangaw ya mangipasinap ta lintig ku kiden tekid,
te isurat ku ta nonot da, petta malogon kid sangaw mangurug.
A iyak sangaw ya Dyos da nga makkamu tekid,
a ikid sangaw ya tolay ku nga mangurug teyak.
11 A awena sangaw masapul ta magintultuldu kid.
A awan sangaw ta,
‘O, nonotam ya Namaratu,’kumin,
te amu nak sangaw na ngamin kiden tolay ku
nga abbing ikid na dadagkal, ikid na pobre ikid na naba-nang.
12 A amu dak sangaw te ikallak ku kid sangaw ta pagliwat da,
te awek na sangaw nonotan ya liwat da kiden teyak,” kunna.
13 A gafu ta bidan na ya bagu na tulag, a ikwenta na ya napolu en ta dadan na nga awan ta kapkappyan. A ya nagbalinen ta dan ikid na makafuy a tanagay na imawan.