20
Xtx'aconk kareyil tan porer Kataj
1 Lok tbit Kataj yi stzi'u', te yi atu' tul sotzaj c'u'lal.
Lok tz'oc yi kaRyosil, yi Ryosil Jacow tan colche'nu'.
2 Cho'nk saj ẍch'eybil teru' le ama'l yi wi'nin xanil.
Cho'nk saj wi Sión kale najle't Ryos.
3 Lok tz'ul tx'akx tc'u'l i' cyakil yi oy yi ja wi't tak'u' tetz.
Lok tzatzin te cyakil xtx'ixwatzu' yi ja pat-xij tanu'.
4 Lok tak' i' yi tajbil talma'u'.
Lok jamelan cyakil yi na taju' sbanu'.
5 Yil tx'aconu' kaẍch'ink tan yi tzatzi'n yi ato' cu'nt.
Kachaje' e'chk kabander tan tak'le'n k'ej yi kaRyosil.
Lok tak' Kataj cyakil yi na tzanu' tan jakle'n tetz.
6 Na kocsaj yi tz'ocopon Kataj tan colche'n yi kareyil, yi txa'ijt ta'n.
Nin na kocsaj yi stk'e' i' yi ẍch'eybil tetz.
Cho'n lsaj ta'n le tetz najbil yi at tcya'j, yi wi'nin xanil.
Nin na kocsaj yi xtx'aconk i' scye'j yi e' contr tan yi tetz porer.
7 At e' yi cho'n k'uklij chic'u'l te chicare't tetz oyintzi'.
Nin at e' yi cho'n k'uklij chic'u'l te chichej.
Poro yi o' ketz cho'n k'uklij kac'u'l te Kataj, yi kaRyosil.
8 Yi e'a'tz, cupon nukpuj quikan, nin chicupon trimp, na qui't jal chiwalor.
Tircu'n ẍchisotzok cyera'tz.
Ma yi o' ketz, iẍnin txicl cho'.
Nin iẍnin benak kukan ttx'otx'.
9 Ilu' Kataj, lok tbitu' yi katzi' kakul, yil ko'c tan jakle'n ẍch'eybil tetz yi kareyil.