22
O'kl swutz Ryos nin k'ajsbil tetz i'
1 Ay Ta', ilu' inRyosil.
¿Mbi tzuntz yi nchincyaj tilolu'?
¿Mbi tzuntz yi qui na u'lu' tan incolche'n?
¿Mbi tzuntz yi qui na tbitu' yi intzi' yi inkul?
2 ¡Ay Ta'!
Sk'ejl nin lak'bal na chintzan tan jakle'n ẍch'eybil wetz teru'.
Poro qui na stza'weju'.
Wech, na qui na nuje' tan jakle'n ẍch'eybil wetz teru'.
3 Poro yi ilu' teru' Ta', skawutz yi o' xonl Israel chin tz'aknak cuninu'.
Ilu' cawl ketz.
Nin ilu' yi jun yi na katzan tan c'u'laje'n.
4 Cho'n nk'uke' chic'u'l yi e' kamam kate' te'ju'.
Nin ilu' ocnak tan chicolpe'n.
5 El chitzi' teru', cha'stzun te chiclaxe'n tanu'.
Nternin k'uke' chic'u'l te'ju', nin jun cu'n ja el k'abu' te yolu'.
6 Ma ẍchiwutz wunak, yi in wetz ni'cu'n in tu jun amlu'.
In tu' chitze'lbe'tz.
7 Na cyakil yi e' yi na quil in wutz, na cho'c tan xbajtzi'i'n swe'j.
Na chucan len chiwi' nin na cyaltz:
8 “Ja tabnaj tibx tk'ab yi Ryosil.
Poro iẍkaj tz'eleponkx liwr ta'n.
Wi'nin na pek'x te'j tajcawil.
Poro iẍkaj sclaxok ta'n,” che'ch.
9 Poro ilu' Ta' ilu' nno'csan twankil intxu' tan wule'n tzone'j wuskil.
Nin ilu' nchinch'uysan, jetz yi intxutxune'n te intxu'.
10 Te yi ntaxk nitz'ij, sken no'c wetz tetz q'uicy'be'tzu'.
Te yi atin tzaj twankil intxu', ilu' inRyosil.
11 Cha'stzun te Ta', quil sjatxlen tibu' swe'j.
Na txant tan tule'n jun chin sotz c'u'lal tzinwutz.
Nin qui'c jun atk tan wuch'eye'n.
12 Yi e' incontr ja wi't chin baj chisutal.
Ni'cu'n quitane'n chi tane'n mam tor.
Chin xo'wbil nin chiwutz, chi quitane'n yi e' smaron wacẍ yi ate' wi Basán.
13 Ncha'tz ni'cu'n quitane'n chi quitane'n balum yi na chiẍch'in.
Jakij chin chitzi' cya'n.
Jalt cuntunin tan chisaje'n wokpuj tinwi'.
14 Ja ne'l num ẍchik'ab yi e' incontra'tz.
Ncha'tz tane'n walma', ni'cu'n tane'n tu xcab yi tzan tele'n num.
Nin ja el k'ok cyakil imbakil.
15 Ncha'tz tane'n intzi', ja wi't skej chi tane'n jun piẍ xc'o'n tx'otx'.
Nin yi wak' ja aje'n wutz inja'j.
Na txant cun tu' tan inquime'n.
16 Na suti'n chin cyak'un jun c'oloj incontr, chi na chiban tx'i'.
Suti'n chin cyak'un jun c'oloj mal nak.
Nin ja wi't kopxij yi ink'ab tu wukan cya'n.
17 Lajluch cu'n cyakil yi imbakil na qui'ct nin in.
Nin jalt nin in na chitzan e' incontra'tz tan inxmaye'n.
18 Ej nin ja cho'c tan tx'ilu'n te be'ch wetz, tan quilol na'l camban tetz.
19 Poro yi ilu' teru' Wajcaw, quil chin tilcyenu'.
Na ilu' ak'ol inwalor. Ulk chanu' tan wuch'eye'n.
20 Chin cole'u', tan qui inquime'n tan spar.
Chin cole'u' tan qui inquime'n cyak'un yi e' chin tx'i'a'tz.
21 Chin cole'u' tan qui imbaje'n cyak'un yi e' balum.
Chin cole'u' tan qui inlo'one'n tak'un cyuc' yi e' mam tor, yi chin xo'wbil nin chiwutz.
22 Ta', swale' yi stziblalu' scyetz yi e' tal witz'un.
Chimbitzink ẍchiwutz yi e' nim juy tan tak'le'n ink'ajsbil swutzu'.
23 Ncha'tz cyakil yi e'u' yi na cyeku' ẍchi' Kataj, cyak'e'u' chik'ajsbilu' tetz.
Cyakil yi e'u' xonl Israel, cyak'e'u' k'ej i', nin cyeke'u' ẍchi' Kataj.
24 Na cyakil yi e' yi na sotz chic'u'l, qui na che'l te c'u'l i'.
Qui na tew tib i' ẍchiwutz.
Ma na ilenin na che' stza'wej yi mbi cu'n tajwe'n scyetz.
25 Ẍchiwutz cunin yi e' nim juy yil wak' k'eju'.
Ncha'tz ẍchiwutz cunin yi e' nim juy, yil tz'el ink'ab te yi suki'nt wa'n teru'.
26 Snojk chic'u'l yi e' yi qui'c ate' cu'nt.
Nin yi e' yi na chitzan tan joyle'nu', scyak'e' chik'ajsbil teru'.
Nin ẍchinajank wi'nin tiemp tanu'.
27 Cyakil yi e' wunak bene'n tzi'n wi munt, tz'elepon chitxum tetz Kataj.
Nin te yi tiempa'tz, ẍchimejek, nin chocpon tan tak'le'n k'ej i'.
28 Na yi ketz Kataj i' yi wi'tz Ajcaw.
Nin scawunk i' scye'j cyakil wunak bene'n tzi'n wi munt.
29 Cyakil yi e' ric chocopon tan c'u'laje'n i'.
Nin cyakil yi e' yi tx'aklij quimichil ẍchiwutz ẍchimejek swutz i'.
Ncha'tz cyakil yi e' yi quil chixcye' tan claxe'n cyalma' ẍchimejek swutz i'.
30 Cyakil yi e' wunak yi xomche' tzaj,
ẍchibne' chimunl swutz.
Nin ẍchitxole' yi balajil Kataj scyetz chinitxa' tu chimamaj sbne' opon tunintz.
31 Nin yi chinitxa' tu chimamaj,
ẍchitxole' scyetz yi cyetz chinitxa' tu chimamaj yi balajil Kataj nin cyakil yi bnixnak ta'n.