55
Na cu' intzi' swutz Ryos tan paj yi xo'w yi atin cu'nt
1 Ilu' inRyosil, tbite'u' yi intzi' inkul.
Qui'k tew tibu' tzinwutz.
2 Tbite'u' bin cobox tal inyol.
Nin stza'we'u' yi wajbil.
Na na cu' inwutz teru', tan paj yi chin bisbil nin atin cu'nt.
3 Na na chinxob yi na wit yi na chiẍch'in yi e' incontr wutz incoc.
Na chitzan tan inxo'wse'n.
4 Yi walma' na chucne' tan xo'wl.
Pyor yi na wit yi chinquimok cya'n.
5 Chin xo'wbil nin wutane'n ẍchik'ab incontr.
Wi'nin na chinlucne' tan paj.
6 At na ban cu'nt na intxum, yi chumbalaj nin klo', yi atk inxicy' chi tane'n jun plomẍ, tan wele'n ojk ẍchiwutz yi e' incontra'tz, bantz inclaxe'n.
7 Ba'n klo' ne'l ojk ẍchiwutz.
Nin chimben joylaj tan joyle'n jun ama'l tan wujewe'n tul.
Ba'n chimben tul e'chk ama'l tz'inunin tu', bantz cya'l chinxuxin.
8 Swewe' wib swutz yi tojkbil yi cyek'ek'.
Nin tzincole' klo' wib, tk'ab alchok e'chk takle'nil.
9 Poro Ta', xitcunu' yi cyajtza'kl yi e' incontra'tz.
Suk' cunu' chiyol, na jaltnin xtxumle'n e'chk ilc'ol cya'n.
10 Qui'c jun ba'n ẍchixo'l, na e' len cu'n juchul il.
Na cyakil k'ej, nin cyakil ak'bal, na chixon tnum tan juchle'n quil.
E' len cu'n biyol nak. E' len cu'n aj oyintzi'inl.
11 Ntin na cho'c tan kasuble'n, nin tan kabiyle'n.
12 Poro nk'e'tz jun awer nak yi wetz incontr, yi na tzan tan inxuxe'n.
Nin nk'e'tz jun yi mero na chi'ch c'u'l swe'j, nka yi mero wetz incontr, yi na tzan tan joyle'n puntil tan inlo'one'n.
Na i'-k jun mero incontra'tz, ba'n klo' lwew wib swutz.
13 Ma na i'tz aẍ, yi junit o' tzawuch', yi kamiw kib tzawuch', yi nternin na ke'l na ko'c tzawuch'.
14 Ncha'tz, junit nxka'k tzawuch' tan c'u'laje'n Ryos le templo.
Mero kamiw kib tzawuch'.
15 Poro na klo' waj yi ẍe'nk chiquim e' incontra'tz.
Na waj yi nink chisotz tircu'n.
Na e' len cu'n juchul il. Jaltnin juchle'n il na chitxum.
16 Ma in wetz copon inwutz tetz inRyosil, nin jun cu'n ẍchinclaxok ta'n.
17 Sk'ejl nin lak'bal copon inwutz tetz.
Nok'ok swutz i'. Nin jun cu'n tz'elepon k'ajab swe'j.
18 Nin kol chimben tan oyintzi', i' tz'ocopon tan incolche'n tan qui inquime'n.
Mpe jun c'oloj cu'nk incontr, quil tak' i' ama'l tan inquime'n.
19 Yi wetz inRyosila'tz, ilenin na tbit intzi' inkul, na itz' i' tetz ben k'ej ben sak.
Stak'e' chicaws yi e' incontr, na yi e' incontra'tz, qui na chitx'ixpuj cyajtza'kl, nin qui na cyek ẍchi' Ryos.
20 Na na cho'c tan chibiyle'n yi mero cyamiw.
Nin qui na chibisun tan paj.
21 Nin yi na chijilon yi e' wunaka'tz, chumbalaj yol na xcon cya'n.
Poro apart chitxumu'n, na yi na xcon e'chk putzpuj yol cya'n, i'tz tan chisuble'n tu' wunak.
Na yi cyetz chitxumu'n, tu chiyol, chin xo'wbil nin.
Na ni'cu'n chiyol tu jun spar yi na kalo'on ta'n.
22 Mas balaj kak'e' cyen tircu'n yi bis o'kl yi na ul skawutz tk'ab Ryos, na list i' tan kaquiwse'n.
Nin quil tak' i' ama'l scyetz yi e' yi na cyek ẍchi' i', tan chicyaje'n cyen junawes tul il.
23 Poro Ta', na el intxum tetz yi e' subul nak, scyuch' yi e' biyol nak.
Quil ben ẍkon mas chitiemp, ma na ẍchimukxok chan cye'tz tcamposant.
Poro yi in wetz, ilenin sk'ukek inc'u'l te'ju'.