59
Yi Kataj i' colol ketz ẍchik'ab kacontr
1 Wajcaw, ilu' inRyosil.
Chin cole'u' ẍchik'ab incontr.
Chin cole'u' ẍchik'ab yi e' yi na chitzan tan xtxumle'n tan inquimse'n.
2 Chin cole'u' ẍchik'ab yi e' mal nak.
Nin chin cole'u' ẍchik'ab yi e' biyol nak.
3 Elk bin k'ajabu' swe'j Ta', na at wi'nin e' yi chin cham nin e', yi na chitzan tan joyle'n puntil tan imbiyle'n.
Wech na qui'c wetz wil.
4 Wajcaw, tzinwutz wetz cya'l cunin na impajwit ca'wlu'.
Nin cya'l na injuchwit wil swutzu'.
Poro yi e' incontr nternin na chitzan tan joyle'n puntil tan wele'n cu'n swutz.
Elk bin k'ajabu' swe'j. Sajku' tan wuch'eye'n.
5 Na yi ilu' teru', ilu' kaRyosil yi cya'l jun na xcye' quen te'j.
Ilu' kaRyosil yi o' xonl Israel.
Che' cawse' binu' yi e' juchul ila'tz.
Qui'k tz'el k'ajabu' scye'j yi ta'k subul naka'tz.
6 Na yi na chu'l tzone'j lak'bal, ni'cu'n na chiban chi na chiban tx'i' tan wojo'n lak'bal.
Nin na baj chisutil te katnumil.
7 Ej nin te yi na cho'jkel, na swokin chitzi' nin nternin na chixcy'aklin.
Ej nin na cyaltz: “Cya'l na bitan kayol,” che'ch.
8 Poro yi ilu' Ta', na tilu', nin na tbitu', cyakil yi mbi na chiban yi e' mal naka'tz.
Nin tze'e'n tu' na banu' scye'j.
9 Nin cho'n k'uklij inc'u'l te'ju', na yi ilu' teru', ilu' inRyosil.
Nin list atitu' tan wuch'eye'n, nin tan incolche'n.
10 Na tan tu' banl talma'u', tz'ulu' tan wuch'eye'n.
Nin ẍchaje'u' swetz, yi ẍe'n cu'n che' tuleju' yi e' incontr yil chilo'on.
11 Qui'k tz'el k'ajabu' scye'j, bantz quilol yi e' intanum, nin quil tz'el te chic'u'l yi mbi sbajok scye'j.
Che' xit cunu' tan yi teru' poreru', bantz cyoque'n juy jak' ca'wlu'.
Na jun cu'n, ilu' yi colol ketz.
12 Na yi e'a'tz, chin juchul il nin e', na qui'c nin ba'n te chijilon.
E' te'n nink chibaj tc'u'l yi chinimel.
Ej nin e' te'nk chibaj tul chiyol yi na cyal sketz.
13 Che'lk cu'n tanu' swutz.
Sajk colpuj wi'u' scye'j.
Che' sotzaj cunu' junawes, bantz tele'n chitxum tetz yi ilu' yi wi'tz Ajcaw, nin ilu' na cawunu' scye'j e' xonl Jacow, nin scye'j cyakil wunak bene'n tzi'n.
14-15 Yi e' wunaka'tz, ni'cu'n e' chi quitane'n tx'i', na na chu'l cwe'n k'ej tnum tan joyle'n chiwa'.
Poro ko qui na noj chic'u'l, tu na cho'jkel tunintz nin na chok' tan we'j.
16 Poro yi in wetz Ta', swak'e' ink'ajsbil teru' cyakil jalchan.
Nin chin inwi' nin sbne' tan xtxole'n yi banl talma'u'.
Na ilu' yi colol wetz. Ej nin list atitu' tan wuch'eye'n yi na ul sotzaj c'u'lal tzinwutz.
17 Cha'stzun te swak'e' ink'ajsbil teru' ilu' Wajcaw, na ntin ilu', atu' tan wuch'eye'n, nin wi'nin na pek'u' swe'j.