CYAJI'N WEKL TE E'CHK SALMO
90
90:1—106:48
Iẍnin at Kataj Ryos
1 Kataj, sajle'nix tunintz cho'n na kacol kib te'ju'.
Nin ite'n nin skabne'a's sbne' opon tunintz.
2 Na te yi ntaxk tzaj jal e'chk ju'wtz, nin yi ntaxk cu' yi wuxtx'otx', nin yi ntaxk bnix yi bajx wunak, ilu' nin Ryos.
Na tul yi tiemp yi icy'nak cyen, nin tul yi tiemp yi xomtzaj, ilu' nin Ryos.
3 Ja bnix yi bajx wunak tanu' tan xk'ol tu'.
Cha'stzun te tlolu': “Tx'otx' tu' cxtzaj pontwok.”
4 Na swutz teru', ni'cu'n jun mil yob, tu yi jun k'ej ewt yi ja wi't icy'.
Nin ni'cu'n jun mil yob swutzu' chi na icy' cobox ntzi' or lak'bal.
5 Ncha'tz ba'n che'l cu'n cyakil wunak tanu' swutz, chi na el cyakil e'chk takle'n tan jun tzanla' yi na elu'l.
Na yi ank'i'n yi ak'ij sketz, jalcunin na icy', chi na el jun wutzicy' te kac'u'l.
6 Na ni'cu'n kutane'n swutzu' chi tane'n jun wi' buch, yi na je' chitpuj yi buchil jalchan, poro yi na cu' k'ej, na saj lokp nin na skej.
7 Cha'stzun te Ta', yil saj colp wi'u' ske'j, ba'n ke'l cu'n tanu' swutz.
8 Na yi ketz kil tu yi kajtza'kl cachi', sak cu'n swutzu'.
9 Yi ketz ka'ank'i'n ba'n tz'el cu'n tanu' swutz yil saj ẍchi'chbe'n c'u'lu' ske'j.
Na yi ketz katiemp, na icy' te'tz, tul jun ntzi' tkuj.
10 Na oxc'al tu lajuj ntzi' yob na ka'tij ketz tzone'j wuxtx'otx'.
Ntin yi e' mas quiw na chijepon te jun mutx' yob.
Poro qui'c ltak' sketz kol tz'el kalma' tan ka'te'n jun c'oloj tiemp tzone'j, na ntin na katx'ayne' tan paj yi q'uixc'uj yi ato' cu'nt.
Yi jujun yob jalcunin na icy'.
Cha'tz cunin tzun kutane'n ketz.
11 Poro cya'l jun jajk tij cyakil yi walor yi ẍchi'che'n c'u'lu'.
Nin cya'l jun yi jajk pujx ta'n yi xo'wbililu'.
12 Ẍchaje'u' sketz yi jun ntzi' tkuj ato' wi cojbilu'.
Sjalok tzun kajtza'kl.
13 Wajcaw, sajku' skaxo'l.
Elk k'ajabu' ske'j na o' ẍchakumu'.
14 Cyakil tir yi na ul skil, tak'u' tzatzin sketz, bantz kak'ol kak'ajsbil teru' te cyakil tiemp yi ak'ij sketz tzone'j wuxtx'otx'.
15 Tak' tzaju' coboxt yob tzatzin sketz tetz xel e'chk yob yi ja katij yi sotzaj c'u'lal.
16 Tak' tzaju' ama'l sketz, nin scyetz e' kanitxa' tan kilol e'chk milawr yi na ẍchaj yi at k'eju', na o' len ẍchakumu'.
17 Tak' tzaju' yi banlu' skibaj.
Nin ko' quiwsaju' sju' yi kak'un, na ilu' kaRyosil.