17
Paul Silas-atherr Thessalonica tawen-warl alheyel
1 Rernem Amphipolis tawen-they Apollonia tawen-angkwarr arntarnpenhek Thessalonica tawen-warl apetyek. Tawen ikwerel Jew-rnem-kenh tyaty arrwekel artelhenh.
2 Arlta Saturday-el Paul tyaty ikwer-warl alhek. Saturday arrpanenhel wik 3-ek-atwety, ra tyaty ikwer-warl alhenh Akngey-kenh angka arrwekeleny anayntiletyek, Jew-rnemek.
3 Ra renh-rnem akalty-anthek Akngeyelarl arrwekel alhelek Jesus renh ahern nhewarl thwenetyek. Jesus rey-antey Akngey-kenh impen, Christ-an. Jesus ra irrwampemel ilwetyek, Ra itethirremel akemirreyenh arrpemarl. Jesus Christ rarl arrwekel ilwek rarl angkep arrpemarl itethirremel akemirrek. Jesus inngantey ipmepenh itethirremel akemirrek Akngey-kenh pip arrwekeleny aynteyel-angkwarr-antey. Akngey-kenh angka alakenh aynteyel, arrwekelenyel Akngey-kenh angka ingkwernek-angkwarr.
4 Jew ingwer-rnemel Akngey-kenh angka tnakek, Paul-atherr Silas-atherr-angkwarr antelhek, artwa Greece-areny iylpareth-rnem Paul-atherr-angkwarr antelhek, arelh atyetyart-rnem-then.
5 Jew-rnem arlkarirrek Paul ikwer-atherrety. Rernem-anem artwa apmwernem akarrilek apmer-areny-rnem arwengkilek. Rernem-anem irrwernek, Jason-kenh apmer-warl alhek Paul Silas-atherr anterrkwetyek.
6 Ratherr Jason-kenh apmer-itwek aney-angenh. Alakenh-anyem rernem Jason renh anterrkwek, Jesus-arl apenteyel irrpety ingwer-rnem-then. Rernem-anem Paul-atherr atnwenhek, artwa ampwernem-warl ayntarrp-ilemel-anem ilek. “Paul-then Silas-then ratherr, apmer arrpanenh-warl apetyek, apmwangkwarr ilpertiletyek. Ikwer-penhan ratherr nhenh-warl-anem apetyek.
7 Jason-el renh-atherr arntarnt-arek. Rernem anwenhantherr ilek, ‘Jesus Atyetyart ilkwa aneyel.’ Alakenh rernem Atyetyart anwekantherrenh Caesar-ek irrpelthirreyel.”
8 Angka awek-penh, ingkerrenh anyentirrek, rernem ahelirrek-anem.
9 Artwa ampwernemel-anem Jason ilek, man ra anthenhey-alpetyek. Ikwer-penhan renh-rnem iletyek-anem tyarlewek.
Paul Silas-atherr Berea tawen-warl alheyel
10 Ingwa ikwerel-antey Jesus-arl apenteyel-rnemel Paul Silas-atherr Berea tawen-warl-anem thwenek. Berea ikwer-itwek ratherr Jew-rnem-kenh tyaty-warl alhek.
11 Jew Thessalonica tawen-areny-rnem arlkarirrenh. Berea-areny-rnem iylpareth-rnem anenh. Rernem inkwerelhek innga Paul-kenh angkek. Arlta arrpanenhel Akngey-kenh pip arrwekeleny reytemilek, rernem aretyek Paul-el apek renh-rnem arraty-angkwarr akalty-anthetyek.
12 Jew akngerrel Jesus renh tnakek, arelh atyetyart Greece-areny Jesus renh tnakek arrpemarl Greece-areny artwernemel-then.
13 Jew Thessalonica-areny akngerrel awek-penh Paul-el tawen Berea-itwek Akngey-kenh angka innga akalty-anthek, rernem Berea-warl-anem alhek. Rernem irrwernek.
14 Alakenh-anyem Jesus-arl apenteyel akngerrel Paul renh anamerl-antey thwenek ament kwaty alay-angkwarr arntarnpenhemel alpetyek ingwer-rnem-kety Silas Timothy-atherr apmer Berea-el-antey anenh.
15 Artwa akngerr ingwer-rnem rernem Paul-atherr-angkwarr ilkwatherr alhek rernem renh Athens tawen-warl artengewek. Rernem alpey-angenh-antey, Paul-el renh-rnem ilek Silas-atherr anamerl ikwer-warl apey-alpetyek.
Paul alheyel Athens tawen-warl
16 Paul Silas ratherr Athens-itwek mpwelhenh ingkart-arrpantey mpwarekarl akngerr, ranem ahelirremel arey-alhek.
17 Alakenh-anyem ra tyaty-itwek Jew akngerr-itwek angkerrenh Greece-areny-rnem-itwek, rernemarl Akngey innga arraty iterl-arenh. Arlta arrpanenhel apmer-areny-rnem-itwek angkerrenh, tawen ampep-itwek.
18 Artwa irrpety ingwer-rneman Epicurus ikwer kwertengerl anenh, artwa irrpety ingwer-rneman Zeno-kenh kwertengerl anenh. Paul-then artwa ingwer-rnem-then rernem angkerrenh, “Artwa arwengk ilenhelan irrtywerremel anwenhantherr ileyel. Ilekek ra anwenhantherr ilem?”
Irrpety ingwer-rneman alakenh angkek, “Ra ingwer-rnem-kenh Akngeyek angkeyel.” Rernem alakenh angkek. Paul-el renh-rnem Jesus-kenh angka akalty-anthek, “Jesus ipmepenh akemirrekarl.”
19 Artwa rernem Paul renh akngek Areopagus Council-warl. Rernem renh ayernek, “Ntwa apek anwenhantherr ilem angka renh ntwarl akngerr akalty-antheyel?”
20 Rernem ilkwerl-alhek, “Angka aleyantarl anwenhantherr awek.” Rernem Paul renh ilek, “Lyertant anwantherr awek angka renh anwekantherr anayntila!”
21 Athens-areny-rnem akngerr arlta arrpanhenhel angkek awelherlenty-akngenh, angka ingweram-ingwer ikwer-penh angkerretyek.
22 Paul akemirrek Areopagus Council ikwer-rnem-warl, rap angkek, “Artwa Athens-areny-rnemay, atha areyel arrantherr altyerr akngerr-akert aneyel.
23 Ayeng tawen-angkwarr alhenhel, athan arek altyerr-arrpantey ingwerek-ingwer arrekantherrenh. Anyent ingwerekant arrantherr ikwer akwerrp-antey aneyel. Akngey inngarrpantey arrantherr apentenh apalel, arrantherr iterremel altyerr renh-arrpantey, iltyelarl mpwarek gold-penh. Akngey innga ikwer-penh atha arrekantherr iletyek.
24 Akngey anyent innga ra alker-then ahern-then arrpmernek, arwerl-rnem-then atnwenth-rnem-then artwernem-then ingkerrenh-antey. Ranem ingkerrenhek Ingkart aneyel. Akngey warl iltyel mpwarekarl-itwel nthakenh aney-angenh.
25 Akngey anyent innga ingwerel renh nthakenh iley-angenh. Rant ingkerrenh itethilem renh-rnem amern-then anthem, ingkerrenh-antey.
26 Artwa anyent-they ingwerek-ingwer arrpmernek, ranem renh-rnem arlperrtyilek. Ra anyentel-anyentel apmer renh-rnem antheynek. Ra ikwer-rnem akalty apmer nthenh-ampenyel rernem aneyel, ilengerarl rernem ywerreyenh.
27 Akngey ingkerrenhek anayntelhilek, rernem ikwer nthwetyek, renh iterl-aretyek. Akngey ra anwekantherr-itwek arrer aneyel.
28 ‘Ra anwenhantherr iteth atnyenem, rlterrkilem, arntarnt-arem.’ Artwa anyentel ilek, ‘Anwantherr alerikw ikwerenh ingkerrenh aneyel!’
29 Anwantherr Akngey-kenh alerikw-rnem aneyel. Nthakenh iterrey-angenh Akngey anwekantherrenh gold-penh thilp-penh mpwarey-angenh, apwert-penh mpwarey-angenh.
30 Awank-akerran alhenh ament-warl-tangkwel, Akngey iterl-arey-angenh. Akngeyel renh-rnem menty atwey-angenh arntarnt-arenh. Aley-anem ra ilkelheyel ingkerrenh ikwer-warl-anem angkepirretyek.
31 Ra kel akalty arlta ikwerel-antey ra ingkerrenh-antey arraty innga akngakeyenh. Ra artwa anyent rlwanek, ingkerrenh-they akngakeyenh. Anwantherr akalty ra arraty innga anem, rarl artwa renh ipmepenh akemelhilekarl.”
32 Rernem awek-penh Akngeyel artwa anyent ipmepenh akemelhilek, ingwer-rnem atherrek, ikwer irrpelthirremel. Ingwer-rnemel Paul renh ilek, “Ingwer-ingeran anwantherr ngkweng awelhetyek arrpemarl.”
33 Paul Areopagus Council-they alpekant-anem.
34 Artwa irrpetyel angka ikwerenh renh tnakek, kel renh ingkern-they apentek, alhek ikwer-angkwarr. Artwa anyent itnan Dionysius Areopagus Council-areny anenh. Arelh anyentel itnan Damaris ingwerel-rnem-then Ingkart renh tnakek-anem.