2
Mwantyaw, ingwer-rnemelan akalty-antheyel apmwangkwarrarl
1 Awank-akerr ingwer-rnem arrkernelhenh, Israel-wenh-rnem akalty-anthaynteyew apmwangkwarr. Aley irrkaty-angkwarrarl ingwer-rnemanap apetyem tyaty arrewantherrenh-warl, apmwa inngangkwarr akalty-antheyew, arrenhantherrenh ilperteleyew Akngey-wenh angkewety. Rernemap irrtywerremelarl arrenhantherrenh ilerl-aneyenh, alakenh angkemel, “Jesus-an anewantherr ilwey-angenh.” Arrangkw, alakenh-weny! Jesus rarl ilwewel arwerl iylpeyl-atherr-itwew, rap renh-rnem itethelew arrpemarl. Rernemanap angkerl-aneyenh arrewantherr-warl, “Anantherran renh apentey-angenharl.” Alakenhanap, Akngeyelan renh-rnem arwapeny ywerrelheleyenh inngarl.
2 Rernemanap arrewantherr-warl-anem itengerreyenh tyaty-itwew. Tyaty-areny ingwer-rneman awelheyenh-anem ikwer-rnem, rernemap apmwa yanh-rnem iwarrerneyenh-anem, mpweny apmwelhelemel irrkaty-angkwarr. Akngey apentey-angenh-rnemelan arem arrenhantherrenh, rernemap tyel-angkem-anem alakenh, “Christian yanh-rneman apmwarl. Akngey-wenh angka inngeweny arrpemarl.”
3 Irrtywalth yanh-rnem ankety inngey manew. Rernemanap angka mwerr-arrpantey arrewantherr ilerl-aneyenh. Alakenh-anyem rernem man arrewantherr-wety anyelkel-inem. Akngeyelanap renh-rnem arenh arleng-alenty intem mpwelhemel, renh-rnem irrwampenh-antheyenh-anem.
4 Anantherr aleyan iterl-areyel, Akngeyelan alakenhey mpwareyenh. Antyerl-rnemew iterrenh-arey. Irrkaty-angkwarr arrpemarl awank-akerran ra antyerl yanh-rnem irrwampenh-anthew, rernemarl ikwer-wety intwemelerrew, apmwangkwarr-anem rernem anenh. Rap renh-rnem iwew irrka atemwengk-warl kwen inngey. Renh-rnem atnyenerl-aneyenh irrka ikwer-itwel tyaylel-apeny intemey arleng-alenty arlta yanhew-atety, rarl court-emelerl-aneyenh-anem renh-rnem ingkerrenh.
5 Iterrenh-arey artwa Noah wethew, awank-akerrarl anenhew. Akngerran ahern nhenhel apmwangkwarr inngey anenh. Noah ran arrkernelhenh, renh-rnem akalty-antheyew, arraty-angkwarr anaynteyew. Rerneman awelhey-angenharl anenh, arrangkw. Alakenh-wetyap Akngeyel kwaty atnyerr ilkwa thwenew, renh-rnem altheneyew ingkerrenh-antey. Ranap Noah iteth atnyenew, anewikw ikwerenh, alerikw-rnem irrpety, ikwer-rnem-wenh anewikw-rnem irrpety-akert arrpemarl. Akngeyel iteth atnyenew 8-ant atnyerr-wety.
6 Iterrenh-arey tawen weth-atherrew-anem itnanap Sodom-then Gomorrah-then, awank-akerrarl rtnenh. Akngerr tawen atherr-areny-rnem rernem apmwa inngey anenh. Alakenh-wety Akngeyel ra tawen yanh-atherr intem-antey ywerrelhelemel atwew. Ya, rap ampernew rwel alker-they, irrarlkemel ingkerrenh. Rap aley apmwernem alakenh arrwekel-antey ileyel, aleyarl ahern nhenh-itwew aneyel-rnem. Rerneman ilkelheyel, apmwangkwarr alakenh anaynteyew, rernemanap iterreyew mwanty Akngeyew, ra renh-rnem ywerrelhelemel atwewerr irrkaty-angkwarr.
7-8 Arrantherranap iterl-areyel angka artwa Lot-akert. Ranap anenh apmer Sodom-itwew awank-akerr. Artwa mwerrarlap ran Akngeyewant anenh. Arlta arrpanenhel ra ingwer yanh-rneman arenh apmer ikwer-itwew, apmwangkwarrarl mpweny rernem anenh. Ran alpwely inngey anenh, ikwer-rnem artewenty iterremel. Lot-tangkwel Akngeyel ilew, ra anterreyew itethew, apmer yanh ywerrelhelemel atwey-akenh.
9 Ya, Akngeyelan akalty-antheyel anenhantherrenh angka awankeny yanh-rnem-angkwarr. Akngey-wenh-rneman awelheyel ikwerant, intem rernem aneyel ikwerenh-angkwarr. Ranap renh-rnem intem arntarnt-areyel, ingwer-rnemelarl aha mpwareyel-angkwarran. Irrwerney-angker-rnem ra kelarl irrwampenh-antheyel. Rap alakenh aleth mpwarayntem arlta ikwerew-atety, rarl court-emelerl-aneyenh anenhantherrenh ingkerrenh aleth.
10 Ingwer-rneman arwa alhewer aneyel apmwangkwarr-then, Akngey-wety arlkarerremel. Rernem atyetyart ikwer-rnem-wenhew-then awelhey-angenh, irrtywerremel ilemel. Rernemap ikwer-rnem-wenh-angkwarrant iterreyel, irrngerney-anthelhemel, manew anketyerremel, ngkwarl antywemel, mpweny alherlewemel.
Rernemap artewentyel nakelhemel aneyel. Rernem apmwa tyel-angkeyel antyerl-rnemew, arrkent atherrelhelemel renh-rnem, nyerrerrey-angenhel.
11 Antyerl-rneman rlterrk inngey angka apmwakert-rnem-angkwarran. Rernemanap nthakenh apmwangkwarr angkey-angenharl inweng ingwer-rnemewan, Akngeyelarl aweyel-wety. Akngey rant anyentelant renh-rnem court-emeley-angker. Inngarlap ran.
12 Apmwa akalty-anthey-angker-rnem rerneman akwerrp, Akngeyew tyel-angkey-angker-rnemarl. Rernemap pwelek-apeny yep-yep-then-apeny aneyel, nthakenh arraty iterrey-angenh, nthakenh arraty angkey-angenh. Yep-yep pwelek-then renh-rnem arwa atnyenem, anantherraw renh-rnem antwerrkemel atweyew, aker-anem arlkwemel. Alakenh-angkwarr Akngeyelan angka apmwakert-rneman ywerrelhelem.
13 Ranap artewentyel inngey renh-rnem irrwamperl-anthem, rernemarl apmwangkwarr aneyel ingwer-rnemew.
Rerneman angkeyel, “Mwerraw. Anantherran alhewer itwernew anerl-ayntem apmwangkwarr. Anantherr ilkelhentyan, anantherrap terangkerremarl.” Rernemap itengerremel anem arrewantherr, amern arlkwemel aker-then, alakenh-anyeman rernem nyerrel-anthemarl. Aley rernem aneyel arrewantherr-itwel, rernemarl atherreyel arrkent-then ilek-ilek apmwangkwarrew, mwerr-arrpantey. Rerneman nyerrerrey-angenh, rernemap arrenhantherrenh nyerrel-antheyel, tyaty arrewantherrenh alakenh apmwelemel.
14 Rerneman aleth iterreyel, ilek-ilek anketyel inaynteyew. Rernemanap aleth iterreyel, ayntaynteyew ingwer-rnem-wenh anewikw-akert apmwangkwarr, anewarterrem-apeny. Aletharlap rernem irrwerneyel ingwer-rnemew. Ingwer-rneman arrantherr Christian anem angath-antey. Christian rlengkeny-rnem rernem intwemerlerrem apek Akngey-wety. Akalty-angkey-angker apmwa yanh-rnemelan apmwangkwarr atnwenhem Christian rlengkeny-rnem, apmwa ilek-ilek mpwaraynteyew. Akngeyelanap renh-rnem irrwampenh-antheyenh innganemarl.
15 Rernemanap ipmelhew Akngey-wenh arraty-angkwarr-wety, apentey-angenh-anem, apmwangkwarrant-anem apenteyel. Rernem apenteyel Balaam-wenh-angkwarr-anem. Arrantherr iterl-areyel apek angka Balaam-akert, Beor-wenh alerikw ikwerenh? Ranap artwa angkakert Akngey-wenharl anenh awank-akerr. Manewantarlap ra arwengkerrenh aleth. Ra apmwa ilek-ilek angwenhelenh, manaw ikwer ra inaynteyew.
16 Tangkey ikwerenhel iltew renh, artwapenyarlap angkewan ikwer. Ranap Akngeyarl angkenh tangkey ikwer-angkwarr, ilemel Balaam ipmelheyew apmwangkwarr-wety, manew anketyerrey-angenh. Apmwangkarr akalty-anthey-angker weth-rnem rernemanap Balaam-apeny. Rernemanap apmwa innganemarl.
17 Ingwer-rnemanap arrangkwarl akaltyerrey-angenh ikwer-rnem-angkwarr. Ngenty artwerrety aletharl ayntem-apeny kwaty-weny arrangkw. Nthakenh kwaty ikwer-itwew inpey-angenh. Kwenpay arlter yanh-apeny kwaty nthakenh rntwey-angenh, arrangkw. Rwarrelanap arwa renh akngemarl. Alakenh-anyem apmwangkwarrarl akalty-antheyel-rnem apmwa arrpemarl. Akngeyelan apmer apmwa ikwer-rnem alalewew arrwekel. Apmer yanhan atemwengk-then apmwethen, rap renh-rnem atnyen-ayntem yanh-itwew intem-antey.
18 Ingwer-rneman rlengkeny-rnem Christian irrem tyaty-itwew. Rerneman ipmelhem-anemarl apmwangkwarr-wety, rernemap Jesus arwa angath-anteyarl apentem. Apmwangkarr akalty-anthey-angker weth-rnemel renh-rnem irrtywerl-ampernem, alakenhap rernem angkeman, “Ampwal ilek-ilekew apek arrantherr ilkelheyel, arrantherranap irrngerney-anthelheyew, kel mwerrarl.” Apmwarlap ampwal yanh-rneman.
19 Rernemap angka ingwer-anem ilem: “Arrantherr mwerr-anemarl. Alhewer arrantherr iterrey, kel mwerr-angkwarr kel apmwangkwarr aneyew, atherr-angkwarr.” Mentyaw! Alakenh arraty-wenyarl! Akalty-anthey-angker yanh-rneman mwerr-wenyarl. Rernem aley nthakenh iterrey-angenh-anem, mwerr-angkwarr alhaynteyew, arrangkw-anemarl. Inweng apmwa Satan ran atyetyart ilkwanemarl ikwer-rnem, aleyan. Tyaylelarl aneyel-apeny, nthakenh tyerrelhey-angenh. Irrkaty-angkwarr-antey nthakenh mwerr-angkwarr aney-angenh-anem.
20 Awankan irrtywalth yanh-rnemelan Jesus iterl-arenh. Ranap impen anyent itetheley-angker. Jesus ran renh-rnem rlterrkelew apmwa ahern nhenh-areny-rnem-wety. Aleyanap rernem intwemelerreyel ikwer-wety, apmwangkwarr arrpemarl alheyel. Apmwangkwarr yanhan rlterrk inngey, tyeynel arertnenty-apeny. Rernem apmwa anenh arrwekel, aleyan apmwa innganemarl aneyel. Nthakenh Jesus-el arntarnt-arey-angenh-anem.
21 Arwa angkeyel-anem. Irrtywalth-rnem apek arrwekel apal anenh, Akngey iterl-arey-angenh. Kel mwerrarl. Akngeyelan renh-rnem alyepelant irrwampenh-antheyenh. Alakenh-wenyarlap ran. Kel inngarlap rernem Akngey iterl-arenh, rernemap intwemelerrew ikwer-wety. Aleyanap renh-rnem Akngeyel irrwampenh-antheyenh artewentyel.
22 Akngey-wenh pwekelan alakenh aynteyel:
“Arengk arntetyerrem, rap rlkwetherrem.
Rap angkeparl apey-alpem arlkweyew-anem.
Alakenh-anyem arrpemarl ra aynteyelan:
“Ingwerentyel pikepik lhewem,
rap angkep aternngelhelem atnthewarl aylpemel.”
Apmwangkarr akalty-anthey-angker-rnem rernem arengk-apeny pikepik-then-apeny. Akngeyelan renh-rnem irrarlkew apmwewety, rernemanap ingkernarl angkep arrpemarl alpew, apmwangkwarr arrpemarl.