14
Akngey-wenh yep-yep 144,000
ikwerenh-rnem-then
1 Ikwer-penhan atha arew ingwer-angkwarr-anem altyerr-itwew. Akngey-wenh yep-yep akelyan rtnenh apwert ilkwa irrwerl-itwew. Apwertan itna Zion. Akngerr innga rtnenherrenh yep-yep ikwer-itwel, 144,000. Rlwitwew ingwerentyelan ingkwernew yep-yep-wenh itna Akngey ikwerenh-wenh itnethen.
2 Athap ingwerenty angkerl-anenty-anem awew irrwerl-they. Atayel inngarlap ra angkewan, kwaty atnyerr-apeny, awely-awely ilkwapeny apek. Ayengan iterrew, “Mwerr-angker! Akngerr arrkenterrenty-apeny ampwal ketay-apeny!”
3 144,000 weth-rnem ingkerrenh rtnenherrenh Akngey-wenh chair mwerr-angker atyetyart-wenh arrwekel-ampeny-itwew, atnwenth iteth weth-rnem 4-then ampwa alkenh 24 weth-rnem-akerr. 144,000 rernem aylelherrew arreyn ngwampeny ingwer-lkwer. Nthakenh ingwerentyak arreynew akaltyerrey-angenh. Rernemant iterl-arenh arreyn renh. Akngeyel renh-rnem ingwer-rnem-then ayerrpelew, ahern-they angkep akngey-alpeyew. Ra renh-rnem payemelew arrnga Jesus-wenhel.
4-5 144,000 rerneman ingwer-itwew ayntey-angenh anewarterrem-apeny. Rernemap irrtywerrey-angenh, apmwel-ayeth aney-angenh, arrangkw. Nthakenh ingwerentyakel renh-rnem ayntarrpeley-angenh. Rernemap yep-yep akely renh apentenh ingweram-angkwarr. Akngeyel renh-rnem akngakew ahern-areny-rnem-they. Rap payemelemel ayerrpelew ikwer-atherr, Akngeyew yep-yep akelyew-then, rernemap mwerr-angkerarl ikwer-atherr-wenh, intem-antey.
Antyerl-rnem irrpety
6 Ikwer-penh atha arew antyerl ingwer-anem alkerelerrenharl. Ra angka mwerr-angker ilerl-apenh, angka rarl arraty innga intem-antey aneyel. Rap ahern-areny-rnemew ilerl-apenh, akngerr apmer arrpanenh-arenyew; angka ingwerek-ingwer angkeyel-rnemew, irrpwerlew-then arlterew-then arrkayew-then.
7 Rap atayel innga angkenh, “Akngey nakenh-arey arrantherr, kwenerremel, mwanty-antey awelhemel mwerr antwemel! Rlengkan ra apetyeyel, ingkerr rnkerneyew ayernemel. Renh nakenh-arey! Rant anyentel ilek-ilek mpwarew; alker, ahern, alay, kwaty alapeltharr-then!”
8 Antyerl namp 2-anem atha arew alkerelerrenharl. Rap angkerl-apenh, “Awelhenh-arey! Tawen Babylon-areny-rneman apmwa innga, rernemap ingkerr apmer arrpanenh-areny-rnem ilenh, 'Mwerr arrantherr apmwangkwarr mpweny aynteyew ingwer-rnem-then.' Aleyan rernem arrangkw-anem ywerrelhelew. Ilek-ilek aytnew, apmer ra arlpaw-anem aynteyelpew. Tawen ilkwa weth Babylon arrangkw-anem!”
9-10 Ikwer-penhan atha antyerl namp 3-anem arew alkerelerrenharl. Atayel ra angkerl-apenh, “Pwertay! Akngeyan aley ahelerreyel-anem weth-rnemew, kwenerreyelarlew arraylenty wethew, arwerl wethew-then rapenyew-then. Akngey ran ahelerreyel ikwer-rnem, rernemarl anthelhew, rlwa amperneyew, itep apek. Ya, ra ahelerreyenh inngarl ikwer-rnem, renh-rnem iwemel rwewarl kwert ikwakeng-warl. Rernemap pwarrkerreyenh artnemel artewenty. Antyerl Akngey-wenh-rnemel yep-yep akelyel-then rernem aytareyenh, rernemarl pwarrk artneyenh.
11 Kwertan rwa ikwer-they intemarl arlwar anaynteyenh. Arltel ingwel-then rernem intem-antey artnayntem pwarrk. Nthakenh ltyerrey-angenh, ankwayntey-angenh, arrangkw. Alakenhaym aynteyenh ikwer-rnem, rernemarl kwenerrenh arraylenty ikwer arwerl wethew-then rapenyew-then, rernemarl anthelhew, renh-rnem itna ikwerenh-akert amperneyew.”
12 Alakenh-wety Akngey-wenh-rneman ipmelhey-angenh anaynteyew, rernemarl ikwer awelh-ayntem, Jesus renh intem apent-ayntemel.
13 Ingwerenty-anem atha awew, irrwerl-they angkerl-anenty, “Alakenh ingkwerna pip-warl! ‘Ingwer-rnem Jesus-arl apentenh-rnem, rernem iteth-tangkwel anenh ahern-itwew, rernemap ilwew-anem. Aleyanap rernem iteth aneyel inkwerelhemel!’ ”
Inweng Akngey-wenhel ran awew, rap tyernew, “Ya innga! Akngeyel iterl-areyel, rernem artewenty ikwer warrkerrenh. Rernem ltyerremel ikwer-itwel aney-alpeyenh intem-antey.”
Akngeyel ingkerrenh-antey
rnkernemel ayerneyel
14 Ikwer-they atha irrwerl itnywenew. Athap anyent ingweran arew, Artwa Inngarl Akngey-wenh-apeny-anem, anenharl kwenpay arlter-itwew. Akapwert-itwewan ampwal mwekart-apeny atyetyart-wenh gold-penh. Itepelan ra nayp arlpenty amper-amper antwerrkew, arreylp innga.
15 Antyerl ingwer-anem tyerrelhenhey-alhew Akngey-wenh tyaty ilkwethey irrwerl. Rap atayel arlkew, wetharl anenhew kwenpayel, “Nayp ngkwenh ina! Amern weytan ampeng-anem ahern-itwew. Alheyew akemel ingkerr akarrelemel.”
16 Rap amern akew, antyerlel ilew-angkwarrarl. Nayp ikwerenhel ra anamerl-antey akew, akarrelew amern weyt-rnem. Amern weyt picture talk-arlap ran, akngerr-apeny.
17 Antyerl ingwer-anem tyerrelhenhey-alhew Akngey-wenh tyaty ilkwethey. Rap antwerrkew nayp arreylp arlpenty amper-amper arrpemarl.
18 Atha antyerl ingwer-anemarl arew, rwarl arntarnt-arenh, apwert ilperr-ilperr-itwewarl ampenh. Apwert ikwer-they ra anperl-alhew, atayel arlkenhew antyerl nayp-akertew, “Nayp ngkwenh ina! Amern grapes-an ampeng-anem ahern-itwew. Alheyew akemel ingkerr akarrelemel.”
19 Rap alhew akeyew, antyerlel ilew-angkwarrarl. Nayp ikwerenhel ra anamerl-antey akew, akarrelew amern grapes-rnem. Rap iwew irrka ilkwewarl, ingketyel-anem lthwaynteyew.
Grapes picture talk-arlap ran. Ran akngerr-apeny, weth Akngeyew awelhey-angenh-rnem-apeny. Ran ahelerreyel innganem ikwer-rnem.
20 Irrka ra Jerusalem arrer-apeny. Rernem grapes lthwenh ikwer-itwew. Grapes-penh akarr thelheley-angenharl, arrangkw. Arrngarl raw! Arrnga ran ankalhenh ilpay intwer-itwew-apeny, nantew-wenh akapwertew-atety. Rap ankalhenh arleng-alenty, 300 kilometre-ew-atety.