16
Antyerl-rnem 7-el apmwa
antheyneyel anyentel-anyentel
1 Ikwer-theyan atha awew, ingwerenty arlkenharl atayel innga tyaty ilkwitwew. Rap angkew antyerl 7 weth-rnemew, “Alhenh-arey arrantherr! Irrkwa 7 akngenh-arey wayn-apeny-akert. Thelenh-arey-anem ahern-warl! Alakenhan akngerr ahern-areny-rnemel iterl-arem, ayengarl ahelerrem innganem ikwer-rnem!”
2 Antyerl namp 1-tangkwel alhew, theleyew irrkwa ikwerenh-they ahern-warl. Anamerl-antey akngerr-anem arntetyerreyelpew, tywen apmwa akngerr-akert pwarrkerremel. Rerneman akngerr weth-rnem namp arraylenty weth-wenh-akert. Kwerrman rernem atnyenew arlkitwew namp-akert. Rernemap kwenerrem ampwal rapeny-warl apwert-penh-warl.
3 Antyerl namp 2-anemarl alhew, theleyew irrkwa ikwerenh-they kwaty alay-warl. Anamerl-antey alay arrnganem irreyelpew, rap ikwakeng inngarl intenharl, arrnga ra ipmewenh. Ilek-ilek kwaty alayel anenharl ilwernerrew.
4 Antyerl namp 3-anemarl alhew, theleyew irrkwa ikwerenh-they ilpay-rnem-warl ngenty-rnem-warl-then. Anamerl-antey kwaty arrnganem irreyelpew.
5 Antyerl ingweran angkew-anem. Ran kwaty ingkerrenh ahern-itwew arntarnt-arey-angker anenh. Atha renh awew, Akngeyew alakenh angkenty,
“Akngeyay, ngan arrwekeleny anenh, ahern nhenharl arnwarney-angenhel-antey.
Iteth nga aneyel, iteth nga anayntem intem-antey.
Ntwa anyentel mwerr-angker mpwarem, arraty ingkerrew mpwarem.
Apmwernemewan nga awakelhew.
6 Apmwa weth-rnemelan Akngey-wenh-rnem atwew ipmew artwa angkakert ikwerenh-rnem-then arrngew-antey.
Alakenhan ntwa renh-rnem arrnganem anthew, rernem antyweyew.
Arraty-angkwarr ntwarl alakenh mpwarew!”
7 Athan ingwerenty-anem awew arlkewarl. Ra rtnenh apwert ilperr-ilperr-itwew, kwert mwerr-angkerarl arlwar anem-itwew. Apwert ra ayntenh arrwekel-ampeny chair mwerr-angker Akngey-wenh-itwew.
“Ya, Ingkart Akngey! Ngan Atyetyart Ilkwa Ingkerrenhew!
Ntwa apmwerneman atwem!
Alakenh-anyem ntwa apmelerr mwerr-angkwarr mpwarem,
intem-antey arraty-angkwarr iterremel!”
8 Antyerl namp 4-anemarl alhew, theleyew irrkwa ikwerenh-they itwern-warl. Anamerl-antey itwern rwenp innganem irreyelpew. Akngeyel ilew, ingkerrenh amperneyew, renh-rnemap ipmew atwey-angenh.
9 Rerneman ahelerrew innga, rwitwew ampemel. Rernemap Akngey apmwarl antwenh arrarletyel iltemel, rarl ilek-ilek apmwa tyarlewenh. Rernemanap angkeperrey-angenh ikwer-warl, renh mwerr antwey-angenh, renh nakey-angenh, arrangkw.
10 Antyerl namp 5-anemarl alhew, theleyew irrkwa ikwerenh-they chair arraylenty weth-wenh-warl. Chair ikwer-itwew arraylenty ra anem atyetyart ilkwa akngerrew. Apmeranap ikwerenh atemwengk-anem irreyelpew. Akngerran ikwerenh-rnem pwarrkerrenh artewentyel. Aleny rernem akwarlkelhenh pwarrk.
11 Rernem ahelerremel Akngeyan apmwa antwenh-antey, tywen-rnemarl pwarrkerrenh-antey. Rernemap angkeperrey-angenh-antey ikwer-warl-athek, apmwarl mpwarenh-penh, arrangkw.
12 Antyerl namp 6-anemarl alhew, theleyew irrkwa ikwerenh-they ilpay ilkwewarl itna Euphrates. Anamerl-antey kwaty ankalhey-angenh irreyelpew, arlwereng-anem artwerrety irreyelpew. Akngeyelan alakenh mpwarew, artwa atyetyart ilkwernemaw ahern artwerrety-angkwarran alheyew artwa army-areny-rnem-akert ikwer-angkwarr akngerrakw-they.
13 Atha inweng apmwernem irrpety-anem arew, perak-rnem-apeny rerneman. Ingweran tyerrelhew rtnwem weth-wenh arrakert-they, ingweran arraylenty weth-wenh arrakert-they, ingweran artwa angkakert-wenh arrakert-theyarl, wetharl irrtywerremel ilenh.
14 Inweng apmwernemel ilek-ilek mpwarenh arawerrng rlterrk-akertel. Rernemap alhew apmer arrpanenh-warl ahern-itwew, atyetyart-rnem arlweleyew, rernemaw atwerreyew Akngey-then. Akngey ranap renh-rnem antengeleyenh ingkerr.
15 Jesus rantey angkew-anem, “Awelhenh-arey arrantherr! Ayengan apetyeyenh anyelkelan, artwa irrtyert-awarr-apeny kwenyel! Ingwerenty apek atyek mpwelhem, arntarnt-arelhemel atyeng, rap inkwerelhem. Ra arnkwakert-apenyan mpwelhem, nyerrerrey-angenhel. Ingwerentyanap arnkweweny-apenyarl anerl-aneyenh, ingwer-rnemel renh-rnem arerl-aneyenh.”
16 Ikwer-penhan inweng apmwerneman irrpety perak-apeny rernem arlkew atyetyart-rnemew army-areny-rnemew-then. Rernem renh-rnem ilanthew, akarr-akarrerreyew apmer anyent-itwew. Angka Hebrew-el apmer itna Armageddon.
17 Antyerl namp 7-anemarl alhew, theleyew irrkwa ikwerenh-they alker-warl. Anamerl-antey ingwerentyan atayel arlkew Akngey-wenh chair ilkwa mwerr-angker-they tyaty ilkwitwew alakenh, “Kel-antey! Ipmelhew-anem!”
18 Awely-awely-anem arrkew, atayel angkemel. Ahern arrewew artewenty innga, iltewelhew-anem. Ranap aleyant arrewew alakenh, ingwerentyelarl alakenh arey-angenh-antey.
19 Tawen ilkwa Babylon atakelhew, apwert-rneman arlperrty ayntew. Tawen-rnem irrpety-anem ikwer-itwew aynteyelpew. Tawen ingwer-rnem-then apmer arrpanenh-itwew rerneman atakelhew arrpemarl. Akngeyel iterl-arew, akngerr apmer ikwer-areny-rneman apmwangkwarr anenh, rap ahelerrew artewenty innga ikwer-rnem, renh-rnem ilwerl-athenew ipmew.
20 Ahernan arrewenharl, akwerlp akely-rnem ampep-itwew alay-itwew rernem ingkerrenh aylperl-alhew-anem kwaty-warl ywerremel. Apwert ingkerr ywerrerl-alhew.
21 Aperrkwer-rnem-anem aytnew alker irrwerl-they, awerr innga ayen-apeny. Ingkerrenhel atwew artwethen arelh-then, pwarrk ilkwa anthemel. Rernem ywarn iterrew, nthakenh irrem. Akngeyan rernem apmwa antwenh-antey, rarl renh-rnem alakenh atwew.