9
Antyerl nampa 5-el terampet angkelh-angkelheleyel
1 Antyerl ingwerel-anem terampet ikwerenh angkelh-angkelhelew. Antyarr atha arew, alker-they aytnenty ahern-warl. Rap artwapeny rtnew irrka intwer-ampenyel. [Irrka ikwer-itwewan Akngeyel inweng apmwernem akentem. Ingwer-ingweran ra renh-rnem iweyenh rwa ilkwewarl, aletharl ampeyel-warl.] Ampwal ilperr-ilperrel arriwan artew door-el-apeny. Ingwerentyel key anthew antyarr renh, door altywereleyew.
2 Rarl altywerelewel, kwert ilkwa arlwar anew irrka ikwer-they, rwa ilkwethey-apeny. Kwertel ingkeny artew-anem. Alker atemwengk irreyelpew, nthakenh arey-angenh-anem.
3 Intelty akngerr tyerrelhew kwert ikwer-they, ahern-warl-anem atwarrerrew. Ingwerentyel renh-rnem rlterrkelew, akngerr atantheyew, atneth-akertel-apeny.
4 Antyerl angkew ikwer-rnem, “Atherrk arlkwey-angenh, arwerl arlkwey-angenh, alperr-akerr arlkwey-angenh! Menty aney! Menty aney Akngey-wenh-rneman, rlwewarlarl ingkwernew-rneman! Ingwer-rnemant atanthenh-arey!
5 Nthakenh arrantherr renh-rnem atanthey-angenh ipmew, arrangkw. Arwa pwarrk anthem alkent-rnem 5-ew-atety.” Apmwanem rernem awelhem, atneth-akertel atanthenty-penh.
6 Ikwereng-arey rernem iterrem alakenh, “Pwarrkerreyel anantherr! Ilweyew-anem anantherr!” Arrangkwaw! Ilwey-angenh-antey. Rernem anerl-aneyenh, kwarnelherl-aneyenhant pwarrk inngey.
7 Intelty-rneman rtnenherrenh nantew-rnem-apeny. Rernem mpwelhenh, alheyew akngerrarl atwerrenh-warl. Ampwal mwekart-apeny atyetyart-wenh gold-penh-akert akapwert-itwew. Inngerran artwapeny.
8 Alta arlpenty arelh-apeny. Arntekan arreylp lion-apeny.
9 Arneltyan arlkwertel ayen-penhel artelhew irrtyart-wety. Intelty-rnemarl alkerelerrew, aympelh-rnem arwerlk angkew, nantew pakey-akert akngerr-apeny, atwerrenty-warlarl anterrenty, akngerrarl atwerreyel-warl anterrenty.
10 Rernemap atanthenh kantyel, atneth-akertel-apeny. Alakenh rernem akngerr pwarrk anthew alkent 5-ew-atety.
11 Antyerl anyent atyetyart ikwer-rnem intelty-rnemew anenh, rap irrka intwer kwert-akertew-artey anenh. Angka Hebrew-they renh itnewem Abaddon, angka Greek-theyan itnewem Apollyon-arl. Itna yanh-atherrel ileyel, Altheney-angker Ingkerr.
12 Alakenh apmwa arrwekelenyan ayntem. Alerl-antey apmwa ingwer-atherr aynteyenh.
Antyerl namp 6-el terampet angkelh-angkelheleyel
13 Antyerl ingwerel-anem terampet ikwerenh angkelh-angkelhelew. Anamerl-antey ingwerenty atha awew angkenharl. Ran apwert ilperr-ilperr ikwer-they angkenh, Akngey-itwelarl arrwekel ayntenh. Apwert renhan gold-el artew, rap rewely 4 atnyenew. Rewely ikwer-rnem-they apek ra angkenh.
14 Rap angkew antyerl terampet-akert ikwer, “Ilpay yanh-itwew Euphrates-itwew antyerl 4 aneyel, arertnewarl. Renh-rnem tyarlewanem!”
15 Antyerl 4 rernem mpwelhenh arlta ikwerew, Akngeyelantarl iterl-areyelew. Ra renh-rnem artwerelenh-tangkwel, rap renh-rnem alakenh ilenh, “Arnwarnelhenh-arey!” Arlta ikwerel, renh-rnemarl tyarlewewel, rernemap alhew, akngerr atweyew ipmew.
16-17 Athap altyerr-angkwarr-anem arew, artwa army-areny-rnem nantew-akert alhenh, akngerr innga. Nampan atha awew; 200,000,000-arlap ran. Artwa army-areny-rnemel atnyenew alkwert-rnem ayen-penh, arnelty artelheyew. Alkwert rernem rnter-rnter, blue one, yellow one. Nantew-rneman akapwert lion-apenyarl. Lherrm arrakert-they rlwemertnew, ikwakeng itntenh kwert yellow one.
18-19 Kanty rtnwem ahelengkw-rnem-apeny, tnhwaynteyew akngerr ipmew. Rtwem-rnemel rernem ingwer-rnem tnhwew ipmew. Nantew-rneman alhew apmer arrpanenh-warl, atweyew akngerr ipmew lherrmel kwertel-then.
20 Ingwer-rnemanap ilwey-angenharl, arrangkw-antey. Rernemap Akngey-warl angkeperrey-angenh, weth-rnem iteth-anteyarl anew-rneman, arrangkw. Rernem angkenh-antey inweng apmwernemew. Ya, rernemap kwenerrenh-antey ampwal apmwernemew, rernemarl mpwarewew gold-penhew, thilp-penhew, bronze-penhew, apwert-penhew, arwerl-penhew. Ampwal apmwernemel nthakenh arey-angenh, nthakenh awey-angenh, nthakenh alhey-angenh, arrangkw.
21 Rerneman apmwel-ayeth-antey anenh; ipmew ingwer-rnem atwenh, ingwer-rnem aylenh arntetyerreyew, mpwenyel alherlewenh, irrtyert-inenh ilek-ilek. Rernemap nyerrerrey-angenh, amperrngerremel angkey-angenh ingwer-rnemew, angkeperrey-angenh Akngey-warl-athek, arrangkw.